10 Like
28 Dislike
灣子
2024-03-16 00:25:31
「出嚟飲嘢?」
「唔出」
彷彿早有預料,周洛軒幾乎係喺下一秒就send多咗個message嚟。
「185大隻消巴」
我即刻彈起身。
「行得」
灣子
2024-03-16 00:28:46
1
「佢哋話坐咗喺最角落頭喎。」酒吧入面,我個friend拉住我行過去搵佢其他friend。
幾日前,佢話佢約咗成班人飲嘢,仲同我講話重仔,問我join唔join。
我見還掂都得閒,就跟咗過嚟。
「我見到佢哋喇!」離遠我就見到佢啲friend對我哋兩個招手。不過一齊行過去嗰陣,佢突然好興奮咁用手踭撞咗撞我:「喂中間嗰條仔幾得喎,之前冇見過佢嘅?」
我順住佢嘅視線望向坐喺中間嗰個男仔。
佢着住一件黑色冷衫,入面襯咗件白恤衫。呢刻佢正喺度唔知同其他人傾緊乜好笑嘢,笑得好開朗,氣質爽朗乾淨。
望落完全係嗰啲青春校園劇男主角。
呢個係我對嗰個男仔嘅第一印象。不過喺我專注咁打量緊佢嘅時候,佢好似感受到我嘅視線,抬頭望咗過嚟。
雖然偷睇人仲要俾對方發現咗,不過我一啲都唔心虛,氣定神閒咁對佢笑咗笑。
佢亦大方咁回以我一個微笑。
我喺我個friend耳邊細細聲評價:「成個小白臉咁。」
坐低之後,我個friend撩個男仔講嘢:「係呢未見過你嘅?」
對方指咗指自己右邊嘅男仔:「我俾佢叫過嚟㗎咋。」又自我介紹:「我叫Hinson呀,你呢?」佢修長嘅指節握住酒杯,飲咗一啖酒。
我喺隔離聽住佢哋嘅對話,心諗:嘩佢個名咁mk嘅。
呢一晚,我對呢個男仔嘅印象就只有「英文名好mk」同埋「幾靚仔」呢兩樣。
之後我同飲嘢呢班人熟晒,但同Hinson就唔係好熟。一嚟我同佢都唔係成日出嚟飲嘢,二嚟就算我哋兩個都出咗嚟,我哋通常都係各自同自己最熟嘅friend一齊坐,隔得好遠,唔會有咩交流。
我諗成班人入面我同Hinson算係最唔熟。
就算之後勉強叫做同佢識咗一排,我對佢嘅了解仍然唔深,淨係知佢同我讀同一間u。不過我從來冇喺學校撞到過佢。
但好快,我就喺一個意想不到嘅場合撞到佢。
因為分咗手一排有啲無聊,我開始咗玩交友app搵食,仲約咗一個大隻仔出嚟。
揀酒店嗰陣,對方問我近邊頭。我直接俾咗個酒店名佢。間酒店同我學校車程距離十五分鐘,我已經去過幾次,幾靚幾乾淨,而且夠晒方便,我可以一放學就直接過去。
當然我冇話俾佢聽我就係喺嗰度附近返學。
喺酒店附近碰面後,我哋一齊check in,之後就一邊傾計一邊等𨋢上房。
過咗冇耐,𨋢門打開咗。入面有一男一女,個男仔攬住個女仔條腰,兩個人姿態親暱咁行出嚟。應該係啱啱開完房嘅情侶,又或者好似我同我隔離個大隻仔咁係sp都未定。我一邊諗,一邊睄咗佢哋一眼。
我第一眼係望向個女仔先嘅,因為佢個樣好cute,眼大大勁童顏,但同時又勁大波,仲要着低胸吊帶背心。雖然佢出面笠咗件外套,但都係好吸引目光。而攬住佢嗰個男仔就幾高下,着咗件灰色hoodie加牛仔褲,係好典型嘅大學生打扮。
不過我望多兩望就發現個男仔好面善。
唔係喎,呢個咪Hinson?
