是咁的，我踏上咗無盡的天國階梯

故事簡介︰踏上天梯，踏上人生，努力向著目標出發，是否就能一切如願，平安順利地到達目的地？當經歷過諸多的苦困、掙扎、磨難，下一站又是個怎樣的地方？


※本故事將會以連登作為第一發放點，長度中短篇，並稍後於Penana小說網作更完善(排版、修飾)、更豐富(每章加上圖片)的記錄存放(下面會放上連結)，希望你哋會鍾意呢個故事～※


Penana——《是咁的，我踏上咗無盡的天國階梯》︰
https://www.penana.com/article/1403469


(下面係我既其他作品同社交媒體)

Penana——《畫畫吧！達文福！》
https://www.penana.com/article/1370760
Penana——《阿福隨心》
https://www.penana.com/article/1355322
Penana——《AFRO短篇》
https://www.penana.com/article/1017036
Penana——《超有病學園》
https://www.penana.com/article/1146207 (此乃實驗作品，已腰斬...)
Penana——《土瓜灣．雙刀劈．賀聖誕》
https://www.penana.com/article/976595 (計劃reboot中...)
Instagram——(好少用...)
https://www.instagram.com/afro1225afro/
Facebook——(更加少用...)
(所以算喇...)

＃１誕生

⋯⋯

好似好耐都冇好似而家咁，可以咁舒服咁瞓上一覺⋯⋯

四周圍溫暖乾爽，又吹住陣陣微風，而且而家嘅光線非常柔和，只要我輕輕咁張開雙眼，就睇得見藍天白雲⋯⋯ 



藍天？白雲？

我喺室外？！




本來打側咁瞓，蜷起個人嘅我嚇到成個人坐咗喺度。都未嚟得切望清周圍嘅環境，我又再一次俾身邊嘅嘢嚇咗一大跳—— 

有個全身著到白雪雪嘅男人企咗喺我隔籬！！

我嚇到即時彈開，坐喺地上面咁猛咁向後褪，點知褪到有一下，隻手竟然摸咗個空！重差啲成個人失去重心跌咗落去！！

好在，我及時掹住邊緣嘅位置，穩住咗個人，然後定一定神，終於望清下面嘅環境——

下面係一片一望無際，而且深不見底嘅蔚藍色空間，除咗幾片白濛濛嘅巨大雲狀物之外，我就咩都再睇唔見⋯⋯

而望住呢一片咁奇特，且震撼無比嘅景色，我成個人呆咗，個腦空白一片。而四周圍包圍住我嘅藍天白雲，亦令到我開始分唔清上下左右，頭暈目眩，天旋地轉⋯⋯



「捉住我隻手。」



穿白色衫嘅嗰個奇怪男人走咗埋嚟，向我伸出援手。

由於嗰一刻嘅我非常徬徨無助，所以我不假思索，咩都冇諗就第一時間捉實咗佢。

白衣男笑咗一笑，用力將我拉起，然後帶我行去一個相對較入，比較安全嘅位置先至放開我。

呢個時候，我個心終於定一定，然後我望住面前呢位岩岩救我一命，但係又一直笑到我心都寒埋嘅白衣男人⋯⋯我個心入面，有好多疑問——



佢⋯⋯應該唔係壞人？⋯⋯



我又望咗一望我而家正身處嘅呢一個地方——

的而且確，我而家真係喺天空上面，呢度四周圍除咗藍天白雲，就真係咩都冇喇。而我腳下面踩住嘅呢一片地方，係一塊size唔係好大，面積大約得7米乘7米嘅白色平板。



究竟我喺度瞓咗幾耐？⋯⋯唔係，我應該問，究竟我係點樣嚟到呢個地方⋯⋯



