【2ch文連登式演繹】詭頭：日本網友與公仔頭共同生活

內容大概如題
中間會加少少創作成份 同埋我當時嘅狀態都怪怪地 所以可能會睇到你哋有啲躁
重有我係第1次開PO（搞錯咗去咗SC嗰邊出PO 而家改返嚟呢邊開） SC即係2ch.sc 分家後嘅2ch 呢度係5ch 即係原2ch
如果有啲咩唔妥嘅位話我知啦

呢件係舊年嘅事嚟
我係好典型嗰陣鍾意上網睇古靈精怪嘢但就冇靈異經歷嘅普通人嚟

同埋要寫嘅話我諗得我係同性戀者呢方面有少少特別呱
關於呢點都有好多嘢後面會提 請稍等

有日我一個人自己去美術館 間美術館附近都算多人行嘅 但就連流浪漢都多
路邊一角都有唔少紙皮屋咁嘅嘢喺度
我就隨意咁望下呢啲嘢咁由美術館返屋企 途中我見到一樣嘢
喺一個紙皮屋嘅側邊度有個人體模型？嘅頭裝飾喺度 原文寫mannequin 估計係服裝店嗰種
可能識嘅人唔多 但個公仔頭好似Brigitte Bardot咁有長長嘅頭髮同好靚嘅面孔 碧姬芭鐸 傳說中嗰位性感小野貓
我唔覺唔覺咁俾佢吸引咁行埋去 就喺我埋去距離佢幾步嗰陣
我腦入面浮起「我好鍾意佢個樣 拎返屋企啦！！」我都唔知點解會突然有咁嘅諗法
而家諗返起就係由呢陣時起我變得古怪

我對住個紙皮屋講「唔好意思 請問有冇人」然後就有個阿伯走出嚟

我「咁唐突唔好意思 我好想要呢個公仔 我第1眼見到就好鍾意 請問呢個公仔係唔係好重要嘅嘢嚟？」
阿伯「下？？」

阿伯好似唔係好明我想點咁 我就同佢解釋話個公仔個樣好似我好鍾意嘅一個舊時代嘅外國女明星
咁講完佢好似明白晒咁話「咁嘅嘢你都想要嘅話就畀咗你啦」
據阿伯講 個公仔係用嚟防犯或者應該話係犯惡作劇用嘅
好似話有啲人鍾意專登走嚟騷擾啲無家者 真係好過份
而有個公仔喺度嘅話啲人就會覺得奇怪唔敢埋嚟搞佢
之後阿伯又話「喺第2個區有啲兄弟個竇俾人放火燒都有...」
但我就因為好想快啲拎個公仔返去所幾只係求其應「哦係咩」咁走人
我將個公仔頭抱喺小掩位度搭巴士 明明好迫人但我隔籬位冇人坐

繼續啦

返去我就將個公仔放喺可愛小物櫃度（我屋企有個專用嚟放可愛小物嘅櫃）
當時淨係咁都已經覺得「真係唔錯～」咁好滿足
日子耐咗慢慢開始會「早晨」「今日呢～有件咁嘅事啊...」咁同個公仔講嘢
之後就因為想同佢講「我出去喇」「我返嚟喇」所以將佢改放喺玄關嘅鞋櫃上面
一返到屋企就第1時間會同碧姬（幫佢改埋名）打招呼
如是者2個月左右啦 一直都係咁 去到有一日
我同碧姬嘅生活出現咗裂痕

#8
知唔知Al snow最近點？

>>8 搞到我守登去search咩係Al snow添 我都係 Al snow係一個美國摔角手

繼續
我有一個叫涼子（假名）嘅女朋友
佢係一個好強勢嘅人嚟 會好勇於表達自己意見嘅
鍾意強勢女嘅我完全對佢好着迷
所以當涼子嚟我屋企玩 我心情就非常之開心興奮雀躍

……喺冇收埋碧姬嘅情況下

碧姬係好孩子？定壞孩子？

碧姬嘅嘢跟住會知

繼續先

我「涼子 好歡迎你啊～」
涼子嚟玩嗰陣我心情好興奮 涼子嘅心情都一樣唔錯咁 因為佢平時不苟言笑所以見佢咁我好開心
但當一見到玄關度嘅碧姬涼子嘅面色就變晒
涼「…...呢個咩嚟」
我「佢叫碧姬啊」
當時好奇怪嘅我一心諗住涼子都會好鍾意碧姬所以好淡定咁同佢介紹
但涼子就「咩嚟㗎」「好唔舒服 咩事 點解做啲咁嘅嘢」咁有啲慌亂