灣子
2024-03-16 00:29:46
2
認出Hinson嗰下,我嘅表情勉強算係平靜,但其實內心係極尷尬。我移開目光,望都唔敢望佢。
雖然好希望Hinson唔認得我,不過擦身而過嗰陣,我感覺到佢嘅視線停留咗喺我身上好幾秒。
我唯有若無其事咁擰轉面同大隻仔講嘢。
兩個禮拜後,我約咗另一個大隻仔去返同一間酒店。雖然有啲驚會再撞到Hinson,但同時我又抱住僥幸嘅心態,喺內心瘋狂祈禱希望佢同我唔同,唔係呢間酒店嘅常客。
Check in之後,我同大隻仔2 號行去等𨋢上房。
𨋢口有另一對男女都等緊𨋢,背對住我哋。我一直耷低頭㩒電話冇認真望佢哋,直到架𨋢到咗,嗰對男女入𨋢之後轉身面向𨋢口。
見到佢哋個樣嗰下,我倒抽咗一口涼氣。
冇錯,我又撞到Hinson。
佢都好明顯認得我,仲望咗望我隔離個大隻仔。
應該係因為發現同上次嘅係唔同人,Hinson個樣睇落好似有啲想笑但又忍住咗。
我硬住頭皮咁同大隻仔一齊入咗𨋢。
諗諗下其實我都冇乜必要咁尷尬,因為Hinson隔離個女仔都唔係上次嗰個。
而呢個女仔同上次嗰個有個共通點,就係大波。
呢日之後我一直都提心吊膽,好擔心Hinson係嗰啲好多口嘅人會周圍唱我。不過佢似乎冇同過其他人提起過喺酒店遇到我呢件事,因為之後其他人有約過我出去飲嘢,佢哋對我嘅態度都冇乜異常。
可能Hinson都唔想俾人知佢有搵開sp。
不過為咗避免再次撞到佢咁尷尬,我之後約炮都唔敢再去返呢間酒店。
再下一次遇到Hinson係因為我個friend生日,我哋成班人去咗個friend屋企開party。
我全程都刻意避免同佢有交流。好彩佢都冇走嚟同我講嘢,可能係同我抱住一樣嘅諗法。
不過飲酒飲到最後,其他人醉晒癱咗喺度嗰陣得返我哋兩個仲未冧低。唔講嘢又有啲尷,我唯有若無其事咁撩佢講嘢。
「嘩佢哋咁廢嘅?一個二個咁快瞓低晒。」
「係囉。」
然後我哋就deadair咗。呢刻我坐喺梳化,而Hinson就企喺餐檯隔離,氣氛侷促。
正當我為呢刻嘅尷尬氣氛而頭痛嘅時候,Hinson突然問我:「你仲飲唔飲得落?」
「飲得落呀。我而家四成醉左右啦。」
「咁串?」佢走咗埋嚟亨我隻酒杯:「咁飲啦。」佢笑住坐咗喺我隔離。
之後我哋兩個係咁飲酒。其實我冇話特別想飲,只係呢刻如果唔飲酒嘅話我都唔知做咩好。
我同Hinson由一開始玩猜枚,到之後玩大話骰、啤牌。最後我哋索性咩都唔玩,淨係齋劈。
事實證明呢個決定係錯誤嘅,因為我哋最後飲飲下酒就無啦啦變成喺梳化度打茄輪加互摷。
我哋喺梳化上纏綿。本來接住落嚟嘅一切都會順理成章,直到Hinson揸揸下我個波無啦啦停咗手。
我喘住氣好疑惑咁望向佢。
我以為佢係理智突然恢復所以停咗手,點知佢只係眼神空洞咁呆坐咗喺度,一隻手仍然放喺我胸前。
幾秒之後,佢低頭,然後毫無預兆咁嘔咗落我度。
我當堂成個人醒晒。
刺鼻嘅嘔吐物味喺成個空間瀰漫,搞到我都有啲想嘔。而作為始作俑者嘅Hinson嘔完之後直接斷埋片,我拍極佢都唔醒。
最後我用咗兩個幾鐘喺度清理現場同埋沖涼(沖咗三次)。
陳樂
2024-03-16 12:02:44
留明
紙巾哥
2024-03-16 12:10:25
lm
灣子
2024-03-18 18:52:23
3
第二日Hinson竟然記得前一晚發生嘅事。佢趁住其他人唔為意嗰陣表情尷尬咁行埋嚟同我講sorry。
「不過你真係幾飲得。我都係第一次同人劈酒劈到咁。」佢唔好意思咁搲咗搲頭,表情有啲傻。
雖然成件事好鳩,不過其實我都幾慶幸我哋前一晚冇繼續落去。我哋有共同朋友,我唔想啲關係變得太複雜。
