[多圖多字] 5日4夜 鹿兒島 霧島 熊本 紅黃葉/溫泉散策

爛尾？仲等我勁期待睇靚相

井完啦？
困咗黑房？

以為有update

推

被騙了

樓主去日本玩企街
俾人拉咗？

耐到我都唔記得左
太過份了真係 今日找數

DAY2 上半行程 鹿兒島市-->仙巖園

一早起身 今日準備第一次係日本自駕了
因為預左１０點先拎車 所以就同朋友去食個早餐先

去食早餐既路上有兩隻好得意既狗
X100V

早餐緊係要飲返杯咖啡醒個神先啦
X100V


天氣勁正呀今日真係 去到租車公司門口都忍唔住影張街景
CONTAX G1 CP200


之後去日產個邊拎車 都係根據ANDY哥條片個做法啦
CHECK下有邊到有花而佢張REPORT上本來無
其實佢地都無MARK幾多下 所以都慢慢紀錄返哂D花
對埋D保險呀 ETC呀呢D就正式出發了
X100V


路上仲遇到架秋明山史必屎打車隊既大發

CONTAX G1 CP200

--------------------------------------------------------------------------------------
開頭睇地圖好似好遠咁
但自從尋日行過鹿兒島市中心個邊之後就發現
個個距離真係會高估
市中心去仙巖園其實好近 揸車大概20分鐘車程
不過自駕黎講呢 就緊係唔多唔少都會出現行錯路
因為個車機無CARPLAY 所以只可以睇電話個MAP導航
但係個MON咁細就好易睇錯行邊條線
但係呢個都係樂趣黎 因為行錯路既過程你就可能會被GOOGLE MAP點去行D細路
(連我而加都搵唔返個陣係點行去條細路 係MAP上面係無路
今次都係咁 所以我地行左條係正錦江灣邊既細路 風景好正


雖然個日係閒日 但都等左一陣先有車位
之後就買飛入場啦 大人 ￥1,000
本來以為會唔會好快行完 點知行完個外圍都行左成2個幾鐘
都仲未行個御殿同未食野


唔知大家有無過幕府末期個段時間既日本史
可能好多人都知長洲薩摩藩係倒幕運動既重要力量
而薩摩藩個陣就係係仙巖園呢到
由整玻璃開始一路慢慢發展到整軍火
靠近仙巖園個邊當初為製鐵而建造的反射爐遺跡
如果下載返個app仲可在手機上看到AR技術重建的3D影像
(利申無DOWNLOAD
尚古集成館就係當事既工廠所在
而且仲係２０１５年成為世界文化遺產
可惜我地去個陣閉左館

(題外話 薩摩切子D玻璃杯真係好靚 不過真係買唔起)


另外其實呢個地方都可以算係朝聖既地方
因為幾乎只要是同幕末薩摩藩相關既戲劇情節
包括「篤姬」、「龍馬傳」、「西鄉殿」都幾乎係係仙巖園拍外景
（其實呢個TＲＩＰ好多地方都係跟住阪本龍馬AKA桐生一馬渡蜜月既路線去，聽日去既霧島神宮就係阪本龍馬同呀龍去既地方)

-----------------------------------------------------------------------------------------
一黎入到黎就行左A區個邊D鋪先
有D貓木既工藝同野食
呢到因為有個貓神社 所以都有好多同貓有關既野
仲買左條同自己隻貓好似既貓尾 有興趣可以估下
X100V






食左個薩摩紫薯味既雪糕 勁撚正 不過480YEN好細份
肥手指sor



野就食完啦 都係時候出返去行下 我地係行左去C區之後再係後面落返黎
之後去食個靚LUNCH 再入御殿
比大家睇住出面D相先
500CM GOLD200







CONTAX G1 CP200






TX1 過期VELAIA 100


行到最入有個位好開揚 可以睇哂成個錦江灣同櫻島火山

X100V

講明貓神社緊係有貓....


呢D浮水波波如果有浴缸我可能會買個擺下
可惜我無


我都買左個御守既 仲唔知點解送多左對長筷子


------------------------------------------------------------------------------
又跌完錢 都係時候去食下野了
仙巖園入面有間係2樓既餐廳 叫櫻華亭
行左咁耐都好想坐下了

本來想食和牛定食 點知太晏去賣哂
最後食左個黑豚 都好啦 始終鹿兒島出名食豬

圖文相乎


一路食一路望住個無敵櫻島景真係好寫意


仲有一睇就知係中國人既大紅大紫


要爆POST既字數了 食完野之後既御殿之行一陣再繼續寫
今次真一陣寫 絕不爛尾 好似係

有update

無諗到原來有人仲記得

DAY2 仙巖園御殿之行->重富->霧島溫泉 (應該夠字數掛)

