[月經post] 心目中最喜愛嘅十首林夕填詞作品

其實我都知道喺連登開詞人post好容易引起罵戰，但我都知呢度有好多林夕詞迷，我出呢個post單純想分享自己嘅喜好，同時感激林夕對華語樂壇嘅貢獻



宣傳post：
https://lihkg.com/thread/189313/page/1
[講故仔][歷史] 名言與其背後故事

呢個係我出過嘅講故仔post，如果大家有興趣歡迎雅教筆者拙作



1. 皇后大道東 - 羅大佑、蔣志光
https://www.youtube.com/watch?v=MAK1BsJun3M

於1991年推出嘅《皇后大道東》，林夕以嘻笑怒罵方式表達港人對「九七」嘅五味雜陳、百感交集之情；歌詞用字精練啜核，例如「硬幣」、「同志」、「路線」等包含意識形態、歷史緣由嘅深層意味；呢首絕對係林夕早年諷刺時弊、引發社會共鳴之佳作。

「有個貴族朋友在硬幣背後 青春不變名字叫做皇后
每次買賣隨我到處去奔走 面上沒有表情卻匯聚成就」

「知己一聲拜拜遠去這都市 要靠偉大同志搞搞新意思
會有鐵路城巴也會有的士 但是路線可能要問問何事」

2. 約定 - 王菲
https://www.youtube.com/watch?v=67slIN7z7-o

呢首係我最中意嘅林夕作品。唔需要堆砌文字、天花亂墜，只靠寫景抒情；當中句句緊扣嘅歌詞，猶如一齣可歌可泣嘅愛情劇集；反璞歸真，反而更加觸動人心。

「還記得街燈照出一臉黃 還燃亮那份微溫的便當
剪影的你輪廓 太好看 凝住眼淚才敢細看」

「明日天地 只恐怕認不出自己 仍未忘跟你約定假如沒有死
就算你壯闊胸膛 不敵天氣 兩鬢斑白 都可認得你」

3. 曖昧 - 王菲
https://www.youtube.com/watch?v=D5aGEtwLJhM

除咗扣人心弦嘅甜蜜情歌，林夕筆下嘅單戀、暗戀情感同樣寫得深婉細膩、真摯動人；當然，王菲嬌柔嘅聲線、迷人嘅唱腔亦將呢份曖昧之情唱入諸位心坎；令聽眾猶感相思之甜酸苦辣，若即若離、患得患失。

「眉目裡似哭不似哭 還祈求甚麼說不出」

「你的溫柔怎可以捕捉 越來越近 卻從不接觸」

「茶沒有喝光早變酸 從來未熱戀已相戀」

「愛或情借來填一晚 終須都歸還 無謂多貪」

4. 暗湧 - 王菲
https://www.youtube.com/watch?v=epif7q6oWlo

好老實講，我恨不得排十首最好嘅王菲＋林夕作品，但為咗擴闊討論空間同避免厚此薄彼，只好嚴選三首我聽完真係欲罷不能嘅神作出嚟公諸同好。戀愛通常分成三個階段：曖昧、熱戀、平淡。第三個階段好聽可以話係細水長流、難聽可以話係枯燥乏味；好多段愛情難以走到盡頭，全因「沒理由，相戀可以沒有暗湧」。

「害怕悲劇重演 我的命中命中
　越美麗的東西 我越不可碰」

「仍靜候著你說我別錯用神 甚麼我都有預感
　然後睜不開兩眼 看命運光臨 然後天空又再湧起密雲」

5. 玉蝴蝶 - 謝霆鋒
https://www.youtube.com/watch?v=9viavzAf20o

呢首可以話係林夕意境最高之作；歌詞有好多令人摸不著頭腦嘅詞語，但成首歌其實只圍繞一個主題－「靈魂伴侶」。當寫情愛愛，寫到呢種「了生脫死」嘅境界；相信華語音樂界只有林夕一人能夠做到。

「我叫你玉蝴蝶 你說這聲音可像你？
戀生花也是你 風之紗也是你
怎稱呼也在這個世界尋獲你」

「你哪裡是蝴蝶 然而飛不飛一樣美
夫斯基也像你 早優生更像你
這稱呼配合你才迴腸和盪氣 改得多麼入戲」

6. 弱水三千 - 麥浚龍
https://www.youtube.com/watch?v=AdXq8Kq7GnY

「弱水三千」，除咗係林夕最愛填嘅佛家用語外；亦係引用自《紅樓夢》當中傳頌最廣嘅一句名言：「任憑弱水三千，我只取一瓢飲。」（ 有關呢段故事，喺我嘅講故仔post第十六章中有提及）；書中賈寶玉一句「禪心已作沾泥絮，莫向春風舞鷓鴣」中嘅「春風」，亦喺此曲中有所提及。林夕詞路廣闊，引經據典、咬文嚼字嘅作品亦為數不少；筆者特意提此曲，除咗鍾情《紅樓夢》之外，詞中揉合宗教、文學、人生觀，同時以「水」一物貫穿全詞主題，令人不禁讚嘆林夕遣詞用字之功力；除此之外，歌曲一段連綿不斷但又恰到好處嘅押韻，亦可見林夕填詞細膩之處。