「下次再一齊飲酒吖,」最後Hinson講:「我唔會再飲到嘔。」
「吓你仲飲呀?」我下意識咁反問。
經歷完前一晚嘅事,我已經產生陰影。
可能係我嘅表情太過嫌棄,佢笑得勁誇張。
下一次成班人約出嚟唱k嗰陣, Hinson趁住其他人走去點歌同去廁所嗰陣坐咗喺我隔離。
我疑惑咁望向佢。佢乜都冇講,淨係用佢隻酒杯亨我。
「又嚟?」我語氣勁無奈,而佢嘅表情勁期待。
「嚟啦,我真係唔會再飲到嘔。」佢躍躍欲試。
見佢咁堅持,我嘆咗口氣,將自己杯酒一飲而盡。
結果Hinson今次真係冇嘔,不過就斷咗片。
好好笑,佢臨斷片之前仲對住我勁吃力咁講「下次再飲」,每粒字都係夾硬咇出嚟嘅。
連佢啲friend抬佢走嗰陣都忍唔住笑佢:「條友平時咁牙擦,今次終於都遇到對手。」
自此之後Hinson就開始間唔中約我飲酒。一開始係同其他friend 一齊,後尾我哋越嚟越熟之後有時會單獨約。只要我得閒,我多數都會應約。
不過我哋冇再做過任何越軌嘅行為,亦好有默契咁冇再提過生日party嗰晚嘅事。
Hinson成日都好堅持要同我鬥飲,但每次結局都係佢醉到要我送佢返屋企。
其實送佢返屋企都唔係問題,問題係我送佢返屋企嗰陣佢啲屋企人以為我係佢女朋友,勁尷尬⋯⋯
我第一次送Hinson返屋企嗰陣係佢媽咪嚟應門。
「點做人男朋友㗎要人哋女仔送你返嚟。」佢媽咪一見到我就喺度講。
我一邊同佢一齊稱Hinson入屋一邊解釋:「唔係呀Auntie,我係佢個friend。」
不過我覺得佢唔係幾信,因為安頓好Hinson之後,佢就捉住我係咁問關於我嘅嘢。
我入咗屋短短十五分鐘,Hinson媽咪已經知道晒我嘅中英文名、讀咩major、住邊度、生日,甚至係我最鍾意嘅卡通人物。
「Auntie唔好意思呀我真係要走喇。」我最後終於忍唔住。
「哎呀係喎咁夜喇,雯雯你不如喺度瞓一晚啦,一個女仔咁夜周圍走好危險呀!」
佢真係好熱情⋯⋯ 搞到我都唔好意思話俾佢聽其實我同 Hinson 只係酒肉朋友嚟。
「唔使喇我ok㗎喇。」我一邊講一邊後退行去門口,驚再同佢講落去我真係會被佢說服到留喺度瞓。
「咁好啦,我聽日叫周洛軒醒咗打俾你啦。」佢終於肯放過我。
我甚至係呢刻先至知道Hinson嘅中文名⋯⋯
但我費事煩,所以求其敷衍佢就算:「好啦,byebye auntie。」
點知第二日, Hinson真係打咗電話嚟。
「喂雯雯~」佢嘅語調勁陰陽怪氣。
「咩料。」佢肯定係從佢媽咪口中知道咗我嘅中文名。
「我阿媽叫我打俾你吖嘛。不過估唔到你個中文名又幾好聽喎,黎熙雯。」
卡士男
2024-03-19 00:27:29
留名
灣子
2024-03-20 23:32:34
4
唔知點解,自從對對方嘅稱呼由 “Hinson” 同 “Nicole” 變成「周洛軒」同「黎熙雯」之後,我同周洛軒就好似變得friend咗咁。
雖然之前成日一齊飲酒嗰陣都已經算friend,但段關係只係好表面,我哋基本上唔會點講自己嘢。
但自從交換咗中文名之後,我哋連心事都交換埋。我亦因此知道咗Winnie —— 周洛軒個ex嘅存在。
據周洛軒所講,呢個狠狠咁飛咗佢嘅ex就係佢墮落成為炮王(呢個名係我自己幫佢加)嘅根源。
「笑死,好mk。」呢個係我聽完成件事之後嘅第一反應。
「屌你⋯⋯」佢對我反咗個白眼。
我內心其實唔係好認同周洛軒俾人hurt完之後就自甘墮落嘅做法,但我都冇再講啲咩。
始終都係佢自己嘅選擇嚟,我冇乜必要干涉。
「咁你呢。」之後周洛軒又問我。
「咩?」
「點解你會搵sp?」
