中環出更：舖王細仔攻平價婚宴生意
港女結婚擺酒叫朋友「給五百元人情就不要來了」風波成為全城熱話，某程度因為擺酒太貴。原來「舖王」鄧成波細仔鄧耀昇（Stan）年半前已洞悉先機，睇準婚宴生意有得做，於是同女友Vicky合力開設婚宴統籌公司。為減省成本開支，Stan動用家族持有嘅油麻地二萬呎舖位，新人搞婚禮平均每位賓客成本都只係四百幾蚊，就算做五百蚊人情都唔怕會蝕本。
已接逾300場宴席
東華三院將於下月中舉行慈善晚會為弱勢婦女籌款，Stan為支持任總理兼籌委會主席嘅哥哥鄧耀邦（Jason），於是以旗下婚宴公司冠名贊助晚會嘅全數開支。Stan話，今年婚宴市道暢旺，由十月至年底已接到逾三百場婚宴，而佢自己則計劃兩年後與女友舉行夢幻婚禮。Stan搞婚宴咁識控制成本，唔知佢會否叫賓客隨意做人情呢？
東華三院主席陳文綺慧（Viola）話，今次籌款晚會嘅全數善款將用作支援弱勢婦女乳癌治療、更年期輔導、家庭及性暴力、扶貧四個項目，希望大家踴躍支持。
鄧耀昇（左）為撐哥哥鄧耀邦，冠名贊助東華幫助弱勢婦女嘅籌款晚會。（潘翠華攝）
香港大把富豪高槓桿起家啦
