無知少女
安頓好後,始有時間環顧四周,咦…心呢?最後在房間深處發現她,原來已經被其他「歌手」擠到沙發的邊緣,她神情看來有點呆滯,可能被高分貝的「煩音」轟到失魂吧。於是我擠到她身邊:「咁快眼瞓?」
她好像才剛發現我,如夢初醒一樣有點迷茫:「咦?你終於到喇,係呀,有啲頭暈呢,可能唔習慣咁嘈呀。」
「噉妳不如攞埋杯嘢,陪我坐出去近門口啦,妳又唔唱,對住個皇帝位托咩?」我都抵受不了他們的音波功。
「哦~」阿心慢慢的站起橫移出來,由於動作緩慢,又遮擋著電視,自然引起眾人不滿,在一片催促聲中,她終於以慢動作移坐到我旁邊,視線回復正常後,其他人繼續忙著表演事業,正好讓我們有時間在熱鬧中獨處。
我察覺到她彷彿好像食了懵仔丸的異樣。「心,妳係唔係唔舒服呀?」
她緩緩的擰過來望我,目光有點失焦。「唔係呀,真係有啲眼瞓咋。」說話速度較平時慢,我看她剛放下的飲品只剩半杯,突然醒起馬飛那句「酒都得喎」。
仆街了,唔係下嘛!?
我有點緊張的問她:「妳個樣唔係好妥,你叫咗乜嘢飲呀?」
「吓?Ice tea囉,佢地提咗我有少少酒精㗎。」她繼續慢吞吞的答我,有點奇怪我會這樣問。
「呢種冰茶?」我攞起枱面餐牌看看,指給她看。
「係呀,甜甜哋都幾好飲吖。」她還用一副可愛的模樣跟我說。
我幾乎暈低,真係畀我估中,難怪好似懵懵哋又作眼瞓,原來係飲—醉—酒。「哎呀,大姐,妳叫嗰杯長島冰茶唔係茶嚟㗎,仲有唔係少少酒精,係全杯都係酒溝出來嚟㗎!妳唔好再飲喇。」
「吓!真㗎?!全杯係酒?你又知嘅?」似乎酒醒了少許。
「唉~妳真係無知少女,長島冰茶係用來『杜女』嘅失身酒,由幾種烈酒溝可樂撞出嚟㗎,所以咪茶色囉。」見她用懷疑的眼神盯著我,遂繼續解釋:「我中學讀男校嘅,呢啲專講杜女嘅秘笈,我哋中三就有得傳閱啦,人人都袋住傍身。」
見我賊眉賊眼,樣樣衰衰的,逗得她笑著問我:「溝女我聽過吖,乜嘢係杜女呀?」
「妳知道乜嘢係杜蟲藥嘛?呢~花塔餅食過喇卦?」以前的衛生環境不太好,有小孩的家庭,都有包花塔餅睇門口,可說是初代的「健康零食」。
她笑著點點頭,我繼續解說:「噉妳都估到啦,杜女藥即是呢啲冰茶呀,咪用來杜妳呢種無知少女囉,任人魚肉呀。」
她笑得花枝亂顫,好一會才笑瞇瞇的繼續問:「噉你哋嗰陣時,杜好多…人?」她故意將女改成人。
「妳睇我噉嘅款,成舊飯噉,都唔慌有機會啦,嗱,妳幫幫忙,快手乾咗佢,等我成功杜妳呢個無知少女,做第一案例。」我指住佢杯「冰茶」摧她快飲。「仲有呀,杜女杜出個未來,現實真係有發生㗎,嗰啲拾壹哥呀、老豆15歲呀,都係真人真事,有啲仲係身邊嘅同學,所以跟秘笈搞真係會搞出人命㗎。」
個衰女居然愈聽愈有興趣,似乎醉意開始消散,口齒也開始回復伶俐,笑意盈盈鍥而不捨:「邊個係拾壹哥呀?新聞有報過㗎咩。」
我登時語塞,剛才衝口而出「任人魚肉」都好像有點過份,點解釋「衰十一」畀一個唔係太熟嘅女生而又不失霸氣呢?唯有亂噏廿四好了。「唏,妳自己去問吓人啦,我而家杜緊妳㗎嘛,點可以爆咁多秘密妳知呢。」
她忍著笑嘟著小嘴扮嬲:「唓,小器鬼。但仲有大半杯喎,唔飲好大嘥啫。」
我笑著秒回:「都叫妳快手隊埋佢喏,一了百了,嘿嘿。」
見我針鋒相對,她只好大發嬌嗔:「噫~黐線仔,唔得呀~」大笑一輪又小鬧一下脾氣,阿心啲醉意都隨著汗氣揮發掉,神態已經回復七八成的快反應和小串嘴。「噉點好呀?」她本身都是慳妹一名,當然沒有叫過另一杯這種打算。
「嗱,噉啦,我杯橙汁未飲過嘅,畀妳溝淡佢囉。(她插嘴:噉你無得飲喎。)嘩,乜無呀,妳倒返半杯畀我㗎嘛。(她又插嘴:但我飲過喎…)唏,少少啫,咪咁婆媽啦。」我見她仍在猶疑,就將我杯橙汁倒落佢嗰杯內溝埋。「嗱,一人大半杯嘞,飲啖試試係咪好橙汁feel?」
她笑嘻嘻的舉杯:「一齊飲吖。」
碰杯後我呷了一口:「嗯…淡咗咁多,應該無藥效嚕。」
她帶著笑意瞟了我一眼:「費事睬你呀。」