【多圖】羅馬浴場下埋藏2世紀哈德良時期壁畫 埃及死神阿努比斯穿着羅馬長袍、同場有智慧女神密涅瓦

點解每次欣賞寫實派藝術就有人出嚟嗌藝術不掛勾寫實？我地只係話寫實派倒退，無否定過任何藝術。

明明應該共存，一齊得到機會發展。係咪我地一唔可以省略「寫實派人像畫風格藝術」任何一個字去講歷史.....

其中一個範疇（寫實派藝術 或 意識流 或 印像派 或 抽像派 etc）倒退，點解唔可以直接講藝術倒退？

你睇下上面條友講啲咩先啦 佢話繪畫倒退然後係到侮辱中世紀美術呀 我都無攻擊過寫實啲咩

樓主:「中世紀都有其他藝術傑作嘅，係審美觀唔同啫」
我:「佢的確有自己藝術，但問題係佢地限制咗學術自由。」
樓主:「幅幅都係畫耶穌同聖母」 題材單一係事實陳述，但樓主並無將題材單一同技術倒退掛勾，兩個係獨立句子嚟。

我地無侮辱過中世紀藝術，我只係指責中世紀限制學術(藝術)自由

你睇下你自己講咩先啦蝙蝠俠你唔鐘意咪唔鐘意囉 又要大義凜然話battle of issus"高得一兩level" 教廷想睇鹹濕畫所以放寬題材都講得出虧你可以係到打長文教人

我一真針對住「光影、透視法、比例、色彩」作為標準去評，並無講過依堆應該係唯一標準。亞歷山大打丈以依堆標準去計我會評高LV過我認識既中世紀畫。

我唔覺得有咩問題。

教庭的確係敗壞而且係文藝復興其中一個遠因，但我會收返「最重要」三隻字」。

首先藝術唔係打機可以咁樣評level嘅野 見到你咁樣講battle of issus 個心真係酸曬

第二我教你少少藝術史基本野 中世紀宗教題材為多主因唔係教廷 規制任何時代都有 唔代表啲咩野 主因係畫嘅人受眾同出錢嘅人完全唔同咗

第三所謂文藝復興時代裸體多咗嘅主因係思想 意識形態嘅轉變 唔係啲人想鹹濕 裸體表達嘅唔係淫穢係用複製理想嘅人體去讚頌創造人嘅神/人本身

咁馬嘅正面又真係好難畫嘅
我諗個畫家已經盡咗全力

呢啲叫泥金裝飾手抄本，通常係寺院嘅僧侶製作
幅圖(miniature)係只有手掌心咁細，用嚟裝飾本書

大約1200年開始西歐盛行哥德風格
同同時期受拜占庭影響嘅南歐相比，已經畫得生動好多，隻馬個眼神交晒戲，完全表達到主人被殺嗰種尷尬感


侏儒殺死騎士
L'estoire de Merlin, Saint-Omer or Tournai, c.1316

睇返約莫相同時間、相同地點(法國)製作嘅另一本手抄本
就會見到隻馬都係相同姿勢

亞瑟王大戰撒克遜人
The Rochefoucauld Grail, most probably Saint-Omer, Tournai or Ghent, c.1315-23

呢兩本都係早期哥德式手抄本嘅代表作嚟

而係中世紀泥金裝飾手抄本入面
我最鐘意下面呢幅，啲騎士勁cute

呢本手抄本係講十字軍征服耶路撒冷嘅威水史，係1287年於耶路撒冷王國嘅阿卡制作，點知4年後阿卡就陷落，象徵十字軍係聖地嘅最後一個主要據點都失守埋



第一次十字軍東征—勒皮主教阿希馬爾和布永的戈弗雷
Histoire d'Outremer, Saint-Jean-d'Acre, 1283

d馬好搞笑

呢幅好似靚過對上果幅

我絕對冇貶低中世紀藝術嘅意思
我認同你講 畫風寫實=好 係一個唔客觀嘅陳述
審美本身就有主觀嘅因素
事實上唔同時代嘅審美觀、作畫原因、受眾對象、材料科技等等都各有不同
所以冇話邊個高低
而我作為一個歷史jj，更加關注嘅係藝術作品反映嘅時代背景


你呢兩個唔好拗啦
其實你哋兩個講嘅嘢都冇乜大衝突
正如蝙蝠俠話齋，佢係比較著眼「光影、透視法、比例、色彩」等繪畫技術層面嘅分析，咁從呢幾點睇，中世紀嘅繪畫技術係倒退嘅，但唔代表係藝術整體嘅倒退
中世紀嘅藝術用另外一個形式serve另一個purpose(主要係宗教)

你真係睇得好仔細
呢幅令我諗起提香幅Danaë
雖然姿勢唔同，而且露兩點，但一樣係挨張臥榻度，欲拒還迎

Titian, Danaë, 1544-1546.

