【賭博/金融】一夜致富 - 我係一夜之間，夠錢買樓

5 勞動光榮

之後幾日開工，我都是如第一日般，跟車做外圍。因為做外圍，一出車通常就臨收工才返公司，所以見同事的時候甚少。基本上見面除了返工前換衫，就只剩下收工後除衫。

做外圍除了搵得少，辛能苦，收工也比較遲。唯一對我的同事比較有印象的，就是換衫時看到不少同事身上的龍虎鳳紋身，不是像外國球星般為藝術感或女朋友而紋那一種，確實是古惑仔電影裡，陳浩南紋的那一種。

還有就是，在這裡逢星期三或星期六，每個同事都會「咆馬經」，每個同事都愛賭錢。有時見他們週末收工後一起去開牌局，一人一支煙仔，幾罐啤酒落肚，互相屌老母，我終於體驗到真正的「貼地生活」。

關於速遞行業，運作的齒輪需要每天進行。假如因為事故而停止運作一天，貨物便會堆積多一日。所以，通常假期後或星期一，最多貨的日子，我們都要提早十五分鐘上班。我上班滿一星期後的星期一，這一天貨很多，兩架5.5噸大貨車都爆滿，華哥也沒空暇來照顧我…

九點鐘，貨遍地都是，我們還在分貨…

「加油…！加油兄弟們…！」

「信風精神！做撚死人！」

「辛撚苦阿屌你老母救命…」

在烈日下聽打工仔怨聲載道，就像聽奴隸困在鐵籠裡的哀歌。

我因為有鼻敏感，開工前分貨通常都戴口罩，別人不知道我的表情。我其實在笑，笑這個世界的荒誕，生活是多麼的殘酷。

在貨車上貨堆中的雪爺，用毛巾抺了抺肚臍上的汗，並笑看著這些怨聲載道的兄弟…

「辛苦阿？辛苦就咪撚做囉屌你老母…」

「細細個已經叫你班撚樣努力讀書架啦…」

「努力讀書…大個咪唔使做咕喱囉…」

一陣笑聲和嘆氣聲，互相笑罵。

「無撚有錯！咕喱呀…我大個咗終於做到咕喱啦…！」

「唉…好撚多貨阿救命…！」

因為沒得選擇，只有苦中作樂。

細個讀書，大個便不用做咕喱。可是我細個讀書，大個依舊做咕喱，是何等悲劇…？

九點半鐘，外圍的貨分完了，大部份的腳仔都已派完第一轉貨回來。華哥叫齊所有「腳仔」，開一開會。

「拿，難得而家有新仔嚟幫你地咽外圍，你哋邊條友，陣間搞掂呢轉貨之後肯出去幫風仔手？」華哥擔著煙，所有同事圍著他。

大部份人都是摸著下巴，沒有人有反應。

「我去！」人群中一個身型飽滿，樣貌忠厚的同事舉手。

「好！宏乳頂外圍！」華哥鼓掌：「咁森仔你陣間晏啲頂埋宏乳條線！」

開會後，同事各自四散。十點左右，那名自動請纓的同事推著手推車回來，準備過來幫忙處理我面前的一大堆貨。

「佢哋...叫我做宏乳。」他笑笑口：「話我個胸夠大啊…！」

我看了看他的胸部，也不禁笑了出來。他的胸部，確實可以跟女性匹敵。

「叫我阿風。」

我們開始夾手夾腳。

「我都係做咗四個零月咋嘛...耐你唔係好多。」

「唉呢度捱下捱下...你就唔覺啲時間過架啦...」

「嗯…」我點點頭。

「係呢，聽佢哋講，你好似係大學生喎…」

我稍為沉默片刻，然後繼續上貨。

「大學生又點啊…咪只係識多幾隻字…」

「讀啲書係社會都用唔著嘅，哈…」我笑說。

「你讀咩架？」宏乳問。

「你估下…？」我看了看他。

「物流！」

我搖搖頭。

「建築！」

「廣告！室內設計！音樂！心理學！哲學……」

「你估咁多次都無一個中…」

