【先秦諸子思想】黑暗儒家心法，荀子參上！

物之已至者，人祅則可畏也。楛耕傷稼，耘耨失薉，政險失民；田薉稼惡，糴貴民飢，道路有死人：夫是之謂人祅。政令不明，舉錯不時，本事不理：夫是之謂人祅。勉力不時，則牛馬相生，六畜作祅，禮義不脩，內外無別，男女淫亂，則父子相疑，上下乖離，寇難並至：夫是之謂人祅。祅是生於亂。三者錯，無安國。

人祅：人妖，指人嘅災害
牛馬相生：牛同馬交配

荀子呢到提出一個好有趣嘅概念：人祅
人祅指以下三種情況
1.當農作物失收，加上「政險失民」，路邊都見到死屍
2.「政令不明」，份內事都無人做好
3.失去禮法倫理嘅情況，搞到牛生馬，馬生牛，連動物都不安
當呢三樣人為嘅災難出現
國家先會動亂
天災不可怕，可怕嘅係人祅


受時與治世同，而殃禍與治世異，不可以怨天，其道然也。故明於天人之分，則可謂至人矣。

至人：最勁嘅人

荀子呢邊指出一個「至人」
必須要明白咩叫「天人之分」
天 生萬物 自然 客觀 沒有道德意志
人 載萬物 文化 主觀 配合自然規律

正所謂「天生人成」，人係自然嘅產物
要理解自然嘅運作，配合自然法則行事
即係配合「天道」以成文化嘅「人道」
唔可以因為自己錯失而怨天
呢一樣就係荀子嘅「天人之分」啦！

儒家我麻麻
反而道家先係我杯茶

了解中國思想嘅話
儒家好重要，對佢有一定嘅把握
再睇道家，會有更深入嘅理解

儒家我麻麻
反而道家先係我杯茶

了解中國思想嘅話
儒家好重要，對佢有一定嘅把握
再睇道家，會有更深入嘅理解

荀子都有借用道家思想

我只知道一件事，就是我一無所知——解蔽篇（一）

如果話荀子性惡篇係基礎
禮論篇係實踐嘅方法
勸學篇係點樣進行嘅功夫
咁解蔽篇就係最為重要嘅理論建構

顧名思義
解蔽即係解除人類嘅掩蔽
一個思想家講應該點樣面對知識
涉及左一樣好重要嘅嘢
就係我地點樣認識世界嘅問題


荀子 解蔽篇二十一
凡人之患，蔽於一曲，而闇於大理。治則復經，兩疑則惑矣。天下無二道，聖人無兩心。今諸侯異政，百家異說，則必或是或非，或治或亂。亂國之君，亂家之人，此其誠心，莫不求正而以自為也。妒繆於道，而人誘其所迨也。私其所積，唯恐聞其惡也。倚其所私，以觀異術，唯恐聞其美也。是以與治雖走，而是己不輟也。

一曲：片面
闇：看不見
妒繆：妒嫉
誘其所迨：投其所好

荀子一開波就講
人認識道理最大嘅問題，係只見到片面
執著係自己嘅視野，見唔到整體
例如有問題就去睇書搵答案啦
但睇完書唔代表你有答案架嘛
黃子華有云：
無限加一仲係咪係限呀
有時因為睇到唔同學者嘅講法，仲亂過之前

「天下無二道，聖人無兩心」
荀子係肯定左一樣嘢
就係呢個世界係有終極嘅答案
係有真正嘅道理
但諸侯因為各得片面嘅諗法
「諸侯異政，百家異說」
大家都以為自己先係無錯
又唔肯聽其他人講嘢
搞到呢個世界好鬼混亂呀！