涼「你做咩事 點解搵啲咁嘅嘢搞？」
我「冇啲咩啊 喺路邊嘅命運邂逅所以我帶佢返嚟」
涼「下！？」
涼子面都青晒咁講「你又唔係髮型師」「完全好奇怪囉！！」「你唔覺咁好詭異咩！？」
平時好冷靜嘅涼子都成個人急起上嚟「你係咪有啲咩心事！？係唔可以同我講嘅！？」咁講嘢好飛躍

我嗰陣完全唔理解點解涼子咩事成個人亂晒
其實我本身都鍾意睇啲古靈精怪嘢 俾呢啲異樣嘅物件突然吸引嗰陣多數都係撞到嘢多...呢啲故雖然都聽唔少 但嗰陣就完全忘記有呢啲嘢 個腦完全係一片花田 話人個腦係一片花田係日本慣用句意指大安旨意＋唔諗嘢＋傻傻下
我「點解你講埋啲咁嘅嘢？咁靚你話詭異咁碧姬好慘㗎」等等講咗好多嘢
涼子就沉默咗陣好似喺度諗緊嘢咁
然後
「都係嘅 睇真啲係幾可愛嘅 係我唔啱」佢淡定咁講然後入屋
後來聽返先知 平時基本上好聽涼子話嘅我會咁樣講嘢好明顯我有唔妥 所以先配合下我

有冇碧姬嘅相？

碧姬嘅相最初我影咗好多 但發生好多事後已經刪晒
有同佢影到俾一堆可愛小物圍住成個boss咁嘅相添

之後就咩事都冇 一次都冇否定到碧姬咁一齊食飯等等
講啲唔關事嘅嘢 涼子呢個時候完全係配合我 連佢以前話「都唔知有咩咁好睇」嘅哈姆太郎電影佢都話「係幾可愛嘅 係我之前唔啱」
呢日就咁完 我同涼子一齊瞓 直到第2朝

涼「你唔使送我喇」
我「點解？」
涼「冇點解」

第2朝 涼子就係咁樣叫停打算送佢出門口嘅我
我心諗點解咁冷淡嘅之後到我要出門口嗰陣我去到玄關就察覺

碧姬唔喺度

涼子好型咁款

咦！？點解嘅！？我成個人亂晒咁又搵個鞋櫃又周圍搵
但都係搵唔到碧姬 我喺屋企坐唔定咁周圍行嚟行去咗陣後諗到

係涼子
一定係涼子帶走咗碧姬
所以佢先叫我唔使送佢 因為唔想俾我見到佢拎走碧姬

我好急咁打畀涼子
涼子就喺電話響咗一陣後接聽
好平靜咁講「咩事」

我「碧姬呢？」
涼「做咩？碧姬有咩事？」
我「係涼子拎走咗碧姬 唔係咩！？」

涼子一開始係話「碧姬唔見咗？」「有冇搵過晒周圍？」
但喺我好歇斯底里咁「碧姬呢！？點解你要帶走佢！？」一大輪後佢有啲放棄咁款慢慢講
涼「你而家好唔妥 好奇怪 喺玄關度見到個公仔嗰陣我心都寒晒所以呢 今朝我拎咗個公仔去掉咗
我想講 你同平時好唔同 好明顯有唔妥 你冷靜啲聽我講 我一定要令你變返正常」
口吻好強勢但涼子慢慢咁講出嚟去勸我

我就覺得比起碧姬涼子奇怪啲囉
寒還寒都冇理由話擅自拎咗人哋啲嘢去掉㗎

結局係唔係取代碧姬而家你玄關放嘅係涼子嘅人頭呢？

#25
而家我屋企都有20個左右嘅公仔頭 公司都起碼有10個...
係咪好驚呢

似Brigitte Bardot應該係winding用（練電髮用）係唔少人都有接觸過嘅款嚟
練剪用嘅個樣應該係更加深燧啲嘅 因為多數都係剪到光頭為止

以上係現職髮型師嘅戲言
啲練習用嘅頭個個都係靚女樣

#26
就係咁完場了
大家睇得開唔開心呢
下一集係「公仔頭生頭髮 AGA雄性禿都大驚！碧姬之冒險2」
執筆中
敬請期待

>>26 會生頭髮嘅詛咒？公仔頭
講真想要...咁就可以無限任練

又繼續喇～

我都慢慢咁變得冷靜返
雖然之前個人好慌 可能因為遠離咗碧姬 識得諗返的確放人體模型係幾怪 更何況只係公仔頭 成個人唔同晒咁諗返起
之後都係好似平時咁過 亦都冇話去搵返碧姬
調返轉想知點解嗰陣我會俾個公仔頭吸引到？
但好快事情又唔係咁

