[毒撚出城]日本東北12日經歷春夏秋冬半鐵膠半賞櫻遊記

日本實在太多地方想去，去極都去唔完，武肺浪費咗3年時間，開關後已經把握機會完成咗全國Pass鐵道遊暨賞紅葉、立山黑部開山睇雪牆等等，但仍然未有機會賞櫻，於是喺上年7月就提早安排今年4月去東北賞櫻

東北櫻花期大約係4月中後期，唔會撞中復活節最多人亦都係最貴嘅時間，而且東北有多個著名嘅賞櫻勝地，非常適合喜歡睇櫻花嘅巴打

機票係上年7月已經買定，買完後已經計劃行程同預約酒店，部分酒店更加係入住前半年一開賣就要搶，幸好櫻花期同預測相差不遠，由計劃到出發都非常順利

Day1 香港飛成田機場 搭NEX出東京
Day2 東京搭新幹線經郡山到會津若松 租車自駕到飯盛山さざえ堂同大內宿
Day3 自駕到會津宮下影只見線列車 經喜多方同米澤到山形藏王睇雪住溫泉旅館
Day4 自駕到山形還車 搭仙山線中停山寺 到仙台瘋狂食牛舌
Day5 搭仙石線到日本三景之一松島海岸 搭新幹線到田澤湖 租車自駕到乳頭溫泉鄉住妙乃宿
Day6 乳頭溫泉鄉浸4個日歸溫泉 自駕環田澤湖一圈 還車後搭新幹線到角館賞櫻 再搭新幹線到秋田過夜
Day7 搭五能線Resort白神號 中停十二湖、黃金不老不死溫泉同千疊敷 到弘前賞夜櫻
Day8 弘前公園賞櫻 搭Resort白神號到青森 參觀八甲田丸、睡魔館、青森物產館ASPAM、A-Factory
Day9 租車自駕到八甲田山睇樹冰 再到青函隧道入口影新幹線、龍飛崎睇北海道、青函隧道記念館
Day10 自駕到十和田湖、奧入瀨溪流 再到八戶八食中心、蕪島睇海鷗 到三澤機場還車後飛羽田機場
Day11 到新橫濱拉麵博物館 搭京急返東京去東京鐵塔
Day12 東京搭NEX去成田機場 返香港

以往都有寫開遊記，歡迎返去睇返舊時嘅遊記

[毒撚出城]周末去岡山睇紅葉行古城睇雲海
https://lih.kg/24236

[毒撚出城]周末快閃四國南部踩車行山浸溫泉
https://lih.kg/182277

[毒撚出城]長野新潟瘋狂睇櫻花坐火車乜鳩都影5日旅程
https://lih.kg/223583

[毒撚出城]快運苦主南九州十日鐵道遊記
https://lih.kg/417262

[毒撚出城]大英祖國17日回鄉之旅
https://lih.kg/964146
https://lih.kg/995549

[鐵膠多圖]16日由北海道搭JR返九州瘋狂鐵道兼紅葉遊
https://lih.kg/btPxOqU

[毒撚出城]半自駕半鐵膠8日南九州之旅
https://lih.kg/bDDcHLU

lm

事不宜遲，即刻開始遊記



而家搭飛機等上機前都鍾意喺天際走廊睇飛機，雖然今次睇唔到飛機直接由下面穿過，但已經好滿足


窮撚搭快運去日本，今次機票連埋劃位、行李、去程飛機餐、回程U-first都唔洗2500，算係平得嚟又有少少享受

48小時前網上預訂嘅堅信號生煎包同豬扒菜飯，難得地個生煎包又幾好味，同地面食差唔多


去程雖然揀咗A位，但冇預期下可以喺飛機上面睇到富士山真係好驚喜
(相反回程特登揀F位為咗睇富士山但睇唔到有啲失落)

飛機好準時到達成田機場，落機後過關拎行李都好迅速，離開禁區後第一時間去JR東日本旅遊服務中心，買NEX來回車飛同拎Eki-net預訂咗嘅車飛

今次旅程原本想用JR東日本東北Pass，但自從價錢由20000Yen加到30000Yen，加上只可以連續5日使用，計過數後散買車飛重平過用Pass，而且用Eki-net預訂重可以1個月前買指定席券揀埋位
(不過我部分車飛其實係1個月前喺關西旅行時自己去綠色窗口買，第一次用呢個方法覺得幾好玩)


