【經典重製】活屍香江 一二三四

有問題可以留言，我會去作者個fb專頁pm佢

lm

(十九)

大家一齊行上去，再經過條行人通道。

我一邊行，一邊望住出面，發覺D雨已經細左好多。

好彩一路上未見有喪屍，直至到左旺角政府合署對開。

權：嘩屌！！咁撚熱鬧呀。

火車站入口、的士站、巴士站、新世紀對開，全部都塞滿晒喪屍。

星：我...我地係咪玩完喇...

我：我想用返K房果招，有冇人肯借部電話出黎？

權：一睇就知有借冇還啦，拿，拎去。

我：唔該阿權，咁我跑去巴士站果邊放低部電話，趁火車站前面班喪屍一行開，你地就衝入去啦。

蚊：咁你呢？

我：我會兜返上行人路再跑返入火車站，同大家匯合。

蚊：唔好！你咁樣好危險囉，仲要得把刀仔...我陪你啦，好冇？

我：咪傻啦，你要跟實阿權佢地，我一個夠做架喇。

之後阿蚊遞左把切肉刀俾我。

蚊：咁你同送死有咩分別丫！一係拎我把刀去用啦！

我見阿權阿包佢地停左咁，望實我同阿蚊爭拗，再拖落去驚引到班喪屍之餘，又怕延誤個timing，所以都係買阿蚊怕，俾佢跟埋黎。

我：好啦好啦...咁你跟埋黎啦。

權：ok！大家冇意見就開始行動！

阿權、Mary、阿包同阿星佢地就按兵不動，而我同阿蚊就跑左去巴士站對出果段馬路，再放低部電話。

『難解百般愁相知愛意濃，情海變蒼茫痴心遇冷風』

班喪屍一聽到D音樂，就個個擰晒過黎，慢慢咁向住我呢邊行。

『分飛各天涯，他朝可會相逢，蕭蕭風聲淒泣暴雨中』

我：驚唔驚呀？俾咁多喪屍圍住。

蚊：梗...梗係驚啦...

『人海裡飄浮，輾轉卻是夢』

老實講，俾一大堆喪屍包圍，我真係都幾淆，但係兩個都一齊驚既時候，對件事一定冇幫助，到時就盞一齊死。

所以我扮鎮定，並且拖住阿蚊隻手。

『情深永相傳，飄於萬世空』

我：咁呢？會唔會好D？

蚊：嗯...

『當霜雪飄時，但願花亦艷紅，未懼路上湮雨濛』

我：我地要等多陣，因為單純用聲係唔得既，要加埋D肉味先work。

一講完，阿蚊就用力渣實左我隻手，似乎佢真係都幾驚下。

『啊...寄相思風雨中』

班喪屍已經逐漸離開火車站入口，差唔多全部都向住我同阿蚊呢便行緊過黎。

『啊...寄癡心風雨中』

我：阿權！機會呀！！

阿權佢地一聽到我大叫，就即刻衝入火車站，跨過部入閘機，入左去火車站大堂裡面。

『抱月去，化春風雲外追蹤鴛侶夢』

而我就大力渣實左阿蚊隻手，起勢咁跑出去巴士上黎果條路，打算兜出去外圍，曲線咁入返去火車站。

『吼吼呀呀呀呀！！！』

班友仔亦都跟得好貼，D手係咁向前劃，我拉阿蚊埋我個身度，再用另一隻手禁低佢個頭，驚佢D頭髮會俾班喪屍扯到。

『恨滿胸，愁紅塵多作弄...』

雖然大部份喪屍都比電話D聲吸引，但外圍既喪屍就唔係，係咁追住我地唔放。

阿蚊咁既狀態，有刀都等如冇刀，而我又要照顧佢，冇辦法殺到喪屍，最後我地見喪屍就避，逐隻逐隻咁扭過，再跑返去火車站入口。

我：阿蚊！跳呀！

我同阿蚊終於入到火車站，跳過埋部入閘機。

而出面班喪屍就俾部入閘機頂鬼住左，成堆野一個推一個咁，好鬼壯觀。

但我既視線，當然唔係班喪屍。

我：嗄嗄...搞掂喇...

