香港電影大師楚原先生千古，回顧藝壇光影旅程無負此生

香港著名大導演兼演員楚原叔（1934-2022）前日仙遊，享壽八十有七。大概三年前，楚原叔攞咗電影金像獎終身成就獎，一番感言成為全城熱話，佢攞完獎之後我都特登開咗個帖考究下佢拍過邊啲仆街片，而家睇返因為嗰陣個帖出得太趕急，其實係考究得好差

【香港電影考古】楚原叔70年代以後電影年表整理 + 嘗試搵出佢口中嗰幾部仆街片
https://lih.kg/631714
- 分享自 LIHKG 討論區
【前境資料，香港影庫載楚原叔電影年表】
https://hkmdb.com/db/people/view.mhtml?id=2454&display_set=big5
https://www.youtube.com/watch?v=cOFB7wiLskY

《新難兄難弟》(1993)

三年後，楚原叔作古，佢嘅生平同得獎感言又再一次洗版，我自己開嗰個老餅帖嘅一班友好都好快有迴響。小弟對一啲舊嘢，包括粵語片係比較有興趣。而楚原叔身為香港粵語片黃金時代其中一個重要嘅中流砥柱，再加上而家一啲早期嘅戲不論國粵語片好多網上都刪除咗，電影資料館而家又因為疫情冇開。除咗上大臺個粵語片臺重溫，我心思思都覺得應該再開一個帖，簡單講講佢嘅演藝生涯同埋有關香港電影發展嘅嘢。畢竟楚原叔成世人拍過同演過太多戲，咁多年佢影響電影界嘅人事物亦都實在太多，都講唔曬。咁所以我都係主要從一啲作品講起。好多資料年代久遠，難免有錯漏，希望大家多多指教。（以下講嘅戲如果網上睇到的話我都盡量唔劇透）

中聯最後喺67年停產，不過中聯出品都已經喺五六十年代成為咗一道代表到香港電影正氣嘅影響力。張活游當然有份演好多嗰陣中聯拍嘅戲，楚原叔亦都係大概喺50年代因為佢伯爺推薦入行，55年用筆名秦雨做編劇，跟吳回開始學拍戲，之後轉入主要拍文藝片嘅光藝影業公司跟秦劍。
60年代張活游同楚原叔兩父子接手山聯影業公司，64年拍白燕息影作《瘋婦》。
楚原叔(右)、張活游(左)


就係喺呢一種氛圍入面，楚原叔自己都話最叻就係拍文藝片同反封建嘅片，包括佢自己第一套單拖執導嘅《湖畔草》(1959)，當年佢只不過廿零歲。套戲係改編嗰陣一本講關於私生子嘅三毫子小說，因為湖畔草都係冇乜人理，啲人由得佢自生自滅，同私生子一樣，咁所以就叫做《湖畔草》。套戲就係圍繞私生子呢樣嘢，講南紅（蘇淑媚，媚姨，楚原叔夫人）嘅家姐嘉玲（何佩英，同光藝時期嘅四哥謝賢係嗰陣嘅熒幕情侶）因為畀姜中平始亂終棄咗，重有埋佢bb。之後就識到四哥同佢一齊咗，但係生咗個仔出嚟之後嘉玲就ham咗。慢慢四哥就轉為同媚姨互生情愫，最後同姜中平擘咗面，跟住四哥媚姨就一齊照顧個b。本身呢套戲都係改編麗的呼聲廣播劇，都算係常見文藝片情節，但係楚原叔一開頭就拍咗媚姨介紹自己同屋企人嘅一段獨白做開場白，呢種手法喺當其時就確係一種好創新破格嘅做法。
《湖畔草》(1959)

另外一套講楚原叔嘅時候一定會講嘅戲就係《可憐天下父母心》(1960)，佢自己都有份演，重有嗰陣重係童星嘅黎小田、王愛明，呢套戲真係怎一個慘字了得？白燕張活游貧賤夫妻百事哀固然深入民心，呢個都因為戲入面慘事一單接一單但係又唔會拖戲嘅鋪排：張活游失業、成家人要一齊冚埋同一張爛被、要問大耳窿借錢、乞食、賣仔賣女，又影住張活游漏夜趕稿搞到血都咳埋出嚟，跟住搞到想自殺。最後雖然都算係有好結局，但係成套戲都真係太撚慘，都係會搞到人哭能咗。用而家嘅角度睇，套戲係比較煽情，但係又實在慘得夠經典，講低下階層雖然窮，但係有最強嘅人性光輝。嗰陣香港民情始終唔同，呢類片係有一種好明確嘅道德說教意味。套戲咁慘重要多得首經典配樂：法國作曲家Jules Massenet （馬斯奈）1894年嘅歌劇Thaïs（泰伊思）入面嘅 Méditation（沉思曲）
Jules Massenet - Méditation (Thaïs)
https://www.youtube.com/watch?v=luL1T1WQC2k
《可憐天下父母心》 (1960)

