[10年英撚]BNO中學同學

是咁的，我喺英國住左10年有多，住既地方唔算係bno移民既首選地區，但都因為bno移民多左好多香港人。喺香港既屋企人前排叮囑我，要小心啲香港人，多香港人既地方就係多事非，而加我都十分同意。帶番個頭盔先，我係歡迎bno港人移民，但今次想分享既事情我都屈左一排，開始前，請有心/諗緊想黎英國既港人，必須尊重英國本地文化，尊重身邊既人和事。

我相信好多喺英國既巴打絲打都一樣，移民潮下，突然之間又多番好多平時唔搵你既人主重搵你。

要講番上年1月左右，我有一位中學同學，搵我問左我一啲關於英國生活工作既事。佢叫Billy。我喺香港讀完中學就過左黎，同呢位同學未算係最好朋友既堆，但以前細個都有黎過我屋企玩，但近6，7年就真係好少聯絡，有乜大事都係打句congrats，或text一兩句咁，你話好friend，我覺得唔係，你話我地唔friend唔熟，我又唔覺得。講多少少background，其實點解會少左聯絡，其實都有原因既，最主要因原係，佢老婆，當時仲係女友憎撚哂我地呢班中學同學，佢覺得我地呢班中學同學教壞Billy，同埋我覺得Billy都係仆街，喺條女面前，有乜衰野都瀨哂落班中學同學身上，我唔知其他同學，但我就主要係因為咁，就越黎越少聯絡。
好，分三個階段講下Billy點樣影響到我既生活。

出發前
——
喺上年大約一月既時候，Billy有日突然text我，好關心我喺疫情下既生活。我大概都明白，平時唔講野，一黎就問我生活工作有幾多影響時，就一定係想過黎既。當時，Billy對我有個請求，佢老婆同個仔想過黎先，佢想喺香港番多半年或以上既工先過黎，問我可唔可以幫佢手照顧佢屋企人，要求我可以機場接送佢地兩母子，平時要車出車入去買餸，帶佢地去認識社區咁。其實我真係諗唔明，到而加都唔明，點解可以成個責任比左我，仲講到要移民只係為左佢個仔，所以想搵多啲錢先過黎（當時我信）。

當時我既回應係，唔洗因為我喺度所以要搬過黎呢區，同埋我真係冇能力去照顧多兩個人，因為我有我既工作，我有我既活動。其實我真係講到明，唔好覺得我有車就等於我隨傳隨到，我同我老婆好鐘意星期5星期1攞兩日假，long weekend就開車去下其他town，我歡迎我既朋友黎，但我唔希望係打亂左我呢10幾年既生活節奏。

咁Billy話佢明白，而最後佢都係一家三口咁出發，我鬆左一口氣，但佢問左我屋企地址，問幫佢收下信收下箱，因為佢唔會咁快有個地址，咁都係合理既。

等緊樓主出文

頭半年（呢段好長）
——
上年三月，Billy一家三口到左，因為嗰時佢地過到黎係要做家居自我隔離10日（我唔記得係點，但總之就係要隔離）。我嗰日要番工，所以Billy話唔洗我去車佢，但叫我幫佢去超市買左幾袋生活野同食物，咁佢地先從機場黎我屋機樓下，攞左幾袋野就去隔離。本來，佢地係想我每日都幫佢地買野，佢地覺得咁樣啲奶，肉，菜會新鮮啲，我同佢講不如用上網買，人地都係喺雪櫃入面收到order即時執比你，唔洗我去。初初好似唔係好想，但我講左幾次佢地先開始用呢啲服務。

佢地隔離完左，租到屋後，咁我地兩家人都有見下面既，佢地好注重衛生，唔想中covid，咁我明既，但我有啲唔慣佢會話我喺戶外唔戴口罩，我諗大家都知，英國戶外基本上係冇人戴口罩，但我覺得我比人話好古怪，你想戴你咪戴囉，你唔一定要迫我戴既，總之，Billy一家岩岩到既頭一排，都係有好強烈既衛生意識。

咁Billy身為新黎既香港人，有join一啲TG group，有一班都係新黎既香港網友，咁佢都有介紹啲人比我識既，係幾得意既，我咁多年都冇乜香港朋友，最多都係BBC。有另外兩家人（Will同Harry）特別friend，因為我地都會打網球，咁我地4個係開左個group吹下水，得閒又約下食飯既，係幾開心既。咁Billy通常都係會同人講同我識左好耐，乜乜乜中學同學咁去介紹我既，本來我都唔介意，因為都係一句啫，但之後就好似有啲唔同。

