1，比賽真係好精彩刺激，就算我哋已經睇咗無數咁多次漫畫，都依然會比呢場波牽引到情緒，依然覺得好感動好激動
亦不禁再次佩服井上喺呢場比賽上面嘅比分同情節安排得咁好（雖然同電影無關）
2，雖然無用到舊歌，但估唔到新歌出奇地好，而且成套戲配樂都唔錯，令人熱血沸騰，比賽最後嘅心跳聲更加令人唞唔到氣咁投入同肉緊，拳頭都揸到實
我真係揾唔到其他野讚，雖然唔係原汁原味，但都佩服井上唔行舊路，忠於自己想法。
唔好嘅嘢就真係好多，
1，配音好差，晴子配到成個弱智妹咁，好似求其搵個配音班學生去做咁
彩子好少少但都唔係好得去邊，漫畫彩子係會鬧人怎至打人(打過宮城櫻木流川)，所以性格聲線應該再硬朗少少。
安西教練把聲仲後生過赤木係咩事丫
五子把聲經過20年老左好多呢個我可以體諒，但個配音領班係咪有病丫，好多人講對白都講唔清楚喎，有啲我要諗下佢講乜，有啲直頭唔知佢講乜，呢套戲應該有足夠budget，點解唔配到最好為止呢？！
仲有，以前喺電視播就話對白唔可以太粗俗啫，但你喺電影都成日「你呢個衰人」「正衰人」聽到我打冷震，呢啲說話根本女人至會講。
2，宮城做主角用佢角度去睇無問題，但比賽以外嘅情節節奏真係太慢怎至有啲沉悶，而去返個比賽嘅時候個節奏又過份地快，快到好多動作表情都一閃即逝，對我呢啲睇過幾十次漫畫嘅人嚟講都覺得可惜，何況如果係新睇嘅人，對一d表情動作肯定會無感覺唔知佢哋做乜。
3，三井只係大宮城一年，點解第一次相遇嘅時候搞到好似差幾年咁，同埋三井理論上應該係中長髮(mvp時期)，點解會整個三年級嘅髮型俾佢？！搞到而家個髮型次序變咗，短->中長->長毛->短，成件事好奇怪囉。
我知道三井係井上親生仔亦係大家最喜愛角色，但都唔洗夾硬俾呢啲戲份佢掛。
4，流川話晒都係第二男主角，點解沢北戲份會多過佢。
總括嚟講，無驚喜又無太大失望，無毁左漫畫又無令佢更上一層樓，可以接受啦。
以後會上網揾方法再睇，但應該都只會係細味個比賽。
