玩左1個鐘頭SMT3，原來係恐怖Game嚟

呢到首周目玩normal版，我死左10次有多
對我黎講係真女三第一個噩夢
果陣真係唔知buff同debuff嘅重要性
由存檔點行過去又要過河道又要爬梯開門，勁長
cls玩到差d dum手制

老玩家看透依類game上buff同debuff先打架
只要加回避同減命中 再減減上其他屬性就咩都好易過 後面d boss都係咁打

銀座地下通道已經有幾個終端機，而且只係一路向西行，之後過漆黑地底隧道仲煩。

見完牛頭天王之後開始解深界第1層，每次經過深界都要玩衝浪小遊戲好煩。


解鎖深界需要燭台即係要打走班變態魔人牛鬼蛇神。


途中遇到一個墓場，紀錄著人修羅開無雙割草的風光偉績。


而深界的迷宮果然非同小可，如果唔係有地圖攻略，根本唔知道會有假牆存在。亦有上鎖門，要去到更深層去攞鑰匙。


深界亦補充返D世界觀，例如迦具土的創世地帶可以存在係不同時空(東京又要被毀滅N次了 )。


探索結束後攞左1粒死兆石，可以用來合鬥牛士，同預計一樣係偏向高攻高速，但換來的係低HP MP，可以試下去迦具土塔時用血色鬥牛士加回避率睇下係咪可以避開曬Boss的萬能技先。

大僧正真係好好用
當初通訊塔逆剝隻大象會物反勁難打，又成日用卡加
我成隊打到冇晒mp
最後係靠大僧正冥想，幾十mp幾十mp咁將大象吸光吸淨
睇住佢出唔到卡加技能真係好正

PS1 GAME?

最初係PS2，後來port上去PS4 Switch 同Steam，我玩Steam版

佢早期就可以學到永世祈禱全體全回復，快過等57lv蒂妲妮亞

打完深界第1層，繼續返到主線，由池袋出去走到歌舞妓町看守所的高速公路出現第3個魔人日本Ghost Rider。魔人愈出愈垃圾，只係普通攻擊同火魔法，無古怪招式單純抗性贏左。


之後為左引出4色騎士現身，打埋深界第2層，你以為Pokemon關都淺紅市道館好難過，SMT 3個隱形牆係無地圖攻略保證玩到你團團轉(仲要係暗雷一路遇怪 )。


通過隱形迷宮之後可以攞到圓月之鑰，可以解鎖第1層的白色門，攞埋餘低1粒死兆石。


不過隱形牆算小事，呢1層仲有殘血地獄，裏面D毒氣行幾步路就瞬間變殘廢形態1滴血。最怕遇敵時先制攻擊1野打落人修羅到見天使，連我都有D驚驚地。挑戰前記得儲存定，防止意外見天使無曬進度。


完成之後得到豐厚獎金，方便你燒錢拿成牛鬼蛇神。


完成呢1層之後會講述返冰川的劊世經過：冰川係蓋亞教會的人，後來係教團入面得到創世書彌勒經，透過阿瑪拉網絡得到創世同召喚惡魔能力。但係教團其他人唔同意反對冰川，結果造成遊戲一開場的代代木公園慘劇，之後就東京受胎展開人修羅的故事(人修羅算死好命，如果唔係老師出場的話，佢係醫院到一早比隻巴風特打死見天使了)。

最後利用第2層的死兆石去復活返大僧正同Ghost Rider。


人僧正係遊戲的最強補師，最主要佢低lv就可以攞到，37lv入手、升到39lv學永世祈禱，再加上冥想可以吸魔法唔洗驚唔夠MP用。如果無用到大僧正的話，想要全體全回復補血，就要有排等，等到57lv最強妖精蒂妲妮亞登場。


Ghost Rider同鬥牛士一樣高攻高速，不過Ghost Rider可以學地獄燃火有火屬性攻擊。可惜魔力實在太差連1半20點都唔夠，MP比鬥牛士更低。

跟住就係打4色騎士，劇情要去到代代木公園打逆剝先可以打爆曬全部4個去。

打通左深界第2層就可以去打4色騎士。首先出場係密集恐懼多眼白騎士，召喚出來的天使會降防，但無咩威脅。



之後係騎著赤兔馬的紅騎士，佢召喚出來的天使會加攻，我試過大意比加左攻的紅騎士打死左...


第3個係絕影黑騎士，召喚出來的惡靈軍團即死地獄凝視命中率低，輕鬆搞掂。


最後1位騎士需要打通深界第3層，係打通之前要加點令人修羅有25點攻、25點魔同18點運(唔包禍靈加成)，咁樣先可以開到第3層的金色門。



途中會比龜頭蛇神發現，要同雷道玩捉伊因，但呢隻係JRPG唔係Action Game，所以走位亦好簡單，摸熟好地型就識玩。


當然最後都要一戰，今次雷道會召喚一堆係呢隻game入面無出現的牛鬼蛇神，例如好可愛會食人腦的鳥娘莫索保，能力亦十分全面。


打完深界第3層就先復活左3騎士先。大家都係高攻高魔，反而雖然騎著馬，但速度就異常地低，仲慢過步兵鬥牛士。技能大家可以學到唔同的4色魔法，但黑騎士勁D，可以學核爆。

之後就打埋最後3個魔人同清埋深界第4層去。

係衝到深界第4層前要先解決埋剩低的魔人先。係御船所聽完太洱訓話解鎖左淺草西側拾垃圾似人商店，係通道入面就可以打埋最後一個末日騎士 -蒼白騎士(唔好同白騎士混淆左)。