問題一，Billy好鐘意R車坐。我地幾個人入面，得Billy冇車，咁其實大家出去打網球食飯，車埋佢係冇所謂既，但佢住南，我地幾個住北邊，打個比喻，個球場喺我屋企5分鐘車程，佢就會叫我先去佢屋企車左佢先再一齊去球場，打完就車左佢番屋企先再番自己屋企。頭幾次，我見佢真係唔熟路，咁我咪幫下朋友，咪當車佢周圍睇下囉，但做左一次，原來就係expect我每次都係咁。我都有次同佢講，其實我買車，其實係想幫我自己慳時間既，第二就係周圍去下。但佢就遍遍覺得其實有車好方便，打完車佢番屋企都只係用幾30分鐘。大佬呀，放工打夜波，10點打完，我本可以10點半就喺屋企沖埋涼，車埋佢先番屋企，隨時用多一個鐘。有次，我覺得好過份，我係因為有野做唔去打波啦，就咁岩發生喺同佢講完我唔想成日車佢既同一個星期，咁佢就比說話我聽，佢話佢打完波，球場坐巴士番屋企要45分鐘，仲話係巴士站等車要食風，話下次我唔去打佢都唔去，太嘥時間，又話坐巴士可能會中covid，都痴撚線。R車坐，佢真係高手，佢個仔今年4歲，如果係出黎食野，佢就會教定個仔講，「我想坐叔叔車」，出門口前，佢就會打比你，叫個仔講呢句，食完野，佢又會叫個仔講番同一句，攪到真係好尷尬，我有次話我想weekend飲番兩杯，但佢就講到佢個仔唔坐車唔想出門口，真係痴鳩線。

問題二，Billy睇唔起藍領，覺得人地wfh就係唔洗做野。喺佢岩岩到既時候，我以為佢搵工方面冇乜所謂啦（因為佢喺出發前係咁同我講），咁我同我老婆就如果見到有啲咩簡單工，easy money就會send比佢睇，佢有幾次都唔覆我，有一次，佢覆番我，話唔洗再send呢啲工比佢同佢老婆睇，佢地只係traget office工，我嗰下真係呆左，我同老婆完全冇任何見低佢地既意思，我地都只係想幫下手，令Billy一家都快啲有收入，有啲野做下。另外，佢一直都知我同我老婆都係wfh，咁我書房就係我office，要接個電話，覆下message，落街買杯咖啡都真係冇乜所謂，因為我要番office時都係咁。我成日都話，公司對我地好可以講個電話，買杯咖啡，做到攰休息一陣，唔等於我地可以偷懶唔做野，但Billy就覺得我喺屋企番工就係無所事事，不停叫我去屋企隔離個大型超市幫佢買野，佢話佢帶埋個仔坐車過黎太遠太麻煩，不停咁比壓力我，講到佢地睇住個仔先係最忙嗰個，有病。

問題三，約出黎要就哂佢，出到黎又唔care個仔。有次喺個group入面約埋Will同Harry兩家人一齊出黎食飯啦，Will話想等埋佢老婆出左更表先覆，好死唔死，我地想食星期6， 個更表星期5先出，Billy就好似真係上左身，叫我地做人可唔可以有啲交帶，去就一句唔去就兩句咁，我屌，我幾撚尷尬呀，大佬，唔係人地唔想答呀，人地都等緊個更表啫，仆街，了解下件事先得唔得呀，唔好下下衝出黎，我真係好尷尬，Billy哥同埋人地講識左我好多年，我真係立即pm同Will道歉，同人地講Billy可能係比個仔激親。咁好啦，到人地攪，Billy做比人約嗰個，佢又可以大大條道理搬自己個仔出黎，話個仔呢排唔聽話，要聚會前一日先答到，真係雙重標準到仆街，話人地唔顧你做攪手既感受，但自己咁做就冇問題。好啦，約到出黎啦，Billy兩公婆真係好識玩，佢地永遠唔會兩個夾住個仔坐，最多都只係會一個坐個仔隔離，個仔另一邊就痴住我地其中一個大人，食餐飯就好似要人地去幫睇住個仔咁，唔係話唔鐘意佢個仔，錯都不在於佢個仔，成件事會覺得佢地係想將成個責任比左人地，自己就食野，玩手機，睇youtube咁，上次佢地個仔扭計，佢地食食下要走先，走既時候有黑面，好似覺得係我地唔幫手去氹番佢個仔咁，真係好撚野。