「我知啦…！個科咩啊個科…個科…」他欲言又止。

「日本研究！」

「係又好阿…我大師級阿…」我淫邪地笑。

「呀…你條友…扮晒斯文呀…」

我倆都是日本愛情動作片專家。

「咁你之前撈咩架？」他問我。

「之前...做過Sales...做過文職。」

「睇你個款就知你係斯文人啦。」他捲起衣袖：「砌貨呢啲野，等我呢啲老粗嚟啦。」說罷，他走上車尾，把貨像Lego般砌得井井有條，而我負責睇地址，他負責分地區，二人合作，效率快了很多。

「咁你呢，你之前做咩架？」我把貨遞給他。

「之前…之前做地盤。」他正在提起重貨。

「做地盤唔好搵咩...？咪仲好搵。」

「做地盤好搵…」他想了一會：「弊在之前我做間公司濕鳩呢...都唔知食咗我哋班手足幾多夾棍。」

「做地盤同做信風都講運嘅，好似你做信風，搵到條靚線，你咪發囉。」他突然把頭伸過來細聲說：「好似阿肥仔嘜，佢條線呀，一個月閒閒地搵三皮嘢一個月架。」

「．．．．．．」

「我條線...窄啲呀可？」我笑問。

他以一種輕視的眼光跟我笑道：「你條線就梗係窄啦，人地掃兩棟大廈，你就要掃幾條街不特止，人地掃完可以準時收工，你掃完人地已經走晒。」他攤著手。

他說得是對的，每一晚，我都起碼OT兩個鐘。

「睇你個樣都捱得下嘅，如果你一心諗住求財，遲下同我一齊出嚟做紮鐵啦。」他取出香煙，點火吸入，開始呼出：「我諗過架啦，過埋呢幾個月信風旺季，遲下出嚟考番個牌做紮鐵，淨係一個月都起碼搵三皮啦。」

我只有聽，而沒有反駁。事實上，諗搵食前途，一向不是我專長。如果我精於處世，一早就不會弄得如斯田地。恰巧，前面的大廈外牆正有些搭棚工人正在高空工作。

「個啲搵幾多錢一個月啊？」我指著那些工人。

「個啲做搭棚嘅都起碼搵二千蚊一日架。」他瞪著眼：「不過一個唔覺意，跌死左就無命賠啦。」

「我就自問無本事食呢行飯啦。」

我看著那些被認為是社會上最低下的工人，從前沒有細心留意過他們的工作，心底裡也從沒有對他們尊重過、體諒過。但今天，當我處身於同樣的勞動階級，忽然心裡對他們有一份肅然起敬。

今天星期一，貨非常多，我和宏乳分好站頭，分頭行事。

「呢個高山道6號個阿婆一定要送先...唔送會屌鬼。」我把阿婆的貨放上手推車。

「咁你送呢棟，我送新柳街。」他推著一大車，準備出發。

「你呢度好多喎，咁啦我洗完樓，過嚟搵你啦。」

「得架啦。你而家上去，應該差唔多架啦。」

他沒打算接受我的幫助。

「阿婆！開門阿！速遞送貨啊！」我邊按門鐘邊喊。

「邊個呀！」阿婆開門。

「呀…乜係你呀後生仔…？」阿婆面帶喜悅：「啱啱打去俾你公司，咁快就送到？」

「係呀，你以後唔使再打電話去架啦，我一見到你啲野就即刻送過嚟啦，得未？」

「嗱，呢度簽個名。」

「唔該晒你呀，拜拜。」

「拜拜。」

我落到樓下，正要上車等待之時，就已見到宏乳推著空空如也的手推車回來。

我目瞪口呆：「咁撚快嘅喂...」

確實，他推著手推車和背著袋疾走的速度，是我見過眾多同事中最快的一個。

就像巴西球星卡卡，純粹以跑步速度來說是毫無亮點，但當盤著球時，就變了世界第一。

我看著宏乳回來，不知為何，那一刻，腦裡有著跟他一起幹大事業的畫面。

還記得第一個月出糧的那一天...

