山陰山陽遊記

之前喺連登問咗大家山陰山陽嘅行程
想share 返個旅程，順便重溫一次自己去過嘅地方

朝早5點機就到關西機場，入境嗰啲好順暢，好快拎完行李就搭車去梅田，俾預計時間早咗到，喺附近食埋早餐先出發去鳥取


去到鳥取站已經充滿當地嘅特色，有啲沙嘅雕像，去酒店放低行李食第二餐。

嚟到鳥取緊係食蟹，個汁甜甜地又好香蟹味，好食

之後喺車站附近買咗巴士pass去第一個景點—鳥取城跡、仁風閣
天氣好影咩都好靚




下一站搭巴士去白兔神社、白兔海岸
白兔神社嘅御守係白兔形，都幾靚幾特別


夜晚喺酒店附近食燒肉同壽喜燒
壽喜燒好好食！店員用糖煎咗舊牛先，食落有焦糖嘅香味，再加塊牛本身都靚，好好食
燒肉嘅肉都好靚，不過食咗幾舊開始滯，太油，雞肉都唔錯，燒耐咗都唔會鞋





Day 1完

第二日全日都喺鳥取砂丘玩
第一站去咗砂の美術館，今年主題係埃及

睇完坐纜車落去砂丘，冇咩人搭



落到砂丘喺附近餐廳食咗個lunch ，味道正常，再買咗個布甸食，布甸好滑好正


經過pokemon 孔蓋


食完野再行陣砂丘



差唔多4點返巴士站附近去join 滑沙（預早上網book 定），職員都識講英文，再加上身體語言，所以溝通都冇咩問題

滑沙體驗好爽第一次會坐低由高處滑落去，之後分別喺中位同中高位企起滑板上滑落去，只要隻眼望遠啲就冇咁易跌，不過玩完成口沙，同行架仔好犀利，由最高滑落去都冇跌。
職員同你試過兩三次就係自由時間，大概玩個半鐘就執野走，成個過程最辛苦係滑完要拎塊板行返上去，不過嗰陣都唔算熱，依家夏天玩應該好熱
Btw,嗰個位風景好靚又冇人




本身想睇日落同睇星，但係好似冇車走就放棄咗
夜晚去咗食鐵板燒，老闆同客人好熱心，知我哋唔識日文，其中一個客人視像俾佢一個識普通話嘅日本人，然後同我視像問我想食咩，其實我可以google translate ，不過佢哋太熱情唔知點拒絕



Day 2完

有無去埋松江、米子、出雲同石見？

第三日由鳥取去米子，book咗兩日自駕玩
去酒店放低行李就出發
第一站去植田正治美術館打卡，不過天氣麻麻


行完美術館就去大山，去到大山附近變返好天，行咗陣大山寺（冇上到最高）同附近嘅街道，但係冇咩餐廳，求其入咗間店食個晏就走



下一站去咗大山牧場，試咗好滑嘅雪糕，牧場餐廳嘅牛乳湯拉麵都有好香嘅奶味




食完搭纜車，仲有送爆谷，不過好難食，又冇垃圾桶掉



Hea 咗一陣就搭纜車離開，行程計劃喺大山睇星星，距離日落仲有段時間，所以周圍去咗啲景點：鍵掛峠、木谷沢溪流、大山遊客中心睇日落





日落之後開始見到星星，不過唔多，可能月亮太光，反而落到植田正治美術館仲多星星



Day 3完

冇去石見，其他都有去

第四日朝早去境港食紅楚蟹（未到松葉蟹嘅季節），啲蟹真係好平，千幾羊就有一隻正常size 嘅蟹，佢全部一袋袋裝好，你可以買一隻，會照除返俾你唔會收貴。同朋友傾計講開啲蟹，佢話幾年前去都係呢個價，咁耐都冇加價真係好犀利


