杜琪峯出席完頒獎禮，接受傳媒訪問，問到有冇睇到近日屢創票房佳績的《九龍城寨之圍城》，杜Sir不但有睇，仲大讚抵睇。「《九龍城寨》阿瑞（鄭保瑞）套戲抵睇到爛，我覺得100蚊的話（戲票）值150蚊，不過我唔鍾意部戲，我都有同阿瑞講唔鍾意，但實在好嘢。抵睇，做到香港電影工業上的成就。」
早前《香港01》收到讀者報料，拍杜Sir正為新戲開工，主角更是MIRROR的成員盧瀚霆（Anson Lo），問到拍攝進度如何？「其實我就懶咗啲，拍拍下冇乜心情，得閒再拍，可能遲啲會拍得快啲，而家會慢咗落嚟，等我出完埠返嚟再諗下。」
至於點解搵睇中Anson Lo找他演出？「幾好呀，新一代係要支持，好唔好都要畀啲機會人哋，如果有機會你都做得唔好，就你抵死啦！呢行唔係一下登天，係要累積下，尤其做導演，一係你唔好做呢行，呢行就係付出多過收穫。」
對於後浪導演，杜Sir一再強調要有個人風格和原創。他坦言現在是要考驗現今小朋友智慧。「要做自己風格的電影，抄冇用，徐克有徐克的電影，王家衛有王家衛的電影，就算阿晶（王晶），屎尿屁晶咁叻，佢都有屎尿屁格，全港最高票房導演係佢呀！最緊要乜都可以講，追求藝術。成立鮮浪潮向來視原創最重要，我哋唔會影響參賽者拍攝，但要自己衡量，拍出嚟有冇人畀你放唔係我決定，係你選擇。聰明啲做人，有啲位閃下避下。留得青山在哪怕冇柴燒。」
有記者問到現時的社會氛圍對創作的影響，「大家都知嘅事，唔使我講，我只鼓勵大家唔好見到問題就驚，要諗聰明的方法，做好你嘅藝術世界，電影係好闊。」