之後就個個畫Danaë時都抄佢呢個pose挨係張床到，當中就包括林布蘭(Rembrandt)幅Danaë

Rembrandt, Danaë, 1636-1643.

btw嚟緊藝術館都有個巴洛克展，展出嘅其中一幅就有提香嘅Danae

中世紀啲教會畫同小學雞畫公仔無分別

袁生靚啲

羅馬人都無諗到金毛藍眼會統治到世界啦

東漢？
好似去到柏提亞2河一帶就折返左

首先多謝你既資訊

想知你嗰句「己經唔客觀」係點解
根住又講「藝術唔係打機可以咁樣評level嘅野」

首先我覺得藝術本身係人文思想、技藝既結合，可以但唔需要用客觀角度睇。然而我用「光&相似度」反而更乎合「客觀」標準。因為光角度、人體結構、力學重心依啲全部有數學基礎，任何人用依啲標準都可以分到準定唔準。而一作品背後既人文思想係無法「客觀」去睇，對佢人文思想有感情本來就係主觀感(無論幾都人有相同主觀感受都一樣係主觀，集體主觀=/=客觀)。你如何定義「客觀」依個字?

我發表自己評論，就應該要主觀，而唔係模仿他人言論作ATTETION SEEKING。我有權對一件事物有獨立睇法。我評一件事高低唔洗乎合你既「客觀」，你亦唔洗當我言論係標準。

我只係評論光影手法既高低，並不是全面評論一件藝術品。你將「相似」以外既標準套於我既言論係稻草人謬誤。

文藝復興畫家當然以追求美麗而畫裸體而非淫穢，我指出既係依個畫裸體既空間曾經係不存既，而裸體畫可以不被迫害其中一個原因係有啲教宗以私慾原因而不打壓。之後也有教宗轉口風要加塊葉。

我認同中世紀畫家自發畫聖經故事表達對宗教熱情，我相當支持依啲畫家表達自由。我指責既係有好多其他文藝、科學自由被教庭壓迫。若然人文思想係一件藝術品既其中一個核心，咁我都應該要把持藝術精神去正視「中世紀壓迫自由既做法」。

聽到你心酸真係唔好意思，不過你唔能該為我既主觀感受有太大波動。而且你一直話我評錯，然而你並唔發表自己睇法。咁都唔乎合學術精神。

The Frescoes and the Stories They Tell

依幅最值得講就係金屬材質與曲面，頭盔應用咗球體受光既描繪方法，個圓餅襯返個半圓，腳甲似乎用上咗明暗對照去強調左右腳位置既立體感(唔應該唔係發毛變黑掛)。睇落帽既濬度同上胸亮度應該用上差唔多色，相似既白光同黑影，令到肌肉質感堅硬度好比頭盔。

兩個人一動一靜，右邊呈備戰狀態，身體受傷出血而容不變色既鬥士，左邊擺POSE做出示威動作。似乎暗示激烈戰鬥後仍處上風既儌氣!有意境


SORRY，樓上騎劫咗大家田

終於有時間執下個稿
係個展覽入邊揀咗幾幅我鍾意嘅畫嚟講
主要係想講嗰個時代背景

— — —
話說香港藝術館之前係佛羅倫斯嘅烏菲茲美術館借咗42幅畫，搞左個「波提切利與他的非凡時空」展覽

可能大家唔知邊個係波提切利，但係你一定見過佢嘅名作《維納斯的誕生》


Sandro Botticelli, The Birth of Venus. c.1485

波提切利(Sandro Botticelli)係早期文藝復興嘅佛羅倫斯畫派畫家，佢生於1455年嘅佛羅倫斯，老豆係一個皮匠，15歲左右跟當時著名嘅畫家菲利普·利皮
(Fra Filippo Lippi)學畫畫


Pietro Vannucci (Perugino), St Mary Magdalene. c.1500
由於畫風類近，呢幅畫曾經被歸類為達文西同拉斐爾嘅作品，依家則被認為係拉斐爾嘅老師佩魯吉諾(Perugino)嘅作品
畫中據信以畫家老婆為model嘅聖瑪利亞．瑪達肋納身穿紅衣、開闊嘅平領口設計、加上毛皮鑲邊，係文藝興時期流行嘅款式。而深色背景下露出3/4半身嘅構圖源自佛蘭芒畫派(Flemish
School)，足見當時低地國家嘅畫作對意大利嘅深遠影響



有別於達文西呢類擅用光暗、強調寫實(得益於解剖學及科學精神嘅與日俱增)嘅文藝復興盛期畫家，波提切利嘅畫風深受老師菲利普影響，比較傳統(哥德風)，中意用強烈嘅線條感刻劃人物嘅優美動態

留意下人物嘅頭髮、嘴唇、輪廓，幾乎全部都係曲線

波提切利為咗追求理想美，甚至可以犧牲準確嘅人體比例，維納斯條頸同膊頭都長得好唔真實




大家可能成日覺得文藝復興就係重新發掘古希臘古羅馬嘅人文精神，重視對世俗生活嘅關懷

但事實係，係15世紀嘅畫作之中，聖母同耶穌出現得比任何其他人物都要多，好似《維納斯的誕生》咁嘅神話寓言作品只係少數，當時大部份嘅畫作仍然圍繞聖經故事、聖人等宗教題材，反映當時宗教嘅影響力仍然好大