我開始留意面前嘅白衣男——

佢個樣睇起上嚟好後生，皮膚好好，可能佢只係得20幾30歲？⋯⋯佢嘅五官生得幾標緻，整體嚟講幾靚仔，又幾和善。不過，佢喺衣著品味方面，就真係令人不敢恭維⋯⋯

白衫、白褲、白西裝、白馬甲、白皮鞋⋯⋯全部都白到反光，又乾淨到一塵不染。而佢頭上面，重要戴住一頂作狀到不得之了嘅白色嘅紳士帽⋯⋯



屌⋯⋯邊有人咁樣襯衫㗎⋯⋯



而喺呢個咁奇特，咁細小嘅地方裡面，竟然就淨係得我同佢⋯⋯

唔通⋯⋯佢就係呢一切嘅始作俑者！？

到底⋯⋯佢係個咩人？⋯⋯



「不如就等我回答咗你呢條問題先啦～」



咦？⋯⋯



白衣男：「歡迎你嚟到呢度，我係你嘅指導員，我係嚟負責話畀你知接落嚟你須要做啲咩，同埋有啲咩你係須要注意。」



指⋯⋯指導員？佢講緊咩啊？⋯⋯



我：「⋯⋯呢度係咩地方？同埋點解⋯⋯我會係度嘅？⋯⋯」 



白衣男：「呢度係前往天國嘅起點。」 



⋯⋯天國？



白衣男：「由於你生前被評定為一個好人，所以喺你死咗之後，你獲得前往天國嘅資格。」 



我⋯⋯我死咗？！



白衣男：「係，你已經死咗。」



咦？⋯⋯ 



白衣男慈祥咁笑咗一笑：「你唔需要太緊張，因為我本身有讀心嘅能力，所以就算你唔開聲，我都已經聽得到你內心嘅疑問。」



聽完佢嘅解釋，我重更加啞口無言，因為一時之間，實在有太多太難以置信嘅資訊湧到我面前！！

但係⋯⋯當我冷靜咁諗咗一諗之後⋯⋯我發覺其實佢講嘅嘢，又似乎⋯⋯真係⋯⋯幾合理？



哈⋯⋯哈哈⋯⋯



原來我已經死咗⋯⋯而且要準備前往天國⋯⋯

而且我岩岩亦發現到，原來我身上嘅呢一身服飾，望落就好似一件醫院嘅病人服——素白色嘅短衫、長褲，但係赤腳。

唔通⋯⋯我係喺醫院過生嘅？咁⋯⋯我到底係病死定係意外死嘅呢？

我生前又係個點嘅人？點解呢一切，我好似咩都唔記得晒咁嘅？⋯⋯



我：「咳唔⋯⋯唔該，我想問⋯⋯我、我係點樣死㗎？⋯⋯」 



白衣男嘴角摵咗一摵，佢話：「唔好意思，我唔講得畀你知。」



我：「吓？⋯⋯」



白衣男：「我嘅職責只係嚟話畀你知，嚟緊你須要做啲咩，同埋有啲咩你係須要注意。」



佢好似錄音機播帶咁，重覆返佢之前講過嘅嘢，果種冰冷嘅感覺，令我有一剎那覺得佢係一部冰冷嘅機械人。



我：「⋯⋯等等先，我想講嘅係⋯⋯我好似對我生前嘅所有事、所有記憶，通通都唔記得晒⋯⋯咁樣⋯⋯都係正常？」 



白衣男：「冇錯，咁樣係正常情況。」



我：「吓？⋯⋯」



白衣男：「你生前大部分記憶，已經被我地抽調到第二個地方保存住。我哋之所以咁做，係因為我哋認為你而家咁嘅狀態，係唔應該再被一啲額外嘅記憶、情緒去影響。你而家只需要乖乖咁聽我指令，然後專心去做、去完成，咁就得㗎喇。」 



聽見佢咁講，我依然好疑惑，但係——



我：「咁⋯⋯你所講嘅指令係？⋯⋯」



白衣男滿意咁笑咗一笑，然後打橫移開一步。我望見佢身後面，原來一直都有一條大得人驚嘅巨大建築物——

係一條非常之長，一路打斜咁向上伸延，直插天際嘅白色樓梯。 

樓梯大約有4米闊，整體嚟講唔算好斜，但係沿途冇加設任何嘅扶手攔杆或休息平台。佢一路向上伸延，直至到好高好遠⋯⋯喺視覺上，佢嘅盡頭就好似落喺果個消失點嘅位置之上，但佢嘅真實長度，我相信好有可能，將會係誇張得難以想像⋯⋯