有一日夜晚 我喺屋企 聽到出面有好大聲好似有人喺度嘈交咁嘅聲
我打算平時閂埋嘅窗簾諗住裝下出面
喺我打開窗簾嘅瞬間我見到


係碧姬
碧姬就喺露台

咪成日有嗰啲掉咗個公仔但佢會返返嚟嘅故嘅 嗰啲印象中都係喺門口度返嚟 但碧姬就唔知點解喺露台

我嗰陣好開心 心入面淨係識諗「碧姬返咗嚟！」咁樣
明明應該要覺得好不可思議或者一頭霧水先係 但冇咁嘅感覺

好想知之後點

然後略一略 又到有一日嘅事
我有一個gay嘅朋友 佢好蠢所以呢度叫佢笨蛋太郎啦（我知咁好過份但咁易啲明）
同埋佢一飲大咗就會講「我將我嘅處男掉咗入坑渠」咁樣重覆呢啲唔知咩嘅9up 冇人知即係點
就係咁我收到笨蛋太郎嘅電話

笨「聽晚去唔去遊下車河咁呢～」

點解突然遊車河？我咁諗
笨蛋太郎間唔中都有一齊去玩 佢又會話「唔想返去住呀！玩多陣先啦」咁樣怕寂寞嘅人嚟
所以我都係諗佢會唔會係突然想見下啲朋友咁呢
而且我又冇話唔鍾意遊車河 所以我就應承咗笨蛋太郎喇
唔知點解集合時間係晚飯後 呢個時候我應該覺得有唔妥先係

第2日 笨蛋太郎心情好好咁揸住車 唔知點解係向山入面去

我「去邊？」
笨「嘿嘿嘿」

笨蛋大郎面上浮上可疑嘅笑容 呢個時候我應該講啲咩先係
我諗佢應該又係諗埋啲咩on9嘢啦～咁所以冇理佢
路上嘅車愈來愈少
我哋就嚟到一條暗暗地嘅隧道前

我「呢度邊度嚟」
笨「呢度係探靈地嚟！」

笨蛋太郎好hyper
我就本身對探靈呢啲唔多喜愛 同埋驚
但笨蛋太郎就好有幹勁咁款「喺隧道入面響三次咹嘅話！就會有幽靈！！」佢咁講
我心諗乜呢個唔係另一個探靈地嘅嘢嚟咩？但因為佢係笨蛋所以我又冇理佢
同埋佢又咁講「以防不時之需」買咗啲鹽嚟備用 但佢拎出嚟嗰包係砂糖嚟囉 死蠢 日本民間信仰灑鹽或者堆鹽有辟邪作用

我「唔好啦 我驚啊」
笨「一場嚟到唔係諗住走呀嗎你」

我記得同佢爭論咗一陣 最後都係入去

>>25 鍾意古靈精怪嘢嘅髮型師都唔錯喎
想一路set頭一路傾怪談
鍾意睇恐怖片嘅人唔少
但鍾意怪談嘅就唔多 況且呢啲都好難問

架車駛入隧道
入面非常之靜 慢慢笨蛋太郎都變到冇嘢講
然後就咁去到隧道嘅中間位置左右佢停低架車

笨「PK喇 好撚淆添」
我「你真係好on9囉」
笨「想走」

笨蛋太郎同我冇膽去響咹 只係喺度講啲無謂嘢「喂喂喂真係好黑」「咁唔怪得冇發生咩事都會變探靈地啦」

然後就喺我哋講到「都係撇」嘅時候
感覺到車上有啲嘢

點講好 係空氣？變咗定點 應該話變到好重咁
笨蛋太郎都好似感覺到咁 我哋慢慢望向對方四目相對 但都冇講到嘢
然後過咗1分鐘左右 喺我打算話「開車」嘅時候

砰！！！

車頂唔知有咩拍咗下

唔知係咩 但好似係有啲「咩嘢」追緊上嚟咁

我哋驚到震
我唔敢望上面就咁伏去司機位嗰邊
笨蛋太郎就不斷咁叫「有怪莫怪！細路仔唔識世界！！」

然後總算叫做喺隧道逃出生天
我哋之後就一路都好慌張 就算離開咗條隧道都依然震晒
因為淨係得我兩個好會驚 諗住總之去返啲有多啲人氣嘅地方！所以我哋去咗間24小時超市嘅長櫈度坐低 終於可以安定返啲講返嘢