根據蒲鋒嘅觀察，楚原叔拍嘅唔少文藝片嘅主題意識都係一脈相承，好似《瘋婦》(1964)[改編粵語片《長生塔》(1955)]入面批判重男輕女，同埋《冬戀》(1968)呢類又係典型《茶花女》式嘅故仔。《冬戀》改編依達愛情小說，講男主角(四哥)識到女主角(芳芳姐)之後點樣發現大家原來身分背景懸殊,所以就有誤會，最後因為女主角就嚟ham所以冰釋前嫌，不過都係要睇住個女主角ham。另外，《瘋婦》有一個特別嘅位，就係一開頭首先係見到楚原叔自己走出嚟做說書人介紹：呢個故仔就係講一個癲婆……加埋啲配樂效果，同埋開頭啲roller係好似而家啲西片咁襯埋個畫面一齊出，同嗰時一般粵語片一開頭就咁出曬啲roller跟住套戲就開始嘅做法唔同。成個處理手法可以見到楚原叔自己花心思嘅功力 [唔知係咪受到例如希治閣等大師嘅影響？] 呢個楚原叔自己現身說法解話嘅做法，喺之後嘅戲例如《冷暖青春》(1969)都見得到。
《瘋婦》(1964)開場
https://www.youtube.com/watch?v=I3DS9Kkt3QY
《冷暖青春》(1969)

橫跨三四代人rip

我三年前講仆街片嗰陣就話楚原叔拍完《七十二家房客》之後幾年就拍過幾套所謂口碑不錯但係票房唔掂嘅戲，的確用票房計呢幾套其實就係所謂嘅仆街片，咁但係計埋其他嘢的話又係咪真係咁仆街？如果用返上面講《湖畔草》、《冬戀》呢啲都算係楚原叔可以擺上檯面嘅代表作，咁其實73年之後幾年楚原叔特意拍嘅呢幾套仆街片文藝片，就算係佢自己拍多咗商業片之後想拍返一啲自己想拍嘅題材(雖然係國語片)。例如《舞衣》(1974)、《小樓殘夢》(1974拍，1979上)等。

《舞衣》(1974)

《小樓殘夢》(1974/1979)預告片
https://www.youtube.com/watch?v=o5eF3wgyjos

呢個時期佢又拍過一套粵語片《香港73》(1974)，係跟大臺兼香港第一套處境喜劇《七十三》(1973-1976)改編嘅，其實算係另一套好似《七十二家房客》咁嘅大堆頭式製作，好多嗰陣嘅大臺藝人都有份拍，都拍咗好多嗰個年代香港嘅社會百態。
《香港73》(1974)
https://www.youtube.com/watch?v=7sG7Pl7qkHk

另外，邵氏時期井莉係楚原叔嘅御用女主角，以上講嘅一啲文藝片同埋以下舉例嘅武俠片唔少佢都有份拍。我都同意佢外型同氣質係幾好，做到文藝片之餘，做武俠片都ok，可能就係因為咁樣所以楚原叔成日用佢。
井莉

1983年第二屆香港電影金像獎頒獎典禮，楚原叔、井莉頒最佳攝影
https://www.youtube.com/watch?v=MlXVwsOwmuU

之後就講到可以令到楚原叔唔使再做邵氏最難堪導演嘅武俠片。經典始終係經典，尤其是係佢嘅劍系列，即係《流星蝴蝶劍》(1976)、《多情劍客無情劍》(1977)、《三少爺的劍》(1977)。呢三部都係古龍小說，本身就係新派武俠嘅代表作，楚原叔更加係拍出一種所謂嘅武俠世界嘅電影感，有佢自己嘅強烈風格，重視劇情同武打場面配合，當然都開創咗拍古龍小說做影視作品嘅先河，其他拍古龍小說嘅重有例如《天涯明月刀》(1976)、《楚留香》(1977)、《蕭十一郎》(1978)、《絕代雙驕》(1979)。楚原叔都有拍過下金庸，例如《倚天屠龍記》上下集(1978) [不過唔知係咪因為《天龍八部》事件所以拍金庸拍得比較少]。除咗狄龍、姜大衛、岳華呢班之外，楚原叔邵氏武俠片都出咗好多人，例如爾冬陞,余安安(三少爺的劍)、文雪兒(蕭十一郎)。特別一提有一套又係改編古龍《武林外史》嘅武俠片《孔雀王朝》(1979)，呢套我覺得拍得幾好睇 往後例如徐克拍嘅武俠片都有受到楚原叔等人嘅影響。