搭NEX 48號出東京站，E259系已經十幾年車齡但望落重係覺得好靚唔Outdate

雖然好多日鐵Post巴打都唔支持搭NEX，但我不嬲都係首選搭NEX，原因都係我鍾意住東京站附近，鐵路計嘅話NEX一程過到東京站好過搭Skyliner轉車

至於巴士就上年去立山黑部時搭過一次，其實都幾滿意但身為鐵膠都係鐵路優先


唔洗1個鐘頭車程就到達東京站總武線地下月台


第一晚晚餐簡單啲喺東京站拉麵街解決，而且見邊間少人就食邊間，見東京煮干拉麵玉少人就入去，果然開得係度嘅水準都唔差


食飽後就去京橋Daiwa Roynet酒店Check In，而家去日本住酒店好多時都揀呢個集團，而且鍾意揀有乾濕分離而唔係組合式浴室嘅酒店

Day 2 開始



第二日一早就起身，Check Out後喺東京站駅弁屋買個早餐就去22號月台等8點07分やまびこつばさ127號

極度完美主義嘅我每次搭車前都要影站牌

影完站牌又未夠鐘搭車就周圍睇同影新幹線

首先影E5系，E5係JR東日本首款可以行到時速320公里嘅新幹線，2010年已經投入服務，係東北新幹線嘅主力

21號月台就有E6系，E6主力行走秋田新幹線，由於秋田新幹線係迷你新幹線所以車身比較窄，但係盛岡以南嘅東北新幹線路段內同樣可以行到時速320公里

另一邊就有JR東海嘅N700S，N700S係東海道新幹線最新列車，暫時我未有緣份搭到

最後影埋E3系，E3喺1997年已經開始營運，但當年係0番台行走秋田新幹線，而家呢批係1000/2000番台行走山形新幹線，不過呢批E3都好快會被最新嘅E8系取代


本身係想劃やまびこ127號，但劃位時職員話やまびこ127號冇位就幫我改劃一齊運行嘅つばさ127號，可能就係我最後一次搭E3

坐低後開始食早餐，呢個蟹肉便當非常好味，下次再去駅弁屋可以再食

LM, 5天pass真係唔夠唔係有pass, 會坐返skyliner

やまびこつばさ停站比較多，8點07分開車要9點31分先到郡山
https://youtu.be/i9MFZy7GgH8
落車後留喺月台睇E5同E6以時速320公里通過郡山，現場睇真係超級震撼

郡山站內嘅按摩椅都用E5塗裝，好正


離開新幹線收費區就轉去在來線搭10點15分快速あいづ1號去會津若松，雖然10點05分有班觀光列車あいづSATONO都可以去到會津若松，但あいづSATONO早10分鐘開車反而遲20分鐘到，所以最終揀搭快速列車而唔係觀光列車

快速あいづ1號用車係4卡編成E721系，其中半卡列車係指定席，其餘就係自由席

雖然係4卡編成，但由郡山去會津若松嘅乘客都幾多，4卡車接近企滿開出


あいづSATONO用車係HB-E300系，由リゾートあすなろ其中一編成喺2023年改裝而成，觀光列車開車前都有職員拉橫額揮手送別

開車後經過藤田川見到好多櫻花，賞櫻嘅人都好多


揀坐右邊就可以睇到磐梯山，磐梯山有會津富士之稱亦係日本百名山之一

差不多到達會津若松時望去遠處係另一日本百名山嘅飯豊連峰，鋪滿白雪嘅飯豊連峰加埋路軌旁嘅油菜花超級靚


65分鐘車程後到達會津若松，落車後影多次剛才坐嘅E721系

會津若松站外有隻非常大嘅赤べこ，赤べこ係會津地區嘅吉祥物，個頭點下點下咁好得意，每個離開車站嘅人都會同佢影張相先走

去到會津若松第一時間到旁邊Toyota租車，而家JR東日本駅レンタカー同Toyota合作，雖然有兩個門口但行到入去都係同一個櫃台

今次陪我3日2夜係Toyota Roomy，25000Yen包埋喺會津若松拎車去到山形還車同保險



拎車後沿住站前白虎通一條大直路揸10分鐘車就到達飯盛分站有料駐車場，雖然要俾1000Yen泊車費但500Yen可以用返喺飯盛分站買紀念品，而且泊車後會有埋飯盛山案內圖派發，一條龍服務非常好


