天文學家從兩萬年前嘅洞窟壁畫，發現金牛座嘅蹤跡。星座居然係舊石器時代嘅產物！？

更多事例
除此之外，拉朋格魯克仲搵到其他洞窟當中可能含有嘅天文學知識。

例如，喺法國阿爾代什省嘅獅頭洞窟發現另一隻原牛。呢一隻原牛比起第十八號公牛仲要古老四千年，身軀畫住七個點聚成一組，可能係昴宿星團。

喺西班牙嘅卡斯蒂略洞窟，搵到一組源自於公元前一萬二千年嘅七個紅色圓盤，排列成向下嘅曲線，仲有一條接近五米長用紅色手印畫出嚟嘅飾帶。拉朋格魯克返到去公元前一萬二千年嘅星空，發現呢個圖形符合當時嘅北冕座，嗰條紅色手印可能就係銀河。北冕座喺公元前一萬二千年會一直圍住北極星轉而唔會落下。

喺凱爾特神話，北冕座被形容為星辰女神艾麗安蘿德(Arianrhod)嘅屋企，係一座冰堡座落喺北方、不斷旋轉嘅島。從依家嘅星空唔能夠理解呢個故事，呢一個神話會唔會係保留住公元前一萬二千年嘅星空呢？

不過，洞窟壁畫同星座嘅關係基本上唔可能得到證實。因為天空有太多星星，畫像有唔同圓點，咁就有千千萬萬嘅可能性。但係從十八號公牛嘅三個巧合，我哋要去思索，天空嘅故事，或者始於萬年以前。