宏乳：「阿風，出糧喎今日，打左簿未阿？」

早上八點半的信風門口，我們正在分貨，彼此已建立了友誼。

「未啊，打咩啊，第一個月咪又係咬老底。」我看著貨上的地址。

「你再唔入線啊，哈，分分鐘之後都係咬老底阿！」有名同事搭訕。

「入到先得架，都無位比我入。」

搭訕同事：「喂，荃灣、觀塘大把線入喎，你想做嗰度大把嘢可以撈喎。」

「嘩，兩大冧檔區域...你唔好玩阿風啦，阿風住土瓜灣呢頭架...」宏乳道。

所謂冧檔，是指那種貨物堆積如山、派送不及而又不斷被客人催派的情形。凡是速遞員，身上都會有一部機。當收到某件貨call催派時，那部機便會發出一些很恐怖很恐怖的聲音。而當你目前有大量貨沒有及時送到，而那些客人又不斷打電話催派之時，那種聲音發出的頻率你可以想像...

「你咪撚靠害啦！叫阿風走去荃灣…」三爺笑指著那腳仔。

「荃灣有咩咁恐怖啊…？」我蒙昧無知。

三爺一向愛講故事。

「你知唔知啊…荃灣呢…有個組長我同佢十鳩幾年老友，晚晚想約佢隊酒呢，約唔撚到架...！無十一點都收唔撚到工架！」

「個啲邊撚度愉景灣啊…東涌個啲閪客一追件呢…你做大嘅，屌你老尾閪唔理阿豬阿狗都要送埋架…晚晚OT到無晒朋友架！搞到凌晨一、兩點仲派緊都試過架…！」

「慘就慘在你知唔知我老友佢住邊撚度啊？」

我和其他腳仔都搖搖頭。

「深圳啊！屌你老尾閪！」

深圳…讓我想想，由荃灣到最近的直通車上深圳，我預最快都起碼要一小時。每晚十點收工，每朝早返八點，還剩下多少時間睡眠…？還剩下多少私人時間…？

可是那人仍然在做，還做了不短的日子。我從來沒想像過，這是現代文明社會的人類生活。可是，在香港，這已荒謬得不是讓人聽到會憤怒，而是聽到了，還是沒感覺。

這個世界有種辛酸，不是光憑想像就能夠理解。只有親眼所見，親耳所聞，才能明白到，原來窮是一種「罪」。有些人半輩子沒做過壞事，卻「罪」有應得。

在可見的短暫日子裡，我相信我依然需要做外圍。其實做外圍，我是沒有甚麼問題的，只要我的勞動付出跟工薪成正比便可以。可是這種多勞多得制，薪金向上升是需要一定門檻的。如果收派數量不達標，便注定咬老底，而做外圍，地區大而分散，咬老底是幾乎注定。

我把薪金七除八扣，扣去信用卡卡數、電話費、雜費、家用...

第一天出糧，我便剩下1,300元生活費。

那一天是星期三，恰巧跑夜馬...