跟住案內圖指示由本參道開始行，先經過白虎隊傳承史學館，館內介紹會津戰爭嘅歷史，我自己冇特別留意日本歷史就冇入去參觀，對戊辰戰爭有興趣嘅巴打就唔可以錯過


4月中旬嘅會津若松剛剛好係櫻花滿開嘅時間，飯盛山上都有唔少櫻花開到好靚



本參道行到最盡頭就係嚴島神社同戸ノ口堰洞穴，洞穴內不斷有水由猪苗代湖戸ノ口引過嚟

留個名先

由本參道盡頭向右邊繼續行就到さざえ堂，さざえ堂1796年已經建成，喺1995年被指定為重要文化財

由於建築物內部兩條通道嘅設計，呢類型嘅建築被稱為さざえ堂

入場費400Yen，課金後就可以行入去さざえ堂，亦都因為要保護建築物，每次最多只可以30人進入さざえ堂


雖然さざえ堂只得16米高，但不斷咁旋轉行上頂層好似行極都未到咁，上到頂層就經過拱形通道往另一邊返落地面

由さざえ堂嘅窗望出去外邊只可以睇到少許風景，但以さざえ堂嘅歷史價值，欣賞建築物內部比起睇風景更值得


慢慢睇完內部結構就返落地面，上さざえ堂容易落さざえ堂難，返落去時要慢慢行好小心先唔會被木條Kick親

さざえ堂由飯盛本店負責管理，飯盛本店除咗有紀念品賣之外，喺飯盛本店望出去會津若松嘅景色都好開揚好靚
(不過飯盛本店同飯盛分店係唔同鋪頭，剛才嘅泊車券唔可以喺飯盛本店用)

自己一個都自駕咁Rich?
但奧入賴溪流去十和田湖唔係沿路行會靚啲咩？
嗰時我都行咗好耐

離開飯盛本店後沿路行去飯盛分店旁嘅飯盛山展望台，睇風景順便用埋500Yen商品券


喺飯盛山展望台望出去景色更加開揚，加埋櫻花襯托非常之靚

睇完風景行去另一邊由高處影返さざえ堂全貌

さざえ堂同飯豊連峰合照

睇完風景影完相就經飯盛山仲見世離開，返去飯盛分站有料駐車場拎返部車去下一站

我今次咁啱來回都係東京站就買來回優惠車飛，上次單程就坐巴士，Skyliner可能要揀住上野嗰邊先坐

5日Pass起碼搭一程東京去新青森/秋田先回本，重要連續5日用真係搞唔掂

毒撚x2出城

我都想慢慢行，但我比較貪心想去多啲地方最後選擇慢駛

離開飯盛山後大約揸50分鐘車程去下一站大內宿，唔係自駕就可以經會津鐵道湯野上溫泉站轉巴士

喺未有鐵路嘅年代，由東京前往東北嘅路程要以星期計算，沿途會有唔同嘅宿場設立方便旅人留宿，大內宿就係會津西街道上其中一個宿場亦都係日本三大茅葺屋根集落之一

大內宿中間係主要通道，兩旁有幾十間茅草屋頂建築物排列，成個格局好整齊好靚


到達大內宿後首先搵間餐廳食蕎麥麵，見到最外邊嘅三澤屋冇人排隊以為即刻有得食，但原來係要拎籌等1小時



等候期間就喺大內宿遊覽住先，行多幾步見到南仙院有會津名物蕎麥粉天婦羅饅頭，入面係紅豆餡料甜甜地咁幾好味



食完饅頭就轉左行去高倉神社，由大內宿街道行去高倉神社要幾分鐘步程，途中先經過一大片農地，高倉神社就係位於盡頭嘅杉樹林中，環境好清幽舒服冇咩人，同熱鬧嘅大內宿街道形成對比

離開高倉神社返到大內宿街道後行埋去最盡頭，登上小山丘睇埋大內宿最經典最靚嘅角度



由山丘上望出去，道路有少少彎曲位於正中間，左右兩邊向一排茅草屋一間接住一間排好，成個景色就好似名信片入面一樣

遇上秋天時有紅葉或者冬天時有雪，成個景色會更加靚

影完相行樓梯返落去


差唔多到預約好嘅時間就返去三澤屋，最著名嘅大蔥蕎麥麵1320Yen一碗，雖然有筷子提供但一定要試下用大蔥嚟食，食完重可以加啲煮蕎麥麵嘅水飲埋個湯

另外叫咗一客鮎の桶り子，原來係炸魚加上酸酸甜甜嘅汁，幾好食

喺大內宿食完蕎麥麵後見有時間淨，就Google吓附近有冇景點吸引，最後搵到距離大內宿20分鐘車程嘅塔のへつり，塔のへつり位於會津鐵道塔のへつり站附近，即使唔係自駕要去參觀都非常方便