享受完高汁既食物仲睇埋美景之後
我地決定入埋去御殿行下
入面都好多展板
有D講下島津家既歷史 講係島津同維新志士之間既關係
又有D講下唔同年代既女性打扮 幾有趣


其實好似放係今日都幾靚下

花期其間 連殿內都周圍都係菊花都係非常之合理
X100V


殿入面好多相都係影朋友 所以唔係得幾多相
不過坐係度睇下園景睇下書其實真係幾舒服
CONTAX G1 CP200



行完之後又好似唔想走住
結果又跌錢
去左餐廳樓下既茶室 仙巌園茶寮 飲茶
上網借既圖


仲貪得意去自己抹自己個抹茶
好似唔記得影相 唯有借朋友個視角


其實除左茶之外仲有好多野食
好似D抹茶刨冰呀
連飯 蕎麥面都有
唔想食樓上和式料理既都可以落黎呢到食 不過就無景睇啦
我自己都係建議上櫻華亭食

飲完個茶坐多陣之後就準備離開了
仙巖園 OUT
G1 CP200


------------------------------------------------------------------------------------
重富漁港篇
個陣都3 4點 本身諗住咁早入到去酒店都無野做
就不如搵個地方行下先
所以我就係GOOGLE MAP到搵到重富漁港呢邊
睇黎可以行下海邊 睇下日落 聽下海浪 聽下風呼鳴咁
而且同之後去霧島都係順路既 所以就出發去海邊啦

過左防波堤就到了
幫朋友影左張 呢張個人覺得真係幾正
都哂左實體送比佢地
CONTAX G1 GOLD200


上到去了 又係唔同角度既櫻島火山哈哈哈
CONTAX G1 GOLD200

又有好得意既狗 然後佢地打緊交
CONTAX G1 GOLD200


呀伯話左邊個隻16歲了 真係勁老 但仲打到交
X100V



500CM GOLD20



XPAN 過期VELVIA100

呢張我都幾鐘意 好PEACEFUL 但又有D漣漪
------------------------------------------------------------------------------------

個天都暗到咁上下 係時候要去溫泉了
本身想用盡D時間 反正天黑就慢慢揸上去
但呢個決定係錯既!!!!!
千奇唔好呀!!!!!!!!!!

因為首先係放工時間市區開始塞車
比原本預計到既時間已經晏左
開始行山路個陣係已經黑哂
而且好似你睇頭文字D咁 真係無乜街燈好黑
因為始終唔熟路 所以要揸得好小心
黑到唔開高燈真係前面轉彎都睇唔到
好彩有驚無險
揸左差唔多2個鐘終於去到溫泉酒店露天風呂の宿 天テラス

去到CHECK IN完櫃台問我地想幾點食
揀左8點半 我諗我地應該都尾輪了
一泊二食 56000YEN 未計溫泉稅
不過其實入到房開得喼整得黎抖下都已經夠鐘食飯了

房入面勁大 兩張床係另一間房

廳有個BAR枱比你自己調酒 又有另一張床比你浸完溫泉係到攤
落左簾後面就係私人溫泉了 廢事影到自己反光

呢三枝野係酒店比我地調酒的

仲有套架餐


抖抖就準備去食野了
唔知係咪九州薩摩藩既維新傳統
呢間酒店都係個種洋館式既建築
自然無女將 而取而代之既就係男既管家
上菜既STAFF都係著哂西裝個種
唔講咁多 即刻睇下有咩食先
唔係食燒肉 小失望!

佢個頭盤好特別
好似想刺激哂你唔同味道既味蕾出黎先咁
可能想等你之後既魚生呀料理呀可以食得DETAIL D





甜品就一般啦


食完都9點幾了 上左山其實都凍左好多下
所以就緊係抖陣就去浸溫泉
我地見佢好似除左自己房出面個個之外
仲有一D係天台同係出面山上面
咁我地都去行下順便等自己消化下
始終食完唔可以即刻浸溫泉 會消化不良
因為係係深山入面 所光污染都好小
本身有諗過要唔要帶腳架影星空
最後都係唔想拎咁多野無拎腳架
抬頭望一望個天真係好清 好多星星
風吹住既時候望住個天好似自己都成為環境既一部分咁
睇左一陣之後用電話影左張就算了


或者有時旅行就係咁
享受過程比你想得到D咩係更加重要
呢句說話係另一個以前同我講
但當時既我唔明 我就覺得 我緊係要去呢到影到乜乜乜先好啦
咁樣樣

或者我因為無帶腳架而影唔到一張好清好多星既星空
但我永遠都會記得望上天空個一刻
仲有教識我享受過程既個一個人

DAY 2 完

岩岩去搵相先發現
原來仲未執數碼之後幾日D相.....
真係斷片咁

終於更新 啲相好靚 想睇多啲

你應該要睇住樓豬啲舊post先 條友相都未執

即睇

樓主算唔話得 之前出面有個post 誇張到爛頭

點樣為之爛頭
利申 執緊相

得個殼 連第一日都冇

樓主係鹿兒島有冇買到菲林
朋友係福岡都買唔到

希望你唔好爛尾!!!

唔會的
已經執好哂相了

無買到
之後我返福岡都買唔到 唔知係咪個排無乜產能
定可能比D台灣人掃哂
今次買得最多既野係藥妝

上個月去大阪都唔算好多菲林賣
睇黎鹿兒島都唔會有