「閪痕囉。」我好輕鬆咁答。
我唔似佢,冇經歷過佢嗰啲咁傷心嘅故事。雖然我之前都有過男朋友,但全部都係和平分手,所以唔存在「因為失戀所以要靠約炮尋找慰藉」嘅問題。
「吓。」周洛軒嘅表情好失望:「我同你坦白咗我自己最痛嘅經歷,你俾啲咁嘅嘢我?」
「唉好喇,」我都唔知點解同佢吹吹下水會變成自揭瘡疤大會:「我啱啱開始搵sp嗰陣試過沉船,夠juicy未?」
「一般般啦。」周洛軒表情嫌棄:「有邊個約炮未試過沉船?」
「你都試過?」見佢講到實牙實齒咁,我即刻好八卦咁問。
「咁又冇,我個心淨係得Winnie。」
「⋯⋯」
後尾我又同周洛軒飲咗幾次酒,送咗佢返屋企幾次。每次都要面對佢媽咪嘅熱情招待。
幾次之後我終於頂唔順,下定決心唔再同周洛軒飲酒,費事佢醉咗我又要送佢返屋企再俾佢媽咪拉住係咁吹水同叫我留喺度瞓。
我同周洛軒講話呢排唔出嚟飲酒住,但就冇話俾佢聽係因為佢媽咪,費事佢覺得我唔鍾意佢媽咪。
其實佢媽咪真係幾好人,只係我份人太慢熱所以唔習慣佢嘅熱情。
我同周洛軒講完之後嗰個禮拜佢的確冇再約我去飲酒,只不過好快佢就忍唔住。
「出嚟飲嘢?」呢日我舒舒服服咁喺屋企hea緊,周洛軒嘅message無啦啦彈咗出嚟。
「唔出」我言簡意賅咁覆咗佢一句。
但彷彿早有預料,周洛軒幾乎係喺下一秒就send多咗個message嚟:「185大隻消巴」
我即刻彈起身。
呢個人真係好陰濕,出動埋美男計引我出嚟⋯⋯
「行得」
周洛軒覆咗我一個奸笑嘅emoji。
講開又講,其實我已經好耐冇開過齋。
自從前排喺交友app match到個自稱180 gym巴實際上係170痴肥巴之後(利申:我當時一見到佢真人就即刻跑走咗,連一條頭髮都冇俾佢掂到),我就咩胃口都冇晒,過咗一排清心寡慾嘅日子。
「喺app識人梗係易中伏啦。」周洛軒知道呢件事之後毫不留情咁恥笑我。不過過咗冇幾耐,佢就被我發現學我down咗同一個交友app。
「又話喺app識人易中伏?」我對佢講一套做一套嘅行為好不屑。
「蠢人就話會中伏啫,我咁醒冇事嘅。」佢嘻皮笑臉咁講。
我真係唔知佢呢種莫名其妙嘅自信係喺邊度嚟。
灣子
2024-03-23 22:35:34
5
個半鐘之後,我到咗同周洛軒約好嗰間酒吧。間酒吧好細,幾乎一眼睇晒。門口行入幾步已經係吧檯,呢刻已經坐滿咗,除此之外場內就淨係得幾張大檯,每檯都有張靠牆嘅長梳化。周洛軒佢哋嗰檯就喺門口右手邊第二檯。
啱啱行入酒吧,我就見到周洛軒同一個mk妹喺度flirt緊。
睇嚟我今晚唔使再送佢返屋企。
呢個時候,唔知道周洛軒喺個mk妹耳邊講咗啲咩,個mk妹笑到花枝亂顫、見牙唔見眼咁,仲抬手拍咗周洛軒一下,指尖精緻嘅粉色Gel甲隨著佢抬手嘅動作喺燈光下閃下閃下。
周洛軒笑而不語,淨係專注咁望住mk妹,彷彿眼眸中只裝得落佢一個人。
同樣嘅情景,唔同嘅對象,我已經旁觀過唔知幾多次,睇到悶。
不過Mk妹好明顯對呢招好受落,即使距離咁遠我都見到佢兩頰緋紅,嬌艷欲滴。我將目光從佢哋兩個身上移開,睄咗一眼同檯嘅其他人。除咗周洛軒同Mk妹之外,同檯仲有幾個男仔,唯獨是有一個男仔特別突出。
大家都係坐喺度,但驟眼睇,個男仔好明顯就比其他人高咗一截。
我不露痕跡咁上下打量呢個人。佢坐咗喺最側邊,但因為身材關係,佢全身都散發住強烈嘅存在感。
睇嚟佢就係周洛軒口中嘅「185大隻消巴」。
我滿意咁點頭,微笑住行近佢哋嗰檯,同時內心不由自主咁對周洛軒生出由衷嘅感激之情。
果然夠老友。
察覺到我嘅靠近,成檯人都抬頭望住我。我橫掃咗佢哋一眼,目光刻意喺掃過大隻消巴嘅時候稍作停留,同佢對視片刻之後又若無其事咁移開目光同大家打招呼。
