Edan Lui 呂爵安討論區 4丨一表人才小諧星丨Elevator即將推出

【睡前一首歌 － 聽廣東歌】《Elevator》：不要急，慢慢來，有些事急不來

「揀好香水襯髮型 布鞋轉了真皮 (I like it)/ 好新款戰鬥服 笑匠也變不羈/ 而鈴聲響了戒備/ 連忙回 Baby on my way/ 火速閂閘衝入𨋢門/ Are you ready 剩下六十分 預備驚喜」

香港人有一種特質聞名於世，那就是急，慢半秒都可能遭到旁人側目。猶記得初到歐洲留學前，就有前輩提醒：不要瘋狂按電梯裡的關門制，這個香港並不罕見的舉動，在當地卻是非常不禮貌。其實多按幾次並不會使關門的速度加快，只能反映你心急的程度。留意留意，不是趕時間的程度，因為真的有很多人明明不趕時間，就是慣性，想所有事都快一點，不浪費半分半秒。

「懸浮於半路太久/ 難題堆滿入口 (Oh my)/ 七樓的等夠五口/ 三樓要搬貨裝修/ 可否再快兩步 Come on」

Edan 說電梯就好似人生縮影。從等電梯開始，前面一切未知，你不會知道正在等的那部電梯會否已經客滿，即使是站站停的電梯到底能不能擠進去。哪怕你幸運地進了一部無人的電梯，也不擔保接下來會否寬敞到尾，下一秒可能會突然湧入一班人，或者再換位經歷一次站站停。整個過程，你不能控制，只能抑壓靈魂內焦急的心情。這種焦急在編曲上亦能體現，鼓的節點，仿似時分秒指針滴滴答答的聲音。不斷循環出現，像不像你不停在查看時間﹖

「Bala bala ba bala ba ba/ Elevator Elevator/ 心越急越煩問題越難拆 Come on/ Bala bala ba bala ba ba/ Elevator Elevator/ 現實未能預料 着急解決到嗎」

新歌的歌詞、編曲和排舞，各司其職，相輔相成。歌詞畫面感強，編曲奠下整首歌呈現出來的節奏，而排舞則把其中的輕快、佻皮充分展現。有許多事急不來，只可以慢慢地，順著它的節奏慢慢地走。Edan 在唱「Bala bala ba bala ba ba」後，有一句很自然流暢而舒爽的「呼/hu」聲，是啊，在長久以來的急促節奏壓迫下，偶爾闖入生活的一絲輕鬆，不是很爽嗎？既然一切未知，亦掌控不了，why not take it easy？

「趕 趕到最尾要我照等候 Elevator/ 急 急到最尾要我照忍受 Elevator」

撰文：馬來時
圖片：《Elevator》MV

本月好集慣主題：【走進香港的平行時空】
#好集慣 #習慣是一種堅持 #堅持是一種習慣 #睡前一首歌 #聽廣東歌 #呂爵安 #EdanLui #不要急慢慢來

回帶︱早熟Edan分享考DSE升學心得
Retake no big deal
珍惜大學友誼：係一世嘅朋友

「我係學生你又係學生，點解我唔可以遲到你可以遲到？點解呀？」虎仔 #邱傲然 質問 #兒登 #呂爵安，兒登不住道歉：「對唔住對唔住。」由一入門口他就不斷鞠躬道歉，他又遲到。隊長 #Lokman 問他：「點解你成日遲到嘅？」虎仔不滿說：「我真心嘅，而家幾點先？」兒登用慘豬腔跪求原諒：「對唔住，鬧鐘冇響到…」之後一直坐得僵直陪笑，笑容也是僵的。

虎仔的對白其實是 #花姐 要求，那是 #MIRROR 成軍之初，#Jeremy（#李駿傑）還是藍毛毛，花姐聯同大夥兒整蠱兒登。「#Edan 最驚全部人到齊！」 #皮皮 #陳瑞輝 曾笑他。現在登已戒掉遲到陋習，組隊之初他不時遲到，正如虎仔所說﹐那時他跟兒登仍未大學畢業，要兼顧學業和MIRROR，意志非常強大。

【應試前準備：自修室溫書＋補習】
本屆 #DSE 將於4.22開考，竹篙灣特設考場。當局4月4日才公佈有關方案，教育局副秘書長康陳翠華還稱這是「人生歷練」，籲大家做正能量寶寶，說：「過去嘅呢唔需要再抱怨，因為怨係一種負能量。」形容竹篙灣試場讓考生知道「係可以有選擇」。