「三千春江水 暫住寂寞天空
　逛夠了世界 跌進了春風」

「山水非山水 凍了變雪堆
　山水般山水 遇熱若霧水
混雜絕望後便是淚水 衍生出心碎
狂潯約花絮 再醉了愛再醉 會跌進漩渦太虛
擠於渠裡 浸於浴裡 同樣落自春水」

7. Shall We Talk - 陳奕迅
https://www.youtube.com/watch?v=IBbPMUCR0k

好歌縱然一聽再聽都係歷久彌新；好詞經過時間洗禮都能有所領悟。《Shall We Talk》於2001年推出，迄今都已十六年；當時年少無知，只覺曲調柔和、歌聲動人，未有感受詞中奧妙；隨著年歲漸長、經歷更多，細嚼歌詞，回憶童年時代嘅放縱、反叛、我行我素，但又無憂無慮；再到今時今日，思想成熟咗，但同時責任、顧慮亦多咗。歌曲依舊動人，但卻多咗一份唏噓、同感慨；「此情可待成追憶，才下眉頭，卻上心頭」。

「孩童只盼望歡樂 大人只知道期望
　為何都不大懂得努力體恤對方」

「成人只寄望收穫 情人只聽見承諾
　為何都不大懂得努力珍惜對方」

8. 不來也不去 - 陳奕迅
https://www.youtube.com/watch?v=kJ3_0WrUXE8

林夕填詞善於將文學同信仰融會貫通，而呢首《不來也不去》更將林夕「玩字」功力發揮得淋漓盡致。歌中寫嘅正正就係人經歷每一個愛情階段嘅心境變化：相遇、分手、感慨、重新出發；而林夕更將佛教所提倡嘅萬物「緣聚則生，緣散則滅」道理寫入詞中。有啲人分手會呼天搶地、死去活來；亦有人視之為「解脫」。寄語所有失戀嘅朋友，「Life must go on」，耿耿於懷都係無補於事；希望聽完呢首歌可以令你收拾心情、重新上路。

「垂頭前 沒緣分喪氣
　睡到醒 才站立得起
盲目過 便看到天機反覆往來 又再做回自己」

「如烟 因給你遞過火
　如火 卻也沒熔掉我
回望最初 當喪失是得著可不可
　可痛若驪歌 樂如兒歌
　像你沒來過 沒去過」

9. 傳說 - Raidas
https://www.youtube.com/watch?v=UJ4X3Sq-nAQ

假如林夕同王菲、陳奕迅係黃金拍檔、合作無間嘅話，咁成名於八十年代嘅香港組合Raidas同林夕簡直就係如魚得水；當中《傳說》一詞，更將林夕嘅文學根底、才華表露無遺。歌曲喺一片電音、鼓聲環繞下，配上嘅竟然係文學味道極濃嘅歌詞。歌詞以「俗世愛情故事」作脈絡，同時透過「戲曲與文字」：《紫釵記》、《帝女花》、《梁山伯與祝英台》等中國民間傳說、故事，連繫書本同現實世界。林夕將英倫電音融合中華傳統、歌詞揉合讀白同詩句，大膽驚艷之餘不落俗套。

「小玉典珠釵 鉛華求長埋
　　祝君把新歡 乘龍投豪門」

「小玉休相迫 檀郎無忘情
　　三載失釵風 瑤台求重逢」

「庵中孤清清 長平難逃情
　　江山悲災損 流離仍重圓」

「花燭映規妝 難為郎情長
　　 交杯飲砒霜 泉台諧盟鸞」

10. 似是故人來 - 梅艷芳
https://www.youtube.com/watch?v=P-CxF1RV4kY

人嘅一生既苦且短，能夠搵到命中伴侶當然係好事，但假若彼此有緣無份、天不從人願，亦都只能順應天命。歌詞引發共鳴，「但凡未得到但凡是過去，總是最登對」、「恨台上卿卿或台下我我，不是我跟你」講中唔少人嘅心聲；除此之外，林夕喺詞中使用大量疊字，為此曲更添凄美之情；副歌末句「似是故人來」為曲點題，更係整首詞嘅神來之筆。

「何日再在何地再聚 說今夜真暖
　無份有緣回憶不斷 生命卻苦短
　一種相思兩段苦戀 半生說沒完
在年月深淵望明月遠遠 想像你憂怨」

「俗塵渺渺 天意茫茫 將你共我分開
　　斷腸字點點 風雨聲連連 似是故人來」

https://www.youtube.com/watch?v=IBbPMUCR0xk
Shall We Talk補link

高質post留名

Shall we talk真係頂級之作 係講緊個意義 唔洗用複雜又難既詞堆砌

弱水三千神曲
鍾意王菲首郵差

你是千堆雪
我是長街
怕日岀一到彼此瓦解

弱水三千神曲
鍾意王菲首郵差

你是千堆雪
我是長街
怕日岀一到彼此瓦解

呢首我都好中意

個人鍾意富士山下
當中個意境出晒黎
啲詞好入肉

樓主！！終於等到你再出post 發覺同你啲口味都幾似

畫意
浮生若水
你們的幸福

林夕認真去填既唔單單係詞,好似畫緊一幅畫咁

樓主！！終於等到你再出post 發覺同你啲口味都幾似

他鄉遇故知，人生一大樂事也

Shall we talk真係我呢一代嘅神曲

如若你非我不嫁 彼此終必火化 一生一世等一天需要代價

細個睇到羅大佑同蔣志光個mv
以為係玩嘢歌 近年了解返歌詞先知原來咁正

同弱水三千並行嘅生死疲勞、顛倒夢想, 都係好嘢嚟

raidas嘅曲+林夕嘅詞真係冇得輸

驟變的音階 屢次起跌
如同年月蹉跎
別人的歌 別人風光
藏著我一生痛楚
但我不甘心 永遠灰暗
如同陪襯
不相信就這般 無聲的渡過

我叫你柒頭傑

秋分 juno
可以一戰

高質post睇完先正評後留名