【那些年 / 真人】《我老婆唔係我女朋友》【第一章 K歌情緣】

無知少女

安頓好後，始有時間環顧四周，咦…心呢？最後在房間深處發現她，原來已經被其他「歌手」擠到沙發的邊緣，她神情看來有點呆滯，可能被高分貝的「煩音」轟到失魂吧。於是我擠到她身邊：「咁快眼瞓？」

她好像才剛發現我，如夢初醒一樣有點迷茫：「咦？你終於到喇，係呀，有啲頭暈呢，可能唔習慣咁嘈呀。」

「噉妳不如攞埋杯嘢，陪我坐出去近門口啦，妳又唔唱，對住個皇帝位托咩？」我都抵受不了他們的音波功。

「哦～」阿心慢慢的站起橫移出來，由於動作緩慢，又遮擋著電視，自然引起眾人不滿，在一片催促聲中，她終於以慢動作移坐到我旁邊，視線回復正常後，其他人繼續忙著表演事業，正好讓我們有時間在熱鬧中獨處。

我察覺到她彷彿好像食了懵仔丸的異樣。「心，妳係唔係唔舒服呀？」

她緩緩的擰過來望我，目光有點失焦。「唔係呀，真係有啲眼瞓咋。」說話速度較平時慢，我看她剛放下的飲品只剩半杯，突然醒起馬飛那句「酒都得喎」。

仆街了，唔係下嘛！？

我有點緊張的問她：「妳個樣唔係好妥，你叫咗乜嘢飲呀？」

「吓？Ice tea囉，佢地提咗我有少少酒精㗎。」她繼續慢吞吞的答我，有點奇怪我會這樣問。

「呢種冰茶？」我攞起枱面餐牌看看，指給她看。

「係呀，甜甜哋都幾好飲吖。」她還用一副可愛的模樣跟我說。

我幾乎暈低，真係畀我估中，難怪好似懵懵哋又作眼瞓，原來係飲—醉—酒。「哎呀，大姐，妳叫嗰杯長島冰茶唔係茶嚟㗎，仲有唔係少少酒精，係全杯都係酒溝出來嚟㗎！妳唔好再飲喇。」

「吓！真㗎？！全杯係酒？你又知嘅？」似乎酒醒了少許。

「唉～妳真係無知少女，長島冰茶係用來『杜女』嘅失身酒，由幾種烈酒溝可樂撞出嚟㗎，所以咪茶色囉。」見她用懷疑的眼神盯著我，遂繼續解釋：「我中學讀男校嘅，呢啲專講杜女嘅秘笈，我哋中三就有得傳閱啦，人人都袋住傍身。」

見我賊眉賊眼，樣樣衰衰的，逗得她笑著問我：「溝女我聽過吖，乜嘢係杜女呀？」

「妳知道乜嘢係杜蟲藥嘛？呢～花塔餅食過喇卦？」以前的衛生環境不太好，有小孩的家庭，都有包花塔餅睇門口，可說是初代的「健康零食」。

她笑著點點頭，我繼續解說：「噉妳都估到啦，杜女藥即是呢啲冰茶呀，咪用來杜妳呢種無知少女囉，任人魚肉呀。」

她笑得花枝亂顫，好一會才笑瞇瞇的繼續問：「噉你哋嗰陣時，杜好多…人？」她故意將女改成人。

「妳睇我噉嘅款，成舊飯噉，都唔慌有機會啦，嗱，妳幫幫忙，快手乾咗佢，等我成功杜妳呢個無知少女，做第一案例。」我指住佢杯「冰茶」摧她快飲。「仲有呀，杜女杜出個未來，現實真係有發生㗎，嗰啲拾壹哥呀、老豆15歲呀，都係真人真事，有啲仲係身邊嘅同學，所以跟秘笈搞真係會搞出人命㗎。」

