粤文維基嘅定位

9 回覆
7 Like 2 Dislike
2021-04-19 21:59:31
覺唔覺粵語版維基百科好撚雞肋
https://lihkg.com/thread/2489990/page/1?post=1

咁啱睇到呢個po,提到粤文維基有幾個問題,例如內容太短,又冇人寫。同時,中文search嘢越嚟越廢(相對用英文search,其實一直都好廢),又多簡體字嘅網。

於是,我就諗,如果我哋想改善中文嘅搜尋結果,而中文維基有好多條目都唔好得去邊,噉點解唔寫多啲粤文維基呢?特別係我哋成日講要保護粵語/港語。而當粤文維基相對簡體字網同中文維基充實,就會吸引多啲人(特別係新一代/普教中嘅學生)睇粤文,從而推廣粤文,並抗衡所謂官話。

另外,有關粵語標準化,我唔知而家有冇所謂標準粵文/有冇人搞緊類似嘅嘢,但我覺得一般人睇得多同寫得多(粵文維基),大家互相交流學習,加上約定俗成,都可以加速標準化,而標準化之後就會少啲分歧,多啲人用。

P.S. 我上個禮拜都開始試吓英譯粵,但遇到唔少難題,例如唔肯定原文講乜同語法翻譯問題(直譯好怪,意譯又驚失真),所以真係要多啲語文好嘅人幫手寫,英文唔好嘅人都可以試吓中譯粵,一齊推廣粤文。
2021-04-19 22:07:43
Wiki好難搵人寫
之前反送中維基戰線都好難推
2021-04-19 22:41:59
我都同意好難吸引人寫,但望住google search嘅結果全鬼部都係大陸網/content farm,啲新移民後代講嘅粵語又奇奇怪怪,成日滲雜普通話用字/書面語,就覺得好有需要推廣粵文,而維基咁多人睇,所以我覺得係個好好嘅平台。另外本土語言同身份認同嘅關係又係千絲萬縷,呢到就唔詳講了。

只能夠話長遠而言,呢樣野始終要做,而且趁重有得做就盡力做,希望多啲人明白推廣粵文嘅重要喇~
2021-04-20 14:07:51
我覺得粵語作為(目前)小眾語言,用維基百科推廣並唔係幾好。
無論條目數量深度廣度,書面語完全完勝粵語
實在無咩動力去睇粵語維基百科
而我地一早已經習慣睇書面語
睇書面語亦冇語言障礙問題

我覺得要推廣粵語,叫黃子華整多啲棟篤笑,其他youtuber用粵語拍多啲影片(葵廣掃街,打機,煮飯,數學,時事)會令人更加有動力去多聽粵語

而粵語維基百科應該係作為正式記錄
條目貴精不貴多,要用正確,當下嘅粵語,作為正確粵語嘅依據,供後人學習。因為拍片多數會為咗順口/懶而有一啲難以察覺嘅語病

反面例子係文言文維基百科,條目品質堪憂,我幾年前求其亂寫啲垃圾落去,到而家仲未俾人回退
得典範條曲,優良條目嘅介紹文係好有唐代氣息

夫世變亟最,文思日衰。凡人屬文,盡入俚俗,字句西化,累贅難言。有志之士,莫不嘆息。大典遂立,以正文風,以匡世道。然五四以來,百年之間,古文殆微,善屬文者鮮矣。是以大典之文,亦良莠不齊,難以盡為懿範。有見及此,乃效古人,嚴擇佳文,以為讀本,表列正典,示諸蒼生,益乎萬民。而上善之文,稱曰卓著,示諸他處。

我比較有興趣作者諗咗幾耐先寫得出咁工整嘅文言文
2021-04-20 21:05:33
當然啦,推廣粵語要喺各方面入手,可以係娛樂,煮飯,時事之類,但同時維基可以喺半學術/知識呢方面推廣粵語,畢竟維基同youtube一樣都係好多人睇。

另外,粤文維基唔係同中文維基鬥,而係互相補足,即係當冇中文條目/太短嘅時候,我會建議寫粤文維基而唔係中文維基。噉嘅話如果啲人search嘢淨係搵到粤文條目/粤文維基好過中文維基,某程度上佢哋要侷住睇粤文。如果中文條目本身已經好豐富,佢哋就會睇中文維基。

「作為正式記錄...作為正確粵語嘅依據,供後人學習」我反而覺得而家粤文維基/粤文文學未有太嚴格嘅用字標準(或者有,可能係我無知),同埋大家寫嘅粤文(例如喺連登)係有分別嘅,而維基就可以變成練習書寫粤文同追求粤文標準化嘅好地方。

