莫雅(老豆)
2022-08-14 19:35:27
今晚馬會罕有轉播兩場德國賽事,真係幾有新鮮感,德國馬大家相信都較少睇到呀,數番呢十幾廿年來香港嘅德國自購馬,大家記得邊幾隻?係咪「魔法幻影」、「功力高」同「金秋」呢?
大摩蕭家軍的「魔法幻影」,有可能係史上最高質素德國PP,此匹德國二千堅尼冠軍,來港高評99分起步,第2季贏到馬會盃,到正本戲國際賽香港盃,直路在柏寶胯下力鬥英愛橡樹冠軍馬后級的「飛雪仙蹤」得第2,賽績堅勁,亦因此扳到125分最高位,但唔知呢場係咪搏得太勁關係,「魔法幻影」之後冇貨賣,食白果食到退役呀。
而由岳敦引入、在前練馬師梁定華手上發熱發亮的「功力高」,相信大家都好有印象,「功力高」2000年首季來港,曾出戰香港打吡(第9)及打吡預賽(第8)敗於「勝利名駒」及「實業家」蹄下,次季在華廐主帥蒙特福胯下首捷一班1600米,而最高成就係女皇銀禧盃得季軍,評分長期超逾110分。
講到德國馬,又點可以唔提胡森匹「金秋」呢?「金秋」首度在港上陣即在田草1800米拚入第2,接戰馬會盃G2狂蝕分跑第5,翌仗更敢挑戰香港盃,堅係一生巔峰,講到依家都有人講,點知最後「金秋」只係贏到一場泥地咁大把,最後仲跌到39分五班水平先退役,好多馬迷跌晒眼鏡喇。
至於現役德國自購馬,有賢廐8歲4捷馬「鵲橋飛渡」,以及石哥同是8歲的「童話」,此匹灰馬取下3W成績。
昔日來港著名德國馬:
馬名 來港評分 當地佳績
魔法幻影 99分 德國二千堅尼G2第1
陸寶 87分 德國打吡G1第3
功力高 102分 曾勝德國G3
卓爾不凡 88分 德國G3第2
金秋 88分 德國G3第3