個衰女居然愈聽愈有興趣，似乎醉意開始消散，口齒也開始回復伶俐，笑意盈盈鍥而不捨：「邊個係拾壹哥呀？新聞有報過㗎咩。」

我登時語塞，剛才衝口而出「任人魚肉」都好像有點過份，點解釋「衰十一」畀一個唔係太熟嘅女生而又不失霸氣呢？唯有亂噏廿四好了。「唏，妳自己去問吓人啦，我而家杜緊妳㗎嘛，點可以爆咁多秘密妳知呢。」

她忍著笑嘟著小嘴扮嬲：「唓，小器鬼。但仲有大半杯喎，唔飲好大嘥啫。」

我笑著秒回：「都叫妳快手隊埋佢喏，一了百了，嘿嘿。」

見我針鋒相對，她只好大發嬌嗔：「噫～黐線仔，唔得呀～」大笑一輪又小鬧一下脾氣，阿心啲醉意都隨著汗氣揮發掉，神態已經回復七八成的快反應和小串嘴。「噉點好呀？」她本身都是慳妹一名，當然沒有叫過另一杯這種打算。

「嗱，噉啦，我杯橙汁未飲過嘅，畀妳溝淡佢囉。（她插嘴：噉你無得飲喎。）嘩，乜無呀，妳倒返半杯畀我㗎嘛。（她又插嘴：但我飲過喎…）唏，少少啫，咪咁婆媽啦。」我見她仍在猶疑，就將我杯橙汁倒落佢嗰杯內溝埋。「嗱，一人大半杯嘞，飲啖試試係咪好橙汁feel？」

她笑嘻嘻的舉杯：「一齊飲吖。」

碰杯後我呷了一口：「嗯…淡咗咁多，應該無藥效嚕。」

她帶著笑意瞟了我一眼：「費事睬你呀。」

趕起，文已出，謝賜酒
我新人無知一問，何解正評數一直不變？

我見有多到喎，兩個變三個

唔知點解手機一直都無變，anyway，感謝感謝

趕工中，今晚或明早出文

祿山之手

因為歌手們個個都搏命嗌，K場為防有人投訴太熱，一般都會將冷氣開得勁凍。我一邊聽著班友喪叫的同時，另一邊留意到阿心開始環抱雙手，動靜有點瑟缩。輕輕的問她一句：「做咩呀，凍呀？」

「嗯，少少啦。」她今天只穿件單薄的長袖冷外套，想來除了K房的冷氣問題，還因為剛才有飲過酒，雖說飲酒能夠暖身，但其實酒精會讓血管擴張，使熱量流失更快，所以酒氣過後反而更容易讓體溫下降。

「無帶褸咩？」我奇怪她竟然會咁失策，冬天返學一般都會帶備大褸之類，因為lecture hall有時候都照開冷氣的。

「無呀，都無諗住出嚟玩嘅，以為放學就返屋企嘛。」她輕輕的說。

看著她好像冷得發抖，真是我見猶憐。「噉不如妳坐貼我少少啦，我人肥似暖爐喎。」原本我只是隨口亂噏，但不知道是不是真的又冷又無助，她居然真的坐近了少許。

我繼續逗她說話：「話時話，今日唔使趕去補習咩？」

「唔使呀，學生屋企今晚去飲，所以暫停囉。」阿心微微瑟縮一下。似乎坐近了都無太大幫助，看樣子她仍舊覺得冷，說話都有氣無力。

「哦，但你又會嚟唱K嘅？妳唔似會跟佢哋玩喎。」我一直想打探她為甚麼會來唱K。

「係呀，我唔太習慣一大班人，蘇菲叫我嚟囉，佢話差一個人戥腳喎，後尾又話有個傻仔齋坐唔唱嘅，我見有伴咪應承佢嚟囉。」她說著說著開始有點興緻。

「妳話邊個傻仔呀？信唔信我毀妳容吖嗱！」我作勢想篤佢面珠。

她左閃右避的怪叫著：「哈哈哈～係黐線仔至真。」

我想我對號入座應該錯不了，齋坐唔唱的在座只有兩人，彷彿已經解答了在地鐵時所思索的問題，但又有點不真實，點會有咁好彩㗎？正在有點患得患失之際，想起剛才她移近我坐時，無意間碰到她的手指好像冰條一樣凍。「喂，鬼整妳隻手，做乜咁凍嘅？」