1980年代及以後
根據明周報導，楚原叔拍得多仆街片嘅時間應該反而係佢臨離開邵氏之前（84/85年）。呢個時期個時代始終一早已經唔再屬於佢，佢都係例如翻炒過《愛奴》拍咗套《愛奴新傳》(1984)（得差唔多三百萬票房）同埋《替槍老豆》(1985)就係所謂票房仆街嘅片（得差唔多百五萬票房）。《大丈夫日記》(1988)先比較唔錯（差唔多二千萬票房），但係都已經係楚原叔導演嘅尾水戲。

楚原叔之後就開始轉路線，自己演多咗戲同入大臺拍劇，呢啲就大家都好熟悉，例如《警察故事》上下集(1985,1988)嘅朱滔、《爛賭英雄》嘅賭王(1987)、《卡拉屋企》(1991)嘅白頭佬、《大頭綠衣鬥殭屍》(1993)、《真情》(1995-1999)嘅拿督、《殭屍福星》(1996)、兩集《西遊記》(1996,1998)嘅佛祖等等。

《警察故事》(1985)

《爛賭英雄》(1987)

《卡拉屋企》(1991)

《大頭綠衣鬥殭屍》(1993)

《真情》(1995-1999)

《殭屍福星》(1996)

《西遊記》(1996)


重有楚原叔同媚姨係一對銀壇模範夫婦，50年代喺光藝共事嗰陣就認識。章國明同楚原叔啲門生朋友都搞咗好多年楚原之夜。
楚原之夜 2015
https://www.youtube.com/watch?v=NfJFYqAyHwQ
楚原之夜 2016
https://www.youtube.com/watch?v=hPGwhslDnyQ
楚原之夜 2017
https://www.youtube.com/watch?v=DOVOgyIG7do

講到呢道，大家相信都知道多咗楚原叔嘅早期導演生涯。如果大家有時間，同埋搵到的話，真係可以睇多啲早期嘅片，可以認識多啲嗰陣嘅香港，同埋留意下有冇一啲啟發到之後嘅戲嘅元素。多謝支持。
《精裝難兄難弟》(1997)

主要資料來源
* 資料室(參考腳趾姐個資料室)
* 老餅帖同仁
* 香港影庫 HKMDB
* 香港電影資料館
* 蒲鋒：楚原：回首半生 青衫人老
https://www.filmcritics.org.hk/film-review/node/2021/01/15/楚原：回首半生-青衫人老
* 關震海：【真本土】 楚原歡聲與淚影交織的電影人生 給香港電影什麼啟示
https://www.mpweekly.com/culture/大丈夫-楚原-港產片-72288

延伸閱讀
*【本土文化】有無人傾下粵語片 / 粵語長片？
https://lih.kg/245775
* [重開]【請支持香港電影、本土文化】有無人傾下粵語片 / 粵語長片？
https://lih.kg/632764
*【從〈明星之歌〉認識香港電影（一）】〈明星之歌〉及其主唱：「東方貓王」鄭君綿
https://lih.kg/785818

曲、戲、老餅帖系列
* 一代粵劇大師唐滌生逝世六十周年紀念，兼略談五夜講場「時逢亂世唐滌生」
https://lih.kg/1574557
* 香港粵劇粵曲/戲曲、早期歌影視娛樂文化新知舊雨交流討論區 (2) - 淺說南音
https://lih.kg/2368924
* 香港粵劇粵曲/戲曲、早期歌影視娛樂文化討論區 (3) - 略談早期粵語流行曲
https://lih.kg/2584800
* 香港粵劇粵曲/戲曲、早期歌影視娛樂文化討論區 (4) - 略談粵劇名旦1
https://lih.kg/2745567
* 香港粵劇粵曲/戲曲、早期歌影視娛樂文化討論區 (5) - 略談粵劇界新血1
https://lih.kg/2827122

留名

楚原拍戲真係好有印象

白頭佬

白頭佬同歸拿督

推+留名學嘢

https://www.facebook.com/watch/live/?ref=watch_permalink&v=2205757896313662
有爛賭英雄
講廣東話
竟然响FB搵到

老老豆豆 嗰堆片依加睇真係幾老套
危樓春曉 可憐天下父母心呢啲真係超級old school

比較有印象嘅係60年代嘅飛女正傳 蕭芳芳真係幾型