[討論]超人Ultraman[44] Netflix”道友”超人Rising 6月14上

主角呢種自私高傲性格喺圓谷自己拍嘅超人入面都好少有，亦係我一路期待性格上有缺憾嘅主角。咁多年嚟得Jack、Dyna同Zearth算係有缺憾嘅主角，Jack同Dyna自大，Zearth懦弱，New Gen超人就多數係熱血衝動撚/On9仔，最多智力有缺憾，人物嘅行動太易估，相反，一個獨行獨斷嘅人物會更加有趣，亦都更具戲劇性。圓谷曾經都想設計一個我行我素嘅主角，但最後都唔成事，希望第日圓谷可以變返一間勇於創新嘅公司，而唔係每年啲主角都好似倒模一樣。

套戲嘅缺點係博士同主角理念衝突以及主角同老豆關係變差呢兩個位寫得唔夠深入，老豆話同博士識咗好多年，如果加插兩個人啲回憶解釋多啲博士點樣變成戲入面嘅奸角咁博士嘅角色會立體啲。作為一套以家庭為主題嘅電影，主角同老豆關係變差係應該用多啲篇幅去寫，而唔係簡單幾句對白交代就算。

另一樣要挑剔就係套戲同超人亳無關係，你換DC個超人嚟做一樣可以，例如主角一家點解可以變成超人，超人係咩來歷，人類點睇超人、怪獸同KDF，呢啲喺圓谷作品入面老生常談嘅topic都冇交代過，換來嘅只係background多咗幾隻怪獸公仔同埋最後用十字死光打敗敵人，但作為超人fans會更加想睇到超人50幾年嘅內涵衝出亞洲，而唔係單單借用超人嘅形象講一個普普通通嘅故事。希望續集講M78星雲會多返啲超人元素，圓谷都可以借鏡一吓美式嘅人設，喺自己嘅TV番試多啲新嘢。