「Hello我係Nichole呀。」我自然咁行去大隻消巴隔離。佢坐最出,見我行埋去,佢都好識做咁坐入咗少少,等我有位坐低。
飲嘢嘅時候,我冇刻意掩飾自己嘅目的,一直有意無意咁同大隻消巴有身體接觸。
飲到咁上下,我見差唔多係時候,就拎起電話喺屋企group講我今晚會喺hall度瞓,然後扮醉挨咗落大隻消巴度。
呢幕俾周洛軒見到。
同我飲咗咁多次酒,佢好清楚我真正嘅酒量,所以偷偷地對住我做咗個好鄙視嘅表情。
我冇理佢。
多得周洛軒嘅好介紹,我同大隻消巴呢一晚過得好「充實」。
至於係邊方面充實我就唔詳述喇。
灣子
2024-03-23 22:36:23
6
之後嗰幾日我同周洛軒都冇聯絡。
其實呢種情況都幾罕見,因為佢平時一得閒就會喺ig send啲memes俾我,唔會完全唔搵我。我有send過message俾佢,但佢都冇覆。不過我冇放上心,只係覺得佢可能忙緊學校啲嘢或者忙緊食女。
直到一星期後佢突然send 咗個message嚟。
「救命!」佢send咗張相嚟。
張相應該係喺酒店房影嘅,我見到白色嘅被同埋掛牆電視,但我仍然唔知佢想表達啲咩。
「?」我覆。
周洛軒send咗段錄音過嚟:「仆街我今日喺app約咗條女即出,點知佢用假相!佢真人勁柒!佢而家沖緊涼⋯⋯」唔知係咪驚俾個女仔聽到,佢全程都用氣音講。
周洛軒個錄音令我諗起佢之前充滿自信咁話過自己唔會中伏。
我好想大笑,但我上緊堂所以忍住咗。
冷靜落嚟之後我覆佢:「咁你仲唔趁而家偷走?」
「屌,直接走人咁仆街⋯⋯同埋間沖涼房有幅玻璃牆,我執嘢走佢會見到⋯⋯」
「咁你好好享受啦。」我幸災樂禍咁講。
「你唔係咁撚狠心下話⋯⋯」今次周洛軒冇錄音,淨係打字,但我仍然feel到佢字裏行間嘅焦急。
「咁你想我點先」
「過嚟救我!」
「吓,點救。」我問。
「我已經諗好㗎喇,」佢又開始錄音:「你扮係我女朋友過嚟捉姦。」
「⋯⋯」乜嘢屎橋嚟。
其實與其搞咁多嘢,不如快手啲執嘢走人好過啦,還掂個女仔沖緊涼冇着衫,都唔可以即刻追出房門。
重點係,我上緊堂,有乜理由要我走堂陪佢去玩角色扮演⋯⋯
不過好快我就改變咗諗法。
因為周洛軒直接payme咗一千蚊過嚟。
「江湖救急!」佢話。
「即到!」有錢冇理由唔賺吖,於是我快快手執好嘢,然後硬着頭皮咁喺lecturer嘅注視下離開咗lecture hall。
間酒店就係我同周洛軒平時好鍾意去⋯⋯各自都好鍾意去嗰間。我喺學校飛的過去,勁快就到咗。
自從我上咗的士之後,周洛軒就冇再覆我message,唔知佢同個女仔而家進行到邊一步。
希望佢哋仲係前戲緊⋯⋯落車之後,我一邊諗,一邊以最快速度衝咗上周洛軒間房。
為咗增加氣勢,我勁大力拍門。
房間內傳嚟一陣窸窸窣窣嘅聲音,幾秒後房門就被打開。
開門嘅係個女仔,我睄咗一眼房入面,唔見周洛軒。
「陳家俊呢?」我臨時亂作咗個名。
呢個時候,房間內左手邊嗰道門被打開,應該係沖涼房嚟。周洛軒喺入面行咗出嚟。
睇嚟佢頭先一直匿喺入面。
四目相對之際,我見到佢嘅眼中散發出遇到救世主般嘅光茫。
下一秒佢已經進入咗角色:「b⋯⋯點解你會喺度㗎!」
佢啲戲真係好假,我爭啲忍唔住笑場。
我強忍笑意咁接落去:「呢句應該我問你下話,你喺度做乜?」我講完先發覺其實我呢句都有啲kam。
好彩聽咗短短兩句個女仔已經get到而家嘅情況,趁我同周洛軒「對峙」緊嘅時候,佢勁快手咁衝入房攞袋走人。
確認個女仔入咗𨋢走咗之後,我同周洛軒終於忍唔住放聲大笑。