「入嚟啦！下一場就嚟開啦！」宏乳拉著我進入投注站。

我懂賭波，卻不懂得賭馬。因為我一直搞不懂，在十多隻馬裡要選一隻跑第一，究竟平均要幾多場才會中一次。

「你唔係斯文人嚟架啦！」宏乳對我說。

「做老粗要識賭馬先似番個老粗嘅！揀一隻啦！」

結果那一場，我跟宏乳買，買了 $100七號，獨贏有7.6倍。

「紅燈亦都已經亮起，所有馬匹準備就緒。」馬評員。

「好啦一開閘嘅時候啦，就見到呢隻......」

「7號！7號！7號！」宏乳在旁大喊，旁邊不少阿叔也在高聲疾呼。

「上呀7號！老虎蟹都要7號呀！！！」他們愈喊愈起勁。

我看著電視螢幕，嘗試去感受賭馬的人那股心跳加速的情緒。以往我最不屑那些蹲在馬會前咆馬經的阿伯，沒想到25歲這刻，我就已成為了他們的一份子，跟他們沒甚麼兩樣。

「屌你老尾…跑第四...位置都輸Q埋...！」宏乳丟飛。

我和他在馬會裡，看著彼此，沒有說話。的確，出糧第一天，便成糧尾，還有甚麼話可以說？

留個名

個少婦呢

留名，幾好睇！

留名

lm

翌日，因某個腳仔請病假，我頂替了他的線，是我工作以來第一次不用出外圍。午飯時間時，我很仔細地選擇餐廳，連吃一般三、四十蚊的茶記都覺得很奢侈。就在此刻，街上不遠，我碰見一個面善的身影...

