我唔記得咗究竟係邊一個會員大力推薦呢一套作品,我唔知你係邊個,但係容許我喺呢度感謝你,因為我幾鍾意小惡魔學妹。
我認為呢套嘢最差嘅反而係個標題,小惡魔學妹呢個名真係非常之趕客,可能只係我嘅感覺,但係我一聽「小惡魔」呢幾個字,只係諗起啲陳腔濫調嘅套路,但出奇嘅係,其實我覺得呢套作品當中,小惡魔呢個元素其實係非常之少,而且呢套書更加花好多時間去講述除咗小惡魔學妹以外嘅兩位女主角。
而我覺得最可貴嘅,係呢本書裏面嘅三位女主角,佢地本身嘅背景,同埋佢哋同男主角之間嘅故事,都係有啲令人耳目一新嘅感覺,而且亦都唔係可以三言兩語就解釋晒佢哋同男主角之間嘅嗰種微妙嘅聯繫同感覺。
而另一樣好嘅,係呢三個女主角並唔係單純嘅競爭對手,而係有啲相輔相成,唔同女主角之間嘅互動同差距反而可以凸顯出唔同角色嘅性格。
我諗我可以挑剔嘅,係開頭嘅時候第一本並唔係寫得太好,男主角同小惡魔學妹相遇嘅故事有啲夾硬嚟,而且我覺得一開頭嘅時候更加應該花多啲時間去講吓小惡魔學妹同埋男主角嘅關係同互動,但係佢就太快去講男主角同其餘兩位女主角嘅故仔,可能中間夾多半本至一本嘅內容可能會比較好。
但除此之外,我覺得呢本書講嘅人物互動,係呢排我睇嘅書當中比較精彩嘅一套,你想鍾意睇呢種類型嘅故事的話,呢本書係非常之好睇。