朝令夕改，疫下考生面對重壓，但「怨」又成為罪名。聽官腔不如呂腔。有爵屎分享兒登兩年前升學講座一席話，由考DSE講到升學揀科、大學生活等。題目雖大，兒登講嘢又急又快，但有條不紊，總好過聽人講「唔係啲同學覺得好辛苦、好可憐就需要放鬆（機制）」之類…

講座上，兒登憶述當時備戰考DSE，不離去自修室溫書、補習，「補習好重要，因為香港考DSE有一個模式，補習我覺得都幾幫到手，同埋最緊要勤力，每日係咁自修室『lun』。」

【老師建議讀BBA (IS)：話我幾啱做business】
兒登DSE考獲最佳五科25分成績，還入讀第一志願港大工商管理學（資訊系統）學士。他說：「我本身冇一個特別嘅科目好想去讀，老師suggest我3個choices都揀HKU。我好鍾意同人傾偈，我覺得Social Work都算係專業人士吖，都幾好，但嗰時老師同我講，嚟緊係IT嘅世界，佢覺得我幾啱business嘅行業，與唔同嘅人用把口去周旋，老師話幾啱我。」

兒登接受老師建議，順利入讀BBA (IS)，但究竟課程內容為何，他笑言「第二年先知」。Computer Science難倒兒登，也令他「入大學係唔使讀書」美夢破滅：「我sem 1第一科Programming fail咗。」下個sem retake，兒登拿了個A：「所以呢，唔使太擔心嘅。」

講座上，兒登多次建議考生要做多點資料搜集，清楚知道自己興趣志向，又以個人為例，笑言：「我有少少俾老師老點咗嘅，老師同我講呢科啱你呀！我問過佢，如果我讀唔到Programming點算，『唔緊要㗎！第二年可以drop㗎！』點知第二年發覺搞唔掂，想drop﹐原來冇得drop㗎，drop咗就要quit U重新嚟過，所以最緊要做足資料搜集。

【問意見唔好淨係問叻嘅同學】
「要問多啲讀緊嗰科嘅人意見，同埋唔好淨係問叻嘅同學，因為學校請得嚟講座都係讀得好嘅；讀得好嗰啲人會同你講幾好呀幾舒服呀前路一片明朗呀冇問題㗎！呢個就係一個人板（指自己），未必一定好。我唔係話我嗰科唔好，只係話大家要做好資料搜集。」

「住hall，上莊，拍拖，走堂，part time」，大學五件事。兒登數來數去也數不到走堂，台下瘋狂提水他仍擘大眼說：「我唔記得第五係乜嘢喇，我又唔係做晒咁多樣嘅。」兒登提過住hall抽房係揀同學揀剩嗰間，結果中單人房。一講到住hall他就眉飛色舞，好彩班兄弟不在，不然一定被追問住hall「你最難忘的事」同「第一次」之類（詳見《MIRROR頻道》）。

「大部份趣事都係喺宿舍發生，其實我都係去到嗰度先開始接觸跳舞，佢俾你好多機會試唔同嘅嘢。」他說遺憾是放棄了去韓國釜山做交換生的機會：「因為某啲原因，最後冇去到；就係因為我冇去到，先會參加《全民造星》，所以都……整定，哈哈。」

【珍惜大學同學友誼：係一世嘅朋友】
大學時代兒登較多參加宿舍內的活動，學會反而少涉足，豐富多姿的大學生活令他學會與人溝通，「合作一定會有磨擦，你點樣令大家都舒適咁去合作，或者出到嚟件事會係最好，會學到好多呢啲嘢。人一定會有爭拗是非，大學就係你踏入社會之前最後嘅試煉場。」

「識朋友都好緊要，你出嚟社會做嘢之後，可能好難識到差唔多年齡、志同道合嘅朋友。呢啲朋友可能之後咁多年都會陪住你，特別係住hall，一齊瞓，一齊玩，係會有一個好深刻嘅友誼。到而家我都會同佢哋見面，呢段友誼係好真摯，你會好信任佢哋，係一世嘅朋友。」

【兼顧學業與MIRROR：有諗過擱置學業】
這班好朋友，在兒登兼顧《造星》及MIRROR成軍之初幫過他不少。「我比賽嘅時候係Yr 3，我出道嗰年仲係讀緊書，讀緊final year。同學好nice，佢哋唔會笑你點解發明星夢，反而好支持，同埋佢哋會八卦啦，問其他參賽者嘅八卦嘢，可能佢哋心儀嘅唔係我係其他參賽者。