蚊：嗄...係丫...

阿蚊跑到成塊面紅晒，個款好可愛，搞到我情不自禁望左佢兩秒。

蚊：我...我塊面係咪有野響度？

我：冇！冇野呀...

我實在望得太耐，終於比佢發現左，我即刻望向第二度，仲鬆返開佢隻手。

阿權佢地響前面清緊大堂內零零散散既喪屍，而我同阿蚊抖順左條氣之後，就上前同佢地會合。

我：咩情況呀？

權：好彩呢度冇乜喪屍，數埋唔夠廿隻。

我：好，你地同Mary姐清住先，我同阿星去seven仔攞野食，陣間廁所前面等。

權：ok，終於都唔洗再食蝦條喇喂~~~

我同阿星入左間便利店之後，就不斷搵o岩食既野。

我八掛睇下阿星揀左D咩，原來佢係咁將D杯麵塞晒入個袋度。

我：阿星，唔好要D杯麵喇，我地冇熱水，食唔到架，盡量搵D可以即刻放得入口，但又未過期既。

星：哦...咁呢D三文治呢？

我：都唔好喇，冇雪過，我驚裡面D餡會變。

星：咁呢D魚腸實得喇掛...

我：得！放入去啦。

跟住我一邊執，一邊望住阿權清完廁所出黎。

權：廁所clear！想去方便既就好快D去喇！

蚊：包包~~~可唔可以幫我紮起後面D頭髮丫？

包：OK呀！

之後佢地兩個入左廁所。

呢個叫阿蚊既女仔真係估佢唔到，只不過黎左一陣，就已經融入左我地。

阿權搞掂之後，就行左去新世紀果邊既出口，幫Mary繼續清埋D喪屍。

我見到Mary姐係咁望住佢前面個細路仔。

個細路仔坐左響地下度，唔郁唔盛既，我見情況有D古怪，就停左手腳，企左起身，睇住Mary姐果便。

雖然阿權都係響附近，但都離Mary姐有幾米距離，佢之後擰轉身向住後面既阿權大嗌。

Mary：阿權~~~呢度有個細路仔呀！！

權：唔好呀！睇定D先好行埋去呀！Mary！

Mary姐並冇理到阿權講野，直接走埋去，扶起左個細路。

Mary：小朋友~~~你有冇事呀？等姐姐帶你走啦，好冇？

『嗄呀！』

Mary：呀！！！哎嘶...

阿權即刻衝左上前。

權：仆街！仆街！！仆你個街！！

『嘭！嘭！嘭！嘭！！！』

阿權用支鎚仔對住細路個頭狂打，成個人失晒控咁。

權：點解呀！！！

我同阿星都即刻跑左過黎，見到阿權周身都係血，而Mary姐隻手，亦有個被口咬既傷口。

個細路比阿權咁樣狂打法，打到變晒肉醬，仲連地板都打裂埋。

Mary：嗄...阿權，我...我冇事呀...嗄...

我：Mary姐！阿星，一齊同我去睇下有冇止血既野！

Mary：唔洗喇...

其實我都知係多餘，但真係一時接受唔到Mary姐咁樣...

Mary：阿權...對唔住呀...我...我冇聽到你講...

權：我...我唔應該俾你行咁前...最衰都係我！最衰都係我！

阿權猛咁打自己個心口。

Mary：唔關你事，係我...係我以為個細路係正常人。

權：你...你一定冇事架，黎，我同你去廁所洗洗個傷口。

Mary：唔洗喇阿權...我之後會點，大家都知...唔洗做咁多野喇...你地走啦...