故為蔽：欲為蔽，惡為蔽，始為蔽，終為蔽，遠為蔽，近為蔽，博為蔽，淺為蔽，古為蔽，今為蔽。凡萬物異則莫不相為蔽，此心術之公患也。

呢到荀子列出人類之所以只得片面道理嘅原因：
1.欲望過盛／害怕失去
2.側重開始／側重結束
3.只看到遠嘅／只看到近嘅
4.博學而成學究／樣樣只係識少少
5.只睇到歷史／只睇到當下

萬事萬物嘅差異，令人只睇到片面
荀子呢邊嘅講法，都係中國傳統思想二元辯證
好似遠同近，開始同結束嘅對立咁
而荀子就強調，要突破呢種只見其一嘅觀念
突破「此心術之公患也」嘅情況
唯有咁樣，先可以睇見整體


聖人知心術之患，見蔽塞之禍，故無欲、無惡、無始、無終、無近、無遠、無博、無淺、無古、無今，兼陳萬物而中縣衡焉。是故眾異不得相蔽以亂其倫也。

荀子係到又返去成日用嘅講法
就係以「聖人」做為一個解決方法
一個好叻叻嘅人，係能夠超越片面嘅道理
可以超越人類「心術之公患」
可以睇到事物嘅整體

不過相信大家睇到呢邊一定唔太滿意
到底要點樣，咩方法先可以睇到整體呢？
可唔可以講得清楚少少？
同埋樓主你講左咁鬼多篇
但性惡篇講嘅新儒家質問「價值根源」又點解答？
普通人有咩動力，有咩可能做到聖人咁叻叻？

放心，我地解蔽篇（一）只係基本簡介
接下來係重頭戲，開始涉及荀子細微理論
玄之又玄，睇左好似無睇嘅地方啦
因為我地開始見到，荀子點樣運用道家概念
同埋，係時候回應新儒家派嘅問題啦！

新儒家之外，荀子價值根源之所在——解蔽篇（二）

我地講過，荀子之所以備受冷落
主要有兩個原因：
1.荀子生平及其歷史角色
2.新儒家對荀子之批評

第一個問題，真係見仁見智
要睇返大家點樣評價
第二個問題，即係荀子理論中
凡人點樣可以有動力學習「禮」
點樣有動力可以「化性起偽」
「價值根源」何在嘅問題？

中國古代思想入面
我地成日會發現「價值根源」主要有三種
1.內在根源，如孟子談「性善」
2.上訴於天，如墨家講「天志」
3.外助權威，如韓非說「尊君」

我地之前讀過荀子嘅天論篇
了解荀子之「天」為一自然天
「天行有常，不為堯存，不為桀亡。」
因此，荀子「天」並唔係佢嘅「價值根源」

而更早一步，我地談過性惡篇
「凡性者，天之就也，不可學，不可事。」
荀子之「性」，係人性本能
並非自由意志，有意識嘅「價值根源」


荀子 解蔽篇第二十一
人何以知道？曰：心。心何以知？曰：虛壹而靜。心未嘗不臧也，然而有所謂虛；心未嘗不兩也，然而有所謂壹；心未嘗不動也，然而有所謂靜。……心臥則夢，偷則自行，使之則謀；故心未嘗不動也；然而有所謂靜；不以夢劇亂知謂之靜。未得道而求道者，謂之虛壹而靜。作之：則將須道者之虛則人，將事道者之壹則盡，盡將思道者靜則察。知道察，知道行，體道者也。虛壹而靜，謂之大清明。

新儒家對荀子批評即在於：
荀子既然話「塗之人可以爲禹」
人人都可以係聖人
但又無回答點解有呢種動力去「化性起偽」

荀學專家同思想史主流講法分歧即在此
就係點樣解釋荀子思想入面「心」嘅概念
我地以下先跟往新儒家思想史主流講話去解讀
之後再講返荀學專家如何回應

荀子因為要尋找「價值根源」
內不在性，外不在天，於是唯有講「心」
「心何以知？曰：虛壹而靜。」
心嘅功用只要係接受，而無法創造
所以，道理係心之外
「價值根源」亦係心之外


