首先講講出院後支援，因為我前公司就係呢一下作為服務切入點。當一個精神病人被青山、小欖診斷為冇暴力傾向時，佢就可以出院，然後佢就會轉介去我前公司。至於病人係唔係真正冇暴力傾向，完全係睇個精神科醫生判斷（我地少用復原呢個字，只為精神病係冇可能完全康復）。問題就出喺呢度，病人係唔係真正冇暴力傾向？冇人知。定係醫院唔夠床位時就會將部份marginal case discharge？冇人知。又或者個病人係唔係醒到見鬼講鬼話？冇人知。所以我前公司有時會接到啲做過驚天動地大案嘅客仔，原因就係醫院聲稱個客仔已經冇暴力傾向。
然後講人手問題，據我所知我前公司下每個服務單位，都係長期人手不足。社署編制下會限制每個單位職員數量，但其實個限制根本不設實際！根本唔足以應付實際服務需要。加上前線護理人員（社監、護理員、社工）流失率普遍高，而精神病復康機構情況更加嚴重，同上面講醫院情況一樣，醫院集中大量人手，但可以射後不理掉晒去機構食，成件事整個體制係唔係應該要負上返一定社會責任？
除編制人手外，有時類似馬會一類金主會突然掉舊錢落嚟，要求公司開設新服務，不過呢類服務通常有時限性，funding一完成team人就會炒晒，同埋亦都限制咗機構點用呢班人，係唔可以將佢地用落恆常服務上。結果係人就大把，編制同事忙到仆街，project同事想幫又唔幫得。
之後講撥款方面，一筆過撥款下每年政府都有一定經費交俾各機構盈運，但除咗一筆過撥款外，仲有其他名目款項，好似block grant、lottery fund之類。聽落好似好好，好多錢可以任你點洗，但實情係呢類錢好多時根本用唔到落去服務使用者身上。每次出現社會不幸事件，政府就會好似買贖罪券咁掟一大舊錢落嚟，不過就會限制你舊錢唔可以用嚟增加人手！結果係唯有拎筆錢去買一堆唔等駛嘅垃圾！例如換晒所有冷氣機、買多兩隻垃圾機械人涼冷氣、買堆部iPad通街派等等等等...每年3月31日前就係地獄，瘋狂地買一堆垃圾返嚟先再慢慢諗點用。
曾經喺武肺期間，社署皇恩浩盪搞個project俾機構請一班programme worker，人工恥辱性地得10,500大元，仲要講明係得兩年期。我請個青頭返嚟教識佢中心每份表點填同大約運作都要半年，加埋份咁嘅人工，你叫人點做？
香港正苦對於精神病復康問題，根本就係頭痛醫腳、腳痛醫頭。成件事完全冇遠見同計劃，純粹覺得掉舊錢出去就會有人包底做晒。有時其實我好佩服我前公司班員工，佢地出發點都係以服務使用者利益做依歸，面對住咁戇居嘅政策都係咬緊牙關照做。
P.S. 鑽石山條友正正就係小欖discharge case，到底佢係真係冇暴力傾向，定扮得太好？
P.S.2 剛聽舊同事講，比卡超話檢視精神病服務，但唔解決根本問題，加上以比卡超條廢物嘅智力，都只係繼續頭痛醫腳、腳痛醫鳩
好大冤氣
