通常都係自己揸，以返一個後生仔角度去分享日常嘅駕駛經驗，
同埋嘗試將長輩講嘅嘢，由後生仔角度翻譯出黎，拋磚引玉
泊車
1. 屋企附近泊邊
屋企附近的話，泊屋苑停車場，通常都要輪，排之前係泊露天石地。
屋苑月租價錢$2500-5000
2.泊街注意事項
其實泊街唔係咁易比人抄，最緊要係揀位，揀位揀得好會大大減低被抄風險。
第一，唔好阻到人，例如泊轉灣位小心睇下貨櫃車夠唔夠位過，或者係唔係一d緊急出口。
第二，揀多人泊嘅位。因為多人泊通常代表大家共識呢個位係安全，同埋就算要抄都係一齊比人抄，心理上平衡d。
第三，留電話，對應返第一點，如果真係阻到人，都等人可以聯絡到你，唔駛比人call咖啡仔/被拖車拖走。
第四，預比人抄，雖然少抄，但唔好彩的話可以會幾日連抄，呢d就真係聽天由命。
4. 泊車泊得慢，如何調節心態
有時新手泊車可能要扭多幾轉，導致塞住後面，人地會係咁bu你。
呢個時候最緊要淡定，慢慢泊入個位先，之後先慢慢回直架車。
千萬唔好因小失大，一陣心急上黎撞到人地架車就仲煩，安全第一。
同埋其實你最多咪阻住人一兩分鐘，但唔係叫你理直氣壯，只係叫你唔駛咁介意。
5. 停車場有咩要注意?
八達通係必須。
我自己係用iphone，建議大家可以用特快交通卡申請一張八達通，平時嘟出入用手機方便好多。
因為會記錄低你入場時間，有時會唔記得自己泊左幾耐，可以睇返手機，唔怕超時。
同埋有時入停車場張八達通咁岩冇錢，而唔係個個停車場部閘機都支援自動增值，會搞到你出唔到去(利伸試過一次)。如果係用iphone張八達通就可以隨時增值，唔怕冇錢。
6. 泊街入錢可以揀入幾多時段，個個地方都唔同，繁忙地段時間會短d。
宜家有個app可以延長，但好似最長係延長兩個時段。之後就要親身延長。
另外有d地方會有人問你駛唔駛幫你入錢，其實就大家講個信字，萬一真係比人抄你都吹佢唔漲。
駕駛
1. 行好自己條線
新手黎講緊最要係行好自己條線，好多長輩同你講好多道理，例如叫你多d望鏡留意周圍。
其實呢d係冇錯，但基本野應該做好左先，講真一開始邊理到咁多野，
所以我覺得大家做其他野之前，最簡單係行好自己條線先，唔好理人cut黎cut去定點，
尤其新手行高速，有時你擰頭擰得太多，冇望到前面／自己條線，好易過界甚至炒車。
2. 禮讓
有人小路出大路的話，不妨收慢架車讓一讓，對大家都好。
一陣佢硬cut，只會大家兩敗俱傷。
前提記得要提早收慢，等後車反應得切。
3. cut線
以前聽長輩成日講，cut線要比油但又要你慢慢cut，成日覺得好唔logical。
後來先明白比油係講緊向前，慢慢cut係講解扭肽。
可能有好多人都知，但當提點下同我一樣理解能力比較差嘅人。
我宜家cut線會做既係:
望鏡 > 打燈 > 望前 > 望鏡 > 望盲點 > 比油慢慢cut
望鏡確認可以cut
打燈等後車知你要cut
比油慢慢cut係為左如果你cut個條線架車唔讓或者有咩突發情況，
你都可以收車唔cut或者等後車都反應到
4. 小路出大路
謹記，冇車/判斷安全可以出，先好出。
千萬唔好比後面bu你多幾下就硬住頭皮出。
但有時後車幫你包後，咁當然你就可以出。
如果等左好耐都出唔到，可以試下開窗伸出去揮一揮，
通常d人都會讓。
5. 提示/溝通
我自己比較常用係3種。
第一係閃人，即係彈一下高燈。主要係讓人時用，比佢知你讓佢。或者你想得到佢alert，而未去到要用bu咁嚴重。
第二係死火燈，通常一係提醒後車前面有事故或者塞車要收慢時用。又或者人地讓完你，你想多謝後車時用。
第三係揮手/舉手，cut線/唔該晒人地讓你
6. 盲點
係一定一定一定要望。千萬唔好信一d長輩話唔駛望。
佢話揸左咁多年車都冇出事，只係佢好彩，請唔好以為係正確。
日常事務
1. 過收費站
主要係要準備散紙(因為唔係個個收費站都有八達通)
第2就係收費站有分autotoll同 non autotoll既lane
autotoll係比月費既人用，你當係全月通咁
一般人都係行返non autotoll既lane。
2. 入油
第一次去佢會問你要唔要油卡
通常都要，因為可以蓄分換野。
值得留意係某d日子入油會平d
詳情可以問返相關油站職員，佢地都好樂意同你講解。
同埋記得入到油站最好停低熜匙，同埋唔好開電台，唔好講電話，以防萬一。
打住咁多先
甩左P半年都仲覺得路口轉灣前簡啱線好難，有時前車剛好紮住個箭嘴
