我以前都試過,有個男人(30歲左右)無啦啦走埋嚟問我可唔可以唱散紙用來坐小巴,但佢係講到好混淆視線咁,佢唔係直接問唱十蚊廿蚊散紙,而係話佢有一個五蚊一個兩蚊,可唔可以換幾多個兩蚊咁上下,好似考緊數學試咁。好彩我自己數學都ok, 我都直接答佢即係你想用五蚊換我廿蚊?跟住佢先話無錢搭小巴。但佢自己又係超級市場行出來,拎住兩大袋野,你同我講你無錢?所以最後我都無理佢。佢見我唔借佢就行咗去另一度搵「獵物」了。
另外有單就係外國讀書時試過喺火車站俾人問借錢俾佢買車票返佢自己個城市。但我冇錢所以冇借。之後讀咗三年都快畢業了,行過火車站仲見到佢問人借錢,我忍唔住走埋去問佢:成三年都未借到錢返祖家呀?跟住佢即刻就九秒九速度跑走咗
我自己如果以依家的情況我都唔借多過借,因為講真有幾可會一蚊都冇,就算冇銀包都有電話,八達通。所以現金一定唔會俾,但如果買枝水買個飯都可以考慮(睇吓係咩人)