阿心終於抵不了冷，在輕微的哆嗦著：「噉真係好…凍嘛～我都…唔想㗎。」

想到她可能真的是為了陪我而來，心中一陣感動，繼而一陣衝動，既然都已經對號入座了，死就死啦：「好啦，見妳咁有義氣，幫妳暖吓嘞，畀隻手我？」不等她回答即大著膽拖她的手。

可能是未及反應，又或是真的太凍（抑或真係神女有心？唉，大膽假設，小小FF都得啩），出乎意料地她並無縮手或掙扎，只是柔順的讓我拖著。剛拖著她的手，驚覺她真的好冷，唯有盡力搓揉她幼嫩柔軟的小手。

毒隱雖然柔荑在握，到得定下神來，卻是暗自心驚，剛才未有深思就出手，萬一捉錯用神，不僅連少許的好感也秒喪，甚至可能惹上麻煩。那一刻的心跳加速，尚未分清是來自心驚膽顫還是小鹿亂撞，畢竟這是毒隱生平第一次觸碰少女的玉手啊，呵呵～玉指纖纖，細滑綿軟，仲任搓任捽，嗚呀～真係玩成晚都得；矛盾的情緒，夾雜著玩手指刺激的觸感，衝擊尤甚於徘徊天堂與地獄之間…非筆墨能夠形容。

好一會後阿心非常輕微的搖我手，靦腆的指一指馬飛他們，用幾不可聞的蚊聲：「…喂呀…佢哋會見到㗎。」

聞言想了想也是，雖然環境昏暗，但始終成班都是「歌手」，一個女生畀佢哋四圍「唱」都唔係好事，但眼見阿心並無反抗之力，形勢於我大大有利，正所謂贏就要谷，老蟹都唔「放手」啦：「嗯…不如試吓噉樣啦？」我靈機一觸，將自己的手反手收到背後，再讓她在背後拖我，用肥胖的身軀擋著馬飛他們的視線，她將小半邊身同時倚在我背脊取暖。

安頓好新的位置後，今次輪到阿心問返我：「噉你又點解嚟呢，齋坐唔唱咁傻仔？」她的肩膊粘著我的背，幾乎是貼在我的耳邊細語。

我要稍為擰轉頭才可以向她回話：「個傻仔見到『義氣心』嚟咪一齊囉，喂～妳咪噴氣去我條頸度，好痕㗎。」阿心噗嗤的笑了出來，唔知笑有人自認傻仔還自己的「新朵」了。

我感覺到她的纖手愈來愈暖，微微的握了她的手一下示意。「喂，換另外一隻手啦。」

「嘻嘻，好呀。」真的乖乖換過另一隻手拖著我。

「嗯～無知少女真聽話。」我讚她之餘也心中暗爽，她真的肯聽我要求啊～

她用剛轉換了的凍手，微微反握我一下，居然反客為主，輕聲的在我耳後說話：「你知唔知頭先你飲咗我飲過杯嘢嘅呢？」狀態稍為回勇，又開始整蠱作怪了。

「喂，我救妳先被迫飲妳口水尾咋喎，噉都算㗎？況且而家一直係妳聽我話咋喎。」我瞠目結舌，開始領教這個女生刁鑽鬼馬的一面。

「哈，此言差矣，應該係你聽我嘅話，我批准你救我同暖我咋。」套用著某人的口頭蟬，她大條道理的回應。

「嘩～妳咁無良嘅？信唔信我爆妳大鑊吖嗱。」作狀拉著她的手一齊舉起，試圖讓馬飛他們看到。

誰知她十分淡定，裝作嚴肅正色的。「唔得喎，我唔批准，噗哧…」說到後來終於忍俊不住，又在我的頸背爆笑。

畀佢大返轉頭，又不能真的爆大鑊，尤幸她的柔荑仍在我掌控之中，無奈下只有擳她的手心聊表怒忿。「喂，唔得咁矛的…哈哈哈。」我的心在她悅耳的笑聲中悸動著，隱隱覺得要是真的一世要聽這個爽朗、單純的女生的說話也不錯呀（嘿，還有小串嘴、小野蠻）。

flirt仔神曲

耳語嬌嗔、柔聲軟語、說說笑笑間，兩個人渾然不覺時間飛逝，對外面嘈雜的環境免疫隔離，完全陶醉於二人之境。可惜好景不常，差不多9點時，侍應叩門送來生日蛋糕，原來生日當天來唱K會送生日蛋糕，無怪乎死纏爛打也要今天來唱K了，二人只好在大家目光所及之前，收回背後糾纏的兩手，又稍稍分開一點坐。