「阿風！」這人在前方喊著我的名字。

「金毛傑...」我認得他。

他是我的中學同學。

「點呀你...呢頭返工呀？」他一身穿筆挺西裝。

我略帶點尷尬：「係啊...係呢頭返工。你呢...？返邊度？」

「前面匯豐咋嘛。」他指著前方。

我看看前面匯豐，笑著對他點點頭。

「你呢？而家做緊咩？」

「哦無，而家我做緊速遞。」

「做速遞...好搵啊...」他若有所思。

「不過做得辛唔辛苦？」

「OK辛苦啦...不過都頂得蒲嘅...」我輕輕帶過其他辛酸。

「估你唔到喎，中學個時寫嘢最叻係你，仲諗住你會做作家呀...編劇家呀添...」

「．．．．．．」

「喂，我要返銀行先啦，有咩我哋whatsapp度傾啦，你有我電話架嘛。」

「得閒call我啊！有咩好路數記得關照下啊！」他愈走愈遠。

我目送他步入銀行上班，腦海中依稀記起中學時，我年年考全班頭十名。而金毛傑，則年年考全級尾十。

我從來沒有想過，在鏡花水月的校園時期，我是遙遙領先，而在打真章的社會擂台上，我卻是徹底落後…

生活是殘酷的，尤其是當你想跟人比較。

一日，我瀕臨冧檔，宏乳說他做完自己條線後，五點鐘會過來幫我手。

「喂？喂！你幾點過嚟呀？」

「仲爭山谷道同理工宿舍堆住宅貨未派呀！」我在升降機中講得有點大聲，旁邊的師奶都望著我。

「我而家係呢棟昌盛金舖大廈呀！」

「快啲呀！」

然後我來到8樓，收起了電話。

「823…823…」我看著單上的地址，逐個逐個門牌數。

「薜…可欣…？」我看著提單，突然心跳幾乎快了兩倍。

「唔撚係嘛…？」

「我唔信。」我停了在823的門前。

「呢個世界，有好多人姓薛，有好多人叫可欣。我就偏唔信，佢就係住喺呢度…！」

於是我按了按門鐘。

「係咪信風呀？」她馬上開了閘。

我愣住了，她也愣住。

且慢，你可能會問，她是誰。

簡單來說，薛可欣是我讀大學時期的隔離系同學。我曾經好喜歡她，她應該也知道，只是我倆不熟，但會認得對方，見到面時會點頭微笑。

「小姐，呢度運費 $37。」

是的，我假裝若無其事。

「…唔使找啦。」她拿出了 $40來，放在我手。

「順便呢度簽個名。」

「唔。」她沒說甚麼，拿起筆，寫了「可欣」二字。

「唔該晒。」

然後她便關了門。

整個過程不用三十秒鐘，乾脆，俐落，卻使我深刻銘記。

我不知道她在關門後，會否也靠著牆壁，想起當天這傻小子，但我好肯定，她內心應當慶幸當天沒有喜歡上我。

落到樓，就看見了宏乳按著手機，正在煲煙。

「喂喂！今晚今晚…好強烈嘅心水，好強烈…今次真係掂，掂硬…！」

「第三場，四號…四號啊…！！」我一路走，他一路講。

「唔好同我講呢啲呀…」我不耐煩。

「宏乳。」

「以後你幫我送呢棟啊？」

「做咩事啊？」他十分愕然。

「總之你幫我送啦，呢棟好近你條線姐…」

「係咪唔想幫手先…？」我看著他。

「幫你手，好容易姐。」他深深地吸了一口煙。

「一係你俾埋昇御門我啊。」

「…昇御門我自己搞。」

「啊…你條死仔…」

昇御門，我當然要自己搞。

「昇御門19樓J...」我看到地址。這一天，我再有機會看到「她」。

「林太，今日啲貨要搬去邊呀…？」

我雙手捧著大紙箱，手瓜起展，仿如《激戰》中的彭于晏。

「搬入嚟我間房阿...唔該你啊...」她穿著比上次更低胸的絲質睡袍。

「哦，好。」

然後我進了房，她馬上進來鎖了房門...

「？」我看著她。

「林太妳…妳…」

她把上圍脫掉了…我終於初嘗那一雙豐滿而圓潤，兼且白裡透紅的……

「林太妳…妳…妳…」

？？？？？？？？？？？？？？？？？？？？？？？？？？？？

「妳咩啊！」

「訓啦柒頭！」我在電梯裡自刮，終止了自己的幻想。

「唔知道今日，佢會著咩呢...？」

升降機來到了19樓，今日我的手推車上，載著10件大小不一的貨。

我按了按門鐘。

我聽見了從洗手間出來的聲音。

她開門了。今天，她穿著一件素色上衣。這件帶點緊的上衣，突顯了她上圍的輪廓，和微微地露出了她的小蠻腰。

「哇！又咁多嘢嘅？」

我心想，這是妳淘寶淘的東西，難道妳不知道有那麼多...？

「係，林太，呢度10件貨，每件30蚊...」

「咪住！速遞哥哥。」她手指指點著貨。

「？」我看著她。

「可唔可以大個四件送入嚟，另外六件我去自取呀？」

我心諗：「妳又玩我咩…」

「．．．．．．」我看著她一言不發。

「唔該你啊...靚仔...」又是那一副很無辜的眼神…！

我當時心想，如果妳讓我就地正法的話，或許可以......

