①無咩新鮮感
- MMORPG / RPG / PVE /手遊
呢種Game基本上性質都係Chor數值遊戲，離不開升Lv打怪刷裝備推關卡然後再升Lv再打怪再刷裝備再推關卡，跟手打埋大佬/推爆哂關卡就GG。
細個開始接觸呢類Game果陣會覺得好有新鮮感，打怪好爽，推關好爽，打爆大佬打爆機好有成功感。
但玩一隻係咁，玩第二隻都係咁，玩到第三隻Game個流程基本上都都都都係咁嘅時候，打幾打就唔想/無動力再玩落去。會覺得好似又又又重複升Lv打怪刷裝備推關卡⋯⋯
會玩到對呢類Game感到厭倦，覺得好悶同無乜新鮮感，作業式/機械式操作咁款。
呢種Game唔同嘅地方最多都係大世界唔同、唔同系統、唔同故事、唔同特效、唔同畫風/畫質之類。覺得已經無乜特別嘅賣點
- PvP
拎LOL黎舉例子，LOL都已經13年
就當你玩咗5年，同一隻Game玩5年都會開始悶。加上你年紀開始大，反應無咁好無咁快，容易出現灰色畫面，灰得多你個人都灰啦（哭阿）
可能你只係放工玩一兩場，跟住比人殺爆仲要比隊友問候娘親，你個遊戲體驗肯定唔會好得去邊。
何況仲有一堆外掛、送頭隊友？
OK，即使當你技術同反應都仲係到，比你哂一堆時間打到菁英又如何？你身邊個個Fd都已經退哂坑，最多Like下你個Post cm下讚下你好勁！
然後提埋你聽日記得準時返工
而家開Game玩得嘅基本上都係同Fd玩先會玩，仲要1個星期玩1-2場已經叫多了⋯⋯
不過呢種Game優勝嘅地方就係食技術多唔係Pay To Win ， 唔洗重複咁打怪升Lv追進度
②遊戲變質
- MMORPG / RPG / PVE /手遊
都明白營運遊戲係需要資金，但依家啲遊戲真係商業目的太勁，特別係啲Online game好似迫鳩你課金咁，全部新角色新武器都一定要課金抽蛋先有，
機率仲要極低。當然做免費仔都得，但你嘅遊戲體驗會冇咁好。
可能會有人話又想有遊戲體驗又要做免費仔，送哂比你好唔好？
但我想表達嘅係支撐住遊戲遊玩人數嘅絕大多數都係免費仔/輕課仔，唔好嘅遊戲體驗基本上會導致玩家流失率極高同極快。就好似新屎坑三日香咁，大部分免費仔/輕課仔好快就會走鳩晒。因為佢地無乜機會玩到新角色新武器，黎黎去去都係初始免費裝備，仲邊忽會有好嘅遊戲體驗？
遊戲體驗唔好 > 主流免費玩家走得快 > 課長冇得恰鳩啲免費仔/個Server變得唔熱鬧 > 課長課黎都無意思 > 課長唔再課 > 隻Game好短命執得快
然後佢老味平均每個月都會出新野，舊嘅野基本上會比新出嘅野代替，當你唔跟抽/抽唔中你就會跟唔上，然後就會大大咁影響你嘅遊戲體驗，又多一個人退坑
雖然都會有免費仔係堅持到一直玩落去，但係又堅持到幾耐？
呢種玩家又佔咗幾多%？
另外想講以前MMORPG職業系統真係分明，真係需要分坦，補，AP同AD輸出組隊咁打副本（通常免費仔係做坦/補），然後亦冇乜人主職會係坦/補。咁你做坦/補就會變得好搶手，課長打副本都會拉你入隊。但而家基本上唔需要坦/補，1個課長後面3個冬瓜豆腐都可以過關～甚至乎課長1個打10個
免費仔無哂利用價值⋯
- PvP
除非真係技術Game
否則原地Pay to win
③無時間
基本上返工都佔左你1日嘅3份1時間，訓覺再佔3份1，搭車食飯再佔多每日嘅嘅少少🤏扣埋星期六日得閒同朋友出街食飯，同女朋友拍拖周圍去行吓睇吓玩吓玩下，其實都剩唔多時間可以打機。
應該話有時間都會拎黎訓吓覺⋯
其實我仍然鍾意打機，但係已經熱衷唔到入去，好多時候打一陣間就好快悶同眼訓，做唔到好似以前咁可以打足一日
都係細個打機開心啲，細個玩xbox360 嘅lego game 會玩得好開心，而家玩返會覺得太簡單超低能勁白痴。
好似細個做咩都開心啲咁
就算而家有RTX4090電腦，有PS5 都好似擺設咁做裝飾多過玩
雖然我冇
娛樂黎姐