1) 牙帶 (又名牙帶, 日本人叫太刀魚.因為一上水真係成把刀咁令身) , 小弟由細食到大的魚,一般潮汕和福建家庭應該常購買,有時潮州打冷也會見到,煎到一舊舊,咸香味下送粥一流。(牙帶去整咸魚都好香)
係街市見到一大條銀色樣子個頭尖尖牙長長好惡的魚就係牙帶(有時砍到一舊舊放一碟一碟賣),可以長至2米幾都有,價錢中等,由於沒有養殖,所以一定係海魚,購買時愈令身愈多銀就愈新鮮,個D銀色狀物非工業用銀粉而是魚鱗,所以無需擔心食用。
帶魚主要分白帶同油帶,分別主要係隻眼睛到,白帶是黑眼,一般比較細條,但肉質比較幼嫩;而油帶是黃眼,一般大條好多,可以粗過你隻手臀咁粗,對比白帶雖然肉質無咁幼,但油香勁好多,由其係個腩位, 正啊。
帶魚營養好好,由其大病或生完BB後也可以多食,但有濕疹或者多暗瘡的朋友就盡量少食,家人有痛風就咁加唔好食。
煮法好多,最常見的是加少少鹽煎香,我媽煮法是燉,放三,四件鋪一隻超大碗度,中間放幾片肥豬肉,水同同少量薑,黨參,水滾放落去燉5分鐘左右就OK ~ 超超超超超正~ 當然你唔喜歡藥材味可以唔加黨參。
2) 黃立䱽
雖然叫黃立䱽,但實際佢同燕䱽,白䱽,鷹䱽並非一類 ; 黃立䱽其實反而係同黑䱽,油甘魚等屬於鰺科,這也解釋了為何前三者和後三者肉質有如此大的不同。
黃立䱽在90年代初算是中價魚,在當時是酒樓魚 ! 在酒樓魚缸也會見到一條一條遊水,但由於養殖技術愈來愈進步,加上易養 , 成為現今中國養殖數量最多的海魚 , 在廣東湛江市,有過十萬人係養黃立䱽為生,呢條魚係中國年產值達到100億元。記得22年,一次打風吹爛哂個邊的魚排,D魚多到游埋黎香港,如果有釣開魚或買開魚應該記憶猶新,個年應該係咁大個仔食黃立䱽最多條的一年。
黃立䱽有分養殖同海魚,兩種其實唔難分,海魚一般比較長身,味道兩姐也差好多,如果見到真係要買一條試下。
值得一提黃立䱽可以大到成米幾長,超大份,現在街市都唔難見到,砍到一舊一舊咁買,但呢種巨型黃立䱽9成都係養殖。黃立䱽仲有冰鮮同超市急凍,超市急凍十幾蚊就有交易,當然味道同新鮮有好大距離,不過都絕對食得落口。
黃立䱽肉質比較粗,雖然腥味唔重,不過坊間煮法都係重口味為主,最主要食法係蒜蓉豆豉蒸 , 有時間可以煎完後豉汁涼瓜煮,特別D食法可以試下氣炸鍋鹽焗。
3) 牛鰍
又名牛尾魚,係一種好好的煲湯魚,營養價值高,細路仔食開胃,大肚婆生完BB後食可以加奶,平時感冒支氣管炎咳唔斷尾食完可以順氣 (記住唔好只飲湯,儘量食埋條魚,好好味),味道唔腥,價錢唔貴,間唔中仲會見到有游水,我一般加蕃茄薯仔再加幾片薑去煲湯,魚質特點偏硬,唔會驚過火魚煲到熔哂。
4) 盲曹
海鱸魚的一種 , 台灣人叫金目鱸 , 是海養魚,未見過有野生,聽我老友阿爸(賣魚戶)吹水,盲曹,和淡水的加州鱸係90年代初期養魚技術的一個重要突破,因為呢三種原本都係魚食魚,唔食魚糧飼料,養魚戶花了唔少心機同時間先研究到點樣令佢到去食魚糧 (方法係將魚仔同糧的比例一步一步調高,而唔係一子轉哂)
不過呢兩種魚,推出初期受歡迎程度有天壤之別 , 加州鱸初出超級超級受歡迎 , 但盲曹的眼睛特點,令傳統的師奶顧客見到都怕怕,因為由細到大老豆老母教買魚都係睇隻眼要亮精精,偏偏盲曹隻眼就好似白內障咁,搞到無物人夠買,令唔少養魚戶損失慘重,也間接令他們轉去尋找新魚種,這也加快了養紅鮋的出現。
時至今天,盲曹的白內障傳說當然消失久久,成為街市其中一種平價養海魚,味道一般,肉質比較粗,少魚油,有微微草味 , 一般都是清蒸為主。
5) 九肚魚
又名豆腐魚 , 應該係大排檔最多人會叫的魚 , 也應該是最考你煮功的魚 , 唔熟者真係會炸到成個廚房都係油。當然九肚魚唔一定炸 , 加中芹大頭菜去煮乃至打邊爐都好正。
細個屋企唔係有錢,我個妹唔鐘意食魚,我阿媽花心思九肚魚起肉(難度超高)加豆腐同少少肉粒蒸,再落少少少豬油 , 個種味道真係一世難忘的好味。
各位朋友鍾意食咩魚? (1)
https://lihkg.com/thread/3659463/page/1