塔のへつり就如名稱所示，係一排好似佛像嘅天然崖壁，而且塔のへつり非常容易到達，停車場旁已經係展望台


由展望台行1分鐘左右就會到達阿賀川同藤見橋，喺藤見橋旁望出去塔のへつり嘅景色比展望台更靚


橫過藤見橋時慢慢欣賞阿賀川景色


過完藤見橋去到對岸後有條樓梯，上面個岩洞入面有虛空藏菩薩

虛空藏菩薩外又係另一個影相嘅好位置，可以由高處回望返阿賀川同藤見橋

不過我去到塔のへつり時已經差不多5點，現場嘅遊客唔多鋪頭亦都準備閂門，最後冇逗留太耐就離開，但塔のへつり不失為一個參觀大內宿時可以配搭嘅景點

離開塔のへつり返到會津若松後開始天黑，係時候搵個地方食埋晚飯就準備休息

日本有三大拉麵，分別係札幌拉麵、博多拉麵同埋喜多方拉麵，前兩者相信大家都聽過甚至食過，但喜多方拉麵比起佢地就較少被香港人認識

今次幫襯嘅來夢雖然唔係評分最高但貪佢位置方便，就喺會津若松站旁邊

喜多方拉麵都係豚骨湯底但冇博多豚骨咁濃厚，麵條係4mm闊嘅平打熟成多加水麵，配上與眾不同嘅叉燒，食落非常夾同好味，難怪同札幌、博多齊名為三大拉麵

食飽後就去酒店Check In，會津若松住宿選擇唔多，喺正車站對出嘅華盛頓酒店相信係最方便亦都係最多人揀嘅酒店，加上只係400蚊一晚非常超值

由酒店房望出去更加望到會津若松城，可惜今次行程唔夠時間冇安排到過去參觀，唯有留返下次再嚟會津若松先去啦

Day 3 開始



第3日朝早未夠6點就Check Out離開酒店，揸咗40分鐘車去道の駅尾瀬街道みしま宿，泊好車執好行裝就開始第一個行程 - 影只見線列車


近10年8年開始，香港同台灣遊客都興起搭只見線同影只見線列車，網上都多咗好多攻略教人點搭車同咩位置影相最靚

當中最易去亦都最多人去就係只見線第一橋樑，自駕就可以直接開車去道の駅尾瀬街道みしま宿，搭車嘅巴打都可以坐只見線去到會津宮下，再轉搭巴士到達

到達道の駅尾瀬街道みしま宿後跟住只見川ビューポイント遊步道好輕鬆就去到3個影靚相嘅位置，案內圖上更加有列車通過只見川第一橋樑嘅時間表

影只見線列車熱門到東京奧運聖火都曾經嚟過同只見川第一橋樑合照

由道の駅尾瀬街道みしま宿開始經過馬路旁嘅行人橋

去到盡頭就係只見川ビューポイント遊步道入口A點


沿住樓梯開始行，1分鐘後就會到達第一個影相位B點


喺B點用Iphone 1倍同3倍鏡頭都好容易影到只見川第一橋樑，不過景色就唔夠開揚亦都影唔到列車反映係河水之中，但勝在最容易去到


離開B點再向上行3分鐘左右就到達C點


C點望出去只見川第一橋樑嘅角度高咗，當列車通過只見川第一橋樑時可以影埋河水中嘅倒影，用Iphone 1倍同3倍鏡頭影相都勝任有餘，只係用1倍鏡頭仍然影到附近嘅樹同草

lm
我都係食來夢 一樣覺得個麵條好食

由C點繼續向上行，行到見到鐵塔就係最高嘅D點


由D點望出去第一只見川橋樑最開揚最靚，而且唔只影到橋樑重可以影埋群山環抱嘅景色

只係D點影相對Iphone 1倍同3倍鏡頭都開始有啲吃力，要影到靚相可能要用專業啲嘅裝備

D點向左邊方向就會望到只見川第二橋樑，不過呢邊用Iphone影相就非常有難度


喺D點等咗一陣就見到頭班往只見方向嘅列車通過只見川第一橋樑，係JR東日本キハE120系
https://youtu.be/9jnkCHnRYgQ
另外亦都用Iphone 11 Set咗腳架拍列車通過嘅片段

