【召集各位有興趣整GAME嘅朋友】無論你識唔識coding／畫畫／音樂，我哋一齊搞個連登嘅Game Jam

.

今屆Game Jam Topic為:

今次主題攪珠係「Divergence 」，唔翻譯做中文就係想留番一啲演繹空間比大家。祝大家創作順利，好好享受呢次活動👍

暫時已經有四組勁旅，密鑼緊鼓創作中

今日先見到呢個post/未組隊/未報名嘅朋友們唔使怕，直到交作品嘅截止時間前（八月三日23：59）都歡迎你哋隨時中途組隊/參加。
Discord Link: https://discord.com/invite/5H9vBhzR

純粹想玩遊戲嘅朋友都請密切留意，一星期後我哋就會有作品誕生

推

自學緊unity留名大開眼界

入理嚟一齊玩

自問未夠料jam到野

完全講中晒香港人個套諗法

師兄想問下如果想揾人整隻網頁驚lf2咁上下玩法個成本要幾多左右？唔該你

等玩遊戲

每日一推
參加者每日增加中,一齊入嚟傾吓計,造遊戲

我唔撐你 不過撐你

多謝你嘅鼓勵 好有力量

建議唔好響連登搵人報價，如果你認真想搵人幫手嘅，可以上LinkedIn搵吓有冇人肯connect然後message對方

呢行做得耐，你就會見好多「喂，我有條好橋想搵人整隻game出嚟」嘅人。呢d九成係睇咗唔知乜，突然想問吓價錢睇吓係咪值得做，但99%都唔會真係肯丟舊錢出嚟。所以，建議如果你真係有心想搵人合作，又或者想真係俾個Project出嚟搵人報價嘅話，先做一做功課，起碼自己落手寫份Design Document出嚟，寫低你究竟想整乜。你唔洗開曬成條橋俾人（十個有九個驚俾人偷橋，最後一個WFC冇所謂），但最少報價俾你嘅人需要知道你隻遊戲玩乜，有乜主要功能，做邊個平台，起碼要預測得到規模有幾大，有乜要搞，咁先可以報價俾你。（果d「我好擔心講咗少少，人哋就已經會偷我條絕世好橋，發曬達建立一個比EA更大嘅遊戲王國」嘅朋友，建議你都係縮番埋地底自己一個人整啦，地面太危險。衷心祝你有日完成隻隻遊戲有錢過李嘉誠）

欠欠

咁我想問下 整個webgame成本會唔會好高，錢我ready左，亦都有揾過人報價，我同條友講似lf2 7成得啦 ui 可以任我改，條友話有lf2 source code就易，冇嘅話從0做要100萬所以先想問多啲，thanks dude

得罪講句，你第一句已經出事啦，「整個webgame成本唔會好高」呢樣嘢已經夠俾人問候老母。成本高唔高同究竟邊個整俾邊個平台係冇直接關係。你做隻簡單到爆嘅單機遊戲，整俾PS5同Switch Store埋100Yen果d，成本貴極有個譜。相反，你整隻手遊或者webgame，諗住俾多人連線可以對戰又可以合作，有唔同角色，唔同連招方式，冇source code要人從頭做起嘅話，報價果個人同你講一百萬起跳，我同你講，佢已經係保守估計嚟

拆一拆LF2嘅功能，以業界有所謂MVP版本（Minimum Viable Product，即係削走曬所有功能之後，最骨幹嘅部份）嚟講，你最少要有戰鬥系統（包括打擊判定、操作輸入、連招、血量）、角色系統（包括每個角色有乜招式、攻防數值）、多人連線系統（包括Sever side同Client side嘅所有嘢）、關卡系統（包括地圖、道具、陷阱），仲未計你都提及過嘅UI/UX，聲效、音樂都要搞。我列出呢度已經係最少嘅嘢，你諗諗如果你隻遊戲再削走我所講嘅呢堆嘢仲成唔成立？譬如冇咗戰鬥系統，唔洗打啦，冇做角色系統嘅，點搞每個角色嘅攻防差異？就算你話差到用番當年LF2嘅介面，但大佬，都要人整，都要寫code擺入遊戲（我當你用Unreal Unity，都要有人整㗎）。你咁望一望，一隻類似LF2嘅webgame，係咪真係「成本唔會好貴」？我自己就覺得，呢個Project起碼要兩、三個人大約全職九個月到一年先可以做得到位（講緊係有經驗整遊戲嘅人）。由零開始未試過整遊戲嘅，估計最少多一倍時間。係咪做唔到？絕對唔係，但肯定唔係一件輕鬆週末做兩個鐘頭，幾個月後就可以擺上網俾人玩然後人人讚好嘅嘢嚟

上面巴打好到肉 推

唔係唔同意佢講嘅野
但係佢答緊嗰條友係問成本會唔會好高
唔係話web game成本唔會好高

你唔講都睇唔到 佢好無辜

留名，睇大家表演👍🏻

有限金錢下，要知道自己最終想要一件點樣既製成品，再揀幾個必要既功能做基本步。

對我嚟講，LF2獨到之處係當年少有免費、多人（同機）連線、連技技巧、多模式、多模組，所以跑咗出嚟，今時今日同樣既遊戲，競爭力可能有啲薄弱，所以要好好選擇遊戲嘅賣點。

想問個game jam 有結果出黎未
discord link 又expired
可以點跟

https://lihkg.com/thread/3756996/page/1
有結果了！可以起我底