1：近來有朋友話我知，機管局行政總裁林天福，喺上個月嘅一個員工大會上，提到好多人都鍾意拎香港同新加坡機場比，which is true。咁佢自己點睇呢，佢就話大家客源唔同（黑人問號？？？），應該要放眼大灣區，深圳同廣州機場先係對手。
2：搞笑啦！香港喺最新國際金融中心排名，雖然低過紐約、倫敦、新加坡，但假假地都排全球第四。香港要比較的話，你叫我唔同新加坡比，要同深圳、廣州機場比？
3：好啦，既然要比，咁我就走去睇返國際航空運輸研究機構Skytrax，自2001年開始公佈嘅世界Top 100機場排名，去比較返幾個地方。
4：香港機場1998年開幕，2001年就拎全球機場首位，於2001至2011年一共拎左8次全球No.1。此後到2019年，差極都係第5位。香港機場，點計都係屬於香港人引以為傲嘅世界級機場。
5：不過自疫情後，即係2020年開始，香港機場排名，可以話係幾何級數暴跌，2020年，第6；2021年，第10；2022年，第20；去到今年2023年，係排33位，係有史以來最低排名。
6：第33位係一個咩概念呢，就係連廣州、深圳機場排名都高過香港，廣州排24，至於深圳更加係由上年57，一舉跳升至今年31。
7：新加坡呢，2012年至2020年一直拎第一；上年、前年跌咗去第三，不過今年又上返首位了。
8：睇到呢個陣勢，突然間明咗點解林天福會話唔好同新加坡比，要同深圳、廣州較勁，因為香港同星洲機場嘅距離已經差太遠，而家首要反而係唔好俾深圳、廣州拋離得太緊要。
9：然後林天福話，依家話要擁抱大灣區啦，話大灣區大把客；而又其實，香港本來一直都擁有好強地利優勢，一早已經係背靠中國，面向世界。香港國際機場一直都係世界級機場，大灣區批客，suppose應該已經擁抱咗啦。今日煞有介事要放眼大灣區，說穿了其實只係「攬住班舊客」，唔好俾人搶走。
10：係可惜嘅，香港地利上得天獨厚，世界一半人口，都可以喺5小時飛行時間內到達香港，呢點連新加坡機場都做唔到。香港機場本來揸一手好牌，但經歷一個疫情，香港機場由世界前列極速降班，由甲組變乙組，由放眼國際，到今日對眼睇返近啲變放眼大灣區，諗起都覺得唏噓。

喂，老老實實，疫情又唔係香港獨有，「北上廣深」中嘅廣、深機場排名都可以急起直追，點解係香港先跌得咁勁，係咪要檢討吓？
11：有咩要檢討，數字或者搵到玄機。機管局至今年3月止年報應該就快出街，到時再睇有咩特別嘢。
依加香港，各方面都比唔上大陸
