我之前有係服務精神病康復者同智障人士嘅機構做過,幫啲治療師同社工手,其實Lokman 、 Peter同家棟嘅角色係同真實嘅case有啲相似,所以我無質疑佢哋角色設定
我未接觸過反社會人格(呢啲user應該都入咗小欖,我唔會接觸到),但係接觸過高功能自閉症user,Lokman同Peter嘅角色係有啲特性似呢種,佢哋智力正常,但係無同理心,理解唔到其他人感受,佢哋會執著某一啲喜好,有自己定嘅routine。自閉係先天,無得醫
Lokman執著嘅喜好係使用利器去殺生物,我諗起有真實user係鍾意長頭髮,所以會扯女同事頭髮,佢哋理解唔到人哋係會覺得唔開心,問佢點解鍾意佢話唔知點解。佢父母綁住佢反而令佢有更多行為問題。
Peter 落雨殺人就似有個user 唔知點解逢係中午12:00就喊,佢家人話佢細個無呢個routine,之後有日社工先發現原來佢有個好親嘅人係12:00過世,佢由嗰時開始set 咗個routine係12:00喊。就似Peter由殺鼠開始,自己set個routine係落雨就要殺啲嘢。
家棟幫Lokman嘅方法又有啲似治療師嘅方法,例如
環境治療,有user好亢奮,就叫佢屋企白燈轉黃燈、著深色衫,令到環境唔好咁刺激佢情緒,容易calm down;
轉移注意力,有負面情緒時/行為問題時,轉移焦點去其他地方,好似戲中念外星文
Mirroring,模仿導師嘅行為,好似戲中派飯嘅時候家棟叫Lokman學佢祝福人
利申:半桶水,我唔係話自閉症有暴力傾向,以上純屬個人自我聯想,無醫學實證