我同大家一樣，其實幾年之前都覺得「呀，其實成個歐洲好似咪差唔多樣……」，但係喺度讀咗幾年書，畢業之後玩咗一年，又喺倫敦開始做嘢差唔多一年之後，覺得又好似睇多咗少少嘢。見之前分享對香港建築嘅淺見又幾多人睇，所以而家又想上嚟盡量用自己影嘅相分享吓
^Royal Naval College, London 格蘭威治皇家海軍學院
成日話嚟歐洲係睇建築、睇歷史、睇文化，咁其實「歐洲建築」係咩呢，相信大家心目中有一個好generic，好大約嘅印象，可以係凡爾賽宮咁金碧輝煌嘅巴洛克王宮，亦可能係古典世界嘅羅馬鬥獸塲，或者係歌德復興嘅西敏宮（英國議會大樓）？
要認識歐洲建築（同歐洲歷史一樣），基本上係離唔開西方文明嘅兩個「祖宗」：古希臘同埋羅馬帝國。兩者之中，羅馬嘅影響力尤甚。帝國帶嚟嘅公共系統、制度、基建、文化，全部喺二O二三年嘅今天仲係清晰可見。世人亦視其爲歐洲文明正統。
自（西）羅馬帝國喺五世紀覆沒以嚟，西歐嘅各路人馬都有意復辟羅馬，或者擁有羅馬帝國喺歐洲曾經嘅影響力（其實有少少似爭奪中華正統）。其中以查理曼嘅加洛琳帝國同後續嘅神聖羅馬帝國，仲有拿破崙嘅第一法蘭西帝國最爲顯著。歷代嘅歐洲君主畫像亦都常見將國王畫成羅馬皇帝亦都係因為咁解。
喺中文世界，「王」比「皇」低級，歐洲嘅King同Emperor比亦係後者高。Emperor（拉丁文Imperator）係羅馬起用，之後亦都係只有聲稱擁有羅馬正統，或者希望自己同羅馬呢一個entity掛勾嘅君主先會用，例子正正就係神聖羅馬帝國皇帝（由教宗賜予），同埋拿破崙自稱法國人嘅皇帝（但係佢嘅風格亦極有復辟羅馬嘅味道）。英國係一個比較特殊嘅例子，維多利亞女「皇」係借印度帝國嚟稱「皇」。
^Arch of Constantine, Rome 羅馬君士坦丁凱旋門
君士坦丁係第一個皈依基督教嘅羅馬皇帝，佢亦都立法將基督教納入羅馬合法宗教之一。當年君士坦丁稱帝嘅認受性亦都唔高，所以佢用咗唔同方法提升自己民意，但係君士坦丁亦無可避免成為羅馬帝國沒落嘅一個象徵。君士坦丁門正正就係反映咗呢位皇帝統治下嘅羅馬。
曬咗咁多口水，終於可以講吓啲建築物。君丁坦丁門嘅結構係非常之典型嘅羅馬凱旋門 - 最明顯嘅就係一大兩細嘅拱門（亦有另一種只有一個中央拱門）。呢個時候嘅羅馬已經開始末落，工藝水平上亦反映咗呢個現實。裝飾驟眼睇好似好精細，其實係因為當時嘅雕塑家係拎咗前人嘅作品嚟改裝，好多時其實佢哋只係改咗個人頭做君士坦丁個樣，喺Frieze上邊嘅新作品亦都失去咗以前嗰隻輕盈，開始有少少中世紀嗰隻扁平累贅嘅影子，好笨拙咁顯示左當時工藝水平。
^君士坦丁門大圖
不過由於君士坦丁門係羅馬凱旋門保存得最好亦係最大嘅一座，所以文藝復興之後亦廣被人用嚟做羅馬凱旋門呢一類建築嘅textbook參考。
以下有兩個比較出名參考佢嚟起嘅例子：
^Arc de Triomphe du Carrousel 巴黎小凱旋門
由拿破崙落order起嘅巴黎小凱旋門，本身係杜麗爾宮（喺羅浮宮正對面，十九世紀中被巴黎公社一把火燒咗，佢嘅消失亦都破壞咗巴黎中軸線）嘅大門口，用嚟慶祝拿破崙大軍瓦解第三反法聯軍。頂頭嘅四隻銅馬亦都大有故事，同威尼斯、十字軍、希臘同東羅馬帝國嘅君士坦丁堡極有淵源，有人想知可以再丼多少少。
^Marble Arch 倫敦雲石門
相對巴黎個老表，呢個就冇乜特別（好多英國建築其實都係）亦冇乜故仔，不過出名啲就擺出嚟睇吓。
