[毒撚出城]日本東北12日經歷春夏秋冬半鐵膠半賞櫻遊記

Day 7 開始

喺秋田大都會真係齋訓一晚，第二朝7點就起身Check Out返秋田站

買早餐後入閘去2號月台搭8點19分リゾートしらかみ1號

落到月台見到列車已經到達，月台上重有一隊人拍攝中


リゾートしらかみ1號多數用HB-E300系橅編成，橅編成係リゾートしらかみ三架列車中最新嘅一列，喺2016年先投入服務，車內設計以木材為主，感覺比其他兩架列車高級啲


自從上次搭リゾートしらかみ唔記得拎乘車記念證，今次上車後第一時間拎咗先


リゾートしらかみ三架列車嘅2號車廂都係包廂坐席，包廂坐席可以拉出嚟由座位變成床鋪/日式座席，不過包廂坐席唔可以喺網上預約，只能1個月前開始喺綠色窗口預約，所以今次無緣試到


疫情前嘅橅編成3號車廂有小賣部，疫情後改成2號車廂設立自助販賣區，但不接受現金付款


位於車頭車尾嘅1號同4號車廂設有展望室/活動空間，平時可以坐喺度睇風景，部分日子會有活動舉辦例如津輕三味線表演等


開車後準備食早餐，早餐喺7-11買，而且為應付今日行程安排，份量買得比較多

リゾートしらかみ去到東能代站後會倒轉方向進入五能線，原本喺車頭嘅4號車廂會變成車尾

東能代站月台上有個五能線起點標誌，旁邊就係リゾートしらかみくまげら編成塗裝嘅待合室


東能代站之後就係能代站，能代工業高等學校係傳統籃球勁旅，由創隊至今已經拎過58次全國高中冠軍(但我2019年去嘅時候已經係58次，即係近5年都冇贏過)

到車會喺能代停留10分鐘，月台有射籃遊戲，每人限射一球，射入會有小禮品，射唔入就下次玩再過啦

能代站記念蓋章圖案係天空の不夜城，源自於能代市七夕祭中會拉動嘅兩座城郭型燈籠，最高一座有24米高係全日本最高嘅燈籠


離開能代站後開始欣賞沿途風景，喺あきた白神站外更加有連綿嘅櫻花樹，奈何天公不造美整日都落住微微細雨



去到海邊嘅景色更加悲慘，人哋嘅海天一色係藍色，我嘅海天一色係灰白色

10點24分，即係大約搭咗2個鐘頭車，終於到達十二湖站

十二湖係1704年能代地震所形成嘅堰塞湖，總數其實有33個但企喺大崩展望所只能見到其中12個，最後就叫做十二湖

前往十二湖最直接方便就係搭五能線去到十二湖站轉巴士到奧十二湖駐車場，十二湖站內有旅客中心職員更新下一班巴士時間表，好貼心



巴士站位於十二湖站對面，由十二湖站搭去奧十二湖駐車場需時15分鐘，車費500Yen



落車後沿住指示行，好快就到達雞頭場之池


雞頭場之池係通往青池必經之路，途中經過一個比較開揚位置望出去，十二湖竟然重有紅葉，加上落雨下清新涼爽嘅氣溫，我覺得自己似係秋天去咗睇紅葉多過春天去睇櫻花

十二湖所在嘅白神山地早於1993年已經被到入聯合國世界自然遺產，係日本最早被列入世界遺產嘅其中一個景點

行到雞頭場之池盡頭就係十二湖中最有名嘅青池，但喺呢個角度望過去好似咁啡咁細嘅


幸好上樓梯去到展望台終於睇到青池嘅真正面貌，青池雖然面積只有975平方米，但水深就有成9米，因此水面經常都泛起藍色嘅光

由愈高望落去其實愈靚，可惜除咗展望台外，其他位置望青池都會被植物阻擋

今日係一日搭晒五能線リゾートしらかみ三架列車，行程安排上只有1個鐘頭留喺十二湖，由奧十二湖駐車場經雞頭場之池行到青池只係需要10分鐘，喺距離回程巴士重有50分鐘下，決定行埋去沸壺之池，而根據秋田白神觀光網頁上介紹，青池同沸壺之池嘅巡遊路線所需時間只係45分鐘，適合我呢類時間唔充裕但又想盡量行多啲地方嘅旅客



由青池沿住樓梯繼續往上行先經過ブナ自然林，喺度真係唔好浪費咗咁清新嘅空氣，行幾步停一停低深呼吸幾吓，感受一吓白神山地嘅美好

行咗5分鐘左右見到小路同路牌指示往沸壺之池


離遠見到有展望台同埋聽到有流水聲代表差唔多到達沸壺之池，建議停低腳步收細聲浪靜靜地聽吓現場瀑布流水所發出嘅聲音，令人好放鬆好舒服

沸壺之池雖然只有3.1米深，但沸壺之池係另一個有藍色湖面嘅池，但沸壺之池同青池係兩種唔同嘅藍，各有各靚

由沸壺之池行返去奧十二湖駐車場巴士站時經過がま池，要不是有個牌完全唔會意識到呢個都係十二湖33個湖其中一個池


行咗45分鐘左右就返到奧十二湖駐車場巴士站，未夠鐘搭巴士就去埋旁邊森ノ物産館キョロロ睇吓嘢同避雨

巴士準時12點到，同樣15分鐘車程同車費500Yen就返到十二湖站

12點15分返到十二湖站但1點04分先搭リゾートしらかみ3號，中間有時間就喺站附近周圍行吓，最誇張係有諗過行8分鐘去550米外嘅郵便局，礙於國道101號冇行人路先作罷，最後留喺車站內行產地直銷商店，但被另一個人食杯麵嘅香味引誘到我又食埋一份