阿權即刻攬實左Mary。

權：我唔走！我點都唔會走架喇！

Mary姐嘗試推開阿權。

Mary：走啦阿權...我...我就快變喪屍架喇，我唔想你出事，你要繼續生存架...

權：點解...點解會咁呀！嗚呀！冇左你我仲點生存呀...

Mary：去沙田條路仲好長...佢地好需要你架...

權：但係我需要你呀！

Mary：阿權...

阿權擰轉頭同我地講。

權：阿安你地行啦，我會stay響度陪Mary。

之後佢仲遞埋支鎚仔俾我。

呢一刻，我完全明白阿權既心情，亦都好想去幫佢地，不過...我連最基本既安慰說話都講唔出。

我：Mary姐、阿權...我地永遠唔會忘記...大家一齊響旺角既呢段時光，永遠都唔會忘記...

『難解百般愁相知愛意濃，情海變蒼茫痴心遇冷風』

『分飛各天涯，但願他日重逢』

『夜漫漫路上珍重.....』

待續

之前睇曬，但都留名支持

(二十)

我咩返起個背囊，渣實支鎚仔，就擰轉身行。

我：阿星，呢袋你既。

星：真...真係要dum低佢兩個呀？

我：係呀，行啦。

之後我地行返去廁所果邊，一路行，一路向後望住阿權同Mary，佢地兩個喊晒口咁攬埋一齊。

雖然佢兩個都冇承認對方係男女朋友，但大家都非常緊張對方，可能只差一個表白，只差一個機會，點解個天要咁玩佢地呢。

阿包同阿蚊響廁所裡面出返黎。

我：阿包阿蚊，我地起程喇，拎好D架生。

包：未齊人喎，阿權同Mary姐姐呢？

我：佢地...佢地打算留返響度...

蚊：留響度？唔係話一齊入沙田咩？

我：係咁既...Mary姐俾隻野咬到，而阿權就留響度陪佢...

包：唔好搵呢D野講笑啦，我唔信，一D都唔好笑呀！

一講完，阿包就即刻跑去新世紀方向，打算親自搵Mary同阿權，但係比我一手拉住左。

我：唔得！Mary會隨時變喪屍架！行返埋黎！

阿包一見到我個樣咁認真，就知道我唔係講笑，佢即刻跪左響地度喊。

包：嗦...唔好咁呀！俾返Mary姐姐我！唔好...咁呀...嗚嗚......

我：好快D行喇，我地要天黑前入到沙田。

包：嗚嗚...咁...咁見Mary姐姐最後一面都得掛...

我：都話左唔得咯！變左做喪屍既Mary，你會殺得落手咩，吓！到時你俾佢咬埋咁點算呀！

蚊：乖啦阿包，俾佢地兩個過埋呢段時間啦...

包：嗦嗦......嗚嗚......

雖然阿包仲喊緊，但係佢再冇行去新世紀方向，擰轉身同我地一齊落月台。

響落緊樓梯其間，我同阿包講。

我：對唔住呀傻女，我頭先語氣重左D，但希望你明白，我唔想再有一個同伴離我地而去...

包：嗦嗦...嗯...

其實Mary姐咁樣，我都好想學阿包咁大喊一場，但係依家冇埋阿權，team leader呢個重擔，一下子就落左響我膊頭度。

阿蚊、阿星、阿包，佢地係生係死，就響我手上，我真係唔想有咩差池。

星：呢度好靜咁喎，會唔會一隻喪屍都冇呢。

我：唔好大意呀阿星，我前你後。

星：係...

『嗄呀！！』

突然間，有隻喪屍響條柱後面走左出黎。

我：返大陸啦你！

『嘭！嘶...』

我諗都唔諗，對準佢個頭一野扑落去，成功殺左第一隻喪屍。

蚊：阿星！左面呀！

星：嘩！！

阿星即刻嚇到跑左上前。

我：喂！我叫左你睇實後面架喎！

蚊：咁等我黎啦！

阿蚊擰轉身，向住喪屍個心口吉埋去。

蚊：依丫！

『嗄！！』

我：打頭呀！捅個身係殺唔死佢架！

蚊：收到！去死啦！

『插嘶...』

阿蚊舉起把切肉刀，一下隊入喪屍條頸度，再向左一fing，將佢個頭斬甩。

我：呼...好彩...

