凌晨好,好人一生平安
開新po出一出文先
八十。咁不如就做個賤男
「阿魚 ! 傻魚 ! 醒吓喇 ! 喂 ! 喂 !」
「Call 白車! 快啲Call 白車呀 ! 」
男子站在紅紅石路上,回憶著過往的總總。
紅紅石路上,不只男子一名,回家的婦孺,對著手機談情的少年,互相依偎的男女,還有彎著腰、推着車子、帶著孫女的婆婆。
不慎,車子絆倒小石,一歪,車上放在頂層的紙皮,如山泥傾瀉般的,傾倒在地。
婆婆蹲下身,雙手顫抖抖地撿回紙皮。她的孫女也跟著蹲下,那對小手勉強地拾起紙皮。周遭的人冷眼不理,紛紛裝作眼不見為淨,那對男女走過時,還嫌骯髒的越過垃圾。
唯獨,男子走了過去,環視四周,看看周遭的人,無奈地嘆出一口氣。然後,他蹲下身,幫忙撿回紙皮。
得到男子幫助,很快就把紙皮撿到車上。婆婆握著孫女的手,連忙感謝男子出手相助,不斷地說他是一個好人。
男子卻不以為意,反倒從錢包抽出數張金橙色的大額紙幣和一張卡片,微笑地遞給婆婆。
「先生,唔係咁好嘅 ! 呢啲嘢我唔收得㗎 ! 我知你好心,但係……」
「婆婆,呢啲錢係我借住俾你先,張卡片有我電話,到時你過嚟見工啦 ! 呢錢就係到時遲出糧嗰陣慢慢咁扣。」
語末,男子彎下腰,吩咐小女孩要好好孝順婆婆,然後就在她們的鞠躬和感激下,繼續前往目的地。
男子深知,這是他想要的,至今為止的努力也沒有白費了。
秋葉飛紛,涼風跟隨著男子重臨舊地。
男子拉了拉黑色大衣的衣袖,從袋中抽出請帖。他低頭查看帖中的地址,不久,又抬頭望向校門,嘴角微微堆起笑意。
「喺學校搞婚禮真係痴線 !」
忽然,身後走來一位婦女,說︰「咁痴線你咪唔好嚟囉 !」
男子上下打量了婦女的全身。小麥膚色,健美的身材,以及那頭茶棕色的捲髮,他問︰「你係Cherry ?」
Cherry點了點頭,笑道︰「係吖 ! 阿朗 ! 隔咗咁多年你竟然仲認到我 !」
「你又會認得我嘅 ?」阿朗反問道。
Cherry上下端詳著阿朗的全身,黑色大衣,黑色高領毛衣,黑色長褲,又望向他那韓系的髮型︰「認唔到㗎 ! 把聲、著嘅衫同埋個頭,你成個人都變咗咁多 ! 」
「只係…… 」Cherry微笑道︰「不過驟眼睇,覺得個氣質好似你咁,咪諗係咪你囉 ! 」
阿朗雙手插袋,問︰「咩氣質 ?」
Cherry擺出一副一概不知的表情,吐起舌來,又問道︰「唔知呢 ? 」
「哈哈哈 ! 你就冇咩點變啦 ! 個樣呀好多嘢都冇變 ! 」然後,阿朗低身靠近Cherry的肚子,又道︰「 除咗個肚大咗之外 !」
「係吖,都六個月大啦 !」Cherry邊看著阿朗,邊撫著肚子。
「爸爸呢 ? 爸爸係邊個 ? 我識唔識佢㗎 ?」
「你唔識㗎喇 ! 以前喺大學識嘅,但到畢咗業之後佢先表白,之後大家就一齊咗,再然後就結埋婚,而家大埋肚添 !」
「咁咪幾好囉 ! 遇到個真係相愛嘅人 ! 而家幸福福福 ! 」
Cherry霎時止語,然後語氣突轉,認真地說道︰