白衣男：「呢條就係通往天國嘅階梯。」 



我：「⋯⋯」



白衣男：「而家開始，請你沿住呢條天梯一路向上行，行到最後，你就會到達天國。」 



佢用簡單嘅幾句說話，就完全交代晒佢所講嘅重要指令⋯⋯講得十分輕鬆，簡直係毫無難度一樣。

但我隱隱覺得，呢一切，並唔係咁簡單⋯⋯



「請你等等。」我指住條天梯︰「可唔可以話我知，咁樣啫係要行幾耐？⋯⋯」



白衣男笑咗一笑：「唔好意思，唔講得畀你知。」



我：「吓⋯⋯又？⋯⋯」



我開始有啲躁底。



我︰「你畀嘅資訊得咁少，就要我貿貿然出發？邊有可能！⋯⋯同埋重有天國呢，天國又係個點樣嘅地方呀？乜呢啲我唔係都有權知道㗎咩？」



白衣男淡定咁回答：「唔好意思，呢啲問題，我通通都唔答得你。」



我：「吓⋯⋯喂⋯⋯？」



白衣男：「不過，我有一件好重要嘅事，想趁而家好鄭重咁提一提醒你。」 



白衣男一反常態，收起笑容，面色變得相當凝重。



白衣男：「我諗你都留意到，我地而家身處嘅呢一個地方，除咗我地而家踩住嘅呢一塊平板，同埋我而家身後面嘅呢一條天梯之外，呢度可以話係一無所有⋯⋯」 



我：「⋯⋯」



白衣男：「我要提醒你嘅係，當你展開咗你嘅旅程之後，你要盡量小心，千其唔好跌．出．去。」 

一聽見佢咁講，我不禁皺起眉頭，而內心亦不其然咁緊咗一緊。



我：「如果跌咗出去，會發生啲咩事？⋯⋯」 



白衣男曖昧咁笑咗一笑，令人心寒，然後佢話：「我只可以話畀你知，雖然我哋而家好似身處喺天空上面，但係其實，下面就只係一個無盡嘅空間，根本就唔存在任何嘅實物⋯⋯」



我：「無、無盡空間？⋯⋯」



白衣男：「如果你真係咁唔好彩，喺半路中途跌咗落去，咁你就只會一直咁向下跌，然後你今生今世，都唔會再到達到任何嘅『終點』。」 



我：「⋯⋯？！」



聽住佢呢一番咁耐人尋味嘅說話，我感到難以想像，陷入咗深層嘅迷思⋯⋯

究竟「永遠咁跌」係一個咩概念？就算港股都唔會啦⋯⋯而佢提到嘅「永遠到達唔到任何嘅終點」，又係啲咩意思？⋯⋯



我：「我、我想問⋯⋯乜我唔係已經死咗喇咩？呢度唔係天國嘅一部份咩？咁點解⋯⋯點解重會容許啲咁奇怪，咁危險嘅事情發生？⋯⋯」



白衣人意味深長咁笑咗一笑，然後話：「冇錯，你的而且確係死咗，之但係，我從來冇話過呢度就係天國喎。」



我：「⋯⋯欸？」



白衣男：「我重申一次，呢度只不過係前往天國嘅起點，亦可以話係天國嘅另一端。喺你到達天國之前，途中你會發生啲咩事，而你又會作出點樣嘅抉擇——呢一切一切，都重係未知之數。」



一切⋯⋯都重係未知之數？⋯⋯



我好茫然︰「可唔可以講清楚一啲？⋯⋯」 



白衣人：「要講你知嘅事我都已經講完，而家開始，你可以正式踏上你嘅旅途。」 



呢頭講完，佢呢頭就側一側身，然後向我展開單臂，攤出手板，做咗個標準嘅「請進」姿勢。 

我明白佢嘅用意，但而家嘅我正處於一種混亂、不安嘅狀態之中。試問咁樣嘅我，有邊有可能有足夠嘅勇氣去踏出第一步！⋯⋯



我對佢苦笑，有啲哀求地：「我重有幾條問題想問，我答應你喺我問完之後，我就會乖乖出發⋯⋯」 



白衣男粒聲唔出，原封不動，只係保持住佢一貫嘅笑容。



我：「我想知道，當我去到天國之後，係咪就可以記起返我生前嘅嘢？」



白衣男：「⋯⋯」



我：「我喺途中會唔會遇到其他人？」



白衣男：「⋯⋯」



我：「我會唔會遇到啲咩其他嘅危險？」



白衣男：「⋯⋯」



我：「喂！！你唔係咁呀嘛？！」



白衣男：「⋯⋯」



我：「⋯⋯」



白衣男嘅反應已經表示得好清楚——佢唔會再透露任何嘅資訊，亦唔會再講任何嘅嘢。

而睇見佢咁堅決嘅反應，我個心當堂涼咗一涼，但係又冇晒佢符。



白衣男：「⋯⋯」



冇辦法啦⋯⋯既然係咁⋯⋯



我只好嘗試面對天梯——



我：「⋯⋯」



好巨大⋯⋯好宏偉⋯⋯

喺天梯面前，我覺得自己就好似一隻會隨時被吞噬嘅獵物一樣⋯⋯唔係，我連獵物都不如，因為我實在係太過渺小⋯⋯我可能只不過係微生物，細到微不足道，一旦我走得太近，就注定被佢吸收，成為佢嘅一部份⋯⋯