「你句台詞勁老土囉,我忍笑忍得勁辛苦。」我一邊行入房一邊講。
「其實你嗰句都唔好得去邊。」周洛軒閂埋房門跟喺我後面。
拾柒
2024-03-26 19:23:44
b⋯⋯你出文未
灣子
2024-03-28 21:17:06
呢幾日搞緊其他嘢
一陣出
拾柒
2024-03-28 21:21:51
G 持
灣子
2024-03-28 21:44:43
7
入房之後,我好隨意咁癱咗喺張床度,而周洛軒坐喺床邊。
「又話自己好醒唔會中伏嘅?搞咩今日一約就中伏。」我問。
我以為周洛軒會開始同我呻,但佢只係出乎意料咁保持沉默。
意識到有啲唔對路,我推咗推佢:「做咩事。」
周洛軒沉默咗一陣,最終開口:「我早幾日睇Winnie ig,見到佢有新仔。」佢講嘅時候一直耷低頭冇望我。
唔怪之得佢呢幾日冇晒聲氣咁啦,原來係匿埋療傷。
照咁睇嚟,佢今日咁衝動約人即出扑嘢,應該都係俾Winnie刺激到。
諗到呢度,我終於忍唔住開口話咗佢兩句:「其實你而家咁樣冇乜意義㗎喎。俾佢知道你而家咁你覺得佢會care咩?你咁樣做除咗令到自己更空虛更加sad之外根本得唔到啲乜嘢。」
一口氣講完之後我覺得自己好似太多事,但我覺得周洛軒為咗個ex搞到自己咁頹真係好唔抵。
如果佢係player嘅話我唔會干涉佢,但佢因為失戀而喺度亂咁嚟我真係有啲睇唔過眼。
周洛軒冇反駁我,只係一直沉默。見佢咁樣,我都費事再繼續話佢。
雖然我呢刻好想唔理佢直接走人,但係見佢個樣仲係神不守舍咁,我又覺得佢有啲慘,唯有開口:「飲唔飲酒?我去買酒上嚟。」
我諗呢樣係我呢刻唯一做到嘅嘢。
最後周洛軒同我一齊落去seven買酒。買完酒返上房之後,佢攞咗支酒坐喺床邊粒聲唔出,淨係係咁飲。
我默默咁坐喺佢隔離開咗另一支酒慢慢飲。
可能係飲得太急,周洛軒好快就醉咗,不過佢唔係嗰啲會發酒癲嘅人嚟,只係有啲呆滯咁坐喺度。
過咗一陣,佢突然開口:「我有啲想打俾佢。」
「你咪啦。」我忍唔住反咗個白眼。人哋都唔care你,好心就咪自取其辱啦。我心諗。
當然我冇講出口。
「一係你幫我keep住部電話先,我驚我忍唔住⋯⋯」周洛軒表情有啲可憐咁遞咗自己部電話俾我。
我攞走咗佢部電話,擺咗喺另一邊個床頭櫃上面。
「我想瞓覺。」之後佢又講。
其實佢講得好細聲,我都唔知佢係同我講緊嘢定只係自言自語緊。
「咁你瞓陣啦。」但我仍然照覆佢,仲爬上床幫佢掀開埋張被。
佢抬頭望咗我幾秒之後就安靜咁捐入被竇。見佢已經瞓好,我隨手將張被撻喺佢身上。跟著我就落床去攞袋諗住走人,因為我仲有下一堂要上。
點知我一落床,周洛軒就坐咗起身:「你走喇?」
我擰轉頭,對上佢嘅視線。
佢頭先真係飲咗好多酒,而家成塊面同成條頸都紅晒,連對眼都紅紅地,隱約泛起水光。
佢個樣搞到我突然之間覺得有啲唔忍心,仲令我覺得如果我呢刻掉低佢走咗去嘅話就係一個十惡不赦嘅衰人咁。
「唔係呀,我諗住攞部macbook出嚟做下assignment咋。」我話。
「哦。」佢答,然後又瞓返低。
等我攞住我部macbook返翻上床,周洛軒已經瞓着咗。
我坐喺佢隔離做assignment。呢刻成個空間只剩下我打字嘅「噠噠」聲,同埋周洛軒熟睡時嘅呼吸聲。
不過唔知係咪因為我都飲咗啲酒,我淨係做咗一陣assignment就開始覺得有啲攰,唔係幾focus到。我堅持繼續做,但堅持咗一陣之後,我發現都係唔係幾掂,決定放棄。
我save file、熄macbook,再隨手將部macbook放喺床頭櫃上。
之後我瞓低,望向同我距離唔夠一隻手臂嘅周洛軒。
佢真係瞓得好腍,睇嚟唔瞓夠幾個鐘佢係唔會醒。