店員會教埋點剝蟹，之後要靠自己食完唔夠仲叫咗半袋蟹腳，都係1000羊



除咗蟹仲有猛者蝦，真係有啲甜味，好好食！不過啲垃圾記得分開袋，蟹殼一袋，其他殼又一袋



食飽去咗水木茂大道，都係行吓就走，對鬼太郎冇咩興趣btw，日本車站真係設計得好靚，會配合當地嘅特色




下一站去二十世紀梨博物館，仲有得試食三款梨，好多汁！



最後去咗倉吉嘅白壁土蔵群，沿途見到當地旅行團都行緊，不過我就覺得唔多野行



倉吉站附近有pokemon 孔蓋，今次有個梨


走之前試埋牛骨拉麵


Day 4完

用咩機影 影到D星咁光

iPhone 13pro

正WO

第五日去松江
一到站就買咗巴士pass 先，聽日去出雲都會用到，外國人買會平啲，記得帶passport （雖然正常都會跟身

第一站去八重垣神社，入面個境之池係占卜緣份嘅地方，首先要買張占卜紙，再去境之池度做，放張紙係池面，然後放個硬幣上去，紙張漂浮嘅時間同距離係代表緣分快慢&遠近，一場嚟到都買咗張嚟玩。溫馨提示，嗰度好多蚊，如果你緣份太遲先到會係咁俾野咬



下一站去食晏，呢個set好豐富，仲試埋宍道湖蜆，原來冇咩味



觀光巴士都幾靚


松江城，上到天守閣望出去嘅風景好靚，不過喺我去過嘅城入面，自己覺得風景最靚嘅係犬山城同唐津城，兩座城都可以行出去睇風景




睇完松江城就去咗島根縣立美術館



最後去宍道湖搭觀光船睇日落，去之前見到今日嘅日落指數係40，成個天都好多雲，不過估唔到40都咁靚，唔知100係點
日落之後船上面嘅人仲一齊拍手掌，氣氛好好



返酒店之前去咗車站附近嘅居酒屋食


Day 5完

第六日去出雲
搭車之前見酒店早餐好似ok 咁，試咗啲，都唔錯（東橫inn




第一站就去出雲大社，行去出雲大社條街都有好多唔同嘅商店睇，去咗買雪糕食，食完行多陣就到


一入到去見到呢條注連繩都覺得幾大條幾靚，不過睇完神樂殿嗰條，再出返嚟就覺得佢好細條


真係好大條注連繩，好難忘，有啲後悔冇喺嗰度買御朱印




行完出雲大社就去食蕎麥麵，好食

稻佐之濱：眾神上岸嘅地方



本身想去睇日御琦燈塔，不過見天氣麻麻就冇去

栗津神社


呢晚又去咗居酒屋食，隻雞髀煎到好燶，同隻碟撞色




Day 6完

山陰之旅告一段落，其實仲有好多地方未去，下次有機會再深度遊
第七日由米子去岡山，放低行李就去咗姬路城，搭新幹線好快就到，嚟到晴天之國就落雨，記得之後都一直落雨或者陰天


對比其他城，姬路城真係好多人嚟，當然都好值得嚟睇，白色嘅城好靚！


買入場券嗰陣買埋好古園，都幾靚



行完姬路城就返岡山，喺車站商場食壽司，嚟到岡山即刻多咗好多舖頭，啲舖又冇咁早收


行過見到呢個芭菲杯好正，好想挑戰


食完壽司去aeon 行咗陣，又食雪糕，日本啲雪糕好好味



Day 7完

第八日去尾道
落車之後沿住商店街行去搭纜車
今日依然係落雨





落車即刻見到隻貓，一開始以為係假嘅睇咗陣貓就去千光寺


喺千光寺望啲纜車都好靚


我地纜車買咗單程，走嘅時候行埋貓之細道，不過一隻貓都唔見可能落雨冇咩貓出嚟，不過條路都幾靚




落到商店街食埋碗尾道拉麵就走，間舖個冷氣唔知係咪壞咗，食到好熱


下半日去返岡山城同後樂園，岡山城好新，入面好似博物館咁，印象中好似有lift 搭埋上去



晚餐時間，好正嘅天婦羅丼，之後仲食芭菲杯，本身諗住兩個人食一個，其實佢餐牌都寫到明個芭菲杯係二至三人嘅份量，不過都係要我哋叫多樣，所以嗌咗杯野飲。個芭菲杯真係好大杯，食到好飽



Day 8完

第九日去倉敷
去倉敷之前去咗吉備津神社，仲見到貓





睇完神社就去倉敷，一去到就食晏先，杯桃汁同布甸都好好味！



食完就周圍行，今日天氣幾好，晴天之國終於出太陽！見咁好天都去咗搭觀光船，可以一去到就買船飛先，因為都有啲full，預早揀返啱嘅時間搭




經過間舖頭食咗蠔嘅煎餅


行完倉敷就去三井Outlet 行吓，幫屋企人買嘢，夜晚去岡山Aeon 打邊爐


Day 9完

巴打間天丼咩名

打算11月初都去鳥取島根玩, 又係大阪出入, 鳥取就主打沙美術館同行沙丘, 島根除左雲大社, 仲有冇咩推薦, 去8日的話落埋廣島會否太chur?

