6歲時呀媽驚我凍，特登拎件冷衫俾我

中野4葉 · 2022-05-24T22:24:07+08:00

6歲時我一年班，冬天嗰陣有一次因為曳被老師罰企一個禮拜，早會同小息都要企特別隊，等全校都知我係曳學生。所以開始罰嗰朝我扭計唔肯返學，呀媽同我講「做錯事就要承擔後果，你乖乖哋罰完之後就唔好咁曳」我被呀媽送咗上校巴，返到學就喊住咁企特別隊。可能係我扭計攪到有啲混亂，我上咗校巴之後，呀媽先發現自己仲拎住我件冷衫。當我喊住咁罰企之際，突然見到呀媽拎住我件冷衫嚟咗學校。呢個畫面過咗廿年仲係歷歷在目。佢幫我着咗件冷衫之後就走咗，而我都冇再喊，繼續罰企。 ------------------------------------------------------------ 廿年後，我26歲，而呀媽喺半年內因癌症而反覆入咗醫院幾次。有一朝，呀媽7點就打俾我：「呀仔，我好凍呀，你可唔可以早啲拎多件褸俾我？」我個心好痛，因為喺呢兩個星期，我已經拎咗幾件褸去醫院俾佢，但佢虛弱到着哂都覺得凍。嗰朝我拎住件褸去到醫院，求護士俾我早啲入去探佢。入到去，佢好攰咁坐喺床邊，見到我就微笑一下。我幫佢着咗件褸，洗面，餵佢食早餐。我捉住佢隻凍冰冰嘅手，忍住眼淚同佢講「放心啦，我會努力承擔自己嘅人生，踏實咁生活落去。」佢冇出聲，只係擠出廿年如一嘅溫柔微笑。而喺同一個晚上，我喺佢床邊，好似廿年前咁樣嚎哭。