【盤菜瑩子出場嗰刻，因為見唔到佢個酒粒，幾乎認唔到佢】
https://www.facebook.com/groups/803879953032830/posts/5626424784111632/
上星期下午打風唔駛返工，上午去咗黃埔睇戲，睇完戲就算打8號波都可以行返屋企唔駛諗搭車問題，一睇睇咗兩套，中午12點半睇《正義迴廊》，晚上6點睇《猛鬼3寶》。因為大陸唔准上真正鬼片，港產鬼片就嚟絕種，睇《猛鬼3寶》純粹支持一下，一套戲，一個導演，三個故事，唔算特別好睇，不過係有啲橋，有時間都可以入場一看。
至於《正義迴廊》就勁囉，中午時間都坐咗超過一半座位，當時仲係3號波兼三級片，已經冇咗一班學生觀眾入場，呢個時間有咁多人睇實在難得。呢套戲好睇唔係因為演員嘅演技（老老實實中間有嘅場景好似睇緊舞台劇），而係《正義迴廊》個劇本好完整，將場景碎cut、返loop，只要帶腦入場，一般觀場都可以砌返一個完整嘅故事線，除咗最後一個畫面……
（以下係劇透）
=========================
就係飾演盤菜瑩子嘅記者變咗做網媒，而林海峰個女徒弟梁雍婷做咗辯護律師，佢嘅客人就係盤菜瑩子。當年蘋果 / 爽報因為單案已經進入司法程序仲夠膽去小欖訪問第一被告周凱亮，記者、編輯同老總畀律政司告「藐視法庭」，當時係書面認罪、罰錢同留案底，冇去高等法院做大龍鳳。盤菜瑩子嗰一幕，其實係暗示其他案件，有心人一定知我講乜。
至於飾演CID「刀哥」嘅邵仲衡，用唔合適嘅方法令第二被告唐文奇在差館盤問中認罪，呢段睇落好似想暗串差人老屈被告招認殺人，但只要有留意當年嘅報導，第二被告被拘留41小時後，連續被盤問9小時係確有其事，以下係當年其中一段報導：
// 法官指，次被告謝臻麒承認殺人的盤問，是在被拘留41小時後，連續被盤問9小時，至凌晨2時半，在太疲累下才放棄抗辯認罪，批評警方盤問時間高度不合適，對謝造成不公義，尤其對謝這種智商較常人低的人，如非這樣謝根本不會被起訴誤殺。法官對此表示「不必要及震驚」，要求控方向警方及律政司反映。律政司回應指，會詳細考慮法官的理據，並參考外聘檢控官的報告，決定是否需要作出跟進。警方則表示，會研究判詞。 //
當年的報導片段：
https://hk.on.cc/hk/bkn/cnt/news/20150323/bkn-20150323224057719-0323_00822_001.html
當然，導演有自己嘅立場，有心人一定知道佢放咗好多密碼，例如低級差人食生命麵包、高級差人返大陸食海底撈、差人叫行人唔好行出馬路，行人叫差人唔好用腳叉住第二被告條頸，佢就嚟抖唔到氣等等。