平時都唔覺,而家周洛軒瞓着咗我先發現原來佢啲眼睫毛都幾長,而且佢瞓覺嗰陣仲會有少少扁扁地嘴咁,好似細路仔。
雖然我知自己應該要返翻學校上堂,但呢刻望住周洛軒嘅睡顏,我卻冇任何動作。
陪下佢啦。內心有把聲音同我講。
於是我順從咁瞇埋眼。
好快我就感受到濃濃嘅睡意。
灣子
2024-03-30 20:35:57
8
隔咗唔知幾耐,我餓到醒咗。
一擘大眼,我就近距離咁對上咗周洛軒嘅視線。
我嚇咗一跳,即刻同佢拉開距離。
佢醒咗幾耐?呢個係我第一個諗法。
「你頭先扯鼻鼾勁大聲。」未等我開口問,周洛軒就笑住講咗句。
聽佢語氣咁串嘴,應該已經酒醒。
「係咩。」因為啱啱醒,我仲係處於一個迷迷糊糊嘅狀態。
「而家幾點?」我又問。
我覺得自己好似瞓咗好耐咁。
而事實上我亦都真係瞓咗好耐。「差唔多11點喇。」周洛軒答我。
「吓?夜晚呀?」我有啲驚訝,擰轉面望咗望玻璃窗,見到個天已經黑晒。
估唔到我哋瞓咗咁耐,明明頭先我到酒店嗰陣先下晝3點幾。
呢個時候,周洛軒部電話響咗。
我頭先將佢部電話放咗喺我嗰邊嘅床頭櫃,所以佢想攞電話嘅話就要伸手越過我去攞。
於是當周洛軒伸手去攞電話嘅時候,我哋嘅距離就隨著佢嘅動作驟然變近。
我哋嘅距離近到我可以好清晰咁聞到佢身上嘅香水味。
不過佢好似冇意識到呢樣嘢。
就係喺呢一刻,我突然之間有啲緊張,甚至不由自主屏住呼吸。
冷靜啲先黎熙雯,你哋之前打過茄輪仲爭啲扑埋添啦,有乜好緊張?我不停喺度自我安撫。
好彩成個過程只係維持咗兩秒。一攞完電話,我哋之間嘅距離又拉開返。
周洛軒掛住攞電話,亦冇注意到我嘅表情有啲唔自然。
等佢打完電話之後,我開口:「好肚餓。」
「落樓下買m記上嚟食?」佢提議。
呢個鐘數附近都冇乜其他嘢食,再加上我真係好肚餓,淨係想拿拿臨有啲嘢塞落肚,所以就同意咗。
「咁我喺個app度落咗單先,一陣落去拎啦。」佢講。
「好。」
落咗單之後我哋就各自各喺度㩒電話等。
過咗一陣,周洛軒起身:「應該差唔多攞得,我落去啦。」
「一齊落去?」我問。
「唔使啦。」
「哦。」其實我都只係客氣問下,我完全懶得郁。
食嘢嘅時候,我同周洛軒依然係各自㩒電話,間中講一兩句嘢。
我發現自從瞓醒之後,我哋兩個都冇再提起Winnie。我估佢可能係酒醒後理智回復,唔好意思再講。
我有一邊食嘢一邊keep住偷偷觀察周洛軒,覺得佢嘅狀態好似比頭先好咗少少,冇咁頹,但我唔肯定佢係咪只係喺度扮冇嘢。
食飽之後,我癱喺床上唔想郁。
「你聽朝有冇堂?」周洛軒問我。
聽日係星期四,我有堂9點堂。
「我9點堂,你呢?」
「我都係。」佢答。
我望一望時間,發現原來已經12點幾:「咁不如喺度瞓算啦,費事再騰嚟騰去。」我提議。
還掂頭先我哋頭先已經一齊瞓咗幾個鐘,再瞓多幾個鐘都冇乜所謂。
「都好。」周洛軒好爽快咁接受咗我嘅提議:「咁你沖涼未?你未沖就我沖先。」
「你沖先啦,我癱多陣。」
喺等周洛軒沖涼嘅時候,我唔小心恰着咗,最後佢拍醒咗我:「沖涼呀!」
「唔⋯⋯」我唔情願咁擘大眼,懶洋洋咁唔願郁。
「拿拿臨去沖涼咪可以快啲瞓囉。最多等埋你喇。」佢企喺床邊笑住低頭望我。
佢呢刻仲未吹頭,啱啱洗完頭嘅佢髮絲濕軟,顯得乖巧文靜,同平時gel好晒頭嗰個fuckboy款有啲唔同。
「點呀肯沖涼未呀。」周洛軒再次催促我,打斷咗我嘅思緒。
「沖喇沖喇。」我唔自在咁移開目光,動作迅速咁落床衝咗去浴室。
呢一刻我終於明白靚仔真係大晒。就算周洛軒根本唔係我鍾意嗰type,我都係會唔小心俾佢搞到我有啲心猿意馬⋯⋯
灣子
2024-04-03 12:47:42