而就算我肯承認，我對天梯嘅呢一份恐懼，都只不過係一種近乎妄想嘅心理壓力都好，但係接落嚟嘅呢一趟旅程，亦似乎唔會咁順利⋯⋯

哈⋯⋯哈哈⋯⋯

種種跡象，好似都係度暗示緊，我嘅未來絕對波折重重⋯⋯



之不過⋯⋯



就算係咁，唔通我而家身處嘅呢一片地方，又有啲咩係值得我留戀？

⋯⋯

我根本冇得選擇。

面前嘅路雖然有好多不確定因素，但係只要我一日唔踏出去，我就永遠都唔會知道個答案。

⋯⋯

一諗到呢度，我就覺得自己好似被說服咗一樣，得到咗少少勇氣，然後好自然咁，我開始向住天梯嘅方向慢慢前進。然後⋯⋯



我好小心咁踏上第一級——



本來，我以為我會透過腳掌，感受到天梯表面嘅冰冷，亦以為會感受到佢受到觸踫之後所產生嘅輕微迴盪⋯⋯

但原來我估錯咗。

天梯不但止冇冰冷嘅觸感，亦冇任何嘅迴盪感覺。

呢一步就只係好平淡嘅一步。

於是，我鼓起勇氣，連續踏出咗第二、第三、第四步⋯⋯

之後大概每隔十步，我都會停一停低，回頭望一望白衣男，亦望一望嗰一個被稱之為「起點」嘅地方。

白衣男依然企喺原地，繼續用佢招牌式嘅笑容嚟目送我，就好似喺度默默咁為我送上祝福，鼓勵我勇敢咁繼續前行一樣。

我向佢點頭示好。

不知不覺，我好似衝破咗內心嘅枷鎖，一口氣就連續踏出咗好幾十步。然後，係好幾百步！

當我再一次回頭望嘅時候，白衣男連同成個起點，佢哋喺我眼中，已經縮到好細、好細⋯⋯

我喺心入面暗暗對佢地講咗聲：



再見喇。



於是，呢一場充滿住未知之數嘅天國之旅，就係咁樣柒下柒下嘅情況下，正式展開⋯⋯

＃１誕生［完］

多謝支持

試下推一次

岩岩睇左規則，原來有巴打留言之後，我可以隨意地連推５次
謝謝巴打

推

推

推

推

推

推

#2 有好多第一身嘅胡思亂想，可能會有啲難啃，請見諒

#2 思考

自從踏上天梯以嚟，我就一直行，一直行，行左好耐、好耐，都未曾休息過。

雖然，我間唔時都會回頭望一望白衣男，亦望一望起點，但係隨住我地之間個距離變得越嚟越遠，佢地喺我眼中亦變得越嚟越細、越嚟越細——

細到得返一點。

所以相對地，我同佢地之間既連繫，亦變得越嚟越弱、越嚟越弱⋯⋯



事實上真係咁？



其實好幾次，我個內心都好有衝動，好想立即行返轉頭，行返去起點去搵白衣男。

因為我質疑自己，係咪太過衝動、太過順攤，任由佢鳩噏幾句，就接受晒佢既所有設定，然後又求鳩其其、冇咩所謂咁，就乖乖起行⋯⋯

而家諗返轉頭，其實我會唔會喺佢身上，錯過咗啲咩重大線索？⋯⋯

當其時，我係咪應該試下繼續chok佢講野，問到佢忍無可忍，睇下會唔會有啲咩意外收穫？⋯⋯

冇錯⋯⋯反正都冇人催，我係好應該試下磨足佢兩、三粒鐘，磨到爛為止。如果咁都仲係毫冇進展既話，咁就⋯⋯



一於行動升級！



可以試吓喺佢啲衫褲鞋襪裡面搵線索，摷下佢啲衫袋啊、褲袋啊，又或者喺啲衣物之間，睇下會唔會chip住啲咩重要線索、重要道具⋯⋯

話唔定到時候會搵到啲咩重要文件？又或者係啲有神奇功效既頸鏈啊、或手鏈之類既東東？⋯⋯



嗱，再唔係，做盡啲！



一於試吓除晒佢啲衫褲，睇下會唔會逼出佢其他反應，又或者可以試下對佢出手，摑佢兩巴！