「咁啦林太...妳老公有無自己開公司...？」

「有啊...做咩事？」

「妳叫佢將公司地址轉番做屋企，或者叫佢開多間有限公司，地址都係寫屋企。」

「妳長期咁樣淘寶法，點都化算啦。」

「妳有商業登記證，我咪可以唔收妳錢囉。」

她「叮」一聲：「好主意呀！唔該你呀速遞哥哥！」

「我就當妳間公司啱啱成立，今日嘅貨我就唔拎走啦。」

「速遞哥哥！請你飲包檸檬茶。」她拿了一包檸檬茶送給我。

「以後我啲貨淨係由你負責送過嚟！」

人好易滿足的一種動物。明明你跟這個女人毫無關係，卻只是因為她的少許讚美，眼前捉襟見肘的生活，忽然一下子變得沒那麼重要。

那一天前，我本打算辭職，決心跟宏乳去學做紮鐵。現在，因為一個女人，縱使做這條線很辛苦，我都想撐下去。

或許我想在年輕勞動的日子裡，留下一些任性的証據。將來老了時，也能發現自己真的存在過。

樓主依定玩到第幾集

樓主依定玩到第幾集

你係指現實？

「我沒有遺忘過，那一段出村，最終戰鬥至勝利的夢想...」

我開始跟宏乳成為了一對好朋友。雖然他是一名老粗，但也算是最不像老粗的老粗。全公司只有我一人是不抽煙的，他知道我不抽煙，所以在跟我一起時都會盡量選擇不抽煙。

而最重要的，是當他看到外圍線冧檔時，他會抽身出來幫我。

每個星期三、星期六，我們收工後都會去投注站睇賽馬直播。我因為沒有賭本，所以只能夠買六合彩，渴望會在千萬分之一的機會率中，寫下我翻身過大海的傳奇故事。

「今期頭獎有三千萬。」宏乳也頭腦發熱：「中咗我就搞撚掂，即刻劈炮，食花生...」

我倆開著手機看六合彩開彩直播，發著千百萬香港人的同一個夢，中六合彩的夢...

「喂，你買咗幾多注啊？」我問宏乳。

「兩張電腦囉。你呢？你買咩啊？」他問。

「我不嬲淨係買嗰六個號碼。」

我長期只買相同的六個號碼，是因為怕有一天，六合彩真的出了我慣性買的號碼，而我卻悲劇般買了電腦飛。又或者，那一天我忘記了落注，這樣的話我會傷心死...

「好嘢...一個都唔中。」宏乳丟飛。

「我中咗兩個半。」我看著六合彩飛：「中三個半，比我有三百蚊捱一個禮拜都好啊...」

對於一名大好青年，假如他的人生只剩下期待中六合彩的話，這件事情是悲哀的。而更悲哀的是，我明白這個道理，卻無力改寫結局。

恰巧，宏乳也住得不遠。我倆在土瓜灣附近的茶記，一起食晚飯...