至於文言文維基,我都係第一次聽。而家都冇人用文言文講嘢啦,唔同粤語,有人講,有人寫(日常溝通,粤文文學,粵典),而粤文維基嘅品質堪唔堪憂就視乎幾多人寫。我唔知粤文算唔算「盡入俚俗」,不過(現代中文)「字句西化,累贅難言」,我就好認同,所以我英譯粵嘅目標就係力求句子符合中文語法/章法,簡潔易明,不過好難。我有時重會ff粤文可以繼承文言嘅簡潔同純正(反對劣質西化而唔係所有西化),勝過大陸嘅共產中文,令香港嘅語言文化唔止有別於大陸(咩XXX是不存在的,進行/實施XX(動詞)),更係優於大陸。

我都唔知個作者要諗幾耐,好黐線,不過如果你試過長時間睇文言文,你會發覺寫嘢會越嚟越貼近文言文,而且會感覺到文言文同現代中文嘅分別,睇文言文會零舍舒暢,好似睇呢篇介紹文噉。
2021-04-20 21:35:12
作為一個中文從來未試過合格嘅人,雖然無可否認文言文係比較美麗,但前提係我睇得明。

文言文的確可以喺較短嘅文字內表達更加多嘅意思。但係文言文同時會令到閱讀速度下降。一啲文筆好嘅人寫白話文就算冇修辭,唔用排比對偶等,文筆都會好優美。呢方面我真係唔識,中文太廢

我寫文章嘅時候,因為我中文能力真係差,寫嘢的確係累贅難言,行文多砂石,多寫冗餘嘅內容。雖然會令到句子冗長,但係都叫做可以精準表達意思。

文以載道 匯則興邦
文字係可以優美,但係都要喺可讀性同優美指之間取平衡。否則而家個個都學文言文,浪費咁多時間,但對表達意思毫無寸進,對理科人係咪公平?

然而係內容方面。除咗茶記等過於香港嘅條目,否則絕大多數,或幾乎都係書面語好過粵語。但係維基百科係有語言保育嘅責任,但同是更大嘅責任係傳播知識。如果我要寫新條目,一定係寫書面語。唔會有人單純為咗想睇得明書面語而學粵語。唔識粵語嘅人係唔會睇得明粵語字。唔似西班牙/葡萄牙可以勉強互相交流。所以出於知識傳遞-維基百科最大初衷,我寫新條目會寫書面語。
2021-04-21 00:56:10
我覺得讀書嗰陣中文成績唔好嘅人,真係不妨試下用粵文書寫。

我記得當年會考拎 E,平時寫一二百字都好吃力,轉咗用粵文之後,喺 FB 寫嘢都大膽咗,好多諗法可以易啲用文字表達出嚟,後尾寫一兩千字都冇難度。而家連帶寫返「書面語」都快咗,但係粵文係再快啲再順暢啲。一開始咗真係返唔到轉頭。

至於受眾,我諗人數都唔細㗎,有幾千萬人日常用粵語溝通,冇理由我哋嘅語言幾千萬人講都要走去就人哋吖。韓文都係咁上下人口之嘛。
2021-04-21 11:35:49
問題係廣東人睇唔到 (可能亦未必想睇)
2021-04-21 13:14:45
或者我講得唔清楚,我唔係話要現代人寫文言文,只係建議大家可以睇多啲文言文,視文言文爲工具,學習佢嘅簡潔同中文語法,故而寫嘢冇咁累贅同西化。我覺得現代中文走咗去另一個極端,即累贅同過度西化,而睇文言文可以平衡返兩端。至於優唔優美,我覺得冇乜所謂,做到行文簡潔易明先再講。

我認同維基嘅首要目的係知識傳播,而粤文喺呢方面的確比較遜色,但長遠而言,粤文維基都可以有效噉傳播知識。如果粤文維基值得睇,啲人就會學睇粤文,而且中文同粤文又唔係真係咁大分別,實在唔難學。所以,重點係粤文維基吸唔吸引到人睇,好似韓國娛樂或舊時港劇,有興趣睇就會有動機學韓文/粵語,更何況粤文對於用開中文嘅人嚟講唔係咁難學。而吸唔吸引到人睇就在於幾多人寫同內容豐富/吸引與否,有麝自然香。

或者,用中文維基傳遞知識的確係有效過粤文維基,但既然有開設粤文維基,我都會繼續寫落去,期望大家睇多啲粤文。
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台潮流台上班台財經台房屋台飲食台旅遊台學術台校園台汽車台音樂台創意台硬件台攝影台玩具台寵物台軟件台活動台電訊台直播台站務台成人台黑 洞