包：得果兩隻都搞成咁，如果阿權同Mary姐姐都響度既話...

我：如果達叔都響度既話，你話幾好呢，咪up埋呢D野喇o靚妹，靠自己啦！

我地一齊跳左落路軌，向住九龍塘方向前進。

行左陣，可能阿蚊著住對平底鞋，行唔慣成堆石仔既路軌，行到擺下擺下，好似玩緊獨木橋咁。

蚊：哎丫！

佢俾舊石搞到失左平衡，我即刻上前抱實左佢。

我：行中間D橫條，果度少D石仔。

跟住我鬆返開佢，佢再行，都係左搖右擺咁，如果響呢個moment拗柴，跑唔郁就好麻煩，所以我一手拖實左阿蚊。

我：不如...等我拖住你行啦。

蚊：嗯...唔該...

係，我個心仲係鐘意阿宜既，但係當下，我亦有少少鐘意阿蚊。

經過左Mary姐同阿權件事之後，我更加覺得，今日唔知聽日事，點解唔順住自己既心意去做人呢？

當我地一行到旺角大球場果陣，D雨亦咁o岩停左。

我：好彩條路軌兩邊都有護欄，唔驚有喪屍擒上黎。

蚊：嗯，係丫，行起上黎都安心好多。

我：阿星記住呀，我前你後呀！唔好又走左去呀！

星：放心啦，唔會再發生，ok？

我：咪下爬輕輕呀，到時盞一鑊熟架。

『逢逢逢逢逢.....』

突然間，有直升機經過。

蚊：有直升機呀！

我：係喎！喂！呢度呀喂！

我同阿蚊都即刻舉起雙手，左fing右fing咁，希望架野會睇到我地，救我地走。

不過架野冇反應，唔知係唔想救我地，定睇我地唔到，就咁飛走左。

蚊：點解唔救我地喎，我呀...一個警察消防員救護員都冇見過呀！正一衰人黎架！

我：正仆街政府！稅就識收，一有起事上黎就當我地班市民係垃圾。

星：阿包~~~你睇唔睇到部直升機呀！

阿包冇應到阿星，佢只係dup低頭咁望住條路軌行。

『包包...唔洗驚，我地一定可以出返去，你都要堅強D，唔係就冇機會見返你男朋友架喇！ 』

Mary姐果個會心微笑既片段，響阿包腦裡面不斷咁播返出黎。

包：嗦嗦...Mary姐姐...

星：阿包，做咩唔應人呀，唔？你又喊呀？

包：嗦...唔係呀！

星：隻眼紅晒喎，仲講大話~~~

包：你咪撚理我啦！

阿包捽一捽隻眼，停低左腳步。

包：我...我唔想再行喇！我要返火車站！

我：搞咩呀你呀...行啦！

包：我要陪Mary姐姐！即使佢...佢係喪屍都好...我都想陪住佢！

我：唉...你個傻包，其實我...同你一樣，但係返去都改變唔到個事實，Mary姐始終都會變喪屍，去到只係得兩個下場，一係就比佢咬，一係就殺死佢，你認為呢兩種結局都係Good Ending黎咩？

包：嗦...我唔理呀！

蚊：阿包，乖啦，為左佢地，我地要繼續生存落去。

我：阿星，拉佢行，唔好俾佢做埋D傻事。

星：收到。

跟住我地行到花墟公園，我望住個球場響度諗。

我：如果可以同阿權打返場波，你話幾好呢...

