歐洲建築（慢慢寫）

去邊頭？

會去倫敦，立陶宛，拉脫維亞，愛沙尼亞同芬蘭

巴打你係建築師？

LM

我都重係睇緊西歐canon嗰堆，未玩到東歐耶

No la 都係興趣，略懂而已

興趣都識好多

應該就係拿破崙嘅，每個軍團都有一隻所以都唔係話超級罕見，英國應該收埋好多吓

羅馬帝國軍鷹就暫時未搵到有實物，只係唔同source都指出每一個羅馬軍團會有一枝鷹仗，所以拿破崙先會整嚟用

^ Exeter Cathedral 雅士打座堂

西羅馬帝國覆沒之後，西歐就離開咗古典世界，進入咗中世紀。冇咗羅馬大佬睇場之後，各界生蕃開始全面進場。其中日耳曼人成功拎到最多地盤，例如法蘭克人Franks，同歌德人Goths。

當然，風格改變通常係循序漸進，而唔係一刀切的，所以喺歌德風格盛行之前，首先有Romanesque 羅馬式風格，英國又常見叫做Norman Architecture諾曼風格。英國例子有Durham Cathedral 對衡座堂、Winchester Cathedral 雲車士打座堂 （Winchester直到今日都係唯一一個曾經正式被宣布做英國首都的地方）、Exeter Cathedral 雅士打座堂等。

呢個風格嘅特色就係佢保留咗羅馬建築嘅半圓拱，牆身厚實，但係少咗好多古典元素，例如裝飾性好強嘅Corinthian Column。

上圖嘅Exeter Cathedral塔樓正正就係好有Romanesque味道嘅建築。後來歌德時期再加/改建咗英倫歌德味好濃厚主建築

唔記得覆

Hampton Court準備搵日去睇了，唔知公司張證可唔可以免費入，冇就應該做member了，

我都住幾近的，不過唔係超多香港人個幾度，可以成日去做member都扺

唔一定要做member 但要天朗氣清睇
今日好天呀巴打值的出街行吓

一年入兩次已經回本了

我St Paul呢幾個月都起碼去咗五六次了當去咗歐洲

都係
入邊最好J 嘅 除咗果條畫滿畫嘅樓梯
仲有個最邊皮嘅English Garden

呢期開始入冬
完全無心情出街

English Garden = 雜草叢生，Castle Howard嗰個唔錯，不過都係法式Formal Garden好

留名

巴打嘅知識係邊度嚟，記到咁多？定一路寫一路上網搵資料

主要都係去睇實物最多，睇正史就一定要去歐洲浸出嚟，走唔甩的。你睇吓睇吓就會太約記得個浪，啲detail你就算唔記得曬都會知有咩keyword搵

有啲基本知識例如order、比例、風格嗰啲就網上加書都好多好多可以學。用Art History角度入手冇咁technical會輕鬆啲，不過要撈埋歷史/古典神話/符號學/拉丁文 etc etc

加插一幅自己好鐘意嘅相，York Minster影的，順便foreshadow一吓歌德呢個咁大嘅主題。

嗰陣時睇緊Evelyn Vaugh嘅《Brideshead Revisited 故園風雨後》，係英國傳統大學嘅學生點都會讀嘅一本書（聽過最有趣嘅形容係「compulsory reading for any man that owns a Barbour」）。呢本書主要講二戰前後英國貴族嘅沒落、宗教衝突之類，入邊Part I嘅題係拉丁文Et In Acadia Ego，大約係解「And/even in Acadia, I am / 雖在樂土吾亦復存」，呢個「I/吾」係借代唔好嘅嘢：死亡、痛苦諸如此類。York呢個雕像又幾應題，所以就影低佢了

樓主安好嗎

以為冇人睇冇寫了

上個禮拜啱先去完羅馬、龐貝同拿玻里，不過今次睇雕塑多些少



第二次去羅馬，終於入咗去圓拱之母萬神殿了，仲要特登住萬神殿隔離，一落樓下就係


羅馬論壇呢個經典影相位係十七/八/九世紀用堆碎石砌返出嚟嘅「picturesque」景，但去到係好feel到嗰個懷古思人嘅情緒，好有「啊，呢度就係歐洲文明嘅發源地」嘅感覺

個up相server又冧咗，返屋企再慢慢up

想sum-up吓去咗幾次歐洲最有感覺嘅城市s

羅馬 - 見證大時代嘅滄桑歷練

千古有幾多風流人物喺羅馬渡過一生興衰？由共和帝國叱咤地中海西歐，天主教廷由盤踞帝都興風作浪到屈服拿破崙大革命淫威之下，意大利統一再作大國之都，復有墨索里尼興歐洲右翼思潮……