9
等我沖完涼出嚟,周洛軒已經準備瞓。
佢已經熄晒其他燈,淨係留咗盞床頭燈。
我爬上床之後順手熄埋床頭燈。
瞓落床之後我先意識到而家我同周洛軒身上都有同一陣沐浴露香味。
搞到我突然之間又諗起頭先佢身上嗰陣香水味。
漆黑之中,我哋兩個都冇講嘢。
聽住周洛軒近在咫尺嘅呼吸聲,我突然覺得自己塊面有啲熱。
我轉身背對住佢,覺得咁樣好似自在啲。隔咗一陣,我feel到佢都轉咗身。
我瞇埋眼,個腦不停諗其他嘢嚟分散注意力。
下個禮拜有assignment要交、之後有份group project要傾、聽日食咩好呢⋯⋯
就喺我諗到就嚟瞓着嘅時候,我突然聽到周洛軒把聲響起:「多謝你。」佢停頓咗兩秒之後繼續講:「其實我都覺得自己咁樣好on9。」
我知佢係講緊自己因為Winnie周圍約炮呢單嘢。
「快啲瞓啦。」我淨係講咗呢句。
「嗯。」
之後我哋兩個冇再講嘢,我亦好快就瞓着咗。
到咗朝早,電話鬧鐘一響我就即刻醒咗。
我熄咗個鬧鐘,擰轉頭望向周洛軒,發現佢都醒咗。
我哋四目交投,靜咗幾秒。
「早晨。」最後係佢開口先。
「早晨。」唔知點解我覺得我哋咁樣有啲搞笑。
退房之後,我哋落咗樓下m記食早餐。食完早餐我哋就一齊返學校。
我同周洛軒上堂嘅地點唔係喺同一棟building,所以入咗學校之後,我哋行嘅方向唔同。
臨分開前佢問我:「一陣落堂一唔一齊食lunch?」
「食咩?Canteen?」我問。
「冇所謂。」
「咁Canteen。」
其實呢種感覺對我嚟講都幾新奇,因為我同周洛軒之前根本未試過喺學校入面見面,每次都係約喺出面。
今堂早咗完,我一落堂就send咗個message俾周洛軒:「我落咗堂,去霸位先。」
佢好快就覆咗我「ok」。
自此之後,我哋每逢星期四都會一齊食lunch。
呢日周洛軒食食下lunch無啦啦同我講佢媽咪呢排有問起我。
「吓? 佢仲係以為我係你女朋友呀?」我問。
諗諗下,上次見到Auntie都已經係幾個月前嘅事,估唔到佢仲記得我。
「我一早同佢解釋過啦,但佢都係會間唔中就提起你。」周洛軒停頓咗一下,然後放低手上嘅餐具。
「其實佢知你就嚟生日,買咗份禮物叫我俾你。」佢喺自己個背囊度拎咗個禮品袋出嚟遞俾我。
「吓?」我有啲受寵若驚。
我冇諗過咁耐冇見,佢阿媽竟然仲記得我生日,仲要送埋禮物。
明明我哋只係見過幾次⋯⋯
「我都唔知係咩嚟。」周洛軒將禮物遞俾我,然後飲咗啖嘢:「不過你唔使驚嘅,應該唔係啲咩貴嘢嚟。」
我拆開嚟睇,發現係一個短銀包。
個銀包係淺紫色嘅,上面印咗幾隻細細地嘅Kuromi,簡單得嚟又cute。
佢媽咪唔單止記得我生日,竟然仲記得我最鍾意Kuromi⋯⋯
「其實我覺得⋯⋯」我忍唔住開口。
「?」周洛軒疑惑咁望住我。
「你媽咪都係當咗我係你女朋友⋯⋯」
「唔係掛⋯⋯」
「咁佢對你其他異性friend係咪都係咁熱情先?」我問。
「冇得比較喎,我本身都唔多異性friend。除咗我啲ex之外我根本冇帶過其他女仔上我屋企。」
咁唔怪之得佢媽咪會誤會啦⋯⋯
「記得幫我同你媽咪講多謝!」最後我提醒周洛軒。我一邊講,視線無意中轉向周洛軒碟飯度。
佢將啲茄子挑晒出嚟撥埋一邊,一嚿都冇食。
「嘩你真係唔識食。」我好鍾意食茄子,所以望住堆被佢食剩嘅茄子,我覺得勁肉赤。
「咁俾你囉。」周洛軒將佢隻碟推向我呢邊。
我唔客氣咁將啲茄子夾晒落自己度。
之後我就冇再諗周洛軒媽咪嘅嘢,淨係專心食lunch。
有神快拜
2024-04-04 22:32:25
Lm
嘩哈哈
2024-04-05 12:21:46
加速