銀行職員 : 未能對一手樓提供任何估價，簽完合約才可按合約估價

最近，我們《胡．說樓市》收到一名谷友求助。谷友與女朋友看中奧運一個一手貨尾盤。經代理介紹及研究各項資料後，也覺得可以一試，當時代理還叮囑他要在周六前向銀行申請一張本票，好讓他向上司爭取回佣細節安排。連回佣等細節都談好時，原本都十拿九穩，怎料當谷友致電銀行查詢按揭事宜後，就跟女友打消了入市念頭。

據谷友表示，雖然發展商有提供備用按揭計劃，但兩口子還是打算申請銀行按揭。當日谷友致電銀行查問物業估價，但銀行職員卻回覆稱：「未能對一手樓提供任何估價」。該銀行職員還對他表示，簽完合約才可按合約估價，但谷友反問：「落完訂，簽完約才知估唔估到價，豈不是好大鑊? 」職員笑而不語。其後代理也協助致電銀行查詢，也得出同一答案。

今次谷友打算認購的是現樓貨尾，照道理銀行多會受理，只是能否估足價卻是另一個問題。業內人士解釋，一般情況下，銀行會按照合約價來估價，所以為一手樓提供估價也沒有意義，話雖如此，銀行慣例按合約價估價，這是否必然? 如果並非必然，則市況逆轉而下調估值的後果，就全數要由準業主來埋單。

我們《胡．說樓市》編輯部也致電銀行查詢，其中一間銀行職員跟我們說，現樓貨尾可直接前往分行申請預先批核，但職員臨收線時提醒一句，預先批核需時一個月。我以為自己聽錯: 「吓?! 一個月?!」他說：「是的。需要一個月，已經比以前好，以前沒有預先批核的。」職員再補充，預先批核的有效期為一個月，提醒須在有效期內簽好合約。

這一個看似沒什麼大問題的瑣碎事，原來對準買家是大件事。放寬按揭成數，是否能夠通過壓測，這一點反倒可以自己評估，確定到財政實力有無問題；但銀行不為一手貨尾估價，要他們拿著合約才肯估，卻對準買家充滿不確定性。所以，如果準買家真的因這原因擱置購買一手貨尾盤，我明白及理解的。

奧運邊個盤仲有一手貨尾？

好難明

睇唔明

其實一手不嬲都係按合約估，唔係第一日既事

新樓簽約三日撻訂唔係無聽過呀

胡說冇理由唔知㗎喎

幾十年嚟都係咁，新樓唔洗預先估價，你合約買幾錢，減或者唔減回佣，就照價做按揭

唔係所有樓都係買完先批按揭，一日未簽銀行都可以反口？ 除非做預先批核？

一手樓無成交紀錄睇到，用返周邊嘅二手成交分分鐘可以差20%，點敢出個估價俾個客

更何況依家已經懶到係叫個客講個價再問返估價行到唔到價就算

不嬲買樓都係咁做法。就係有咁既風險，唔係駛鬼問最少3間銀行咩

佢認真起上嚟估價要揾公正行，check合約/契，到估完價又唔買咪蝕囉。不嬲銀行都係咁玩法講到好似新野咁

佢而家講緊估價問題
二手樓買之前銀行已經會有估值俾你，咁買家就知自己借到幾錢
但一手樓因為無買賣紀錄唔會有估值，所以係要用發展商開果口價做估值，變相係你買完先知借到幾錢，但so far未聽過一手樓估唔足價，不過銀行一定戴頭盔，答你果條友唔會保證你100%估得足

新樓不嬲都係按合約價架啦
冇買賣邊有估價
你話銀行借唔足光豬價再報啦

一手貨尾可能擺咗好多年嗰啲，其他已經入晒伙有二手

發展商可以唔跟巿價開
所以一直都係合約寫幾錢就估幾錢

不嬲都係有臨約先申請架啦

買樓唔係一向都係咁？
一向都係簽完約，拎去銀行做估價

唔明個問題係邊，除非你話依家發展商開個價高過已經入伙好耐嘅二手價好多都仲仆去買，唔係嘅話銀行冇理由唔用合約價同你做按揭

流量密碼

銀行不嬲用合約價對一手樓做按揭
不過風險係自己度 唔知銀行幾時收水


之前飛揚班友咪藉呢樣野想發展商補返差價比佢地