響K房果日，我地一齊去廁所、一齊吹水、一齊諗計、一齊對付班喪屍，雖然相處時間好短暫，但係感覺上就好似死黨一樣。

阿權同Mary姐佢兩個，如果冇喪屍既出現，佢地一定會響埋一齊。

『Mary：係有D人見到靚女就暈晒大浪姐，連人地有冇傷口都唔理，就帶人黎呢度。』

『權：我見到你夠暈晒大浪啦~~~』

我用手掩著個鼻，夾硬忍住D眼淚，但係...但係點忍得到。

我：嗦嗦...唔嗄...

蚊：諗起阿權佢地丫？

我：可能喊真係會傳染啦...

阿蚊面對面咁望實我，再用手捽走我臉上既眼淚。

我：多謝你呀...阿蚊。

待續

下集有新劇情

之前睇曬，但都留名支持

重製版有好多野都唔同左

等下集

(二十一)

行左陣，終於到下一站。

我：前面就係九龍塘喇，大家小心！

雖然路軌上好平靜，但我估班喪屍應該響晒月台度。

由於落完雨冇耐，個天陰陰地，加上我又冇左部電話，真係唔知依家幾點。

我：阿蚊，依家幾點呀？

蚊：就黎五點。

我：唔該，大家行快兩步喇，要響天黑前入到大圍。

當我地踏入九龍塘站果一剎那，我以半踎既姿勢，哨住兩邊月台，再慢慢咁前進。

包：左邊月台有好多喪屍呀！

成個地形對我地非常不利，因為班喪屍可以響月台高處跳落黎襲擊我地，萬一比佢地擒住，就好難甩身。

我：上去右手邊月台度！快快快！

阿星阿包阿蚊佢地三個一齊爬上去月台，而我就企響路軌上斷後。

左邊月台係往羅湖方向，果度推左成棚喪屍響度，相信佢地就係響觀塘線過黎，搭唔到尾班車既人。

響我地吸引之下，亦有唔少喪屍跳左落黎路軌度。

『噫嗄呀呀！！』

蚊：阿安！快D上黎！

我：得！

我跟手爬埋上月台，然後同大家一齊向住隧道狂跑。

星：安哥！有十幾隻追緊埋黎呀！

我：唔好理喇！繼續向前跑啦！

包：嗄...我...我唔得喇...隻腳跑唔郁喇...嗄...

我：包！唔好停呀！

依家阿星同阿蚊響最前，而阿包唔夠氣開始墮後，慢慢貼近響最尾既我。

響又一城個天橋出口，有兩隻喪屍係咁追實我唔放，如果唔清左佢，會俾佢地咬到阿包。

『嗚呀！！！呀！』

屌那媽！頂硬上！響依家，我唔可以再靠任何人！因為唔會再有阿權黎幫我補飛。

我：死呀！死啦去！

我兜野fing支鎚埋去，成功比我打爆左其中一隻個頭。

我：到你喇！去死啦！

『逢...』

呢下我太心急，冇打中佢，fing空氣。

點知隻喪屍冇理到我，係咁直飛向阿包度。

包：嗄...嗄...好攰呀...