五能線列車比較疏，除咗來回共6班リゾートしらかみ外，只有幾班普通列車，行程安排一定要事先規劃好，否則就好易錯過列車浪費時間

リゾートしらかみ3號用キハ48系くまげら編成，くまげら編成係2006年投入服務同現時最舊嘅一架列車，初投入服務時只有3卡列車，喺2010年初代青池編成廢車後將其中1卡車改造並拼入くまげら編成變做現時所見嘅4卡列車

雖然係最舊嘅編成，但リゾートしらかみ標準化下嘅くまげら編成一樣有展望室/活動空間

同樣地第一時間拎咗乘車記念證先


2號車廂都係包廂坐席，同樣可以拉出嚟由座位變成床鋪/日式座席，但就冇設立自助販賣區

座位都係最舊款，而且腳邊有條鐵突出嚟，坐得唔係咁舒服

搭1個站12分鐘車程去到ウェスパ椿山站落車，同くまげら編成講再見

喺月台已經見到黄金崎不老不死温泉接駁巴士已經等緊旅客，接駁巴士由旅館免費提供，乘搭リゾートしらかみ轉車唔需要預約但如果乘搭普通列車就要事前通知旅館安排


5分鐘車程後到達旅館，落車後向海邊行會見到不老不死温泉個牌，牌後面就係最著名嘅海邊露天風呂(露天風呂有分混浴同女性專用，由於有女性專用所以混浴大多數都只得男人)，但能夠望住日本海浸住溫泉已經係人生一大享受


不老不死温泉日歸溫泉收費600Yen，每個溫泉開放時間不一，海邊露天風呂開放時間就係早上8點到下午3點半，不過都要視乎天氣決定海邊露天風呂是否開放

浸完溫泉可以預約埋回程接駁巴士返ウェスパ椿山站

預約完成後喺開車前2-3分鐘到正門等候，但可能今次巴士冇其他人坐就安排咗架細車接送



原先打算喺不老不死溫泉逗留3個鐘，但浸完溫泉又冇嘢做就提早返ウェスパ椿山行一陣，ウェスパ椿山係1995年開業嘅歐陸風綜合觀光區域，有玻璃工房、昆蟲館、展望風呂等設施，可惜喺旅客不斷減少加上疫情影響，最終ウェスパ椿山喺2020年10月31日關閉，剩低一座座廢棄嘅建築，可能十年八年後變成另一個廢探熱點


現時ウェスパ椿山只得物産館コロボックル重有營運，提供物產販賣、列車資訊、食事處等服務

差不多夠鐘就離開物産館コロボックル返去ウェスパ椿山站等車，等車時見到不老不死温泉接駁巴士到達，迎接下一班到臨嘅旅客

最後一程リゾートしらかみ5號搭埋最後嘅青池編成(2代)，青池編成初代係キハ 48系喺1997年投入服務，現時嘅青池編成(2代)係HB-E300系於2010年開始運行(同樣地HB-E300系嘅橅編成都係2代)，青池編成絕對係リゾートしらかみ嘅大哥


上車後第一時間去展望室/活動空間拎乘車記念證，雖然青池編成同橅編成都係HB-E300系，但內裝就截然不同，橅編成充滿木嘅元素但青池編成就冇


青池編成2號車廂設計同くまげら編成更為相似，只係顏色有唔同，不過青池編成2號車廂同橅編成一樣有設立自助販賣區

普通座位就青池編成同橅編成一樣屬於較新設計坐得更加舒適



リゾートしらかみ5號去到深浦站會停18分鐘同リゾートしらかみ4號做交會，我就喺月台上做鐵膠慢慢影返青池編成同埋等リゾートしらかみ嘅橅編成影合照，但有乘客瘋狂到用18分鐘時間跑出車站外嘅Family Mart買嘢

喺深浦站開車後竟然有車上販賣服務，不過只賣蘋果銅鑼燒一款產品，500Yen 3個非常好味，唔知有冇其他地方可以買返


繼續喺車上欣賞五能線日本海絕景(唔好天版)

5點08分到達最後一個景點千畳敷，列車會停留15分鐘俾旅客可以落車參觀


千畳敷喺日本泛指好廣闊而又好平垣嘅地形，但我喺呢度望出去又唔覺好廣闊咋喎

後來見到有一團日本旅客穿過岩石之間嘅道路，我又跟住佢地行


去到另一邊之間終於明白點解呢度叫千畳敷，岩石形成嘅平台真係非常非常廣闊一望無際

影多張全景圖去表達現場嘅震撼

由於千畳敷實在太廣闊，開車前3分鐘車掌會響號提醒旅客就快夠鐘開車要返回車上

千畳敷之後都冇特別景點或停車站，加上重有1個半鐘頭車程先去到弘前(如果去青森重有2個鐘頭)，大部分旅客都進入休息狀態直到弘前或青森落車

さざえ堂好撚型

第一次去落大雨

+1

同埋可能見我人少又唔識日文就唔放位

有玩射波但射唔入

行上去好好玩

好易去，如果安排到會津嗰日下午或者離開嗰朝行一行幾好

我都無拎白神號記念證、見佢d台灣人沖埋去揾個印、嚇左一跳

https://www.hirosakipark.jp/sakura/2024/05/16393/
のべ245万人（弘前市発表、推計値）が訪れた今年の祭りを振り返ります。
今年破紀錄、唔知有幾多巴絲打去左、連登賞櫻大會

好在我冇留到一晚，咁嘅天氣住不老不死會唔開心

我係之前試過唔記得拎，所以今次就第一時間拎咗先

幾時到你出，留名等睇