「阿風，點解你會嚟做信風？」

「．．．？」我看著他那副欲言又止的表情，似是心裡有話。

「可能我想發展所長呱，哈哈哈…」

「你唔覺得我對送貨好有天份架咩？以前無人攪得掂呢條線，而家啲貨可以日日清…」

他看著我，無言以對。

我的嘴巴黏著飲管，檸茶的顏色慢慢填滿乳白色的飲管。

「你咪扮嘢啦…」

「我見你永遠睇住我賭，但其實你心入面係好想賭…」

「你係咪仲爭緊人錢？」

一碟粟米肉粒飯從侍應手中遞來。

「我睇得出你識賭錢...但諗下諗下你個人，呀…又好似唔似會咁爛賭...」

「．．．？」我吃著一口粟米肉粒飯，看著他欲言又止的表情。

「你斯文人嚟架嘛。」他笑說。

我喝了一口茶，不知從何說起。

「咁你呢？你係想賭錢啊，定係想發達？」我問他。

「我問十個，九個都會答：『我賭錢就係為咗發達。』」

「但係，你想發達其實係唔應該賭錢，你要賭錢就唔好預有得發達。」我瞪著眼搖搖頭。

他嚴肅地回答我：「我係想發達。」

「咁你話我知，你諗住點樣發達？」

「靠連中10舖波膽？定係諗住中六合彩？中3T？」我微笑。

「你靠同其他人一樣嘅思維，你點樣發達？點樣賺第一個一百萬？」

我把大路的真理說出，只是不想發表毫無說服力的成功秘笈。因我沒有忘記，我只是一名輸光了錢而淪落做苦力的人。

宏乳他，漸漸抓緊了拳頭，肉緊起來。

「我一心只係想發達，我只係想…威比一個人睇。」

我最初時會想，這個人可能是他老豆、一個看不起他的親友、或是一個經已飛黃騰達的舊同學。

但原來這個人，是他老婆。

「我結過婚...仔都生埋。」他滄桑了起來。

他細我一年，卻已成家立室。我大他一年，卻未曾真正自立過。

「結過婚...？即係分開咗...？」

「我地係有咗仔先結婚。」他語調滄桑。

「後尾佢嫌我家用比得少，嫌我做嘢時間長，跟住就走咗，無再返過屋企…」

「咁你個仔而家…？」

「係我養緊。」他輕輕點點頭。

「佢連個仔都無諗過同我爭，而家係我阿媽幫我湊緊…」

說罷，他拿出銀包，遞了一張他抱著BB的相片給我看。

「佢今日啱啱好歲半。」

在茶記中，我看著一幅照片，並看著坐對面的這個人，感受到他對過去生活的憂傷與無奈。即使我倆中間沒有放一碟豆腐火腩飯，也能感受到那一股男人的浪漫。

「我同佢根本就無註冊過，所以嚴格上，其實都無分開過...」他不禁難堪地笑了。

「你都叫做結過婚，曾經有過一個女人…」我拿著匙羹，嘴巴停止了吞噬。

「至少你嘅生活比我踏實。」我抺抺嘴巴，準備敘述那被我弄得一榻糊塗的人生。

我看著今天感性的他，感激他願訴說自己的過去。

「你想唔想聽下我段故？」

他願聞其詳。

「我18歲第一次入賭場，每次我一有錢，就會攞去賭。」

「但係我同其他賭仔有個少少唔同嘅分別…就係我個人有夢想。」

「我個夢想，係希望征戰世界各地唔同賭場，然後寫成一本書...書上有晒我係每個地方贏幾多錢，溝過幾多條女，同埋係每一個國家發生過嘅驚險趣事。」

「我成日覺得人要做佢天生最擅長嘅事先至會成功。好似周杰倫做音樂、李安拍電影..倪匡寫小說…」

「.好似我呢啲，細個無學過乜野特別技能嘅人，唯一做得最多嘅事，就係打機...」

「打RPG game。」

「於是乎我相信我唯一行到同其他人唔同嘅生命軌跡，就係我當人生係一隻RPG，而賭場就係我每一關要打嘅關卡...」

「最重要嘅，喺兩個月前，我真係將呢件事付諸實行...」

我的出村理論，輸進贏退，八號風球之夜，倒欠卡數70,000，在那一天我都毫無保留地告訴了宏乳。我倆談到晚上十二點，相濡以沫，促膝長談。

「作為一名賭徒，揸錢係靠唔住…所以我諗過，唯一證明到你過關嘅方法......」

「就係你買到嗰度嘅樓…」他搶先說出答案。

「哈哈......」我倆在茶記中，彼此失控地大笑起來。

「唉，風哥，以後我真係要叫你做風哥，咁嘅野都比你諗到。」

「風哥，我好期待你過大海復仇個一日，我好希望你可以帶埋我一齊去。」

我不確定那一刻，他是說認真，還是取笑我的幼稚。

「放心喎，就算你唔問，我都諗住拖埋你一齊。」我微笑回禮。

「？」他不明所以。

「你跑得夠快呀嘛。」

「？」他還是不明所以。

「如果我真係贏咗幾球野而驚比人老笠，起碼有你喺度可以夾住啲錢走人先呀嘛。」

「哈哈哈哈......」

From rags to riches. This is our Hong Kong Dream.

就是這樣，從這一天起，我倆在每天的工作，每天的勞動下，因為某種特殊的原因而變得光榮起來。

為了一個不可能的夢，而必須讓這段歷史變得光榮。

6 罪名：窮

時間，來到了2015年12月，我入職信風已超過三個月。

我每朝早派送由漆咸道北，至整條馬頭圍道左邊，乃至馬頭涌道一路至亞皆老街球場，由最初需要兩日時間，後來需要一日半。到了現在，只需一日便可全線派畢，偶爾甚至可以準時收工。