嗱！再唔係！



或者可以試下⋯⋯試下⋯⋯推佢⋯⋯落去⋯⋯？！



話唔定⋯⋯會發現佢原來識飛？⋯⋯咁我就可以騎住佢，一路直飛天國⋯⋯

又或者原來果塊平板下面，根本就唔係啲咩「無盡空間」⋯⋯佢只不過係一個非常像真既電子螢幕，甚至可能係一條隱藏路線！

又或者⋯⋯當我推佢出去以後，佢跌到半路中途，就使出左瞬間轉移，喺我面前重新出現⋯⋯



⋯⋯



喂喂喂喂喂喂喂⋯⋯

咁既想像力，會唔會豐富得太緊要啊？⋯⋯

頭先諗到既種種做法，講就好興奮，但係到真係要做起上嚟咪就⋯⋯



咪就一碌撚！我根本都做唔出！



果啲所謂既種種可能性，大部分都只不過係天馬行空，一廂情願，紙上談兵，得個噏字！

喂⋯⋯Ching⋯⋯唔撚work喎⋯⋯



⋯⋯



終於，我好似突然清醒返咁，對我頭先果一連串大膽、狂妄、極端既想法感到一陣羞恥、心寒⋯⋯

而我亦卒之醒返起，白衣男喺一開始就已經同我講，佢話我之所以獲得前往天國既資格，係基於我生前係一個好人嘅呢個前題上⋯⋯

如果生前係一個好人，死後就可以前往天國⋯⋯咁如果死後無惡不作，又係咪可以獲得寬恕，被網開一面呢？

會唔會⋯⋯頭先我諗到既果啲極度冒犯、又非常邪惡既行為，當我真係付諸實行，我就會被即時改判為一個惡人，然後被即時取消資格，再被即時打落十八層地獄呢？



⋯⋯



呼⋯⋯好險⋯⋯好險⋯⋯

好彩呢啲咁撚生鬼跳脫既事，我最終都只係諗多過做，冇坐言起行，否則，真係欲哭無淚⋯⋯

其實諗諗下都係⋯⋯既然喺人哋既環頭裡面，最好就緊係循規蹈矩，聽人地既吩咐指示照住做架啦⋯⋯一味係度諗埋晒啲小聰明，諗到過晒火，真係隨撚時會害撚死自己⋯⋯



不過又話時話⋯⋯



我都叫做好聽話咁行左好長既一段時間啦，但係點解⋯⋯好似⋯⋯都仲未有啲咩進展咁既？⋯⋯

當初既起點，而家已經縮到冇得再細，但係面前既風景，就依然一成不變，永無止境⋯⋯

天啊！究竟我要維持呢個狀態直到幾時啊？⋯⋯



※ ※ ※ ※ ※ ※ ※ ※ ※ ※ ※ ※ ※ ※ ※



依然係無無聊聊上住路嘅日子⋯⋯

天梯上面，得我孤身隻影，而身邊四周圍，亦只得藍天白雲⋯⋯

不過諗返起，之前我話面前既風景係一成不變，其實咁講唔係好正確⋯⋯



因為啲雲。



天梯的而且確係一成不變，佢依然係直不甩咁一直向上伸延，睇唔見盡頭，但係我既頭頂上面、腳下面、四周圍，甚至係遠處既雲，佢地由一開始就已經係變化多端、變幻莫測。

佢哋有時好稀疏，有時好濃密，有時靠得好近，有時又離得好遠⋯⋯

多得佢地，我先可以喺呢個平白無奇、又一無所有既世界裡面，用佢地嚟作為「對照物」，令自己比較容易掌握身處既位置。

如果冇咗佢哋，我就好有可能會出現錯覺——錯以為自己一直喺度「原地踏步」——個情況就以好似行走喺一條不斷向後退既電梯上面，自己從來冇真正咁前進過⋯⋯

不過若果真係咁，又反而講得通點解我行左咁耐，都依然未去到天國既呢個事實。



⋯⋯



啊，講起啲雲⋯⋯

我記得，好似去到18000米既高空，都依然可以見到啲雲，但係喺唔同既高度，就會有唔同既形態。

咁唔知而家喺我面前，呢種一絲一絲，好似羽毛咁輕飄飄既雲，係代表住我而家正身處喺一個幾高既高度呢？