影完上行列車通過後，等多一陣就見到下行列車通過只見川第二橋樑，嘗試用Iphone 3倍鏡頭去影，但出嚟效果好差

https://www.youtube.com/watch?v=kfzTxvFWd_Q
到下行往會津若松方向嘅列車通過只見川第一橋樑時，今次轉用Iphone 15拍片，改用Iphone 11影相

下行往會津若松方向同樣係JR東日本キハE120系，但今次通過只見川第一橋樑時車速慢咗好多，好似想方便大家影咁

自駕嘅好處係早啲去到可以影多一班車，當我影完7點23同7點41分通過嘅列車返到道の駅尾瀬街道みしま宿，剛才搭頭班車入嚟影相嘅人先剛剛到達

喺道の駅尾瀬街道みしま宿有個旅客統計，睇吓旅客係來自咩地方，超過一半都係台灣旅客

唔同季節嘅只見線風景，我喺2019年秋天時嚟過，但當時係颱風過後成條只見川都係黃泥水，完全睇唔到相入面紅葉景色

至於冬天鋪滿雪就係咁多季節中最夢幻，但同時因為有雪情況下要行上山影相都係最困難

道の駅尾瀬街道みしま宿內亦都有間食堂，即使喺只見線留大半日影相都唔怕冇地方解決午餐


離開道の駅尾瀬街道みしま宿就開車去下一個影相位宮下アーチ3兄(橋)弟，宮下アーチ3兄(橋)弟位於會津宮下站附近，步行5分鐘就可以到達，Google Map上亦有標示

宮下アーチ3兄(橋)弟分別係1941年開始使用嘅長男只見線鐵道橋(中間嗰條)，1957年開始使用嘅二男小栗山宮下線橋(近嗰條)同埋1989年開始使用亦都係最大條嘅三男國道252號線橋

https://youtu.be/zQ1kD8U6Ji0
喺宮下アーチ3兄(橋)弟等9點04分往只見方向嘅列車通過就影相拍片，第二班車係2卡編成嘅JR東日本キハ110系

由於時間緊逼，今次拍片冇落腳架而且一影完相就即刻上車趕去下一個拍攝點

最後一個拍攝點就係只見川第二橋樑旁邊，揸車只需要3分鐘但我要趕喺下行列車通過前到達，至於步行就需要20分鐘，如非自駕就只能同宮下アーチ3兄(橋)弟二選一

泊好車後睇下邊個角度影相會比較好

最後覺得影晒成條只見川第二橋樑會比較靚，就Set定腳架等列車通過
https://www.youtube.com/watch?v=ecytA9QoCrI

第三班往會津若松方向下行列車用2卡編成JR東日本キハE120系，而且分別係綠色同橙色不同塗裝

雖然喺只見川第二橋樑影唔到列車反映喺河面上，但有列車嘅影子都已經好滿足

最後Zoom埋去影近啲2卡編成JR東日本キハE120系

影完9點幾兩班車之後都係時候離開，準備揸長途車經過喜多方同米澤去山形藏王

由會津宮下開車去山形藏王要2個半鐘頭，中間就揀咗兩個地方停低休息，第一個停車位係道の駅喜多の郷

正值櫻花滿開，加埋飯豊連峰做背景，當道の駅喜多の郷係一個景點咁去影相都非常正



道の駅喜多の郷旁邊有八方溜池，兩旁種滿櫻花樹，又係一個打咭位

另外停車時喺道の駅喜多の郷入面買咗個喜多方拉麵仙貝幾好食，食落真係有拉麵嘅味道


離開道の駅喜多の郷經國道121號由福島縣去到山形縣，去到米澤當然要試一試三大和牛之一嘅米澤牛

揀咗位於米澤站前嘅米澤牛DININGべこや，喺Tabelog上面有3.56分，亦都係2022年燒肉百名店之一

入面大部分座位都係個室，好有私隱亦唔會好重油煙味

平日午餐Menu由最平1580Yen到最貴5500Yen都有，揀自己燒或者Set形式都得，豐儉由人

唔鍾意食午餐Menu都可以單點

食午餐時間有限就唔食咁豐富，揀咗4200Yen嘅米澤牛ステーキ重，已經包埋沙律、漬物、湯、飲品、甜品，米澤牛入口即溶非常非常好味

覺得唔夠喉叫多一客米澤牛炙りうにのせ壽司，個好味程度唔識得點形容，總知就係好好食

食飽後會上埋甜品，係橙味雪葩，最後2個人埋單唔洗10000Yen，超值

離開餐廳轉個彎已經係米澤站，就算唔自駕而係搭JR過嚟食米澤牛都好方便