正在北美進行巡迴演出嘅MIRROR，美國時間星期四晚由西岸飛抵東岸嘅紐約，第二朝就登上當地FOX5 New York嘅晨早節目Good Day New York接受訪問。
訪問環節大約7分鐘，前半段MIRROR全團跳唱與NBA球星Damian Lillard(DAME D.O.L.L.A)crossover嘅最新英文單曲Day 0，但由於錄影廠難以容納十二子同時跳唱，部份時間有個別隊員要跳出鏡頭外，但舞蹈擔當Anson Lo盧瀚霆同Frankie陳瑞輝都近乎跳足成首歌。
MIRROR登上紐約電視台訪問被稱為「新王者」 Anson Lo Ian Stanley做英語擔當
之前MIRROR接受英語訪問時，主要由Anson Lo同Ian陳卓賢負責回答，今次喺紐約嘅訪問除咗佢地2位之外，仲有「大表哥」Stanely邱士縉同Edan呂爵安做埋英語擔當，但訪問期間Edan未有機會發言。
主持之一Curt Menefee想知多啲廣東歌(Cantopop)有咩特色，Anson Lo話除咗吸收世界各地嘅音樂曲風以外，亦會注入香港流行曲嘅旋律風格，任何人都會欣賞。之後另一主持Rosanna Scotto話要「搞事」，於是問MIRROR邊位成員最跳得，Stanley就話Just near you，再指向企喺Rosanna身邊嘅Anson Lo。Rosanna又問MIRROR邊位成員最唱得，Stanley就話Also near you，今次就示意係Ian。但可能大家都一時走神，Rosanna以為Stanley指嘅係佢，Rosanna有啲唔明就話”...like what?” 。後來主持Curt 打圓場，仲叫MIRROR第時更受歡迎時唔好唔記得佢地。