第十日去廣島
第一站去廣島城，去到廣島有啲唔舒服，都冇咩心機影相（去旅行先病


之後行咗原爆原頂屋同和平紀念公園



晏晝搭船去宮島（jr pass可以免費搭），原來宮島都有咁多鹿，好得意



去到大鳥居嗰陣係潮退，影咗陣相就食晏，食完野先去嚴島神社，去宮島可以睇定潮汐表，一次過睇晒潮漲同潮退



去廣島要食廣島蠔



試咗啲饅頭製品，原個饅頭同鯛魚燒款都好好食，不過買返屋企嗰啲饅頭就普通



行完街又去返鳥居，開始潮漲


因為就嚟閂門同埋落雨，嚴島神社都冇咩人，我哋喺入面一路行一路等潮漲



終於多咗啲水，不過最後都唔係好漲就要走，希望下次有機會再嚟



離開廣島之前食埋廣島燒



Day 10完

天麩羅 えびのや さんすて岡山店

島根我仲有去松江，本身都想去足立美術館同安來市睇泥鰍舞，不過有啲遠又冇時間，所以冇去，你睇吓啱唔啱去

我鳥取島根就玩咗6日，主要去咗啲出名嘅景點，唔知你8日包唔包埋搭飛機嗰日，你同我行程差唔多嘅建議你剩返兩日繼續喺山陰玩好啲
因為去廣島玩唔搬酒店直接由米子出發要搭3個鐘車先去到廣島，車費都成萬yen ，同埋冇時間玩，搬酒店第一日去到廣島可以行市中心，第二日先去宮島，不過唔知你第二日使唔使趕搭飛機，如果要就去唔切

第十一日去福山
原本行程plan咗去兒島同鷲羽山睇日落，不過見天氣麻麻，前一晚又發燒費事早起身周圍去，最後決定去福山
今日好晏先出發，第一餐已經係lunch



食完之後去福山城，呢個城其實係早幾日轉車嘅時候發現，買咗本百大名城儲印仔，但嗰日冇預計會去所以冇帶，咁就miss 咗，見近近地就決定呢日去


因為係臨時安排嘅行程，所以前一日先睇吓除咗福山城仲有咩行，原來福山有個叫鞆の浦嘅地方，係波兒嘅故鄉


喺鞆の浦附近見到波兒



附近有間雪糕店，見個大福幾吸引就買咗，不過食得好麻煩，太大舊

崖上的波兒個漁港？其實都唔係好記得套野


燈塔


行咗陣就離開，喺車站都望到福山城，都幾特別


夜晚去買吓手信就結束當日行程

Day 11完

第十二日，都係最後一日
前一晚喺連登見到因為太大雨，關西機場出市區嘅鐵路都停晒，所以都擔心第二日會唔會冇車去機場，不過我哋搭夜機，所以都有好多時間去
本身有諗過喺大阪行吓，不過交通唔係好順暢就取消咗，直接去臨空城行

由岡山搭新幹線去大阪都冇咩問題，一到大阪就超多人，應該仲有啲鐵路未開返，所以有好多人排隊問野或者改飛嗰啲

我哋原本想搭嗰班車都遲咗好多先開，不過都順利去到臨空城，最尾一日好好天


主要都係買野食野就走，不過真係好大，幾適合飛之前最後衝刺，唔買嘢都可以睇吓風景




Day 12完

12日山陰山陽之旅就完啦（冇去到山口縣
之後仲有去九州，搵日再出埋

幫推

Lm
9月尾去

巴打有冇買山陽&山陰地區鐵路周遊pass, 我見 cover 哂大阪, 鳥取, 島根, 好似好抵玩咁