近期 (開始番第一份工到今日)
——
1. 覺得我地融入左，少左理香港野就係港豬。咁因為我都算係好融入本地生活，大大話話都住左10年有多，而加老婆係bbc，喺香港先住得幾年，我地兩個比較留意英國同我地居住地區既新聞。Billy一家好似成日都覺得我地係港豬咁，有次佢喺個group chat講類似唔知邊個黃店餐廳比狗玩，咁我就好奇問下到底係咩餐廳講多啲黎聽下咁啦，佢一黎就問我仲係唔係香港人，點解可以咁唔關心香港。我嗰下真係有啲嬲，所有世界既大是大非，我地都了解，但佢比我既感覺係你無論點樣都首先係香港人，一定要好關心香港，一定要成日都香港掛咀邊。大約5-6年前，魚蛋革命後，Billy有次text過我，大約係問我會唔會讀完書就番香港，當時佢會覺得我好幸運，有得㨂（呢個我都同意既），之後再好酸咁批評我，話我放棄左香港，放低左屋企人唔理，番學期間打啲part-time廢工，係因為我冇本事，冇方法搵到同學業相關既part-time，畢左業都只會係群埋啲華人社區等等。而加諗番，都覺得佢幾好笑。
2. 幾個月前中左covid，呢件事真係凸顯到Billy有幾自私，從我上面所講，Billy一家都係都好注重防疫，但可能都開始融入左本地都防疫措施，所以佢地都冇喺outdoor戴口罩。咁幾星期前，佢地中左，但佢地好似覺得冇乜野咁，自己好番，但個仔未好番哂都照出街食飯，照番office，我真係唔明點解可以咁自私，係唔係留喺屋企多幾日，多一兩個星期都唔得呢？當時，人地一家中左，人地全家好番哂都話唔肯見人地，怕人地會傳到比佢，但而加就雙重標準。
3. 唔洗再約聚會，可能係因為上次Billy佢地不歡而散，我地冇主動照顧埋個仔，而加佢話唔洗再約佢地出黎。其實我知道仲有啲野佢地唔多鐘意我地，我感覺到Billy同佢老婆有啲酸緊我地？因為我地有時講下租屋買樓既話題，呢樣野我會喺下一點一齊講。
4. 搵到工串77，憎人富貴厭人貧。幾個月內，佢轉左幾次工，睇落又好似真係越轉越好既，都鄧佢開心既。但係，佢啲態度真係幾乞人憎，成日喺個group chat度同人講自己番工，係番office，可以wfh，到左可以wfh時，又話其實自己鐘意番office多啲，喺屋企係好，但個仔嘈住佢做野，成日講到自己好易搵到工轉到工，feel到想喺group chat入面同所有人講，唔洗好似我咁，要本地讀書讀幾年書，佢都一樣有能力坐office，而加好似好睇唔起人地要番體力勞動既工作咁。接番上個point，因為小弟半年前搬左屋，新屋入伙，本來我都冇打算同人講我搬屋，因為我唔想比人地覺得我好似好串咁，當時係佢不停問我呢排點解咁忙，又問搬去邊，我先講，咁岩Billy話佢個同事都準備搬入同一區，佢同我講人地係買最大既屋型，睇黎我都係買最平最細架啦，唔明係咩心態，真係唔係需要你句恭喜，但唔知咁講野算係咩態度。

經過左一連串既事件，我而加係好少主動再搵Billy，亦都唔想佢同人地講識左我好年

等緊樓主作埋落去

真

作完

佢本身學歷同工作經驗係咪好有料，又比佢係咁搵到好工都有既

唔算好有料，所以先串9我

樓主好善良 係我嘅話應該唔會覆佢message 由佢地自生自滅

你太好人
俾我一早唔撚理佢
識左咁多年咁又點
都唔識尊重人

本來係覺得幫到咪幫下，點知好似變到老憑咁

你咁忍得嘅 睇字都覺得好難頂

而加我已經唔會再主動搵佢，但始終另外兩家人都係經佢先識到，所以有時人地都會話不如叫埋出黎食飯，咁又會回到坐車問題

我有時都覺自己太忍得，成都都覺得幫到就幫

人要衰，去到邊都會咁衰，最怕係佢遲啲影衰埋香港人個朵
成年人，合則來不合則去，當識少個好閒

珍無事不登三寶殿 第二句就藍剔

直接覆佢
買車啦窮撚

實激佢跳掣

同埋唔熟唔食

同意，我都學緊，但有時都係衰心軟，你唔搵佢一陣，佢又會好似好關心你咁問你呢排忙乜

點解你仲會繼續理佢

我試緊