聖母與聖子圖，聖母通常以慈母嘅形象，用溫柔and哀傷嘅神情望住耶穌



Francesco Botticini, Madonna and Child with St John and Angels. c.1490


Brygos Painter, Red-figured cup. 490BC-480BC
呢種新穎構圖源於古希臘人畫係淺酒杯(kylix)上嘅畫

中世紀時嬰兒夭折率高，佛羅倫斯一帶嘅人會送叫做desco da
parto嘅圓盤比啱啱分娩嘅婦女，個盤之後會掛係牆上面以紀念呢次分娩。15世紀，佛羅倫斯流行圓形畫(tondo)，圓形係構圖上更專注於主角，特別適宜繪畫聖經人物，有錢人會將圓形畫裝裱係昂貴嘅木框掛係寢室牆上

而另一樣可以係當時有錢人屋企見到嘅就係結婚櫃cassone。結婚櫃係新娘嘅父母送嘅嫁妝，唔單只係重要嘅裝飾性傢私，仲有社教化同傳達道德期許嘅功能


呢個結婚櫃嘅板畫係18世紀被鋸開5部分而家分別由佛羅倫斯嘅烏菲茲美術館、巴黎羅浮宮同布達佩斯美術博物館收藏

其中呢個嚟自佛羅倫斯顯貴家族嘅結婚櫃，畫咗瓦市提王后因為唔服從老公波斯國王薛西斯而被廢黜，改立忠誠同謙遜嘅艾斯德爾為王后。

呢個取自舊約聖經嘅故事向婦女展示咗唔服從老公嘅結果，教導婦女對丈夫嘅順從同忠誠and謙遜呢啲當時嘅道德典範，除此之外，畫作亦通過大量黃金、華麗嘅服裝同奢華嘅盛宴展示丈夫家族嘅財富同地位

艾斯德爾與薛西斯的故事：皇后瓦市提的盛宴(上圖)和摩爾德開的勝利(下圖)

Jacopo del Sellaio,The Banquet of Vashti, c.1485

Jacopo del Sellaio, Triumph of Mardocheus, c.1485

(之後想講美第奇家族對藝術嘅贊助同波提切利嘅三王朝聖…不過未寫完)

Sandro Botticelli, Adoration of the Magi (Lami Adoration). 1474-1475

補返幅死圖

留意下人物嘅頭髮、嘴唇、輪廓，幾乎全部都係曲線

呢個係波提切利畫緊自己

唔緊要啦
大家都係表達緊自己feeling啫


你真係睇得好仔細 睇你一講 又發現個盾真係好似反光咁

之前發現個youtube channel
佢又係教藝術史同點樣睇幅畫
佢有提過初學者可以由以下10點切入去試下睇幅畫

-比例
-構圖(形態嘅安排、層次)
-圖案空間(立體感：前清後曚、前大後小)
-外形(eg.圓形、三角)
-線條(分明、曲)
-光線(邊面打燈向邊面)
-顏色(冷、暖)
-色調(光暗、明亮)
-質感(eg.人體、衫摺痕、金屬、石)
-花紋

但好多時我到親身睇見幅畫嘅時候又會唔記得晒
睇嚟我真係修為唔夠

https://youtu.be/RnfcHA3ySTQ
個channel真係勁有心
可惜真係太少香港人會肯花時間學習藝術

樓主有無畫畫？
畫既過程，唔多唔少會留意到你引用嗰10個切入點所需要既心機。唔洗齋背書。

不過我覺得依啲切入點都係次要，個人感受更重要。心裡覺得靚，之後睇技法技術才有意思。

知晒一幅既技法技術但無法觸動內心就不如直接睇下一幅算。

就係無畫畫
不過幾鐘意聽藝術史
就好似上面我講波提切利展咁 我用嘅切入點好多時候都係件藝術作品反映到咩時代背景、幅畫本身擺係一個咩環境for乜用途
(我係俄羅斯真係見過有個阿婆係教堂對住幅聖像喊 個下好深刻 即刻feel到聖像嘅用途)

畫下其實幾好，我去Youtube、facebook follow 一兩個影畫畫過程既作者，佢地會將兩三個縮時至幾分鍾，咁你就會睇到佢地整結構既過程&上色既層次。之後fb、ig成日都建議一啲類似畫家畀我。睇下睇下手痕就畫到啲野，幾開心架。

不過畫畫工具都幾重要，素描既話，擦膠同張紙質地好重要。如果兩隻都用中國牌子就大獲。上色難、擦色更難﹐而且成日食咗啲色入深層永久擦不甩。用過最好台灣擦膠(只係5蚊)。鉛筆就得一隻鬼佬牌子無得錯。