「當知道自己入咗MIRROR，有諗過第四年就擱置住先，因為入MIRROR第一年可能係最忙，但最後都決定咗讀埋佢、grad咗先，如果唔係就會嘥咗三年時間，但過程裏面真係少咗好多時間。好彩我班同學好好，例如做project、功課，佢哋會分啲易啲嘅俾我，好多謝佢哋，我先至畢到業，識人真係好過識字。」登一口氣說，他形容那段時間是擔驚受怕：「我唔係擔心GPA會唔好，而係擔心自己畢唔到業，加上又要做嘢，嗰段時間都幾辛苦。我覺得面對壓力，都係做啲自己鍾意做嘅嘢，同身邊嘅人傾訴吓，有人安慰支持會好好多。」

【人生路漫長 Retake no big deal】
減壓方法他毫不猶疑就說打機，還有打牌。「放榜前一晚我通宵打牌，因為大家都緊張到瞓唔着，搵啲嘢消磨下時間。」萬一考衰咗，登說唔緊要：「Retake一年兩年其實冇乜大不了。」他說大學時身邊很多人也曾retake，甚至有人曾quit U，「真係no big deal」，他說：「你人生路咁長，一年時間唔會爭好遠，仲有好多方法、好多出路去到你最終要去到嘅目標。

「我都做過學生，俾阿媽罰過，我都覺得阿媽真係好鬼煩，成日嘈我，但我之後知道，其實佢係關心我，可能父母用一個encouraging嘅方式，而唔係用怪責嘅方式去做會好啲。

「揀科方面，家長嘅資料搜集可能唔夠學生咁好，好似我阿媽咁，一定係醫生呀律師呀，呢啲一定係最好，但我身邊有啲同學讀呢『神科』，如果要讀得好，其實你會好辛苦，同埋要成功其實唔係咁易，唔係你讀咗嗰科，一定會成為家長心目中嘅成功人士，賺好多錢，未必㗎，所以家長唔使迫子女讀嗰啲佢哋自己覺得好嘅科目，最緊要係子女嘅興趣，因為如果你做緊嘅嘢唔係你自己鍾意做嘅嘢，你都唔會做得開心或者做得好。子女都要同家人溝通，因為子女嘅年齡始終都冇家人咁成熟，向多啲唔同嘅人問意見，對大家都好。」

說這番話時，呂爵安23歲。這一代年輕人，經歷太多，很早熟。人生歷練和負能量是成年人給他們的，但年輕人自會打出一片天。

#娛壹

薑係老嘅辣
Edan不敵Do姐追問連環爆料
證實MIRROR下半年開騷
《百萬同居計劃》原來冇陳漢娜？

薑始終係老嘅辣！是咁的，MIRROR紅館騷近日有傳喺7月舉行，搞到一班鏡粉、前夫蠢蠢欲動去撲飛。之但係當事人十二子一直冇開口回應，純粹大家自high。不過事情今日有新發展，Edan呂爵安下午接受Do姐主持嘅商台節目《口水多過浪花》訪問，喺前輩窮追猛打追問之下，Edan唔小心漏咗少少口風：「將來會發生……今年會發生，係下半年發生。」嗱嗱嗱，今次就堅係認真地同隻手做定按摩，ready上網撳飛啦！

另外，近日開拍嘅ViuTV 新劇《百萬同居計劃》，本身打算沿用《大叔的愛》班底，為大家最期待嘅「田牧CP」Edan、Anson Lo再合體而表示高興。可惜Edan撞期，佢要同毛舜筠、鄭中基拍電影《死屍死時四十四》，所以接唔到。不過竟然有傳聞話Anson Lo因為要帶挈Hanna陳漢娜加入劇組，搶走Edan戲份，令佢劈砲辭演。雖然明知得啖笑，但都想親口聽Edan回應：「我喺公司出名乜都做，甚至花姐都會叫我唞下，我都話一定要做，因為我好鍾意做嘢。啱啱出道三、四年都係新人，點可能揀嘢做？我何德何能咁樣！」而講到Hanna加入劇組，Edan就好有口德唔開名解畫：「有個女仔俾人點名，但以我所知，佢好似係唔關事，佢好似係其實無份參與劇集，我唔肯定，但以我所知係咁！」噢！清楚明白了。

#MIRROR #紅館騷 #下半年 #口水多過浪花 #Do姐 #Edan #呂爵安 #百萬同居計劃 #Hanna #陳漢娜 #死屍死時四十四 #毛舜筠 #鄭中基 #AnsonLo #盧瀚霆 #Viu1娛樂新聞 #Viu1 #Viu #黃Viu煲劇平台