^凱撒帶軍渡過Rubicon河，象徵羅馬由共和走向帝制（羅馬律例規定，擁兵渡河即屬叛國）

羅馬盛世，將希臘式文明社會發揚光大，大國睇場之下亦俾歐洲有一段和平嘅黃金時期

Michelangelo、Raphael、達文西、提香、Canova、Claude Lorrain、Bernini、你與我…… 有邊個冇被對古典世界嘅遐想吸引去羅馬？



^Canova作品，聽講曾經有個退休職業殺手喺度用七飛子彈殺咗成個黑手黨



威尼斯 - 悠然自得嘅塘邊鵝

威尼斯係一個好多「曾經」嘅地方

呢一小片潟湖之中嘅土地曾經紙醉金迷，曾經係國際金融中心，曾經可以左右地緣政局大勢…… 一切一切喺九七年一夜變成曾經。

大亨不再，淨下慕名而來朝聖的遊客、苟且偷生嘅本地人，香港人遠來，自有惺惺相惜之情



威尼斯一早已經放棄掙扎，但六百年藝術底蘊未衰，去到Dorsoduro同San Polo學生/雙年展intern聚集之處，有種藝術學生的頹廢美decadence

讀藝術的大戶子弟離地，但飄飄然的生活態度令人嚮往，San Marco的甚麼遊客本地人之爭，麻煩留在Academia木橋的右邊

威尼斯的脫節經濟，未必是禍，甚麼難民穆斯林斯拉夫人對冇福利冇生計的地方全部冇興趣，面對歐洲移民泛濫問題，威尼斯只留下一聲笑，目光回到畫廊裸模的肌膚上

*威尼斯共和國喺一七九七年被拿破崙攻下，屹立咗十一個世紀嘅寧靜共和國被法蘭西大軍「解放」


^其中一個最「完美」嘅文藝復興建築 - Bibloteca Marciana




^我最鍾意嘅新古典雕塑家 - 來自威尼斯大區嘅Canova其中一個墳頭，佢嘅作品有好獨特嘅肌膚感


^收藏喺倫敦V&A嘅Canova作品 - 一笑傾國傾城嘅Helen of Troy



翡冷翠 - 好「靚」嘅城市

一路都歡喜用「翡冷翠」多過用「佛羅倫斯」，因為佢真係靚到似塊打咗燈嘅翡翠，好似一個身材高挑嘅冰山美人，加上佢位置Toscana山區之中，比起位沼澤濕地嘅羅馬同威尼斯的確多一份清爽




佢係一個冰封咗喺文藝復興嘅城市，唔似威尼斯一路順住時代走


^David仔 by Donatello，古典時期之後第一尊男性裸體雕像




^Michelangelo嘅funerary monument


^瀕死之際的亞歷山大大帝


^由Alberti設計嘅Santa Maria Nouvella立面，呢間嘢買香水好出名



巴黎 - 大國之都嘅氣派

巴黎本身係一個好雜亂嘅中世紀城市（City of London到今天仲keep咗中世紀大城市嘅layout），衛生治安火警安全通通欠奉，而且仲好樣衰

Haussmann喺拿破崙三世治下，得到國家級funding，將成個巴黎重建成今日嘅模樣。


^第一區劇院大道，見到好典型嘅巴黎建築風格，非常高挑、「牛油」色加深色斜屋頂配French Balcony

呢個重建，反映到法國精英嘅will、眼光同遠見。一次過解決咗所有公共衛生問題同治安風險（寬敞直路容易操兵鎮壓，non-institutional的一方封路亦都難好多），第一次將保育呢個概念融入urban planning，用國家地標嚟做巴黎嘅hotspot同統一建築風格突顯帝都風範



類似嘅眼光，羅浮宮八十年代擴建亦都好表現到出嚟。當年貝聿銘玻璃金字塔連埋挖空拿破崙廣場嘅計劃一公布，反對嘅群情非常洶湧，但係市政廳同埋羅浮宮管理層無視民意繼績工程，最後成就咗呢個咁經典嘅場景。



四十年後嘅今天，羅浮宮仍然係博物館翻新嘅教科書級例子，新同埋舊嘅部份完全冇衝突，仲起到互相昇華嘅作用，大家試吓想像冇玻璃金字塔嘅羅浮宮或者羅浮宮嘅玻璃金字塔，成件事即刻冇咁iconic