我大半年前左右一個人嚟英國,想搵個物價較低嘅小城市住,而咁啱我有個朋友幾年前移民咗嚟英國又住喺啲比較冷門嘅城市,所以就喺到落腳。以前成日聽人講咩隔山買牛實中伏,唔好用香港標準去睇樓等等,呢啲講法已經聽到滾瓜爛熟,所以我好謹慎咁一步步嚟,到埗後先租樓,再認真去睇想買嘅樓。
諗起果陣睇到間屋,平到難以置信,當時覺得可能有伏,就好用心去檢查每一樣嘢,例如地區治安、土地規劃、水浸風險、防火安全,有乜要睇嘅都睇曬。睇樓後開始買樓程序,律師查過又搵人驗下樓咁,都搵唔到有咩問題,所以都期待可以喺新家園過一個舒適生活。點知成交後攞匙搞完裝修,第一晚瞓過夜,先知道有樣嘢自己冇檢查到,正常亦唔會有機會檢查,就係喺間屋到瞓過夜。
呢間屋,並冇好似預期咁為我帶嚟平靜生活…
前排英國開始日照時間變得愈嚟愈長,所以裝修果陣就算搞到六七點都有陽光,一直冇發現呢個問題,直到第一晚入住,太陽落山夜幕低垂,我開始有種感覺,覺得有陣奇怪嘅寒意籠罩住自己,空氣瀰漫一股陰森嘅氛圍。我嘗試同自己講,我只係未適應呢個新環境,但令人不安嘅現象卻陸續有嚟。
一開始果陣成日聽到怪聲,例如半夜傳出腳步聲或者有人低聲講嘢咁。我起身落床行曬成間屋,檢查每一個角落,但都搵唔到任何會發聲嘅人、動物或者物品。雖然只係令人不安但我都繼續呃自己話一定係因為間屋有一定年份,有啲舊所以有聲好正常。
但之後開始愈來愈多事發生,有時啲傢俱起身果陣發現唔同咗位置,盆栽無啦啦瞓底咗。試過見到有啲影子喺角落頭閃爍,但一擰轉頭又乜都冇,只係有種比人監視嘅感覺。後來開始經常發惡夢,夢見一條好長嘅幽暗走廊,身後有個無頭嘅人影,醒番後開始唔只傢俱移位,仲多咗啲古怪痕跡,十足腳印嘅痕跡喺地毯到。
我開始頂唔住呢啲情況,就搵個朋友幫手。朋友建議我喺Argos買個CCTV影住間屋,睇下我瞓著期間係咪有啲咩事發生。我照住朋友嘅方法,錄咗一晚嘅片段,但自己唔夠膽睇,唯有去朋友屋企叫佢幫我睇下。我朋友好專心咁睇啲快轉鏡頭,去到某個位,我見佢呆咗一呆,暫停咗,又回帶睇番,佢成塊面青曬,間房靜到可以好清楚聽到佢急速嘅呼吸聲。佢熄咗CCTV個App,我問佢見到啲咩,佢用咗好耐時間去平服個心情先講咗一句…
「我都唔知道…唔好問…」
佢只係建議我唔好睇條片,同埋唔好再返去間屋到瞓。我朋友慣咗一個人住,所以當初我到埗英國果陣,即使佢自己住又有客房,我買樓前都盡量出去租屋,唔想打擾到佢,但如今佢竟然主動提出可以比我暫住佢果到,睇下點處理我自己間屋嘅問題先再算,可想而知個問題有幾咁得人驚。
我搵番買樓果陣嘅律師,問佢一條佢應該從來未聽過嘅荒謬問題,我問佢可唔可以即刻幫我賣樓,佢聽完都呆曬,而我人生路不熟其實都唔知咁做得唔得,律師又話咩HM land registry連你個名都未轉等等官腔說話。佢建議我如果有咩問題要唔要搵下當初個賣家,話以前試過有啲客人買完樓唔識用個boiler都係聯絡番個前業主去問。當然我冇同我個律師講間屋有怪事嘅情況,講出嚟都唔知邊個會信,但當我聽佢建議嘗試去搵番個賣家果陣,就有更加難以置信嘅事。個賣家以前一直用嘅電話都打唔通,個地址直頭係荒廢嘅郊區爛屋嚟。我第二日同個律師講,叫佢幫我由買樓律師變賣樓律師,個律師都滿頭大汗話未見過呢種情況,我話要律師費乜費物費都好我照比,只係想快啲甩手。
決定咗要放棄間cash buy full paid嘅屋後,就叫朋友陪我一齊喺中午入屋執走番曬自己嘅物品。執屋期間,發生咗一件事,我希望呢個會係最後一件令我心寒嘅事…我執到一個相架,入面有一張我喺呢間屋入面嘅相,但我唔知係邊個影,幾時影,只係感到個心跳到就嚟想反胃嘔出嚟。朋友問我咩事,又問我做乜將個相架當垃圾丟走,我果下講唔到太多嘢,只係諗住盡快離開間屋。
返到朋友屋企,終於算係鬆一口氣,我到依家都未夠膽打開CCTV條片睇發生咩事,雖然諗緊既然都唔會再番入果間屋,睇下又無妨,但另一面又好驚唔知會睇到啲咩。或者將來我得到一個真正嘅安樂窩,先至打開嚟睇?我都唔知,我只係想快啲有番個地方比我安居,喺書檯到用電腦上下網,而唔洗再喺朋友屋企客房張床到,用手機去警告其他人關於自己唔想回憶起嘅經歷。當一樣嘢too good to be true,就記得三思而後行。