之後來到代代木公園時會見到比靈泉聖女更火辣的女人 。


當我無講過返出去先。


大淫婦係少數會彈物攻的惡魔，請準備好核爆。


之後跟主線發展，代代木公園打逆剝、歌舞妓町看守所打邪惡霜精、阿瑪拉神殿復活諾亞、千晶似人大屠殺。係出發去東京議事廳的有樂町坑道會遇上最後的魔人同你玩Free Falling。


吹號者最可怕係佢的即死係萬能屬性，就算擋光擋暗都無用，試過一吹喇叭即刻整死左我個紅騎士(好彩唔係吹落人修羅到 )。打完後以後唔洗再打白色惡魔了。


沿著深界第3層落去第4層，途中被我打死的邪惡霜精會復活並加入隊伍。


雖然係邪惡妖魔，但竟然會學補血魔法，我幫佢配招更強的全體全回復魔法。



來到第4層又係殘血地獄，因此第1件事要立即打走7大魔王別西卜去清走毒氣。


留意好呢隻死烏蠅招烏蠅攻擊會即死，記得準備好暗抗，之後亦都係Buff Debuff攻防戰。


別西卜死蠅送葬萬能技係核爆強化版，攻擊附帶即死。



打完別西卜之後可以攞關鍵道具，先係池袋下方墓場攞來世土鈴去超渡深界的亡靈，咁樣就可以復活一忠一奸的似人。


兩者都防即死防異常狀態，不過太洱會防埋物攻。可惜班魔人太強勢，我最後都無練佢地。


另外淺草的拾垃圾似人可以得到明星鑰匙，用來開路進入深界最後一層。


最後講埋最後3個魔人去：蒼白騎士同其他3個騎士一樣主攻主魔，佢升lv會學靜天會心/煌天會心，比你刷好月相後更加暴力輸出。


大淫婦的物攻好可怕，唔單止條囡囡先打1下，佢隻多頭狗仲會咬多幾口進行連段攻擊，仲要本身升lv學埋全神貫注蓄氣加攻...


吹號者的即死技係萬能屬性避無可避，可惜佢的初始技能佔格太多，無咩位比我補盲，所以最後我都無練佢。剩係練頭8個魔人就已經足夠。

下次就會衝埋深界第5層同打撒旦爆機去。

本身諗住樓主係邊玩邊寫感想
但睇睇下好似變左簡易攻略咁

btw 大淫婦扭轉個頭果下真係嚇撚死
號角者算係後期 比較有難度 嘅魔人

大淫婦真係嚇到J都縮埋，不過佢連擊輸出唔錯，吹號者因為即死係萬能技所以中左就真係玩完要帶定復活劑，正常流程應該都執左一堆垃圾啦！

終於來到最後一次更新。來到最後一層先知原來班魔人白色惡魔全部只係考試對象，睇下人修羅夠唔夠資格成為撒旦的門徒。


If you can't beat them, join them.


作為著名惡魔召喚師，5圍唔上30點真係太令人失望。不過佢可以學永世雷道，攻擊附加貫穿，方便最終決戰打撒旦(可惜佢唔係全能抗性，所以我係最終決戰都係派堆魔人上場算)。


當然成為撒旦門徒咁大件事，耶和華一定唔會袖手旁觀，於是派出Iron Man天使被我打成廢鐵(注意好光抗輕鬆唔洗驚即死技)。


人修羅正式join the dark side。睇下撒旦笑得幾似Star War 白卜庭。


You should bring balance to the force, not leave it in darkness!


撒旦終於發現自己養出來班魔人全部都係垃圾，於是親身上陣(撒旦出場幾有霸氣，係個血紅影子到彈出來)。


撒旦同我一樣都係十項全能抗性隊，連物攻都打唔入。好彩撒旦幾好人，join左dark side之後物攻可以貫穿，可以1野正常輸出1000血以上，其餘都係放下Buff Debuff，大僧正補下血咁。隻野只係單純抗性打得慢，慢慢磨輕鬆KO。


呢幅圖可以攞來做Wallpaper，但作畫人竟然連出生入死一齊墮入魔道的妖精皮克斯都無畫到。就算身為黑暗魔王都唔會無情到咁忘本！


最後用左超過120個鐘打爆遊戲，對上1隻JRPG打超過100個鐘已經係DQ11。但呢隻game明顯深刻過DQ11，呢隻game的灰暗遠遠唔同傳純JRPG的中古風格，內容亦環繞著末日追隨各種思想去進行創世，又或者單純發脾氣又得個世界繼續混沌落去，唔係單純打完個黑暗魔王咁簡單。之後我會再開post講返我成個心得出來。

睇到有d想玩

淨係玩過smt5 同 p5


黎緊1月又有p3p同p4g
隻隻都要過百個鐘
多多時間都唔夠

我想玩smt 5 但佢放左係switch到，希望上左p3之後官方會上埋smt 5到pc

但smt 5個故事 ...

我玩完有d失望
我估smt3個故事應該比smt5 更深刻

我記得好多人批評smt 5個故事，smt 3 某程度係抄smt 3，不過tone down左無咁陰沉恐怖，而且媚宅多左好多老婆惡魔

艷后對波 人魚條腰 女媧對腳
重有愛麗絲 伊登幾隻loli。。。

伊登除代蒂妲妮亞成為新奶媽

5代好撚多奶媽的 唔淨係伊登一個

伊登應該最出名，放金蘋果，仲有邊個，唔計DLC，呢代應該無大僧正

https://gamers-high.com/megami5/data/skill.html#kaihuku
睇紅字 回復系專用技 小心劇透

專屬技好似補好少，唔似梅迪亞拉翰咁補全體

公廁技不了 唔用專技不如唔好玩