「叮噹。」我按鐘。

「啊，後生仔…」阿婆面帶喜悅。

高山道阿婆，現在不會日日打去公司催派了。

「啊，後生仔，你真係準時喎！」馬頭圍道288號一間專做旗袍的老闆和老闆娘，每次見到我都滿心歡喜。

「喂，靚仔，以後見到我啲貨，唔準11點送嚟呀！要10點鐘呀知道嘛…？」

「10點鐘我仲未夠鐘出車喎…」

馬頭圍道240號窗簾舖的老闆娘，是很會開玩笑的。

「嘩，師傅仔，上晝你嚟，下晝你又嚟？」新亞書院的門口看更。

「我都唔想…」我用手上的紙箱推開大閘。

「你哋啲貨下晝又嚟，我下晝咪要嚟多次囉！」

位於農圃道的新亞中學，有一間新亞研究所位於四樓。如果送貨，是不能放落校務處的，必須要上四樓。即是說，每次送貨，我要跑四層樓梯。而且，件件都是大貨…

「喂？係咪陳麗娟小姐呀？信風速遞呀…」

「喂？喂？喂！」她掛了線。

樂民新村I座有位腦殘姐，每次打電話給她都會以為是電話騙案而馬上掛線。然後到了下午，就會自動打回給我…

「呀哈哈…係咪信風哥哥仔啊…唔好意思啊…我唔記得左我自己有訂貨啊…我以為你係大陸個啲電話騙案啊…哈哈哈…」

「小姐…你聽過我把聲十幾廿次架啦…」

「唔好意思啊…最多…最多我下次請你飲可樂啦！」

我心想，如果你是林太，或許我會馬上衝過來…

我跟宏乳說過林太住那棟豪宅的某個管理員，特別討厭我們這些「咕喱」。所以每次當宏乳跟我一起來昇御門時，都會大喊：「咕喱嚟送貨囉。」

那管理員，每次一見到我倆都露出無可奈何的樣子。

其實大家都只是搵兩餐，為食飯。為了食飯，人生都已經要花那麼大的氣力了，何必再花氣力跟不相干的人鬥氣…？

倒不如花多點精神，去欣賞漂亮的人與事還比較實際。

「叮噹。」我按門鐘。

她開門了。

林太今天穿的是一件白色喱士吊帶裙，我隱約看到她的胸圍。

「速遞哥哥…」說罷她從牆壁上除下一些東西。

「嗱，商業登記證。」

我特別留意到登記證上的英文名字。

「林太，原來妳叫Gloria…？」

「係啊，哈哈哈…」

她不單止有無辜的眼神攻擊，更有風騷嫵媚的笑容。每次上她家，我都被她的一下出奇不意的動作，完美地K.O.。

多麼慶幸，每個禮拜都至少能見她一次。

每當我食午飯，都會到浙江街附近的茶記。在那裡，會經常撞見附近地舖的老闆、或商業大廈的員工、或經常網購的熟客，跟我打招呼。

「咦？喂咁啱啊師傳仔…？」合誠商業大廈21樓的老闆跟我打招呼。

我微微笑點點頭。

每當我清早想呼吸一點清新空氣，都會先上天光道的英皇佐治五世國際學校派貨。那裡是全香港數一數二的貴族學校，整個校園，環境很好，連足球場都是正規的草場。

「啲有錢仔讀嘅學校，淨係連踢波嘅地方都大過人。」帶著黑超開車的雪爺。

「阿風，第時發左達，就比個仔喺度讀啦。」

「無咩錢就唔好生啦，費時盞害咗佢。」

的確，在香港生小孩，是要計算的。信風的同事中十個有八個，都是因為要養妻活兒，而失去了自己生命的話語權。

每當我進出大廈，看見郵差、其他速遞公司、或送貨的朋友幫我開門…

「唔該晒師兄。」我對著他微笑。

從來沒人教我以「師兄」相稱，這純粹是本能反應，卻是市井中約定俗成的稱呼。

由開工第一日比阿婆罵，做至成為土瓜灣地膽。是有種莫名的執著，令我對工作上癮。

live

Facebook Page : https://www.facebook.com/hongkongdream/