深夜限定心事台 (600)

身邊冇乜人俾我分擔下啲心事
所以係到留言擺一擺低 放下負
最近幾年個人轉變好大
同ex分手兩年 到最近先開始move on到
佢令我改變好多 由以前咩都唔睇 唔上心
到依家咩都想嘗試下 接觸下
發掘咗好多自己內在嘅興趣
好想身邊有人可以分享下
奈何呢兩年自摺太多 圈子越嚟越細
得返10令個中學同學係有keep住contact

今年年頭呀爸又走咗
雖然同佢關係唔係話特別好 又唔係話差 係感情好冷淡個種
但我知道佢係真心愛個家 只係唔識得表達 因為識嘅嘢唔多
到依家不時都會諗起佢臨終前嘅樣
每次諗起心都有啲拿住拿住
有啲對佢唔住 因為我唔似其他同齡嘅人生活咁多姿多彩
讀書又唔係話特別好 雖然係佢臨走前一兩年都入咗大學
叫做了咗佢嘅一個心願
不過自己呢一兩年真係太頹廢
相反身邊好多朋友都大學畢業 開始返工 各自有自己生活
我就好似停滯咗咁

自己患咗強迫症十年 係好返好多 但都係困擾住我嘅生活
強迫症呢個病就似我一直同自己鬥咁
但每次都係輸俾自己一啲無謂嘅執著
一直放低唔到

最近身邊好多朋友都開始出社會 有自己嘅人生方向
有自己想做嘅嘢
我唔係冇 我想做嘅係歌手 中學開始一路有學唱歌
但香港要行音樂呢條路好困難 風氣又麻麻地
想出國 又冇勇氣同衝動出去
除咗返工返學 日日就係屋企hea 面對呀媽真係好慚愧
覺得自己係到浪費緊時間咁 好冇出息

不過我又唔係完全悲觀嘅 慶幸嘅係自己一直都有堅持住做自己想做嘅嘢
冇隨波逐流
只係不時就會好迷惘
唔知自己嘅堅持有冇用

我覺得其實你move on 左同個EX 啲嘢已經好叻
始終你生活上邊咁多嘢拍埋嚟 一定好辛苦好似成日都休息唔到咁 唯有我覺得逐樣逐樣去解決囉
如果解決唔到 咪諗吓點樣令自己個心情好啲
我覺得朋友嗰度其實真心朋友真係幾個就夠 係睇吓需唔需要啲酒肉朋友平時食下飯咁 不過我又覺得酒肉朋友應該唔難搵嘅 有時friend搭friend或者翻翻下學就已經搵到 唔使咁擔心
之後老竇嗰度我覺得呢個都已經係改變唔到嘅事實 可能你覺得自己會留低遺憾 但係唯有可以做嘅嘢就係努力啲諗如果佢仲在山嗰陣時佢會覺得而家嘅你係點 如果你行音樂呢條路佢會比咩意見你 之後再慢慢慢慢咁樣去生活好自己咁樣已經足夠 我都覺得自己成日好浪費時間咁樣去學習呢完全同學業同埋工作唔相關嘅嘢 但係我覺得好多時候呢啲嘢係會變成你嘅一啲軟實力 可能有時同人傾偈有時諗吓嘢或者平時好得閒冇嘢做嗰陣時其實好多嘢都可以幫到你
我覺得唔好呀覺得學一樣嘢係需要幫到你啲咩 佢有時自然會有用
如果覺得自己hea 嘅話我覺得咪試吓定立目標囉 試吓一步一步咁樣去做 着做唔到都唔緊要但係如果fulfill 到其他嗰一刻覺得更加好嘅嘢咁樣已經足夠 冇人知未來係點 亦都冇人知你做呢個選擇你嘅未來會係點 最緊要對得住自己姐

至於病嗰度 我覺得個病咁耐 你慢慢好返好返咁樣捱住 已經真係好犀利 我覺得就算有啲無謂嘅執着都好 嘗試吓用呢個病去解釋 反而唔好影響你嘅心情或者影響你生活上做緊嘅大方向

真係好多謝你肯喺呢度同我哋講呢啲嘢 我唔知我咁樣嘅說話係咪真係可以幫到你始終我都好似喺度廢噏緊 但係我希望我仲可以俾你睇到其實只要你肯講 好多人都會喺度關心你