故人心譬如槃水，正錯而勿動，則湛濁在下，而清明在上，則足以見鬒眉而察理矣。微風過之，湛濁動乎下，清明亂於上，則不可以得大形之正也。

呢到係好出名嘅「槃水之喻」
勞思光指出，人嘅心可以「知」道理
就好似水可以照出物件咁樣
因此水「清明」可以照物，心「清明」可以見理
而物不在水中，理也不在心中
最後結論係：「此心不活動，只存有」
唔係一個有自由意志嘅道德主體
荀子理論嘅「價值根源」變成依賴國君嘅權力
成為一個權威主義，所以先會教出法家嘅學生

簡單黎講，主流講法荀子嘅「心」係咁：
1.只係單純嘅認知功能
2,受而不生，只係有呢種功能，唔係自主去做
3.結果係「成德歷程，可堪憂慮」
正因為咁，可以解釋返成個中國思想史發展點解以孔孟為正宗

心者，形之君也，而神明之主也，出令而無所受令。自禁也，自使也，自奪也，自取也，自行也，自止也。故口可劫而使墨云，形可劫而使詘申，心不可劫而使易意，是之則受，非之則辭。

當代荀學專家係非常唔認同呢種講法嘅
佢地話荀子嘅「心」應該有兩種含意：
1.有「積思慮」嘅能力，先可以做到聖人
2.有自由意思，可以做道德判斷、主宰

「心者，形之君也，而神明之主也，出令而無所受令。」
「心」唔單止係「形之君」，係駕馭形軀嘅行為
同時都係「神明之主」，係精神與意志嘅主宰
呢一段原文好能夠彰顯「心」做為人嘅自由意志

「心」既可以「自禁也，自使也，自奪也，自取也，自行也，自止也」
就算身體嘅行為受外在環境影響而無法自主
但「心」不會受外在所劫持而改變，有自主判斷嘅能力
「是之則受，非之則辭」
係正確嘅先會接受，錯嘅就會拒絕


人何以知道？曰：心。心何以知？曰：虛壹而靜。心未嘗不臧也，然而有所謂虛；心未嘗不兩也，然而有所謂壹；心未嘗不動也，然而有所謂靜。……心臥則夢，偷則自行，使之則謀；故心未嘗不動也；然而有所謂靜；不以夢劇亂知謂之靜。未得道而求道者，謂之虛壹而靜。作之：則將須道者之虛則人，將事道者之壹則盡，盡將思道者靜則察。知道察，知道行，體道者也。虛壹而靜，謂之大清明。

荀子指出「心」經過「虛壹而靜」嘅修行過程
最後係可以去到「大清明」嘅最高境界
呢邊「虛」係不執著於既有嘅成見，先可以解蔽
即係話唔好見於「一曲」嘅片面而睇到「壹」嘅整體
所謂「靜」，荀子用「不以夢劇亂知」去解釋
即係話唔好比想像嘅幻象影響，搞到自己無左理智
唯有咁有，先可以令「心」回歸平靜

以上種種嘅行為，都唔係主流話：
「只存有，不活動」嘅「心」可以做到嘅行為
我地唔可以只係為左滿足思想史一套完整嘅詮釋
而否認荀子嘅「心」係有自由意志
更唔可以因為咁，而將荀子嘅「價值根源」推去權威主義
荀子之解蔽，正正比左我地望見真相嘅機會

留明支持
聽日考試黎溫書

咁可以直接入Blog到睇
已經出哂啦！
http://deliver90.blogspot.tw/

學術台清泉

留名學野

【先秦法家】由Walking dead開始，進入韓非子嘅革命思想
https://lihkg.com/thread/279664/page/1

新Post加埋新facebook page
https://www.facebook.com/%E5%BE%B7%E5%B0%BC%E6%80%9D%E5%8C%96-1410350102358414/
大家記入去比個Like啦！