陳詠謙2015年幫陳柏宇《別來無恙》所填嘅歌詞「我現時自己肯做飯」，當時引嚟網民熱議同批評，仲引發咗「陳詠謙之亂」，佢唔少作品都被網民拎嚟考古同鑑賞。陳詠謙多年後接受訪問，指當時面對批評聲音係唔開心，更有諗過轉行。
見到外賣平台留言抽水，陳詠謙就以長文回覆：「打算開threads睇吓呢一面嘅世界，半日唔夠，見到呢個留言真係既驚且喜。」、「原來除咗送外賣，重鍾意灑鹽巴。貴公司將個官方帳號交到你手上，估計係認可你嘅能力同品格，足以代表公司發言。唔通呢個就係戶戶送嘅企業精神？」、「為咗刷like數，可以罔顧一個人嘅感受；咁我估貴公司同樣可以為咗生意，罔顧車手/餐廳/食客嘅死活。」陳詠謙又指自己係該外賣平台多年嘅客戶，對佢地今次頗為失望：「可能會覺得我小器？但善意惡意大家心知肚明。聽人講，threads係製造二元對立嘅平台。我上得嚟，預咗玩辯論。」
