出嚟做嘢做咗8年，工作穩定~中層位置，今年打算結婚，所以上年同女朋友一齊買咗樓，大家都攞咗8成積蓄出嚟比首期，供就會佔大家收入4成左右，唔算太辛苦但一直以嚟儲錢都唔會太大使，供樓都預咗頭幾年要再慳啲儲快啲
屋企背景係兩老+細佬，大家關係一向好好，由細到大都好錫我同細佬，無話偏心。老豆做小生意，近幾年生意都唔錯搵到啲，上年我哋買樓都比咗50萬我當幫補我裝修。而我細佬細我5年，大家性格都唔太似，我可能每件事都要諗好哂先做，佢就chill啲free style啲，工作上就未搵到方向，每樣都試下先咁。可能因為咁，我父母一向都係擔心佢多啲，我有時都會同佢傾吓睇吓佢有無咩方向
近排知道父母去咗睇樓，原來佢哋諗住比500萬做首期買層樓，會比我細佬結婚住(佢都有個穩定女友)，無問到佢哋會寫邊個名，不過大機會係寫細佬名。聽到嘅時候心係有啲銀住，但當然無表現出嚟。之後有時諗諗吓會覺得點解細佬可以廿幾歲輕輕鬆鬆有層樓，當然佢之後應該都要供啲，但好輕鬆？好似我同女朋友努力咗咁多年先做到嘅嘢，佢可以唔洗點付出就得到
但另一方面我諗我明點解父母會咁做，佢哋應該覺得唔幫佢比首期，佢應該短期內都唔洗諗買樓，亦未必供得到。同埋可能見我同女朋友自己搞得掂就無問題最近成日會咁諗，都承認自己係葡萄，點解輕鬆嗰個唔係我，如果比150萬我比350萬佢，咁大家都可以輕鬆啲？但其實佢哋啲錢點用我係無資格管，而且佢哋都幫咗我。所有嘢我都明白但都係會銀住，同埋發現自己原來都會咁計較，但計較只會令自己唔開心，有無人有類似情況，點樣可以調整到心態
