舉個例子，10蚊成本買入某隻股票，股息率10厘，每年派1蚊息。
五年後你朋友就同你講，依家隻股票值10蚊，但係佢買入成本係5蚊，回報率係100%。
你會以為佢係用5蚊買入10蚊嘅股票，升值一倍。實際上佢係付出10蚊成本，收返5蚊返嚟，總共得到係15蚊，實際回報率最多只有50%。
同一個例子，再過多四年收多4蚊股息，佢個10蚊成本價就扣走9蚊，佢可以聲稱啲股票係用1蚊買返嚟，依家值10蚊。
你又會以為佢係用1蚊買入10蚊嘅股票，見到股神嘅背影。咁係咪代表錢10x咗？身家多個零？實際上，佢係付出10蚊成本，收返9蚊返嚟，總共所得係19蚊，實際回報率最多只有90%。一定唔係900%。
去到第十年，個朋友又同你講，佢啲貨係free貨，聽唔少呢啲垃圾啦。咁即係點呀？行街執到股票呀？實際上，佢係付出10蚊成本，收返10蚊返嚟，總共所得係20蚊，實際回報率最多只有100%。
結論：投資最緊要誠實面對自己。買入嘅嗰一刻，價格同數量應該要固定，呢個就係你既capital，用佢去衡量之後嘅任何回率。如果capital可以隨便改動，咁呢啲就係creative accounting，用嚟呃其他人搵著數係可以，如果連自己都呃埋，咁就屬於阿Q精神勝利法。