笨「頭先嗰啲咩嚟」
我「你問我我問邊個喎」

類似嘅對話重覆咗好多次 而當然唔會有答案 但都總算做叫平靜返落嚟

好想知後續點～

我「......不如去搵啲師傅做啲法事」
笨「邊度有師傅有法事做」
我「搵囉」

之後我哋就開始搵邊度有得除靈
笨蛋太郎好似同朋友line緊啲咩咁 我就上網查下市內嘅神社之類

唔覺唔覺就到咗朝早
淨係天光呢樣個感覺都已經好有救咁
見到出面光晒淨係咁都想喊

然後6點左右 涼子line我
「我有嘢想同你講」佢咁講 所以我打電話畀佢

我「有咩事啊？涼子」
涼「係咁嘅 有少少突然 但你今日請唔請到假？」（呢日係星期一）
我「點解嘅？有咩事啊？」
涼「有度地方想帶你去」

涼子把聲好認真
但而家嘅我哋一心只係諗住「除靈」所以打算推咗涼子
只係佢不斷咁「當我求你」「講真 愈早去愈好」
所以我同佢講返喺隧道嘅事 話佢知我哋而家想去搵師傅做法事 同埋我哋驚到就死

但係喺涼子講咗句令我意外嘅說話
「冇問題 我就係想帶你去除靈」

結論就係 我同笨蛋太郎射波唔返工去做法事

我有啲在意點解涼子會想帶我去做法事 但佢話「趕時間 呢啲遲啲講」
就係咁唔知咩事咁我同笨蛋太郎去搵涼子
然後 笨蛋太郎都聯絡咗個朋友 我哋總共4個人

集合地點度涼子同笨蛋太郎嘅朋友已經喺度等緊

笨蛋太郎個朋友係玩boxing嘅 所以呢度叫佢拳手
拳手係我同笨蛋太郎嘅朋友入面最可靠嘅gay佬
聽講試過捉到一個搶嘢嘅人 而且佢本人又係留鬚嘅型男 諗唔到有咩缺點
我見到佢兩個即時有啲安心 心諗有佢兩個喺度就應該冇問題
之但係拳手就用佢把好低沉嘅聲講

「笨蛋太郎……你條沐契......」
一見面佢就捉住笨蛋太郎心口
笨蛋太郎震晒

拳「你做咩帶佢（即係我）去玩啲咩探靈呀」
笨「嗚哇哇哇哇哇哇哇」

笨蛋太郎變到小動物咁
我心諗應該大家都知咩事 所以我就問涼子
點解要帶我去做法事
我心諗冇理由時間咁啱啱好㗎

涼子佢咁答

涼子喺掉咗碧姬後 佢同幾個朋友傾過關於我嘅事
話我好愛錫一個詭異嘅公仔子 又同個公仔頭講嘢 俾個頭迷住咁
最初涼子懷疑我係唔係精神上有啲咩（唔係呱） 但有個朋友就話「定係撞嘢咋」
同埋都幾有說服力咁 所以涼子就得出帶我去做法事會唔會好啲呢咁嘅結論
而且已經預約咗今日做 涼子嘅手腳真係快

#45
睇嚟係一個好PO

靈異PO常見嘅就係明明日子冇變但個ID就唔同咗嘅情況出現了 上面有兩段接住嘅樓豬ID變咗

>>45 做到好PO嘅話就好了

繼續
喺度我諗返起碧姬返嚟嘅事
一直都冇放上心嘅碧姬回歸事件 喺經歷完靈異現象後我開始覺得詭異
我好似開始回復返正常？咁 覺得咁樣愛錫個公仔可能真係好奇怪

我「涼子 你冷靜啲聽我講」
涼「係？」
我「碧姬佢 返咗嚟」

我感覺到涼子倒抽一口涼氣

另一邊廂笨蛋太郎同拳手好似已經斟完 拳手帶住想喊咁口嘅笨蛋太郎嚟加入我哋嘅對話

我同佢兩個都講咗碧姬嘅事
笨蛋太郎聽完後更驚 涼子同拳手就話「咁帶埋碧姬去」
然後就坐拳手車去我屋企 跟住再去做法事

補充返在場全員都射咗波
笨蛋太郎就好笨蛋咁同上司講「因為我要去做法事...」
拳手就話「使唔使咁老實呀你」

去到我屋企後佢哋3個見到碧姬都驚咗驚

涼子就「真係返咗嚟...」塊面青晒
平時冇有怕嘅拳手一見到碧姬都「嗚」咗聲 笨蛋太郎就唔敢望碧姬一路耷低頭

我帶住碧姬上車
拳手揸車 笨蛋太郎坐佢隔籬 我同涼子就坐後面
大家一齊出發
對住驚到死嘅我同笨蛋太郎 拳手講咗句「有我喺度鬼擋殺鬼唔使驚」
雖然對住幽靈腕力係冇咩作用但拳手咁講又幾有說服力
涼子就一直捉住我隻手 我覺得搞到佢兩個真係唔好意思


sorry 而家我喺老家 隻貓唔舒服所以我一路睇住佢一路出PO
雖然出下停下但我諗住今日內完咗佢嘅 所以希望大家陪多我一陣

一路睇一路入神嘅好PO
期待後續