「至少嗰個人唔係你 ! 」
阿朗一臉不在意的笑道︰「都係㗎 ! 」又坦然地說︰「至少而家我同你都好開心吖 !」
她扁了扁嘴又道︰
「老實講,其實自從你一走了之,我就一直都好憎你,我唔明點解你可以咁對我哋,特別係思穎,同埋點解我哋會默默接受咁樣嘅對待。」
阿朗點點頭︰「明白!」
「嗰陣我係幾努力,用咗幾多時間先得到思穎嘅原諒,佢竟然咁樣都原諒我,所以我好憎咁樣嘅自己,同埋好憎你 !」
阿朗點點頭︰「明白!」
「我用幾多時間先可以放得低你,先可以好好咁重新出發 !」
阿朗點點頭︰「明白!」
「但係……」
她低頭看著肚中的孩子,再道︰「直到佢嘅出現,我就冇咁在乎以前嘅嘢,成個人輕鬆咗好多 ! 而家嘅我淨係想生佢出嚟,一家人開開心心咁過 !」
有時候,真的會把仇恨忘記嗎 ? 大概是不會的。
是時間把仇恨沖淡嗎 ? 大概也不是的。
只是時間將新的事物帶進生命之中,將舊有的愛恨情仇替換了。
阿朗沒有表示歉意,反正都過去了,作任何表示也別無意義。
她無奈一笑,問,當初你為何一走了之 ?
秋葉緩緩飄落Cherry的頭上,阿朗靠近她,用手撥開秋葉。
他說,對她們的肉體厭倦了。
她信了,輕笑一聲, 恥笑自己年少時的不智,又問︰
「咁點解你仲喺紙上面寫低一陣再玩過 ?」
阿朗不語了。
她堅持地重複問道。
阿朗唯有撫著她的頭,淡淡地安慰道︰「都過咗去啦 ! 你而家都成家立室,無謂再諗呢啲嘢呀 !」
「死仆街,你一直都冇變過,一直都鍾意扯開話題,都係咁鍾意玩我…」Cherry勾起眼框的淚珠。
阿朗從銀包裡抽出一張滾著金邊的卡片,一張紙巾,遞給她來︰「如果第日有咩問題,或者需要啲咩安慰,或者你老公滿足唔到你,都可以搵我 !」
「賤男 ! 有老公嘅大肚婆都搞 !」Cherry不屑地冷笑道。
「緊係啦 ! 」阿朗回頭別臉,問︰「佢哋係咪到齊晒 ? 喺晒入邊 ?」
「你入去睇下咪知囉 ! 應該係禮堂嗰邊 !」
「咁我入去先喇 ! 一陣見 !」然後,阿朗轉過身來,走進校門。
Cherry單手撐腰,嘆一口氣,低頭查看剛才接過的卡片。一見稱呼,她瞬間大吃一驚︰「CEO ? 係嗰間地產商嘅CEO ? 係好有錢嗰間地產商 ?」
她望向阿朗逐漸遠去的背影,只見他背對著自己揮手。
「佢呢十幾年究竟做過啲咩……」她訝異道。
一名男子款款地走過來,單手搭在Cherry的膊頭上,問道︰「老婆嗰個邊個嚟㗎 ? 你啲舊同學? 睇佢啲衣著唔似普通人喎 !」
Cherry面無失色地撒起謊來︰「冇 ! 佢唔係我同學嚟 ! 只係咁啱問我係唔係新郎家嘅人啫 !」
「我仲以為你哋係識添,見你哋好似傾得好熟咁!」
「可能佢想溝你老婆呢 !」
「佢又點會溝到呀 ? 我老婆都唔係呢啲咁嘅人 !」
Cherry 握緊掌心,不久又緩緩鬆開︰「得啦得啦 ! 入去啦 ! 唔好喺度賣口乖啦 ! 思穎等緊我哋吖 !」
「收到 !」男子牽起她的手,一同進入校園裡。
未完待續……