蚊：阿包！你後面丫！

包：吓？

阿包擰轉頭一望，先發覺有隻喪屍追緊佢。

包：呀~~~！救命呀！唔好追我呀！

阿包即刻用盡全力咁跑，但係隻喪屍已經越追越近，佢隻手幾乎可以掂到阿包背脊。

而阿蚊都停低左，佢渣緊手上把切肉刀，企定定咁等緊機會。

當阿蚊見到阿包跑過左自己之後，就即刻向前一斬。

『插嘶！！』

雖然只係斬中左隻喪屍既右手，但係都叫做整停左佢，之後佢仲響度無神神大叫。

『嗚呀！！』

唔知係痛到大叫定點，我已經響後面趕到，我即刻用把生果刀一野插落佢條後頸，再一腳踢佢落路軌。

我：收嗲啦你！

不過隻喪屍仲未死，佢打橫訓左響路軌度係咁抽搐。

當我清埋一隻半隻想追我地既喪屍之際，阿星大叫。

阿星：安哥~~~快D啦！前面就係隧道喇！

原來阿星已經率先到左往大圍方向既車頭位置，仲跳埋落路軌。

『嘭！嘭！！』

我：死呀！死呀！同我死呀！！

蚊：阿安~~~唔好殺喇，快D過黎啦！

跟手阿蚊同阿包亦都跳埋落路軌，響隧道口等緊我。

雖然我都好想過黎，但如果俾班喪屍跟埋入隧道，就等於捉蟲入屎忽。

我清多兩隻之後，就極速轉身跳落路軌，再跑去隧道口。

班喪屍仲係咬住我唔放，不過好彩既係，當佢地跟我跳落路軌果陣，竟然全部跌斷晒D腳，攤晒響堆石仔度，爬下爬下。

我：班喪屍應該都追唔到過黎喇...嗄...嗄...前面隧道要行返慢D，一步一步黎。

包：好驚呀~~~條隧道咁黑媽媽...

我：咁你想留返響度定係入隧道呢o靚妹？

包：梗...梗係入隧道啦！

我：好，你地部電話仲響唔響度？有既幫我開著佢。

之後阿蚊、阿包、阿星都拎左部電話出黎，開左個閃光燈。

我：我地全部挨牆行，我行最前，阿蚊跟後，幫我照前面，之後到阿包，照隔離，最尾阿星照後面。

星：收到。

蚊：ok丫，你行啦阿安。

包：嗯...

冇左達叔，冇左阿權，唔得都要得，即使響一年前既康文盃決賽，俾隊友話我唔係做leader既材料都好，我都要頂硬上。

『咕嚕...』

我吞左啖口水，舉直支鎚。

我：好，入去喇！

雖然手提電話既光都足夠，但唔夠電筒咁集中，最衰K房帶黎果D響晒阿權個袋度。

『滴......嗒』

突然間，阿蚊大大力咁捉實我隻手。

蚊：嗄...好驚丫...

我：傻妹，唔洗驚，頭先落完雨，D水響上面滴落黎姐。

包：屌喇星！想搏懵呀！摸我大脾做乜呀！

星：仲好講喎！你行得咁慢，行快兩步咪唔會俾我掂到囉！

包：呀！你條仆...

我：殊！靜D...會引到喪屍架...

響跟住既時間裡面，大家都顫顫驚驚咁，渣實支架生，慢慢一步一步咁推進。

阿星細細聲同我講。

星：係喎安哥，咁你會揀你女朋友定係阿蚊姐呀？

我：殊！！

蚊：做咩丫？有喪屍？

我：唔係，繼續行，阿星，呢D野冇得揀架，歌都有得唱，你在選擇人~~~人亦能選擇你~~~

星：咩歌黎架...未聽過既。

包：一聽就知係D老餅歌啦~~~

『嗚...』

突然間，我聽到D怪聲。

我：阿蚊，你聽唔聽到呀？

蚊：咩聲呀？

『嗚...』

我：呢~~~又黎喇。

蚊：聽到喇...會唔會係...D風吹入隧道既聲呢？

其實阿蚊都知，風聲只不過係用黎呃自己，因為佢即刻用部電話周圍係咁照，睇下有冇喪屍。

不過又照唔到有野。

再行左陣，我發覺我後面D光暗左，擰轉頭一睇，原來阿星部電話冇電。

星：安...安哥，冇...冇電喇，點...點算呀？

我：咁...