唔通我係喺18000米以下？

但係18000米，又係個點樣既概念？⋯⋯



我望向天梯下面，只望見一大片既蔚藍色，同埋大大小小淺灰色嘅浮雲，除此之外，我睇唔見任何一忽屬於陸地既綠色。

不過亦有一種可能，就係下面其實係一片同天空一樣，同樣係蔚藍色既海洋。

但係如果真係咁既話⋯⋯咁大既面積，一望無際，唔通⋯⋯



唔通下面係太平洋？！



但係白衣男講過，佢話我地而家雖然好似身處喺天空上面，但係其實下面係一個無盡嘅空間⋯⋯

係喇，冇錯喇⋯⋯既然呢度係一個我未曾接觸過既世界，如果我想用我原來世界嘅常理去理解佢，最終只會徒勞無功⋯⋯



冇錯，呢個世界根本有好多野都唔合理！



譬如話呢度既「溫度」。

一般黎講，喺咁高既地方，氣溫應該會相對較凍，但係我而家感到好溫暖、好乾爽，就同我一開始喺起點感受到既係一模一樣。



仲有「風」。

喺冇任何阻礙物既高空上面，風應該會吹得相對較猛，但係我而家感受到既，只係係柔和到幾乎可以用溫柔嚟形容既微風。



至於「光線」方面——

我抬頭望向個天，搵黎搵去，都搵唔到「太陽」既位置，成個天都照射出差唔多屬於同一程度既柔和光線。

我試過將隻手放近啲梯級度，諗住觀察下影子既形態，然後我發現影子既邊緣好濛、好散⋯⋯就好似我嘅手掌被幾個光源同時照射住，所以就產生出唔同角度既影子一樣。



所以啫係話，呢個世界，係冇太陽既？⋯⋯



其實就算冇太陽，我都唔係接受唔到⋯⋯但係咁樣，又會唔會洐生出其他嘅問題呢？譬如話呢個世界，到底有冇日夜之分㗎呢？⋯⋯

由起步到而家，都叫做行左好長既一段時間，可能已經有足足一日，但係個天色都仲係一d都冇改變過⋯⋯而又由於個天色冇變，咁就令到我更加難去辨識到時間上既變化⋯⋯

會唔會呢個地方，就好似地球以外既其他星球咁，因為自轉周期比較長，所以日晝時間亦長咗，因而令到天色既變化都變得相對緩慢啲呢？⋯⋯

啊，冇錯喇！好似有個星球，佢自轉一圈就要花上2個月。所以而家個天色好可能唔係冇變過，而係佢個變化相當緩慢！



⋯⋯



我、我究竟⋯⋯我究竟係度諗緊啲咩呀？！



頭先一開始咪話咗呢個世界唔可以用常理去理解架囉，咁點解⋯⋯點解我仲要係咁用常理去解釋呢個世界一啲唔合乎常理既現象啊？⋯⋯

而且我唔係失咗憶既咩？點解我好似⋯⋯我好似喺不斷思考既同時，不斷咁發掘到好多生前既一啲知識咁既？⋯⋯



⋯⋯



「啊～～～～！好煩啊！！！」



激動過頭，我一腳就踢向條天梯度，然後唔駛一秒，痛到入心！！

我抱住咗隻腳，成個人瞓咗係度咁起勢捽啲腳趾，然後我竟然發覺，佢哋好似已經一啲都唔痛。

痛感消散得太快，我覺得好奇怪。我慢慢咁放開雙手，諗住睇下佢嘅真實情況——

腳趾冇紅冇腫，就好似一啲事都冇咁⋯⋯

呢個時候，我心入面起左一個好強烈嘅疑問——



其實我呢一副身體，會唔會喺我死左之後，曾經被改造過呢？⋯⋯


#2 思考 完

我幫#1同#2 加咗張96 x 96 嘅pixel 圖

有興趣就㩒入去睇一下啦

https://www.penana.com/article/1403741

推

推

推

推

推

推