『嗚呀！！』

突然間，響我地側邊有隻喪屍衝緊埋黎。

包：呀！！唔好行埋黎呀！

我即刻渣實支鎚仔，想兜野扑落去隻野度，但係由於阿包驚得滯，隻手亂咁fing，搞到電話D光源郁黎郁去，照唔到隻喪屍。

我：阿蚊！幫手照住阿包！

蚊：ok！

當我望得返隻喪屍既時候，已經見到阿星企左響阿包前面，佢用手頂實左隻喪屍個心口，同佢鬥緊力。

我即刻衝前踢開隻喪屍，再一下扑落去。

『嘭！』

我：呼...阿蚊阿包，即刻再照下周圍，睇下仲有冇喪屍。

包：仆街星...你...你流好多血呀！

待續

留名

又死一個

(二十二)

我：阿星！！

我即刻搶左阿蚊部電話，去照下阿星手上既血，究竟係佢自己定隻喪屍。

但當我望到阿星手臂上冇左忽肉既時候，果個猛咁湧出鮮血既傷口已經俾左答案我。

我呆左咁望住阿星，真係諗唔到點做。

蚊：阿安，安！不如出左隧道先算啦，我驚會有其他喪屍。

我：呀...好...

我伸隻手托住阿星個格肋底，再扶住佢慢慢行。

包：嗦...嗦...阿安你企返前面啦，我...嗦...我想照顧阿星呀...

蚊：係囉阿安，你響返前面好D。

我：咁好啦，阿星就交俾你喇。

當我鬆手，將阿星扶俾阿包果陣，阿星望實我講。

星：安哥...我...我唔係垃圾黎...我唔係冇用鬼呀...

我：傻仔，冇人話你係呀...

星：我知阿權話過...話過我...

我：你...你依家證明左佢既說話係錯啦，係咪？嗦...

星：呀...係呀？

之後我企返響前面，阿包阿星企中間，再由阿蚊行最後。

過左唔知幾耐，終於見到隧道出口。

阿星開心到鬆開左阿包，衝左上前。

星：哈哈~~~嗄...呢度係我地頭，等我黎帶路啦~~~

我：阿星，你受左傷架，咪夾硬黎啦。

『嗚呀！！』

蚊：後面有喪屍丫！大家快D跑丫！

我地一出隧道冇耐，就已經有幾隻喪屍跟尾殺出黎。

我發現前面條路軌上，有幾舊水馬，好似係有人特登放響度欄住咁。

我：快D跨過去呀！

包：等埋呀~~~

我地四個順利跨過左水馬之後，就有幾支電筒既光射住我。

有個男人向住我地大嗌。

男：你地係人定係喪屍呀？

星：人呀！係人呀！

跟住有幾個人響我地身邊跑過，再隊冧水馬後面班喪屍。

男：你地幾個！放低手上既武器，過黎呢便！

我地四個都聽佢地講，掉低晒D鎚仔、切肉刀同支矛。

男：小文你地繼續守住呢度，我帶佢地去火車站。

文：ok，交俾我地啦。

我：你地想點？

男：帶你地去check傷口，唔洗驚。

阿星一聽到佢講，就將隻有傷口既手，擺響背後。

蚊：阿安，咁點丫？

我：照佢說話去做先...

包：但係阿星佢...

我：殊...到時先再算。

驟眼睇，沙田應該都安全，因為有人響主要通道上把守。

不過最重要既係，依家點樣救阿星。

點算呢...點算呢...點算呢...，依家我個腦只係得呢三個字。

當我地入到火車站之後，見到有唔少人，有D同頭先果班人一樣，拎住D刀刀棍棍企響度既；又有D響度搬緊D箱，可能係堆物資。

男：你地響呢度排隊啦，男既入男廁、女既入女廁，裡面會有人幫你check傷口。

亦有D好似我地咁，爛身爛世，排緊隊等緊比人check。

個男人一講完就行開左，我見有機會，就即刻跑上前帶阿星走，但係一郁，當堂俾人喝住。

女：喂！你想去邊呀！排好隊！再郁打鑊你呀拿！

呢個凶神惡殺、渣住支木棍fing黎fing去既死肥婆響度阻撚住晒，如果我有支鎚仔響手既話...

阿包響我背脊細細聲同我講。

包：點算呀阿安...阿星佢...阿星佢實死架...

我：我諗緊計架喇...