大家一起唱過生日歌，吃過蛋糕後，一眾歌手又重投於表演中，再次將我倆遺棄在房間的一角，不過原來「被遺棄」都可以好幸福的。

我仍然在意阿心的身體狀況（藉口啦），背向著她慢慢的伸手過去再拖她的小手，她有默契地又移得貼近了一點，回復小半邊身靠在我的背脊，我擰頭望望她，有點擔心的問：「仲好凍嗎？隻手又試凍返嘞。」

「嗯，仲有啲凍呀。」輕輕的柔聲耳語傳來。

「不如走啦，好嗎？」雖然有點捨不得離開這個溫馨的沙發角落，但我更加不忍讓她冷病，確實要不是阿心在陪我（究竟是邊個陪邊個呢？），相信我最多只坐半小時，而現在已經齋坐了三小時。

阿心答道：「不如10點走吖，我去同蘇菲講聲，啱啱食完蛋糕就走，好似唔太好哩。」

「哦，我知喇，要聽妳話吖嘛。」反正可以摸手仔摸耐一點，妳話事啦。

阿心嫣然笑道：「乖仔嘞～～」

突然房內一陣騷動，原來歌手們在爭拗，搶咪唱陳慧嫻的新歌《紅茶館》，這首新歌是收錄在3月時所推出的大碟《歸來吧》當中。當時慧嫻已經宣布封咪，暫停工作前往海外升學，是以這張專輯推出時，神奇地出現搶購潮，當然收錄的歌曲好聽也是功不可沒的，因此就算陳慧嫻本人並未親身參與宣傳活動，這CD都有三白金的驚人銷量。

《紅茶館》陳慧嫻
https://youtu.be/YcFyOThuVRc

嘿，唔好意思又要講句，年輕的巴絲可能仲未投胎，未聽過這首歌嘅請先睇睇，幾好聽的，記得留意歌詞，那段獨白真係聽嚫都起雞皮。

《紅茶館》爆紅的主因固然是歌好聽，唱得又出色啦（我是慧嫻的忠實fans呢～當年傳出她跟【里奧屙拔甩】的creative director拍拖，我們一眾同學仔都失落了好一陣子），而另一個助長它大流行的原因，就是卡拉OK生意的泛濫，《紅茶館》成了K場裡面最當紅的「flirt仔歌」！「撩仔部」的成員都會用這歌來「投石問路」，咪嘴（lip sync）「扮」慧嫻獨白，目光當然瞟向目標條仔啦！話說真正的「寮仔部」是屬於房屋署管轄的寮屋管制組，為寮屋及住戶進行戶籍登記的。

當《紅茶館》前奏響起時，我倆都自然而然暫停了卿卿我我，一起靜靜的聽歌，不過背地裡仍然互相牽著手（♥）。當去到中段獨白部份時，個衰妹又作怪了，微微的握了我手一下，示意我擰轉頭望她，面上表情戚眉弄眼的。

現場霸到發聲獨白的是壽星女阿May。

我
阿心
阿May

〈♫ 欸～喺度諗緊咩呀？諗緊你女朋友哩 ♬〉

【表情＋動作演繹】先揚揚眉後又皺著眉，似笑非笑的嘟嘴向我呶呶。

我竟然又估到她想點喎。

【表情＋動作演繹】馬上扮無知樣，搖搖頭表示「無呀」。

見我居然「搭到嘴」，她不忘開心的笑了笑。

去到第三、四句獨白。

〈♬ 你冇女朋友？梗係唔信啦 ♫〉

【表情＋動作演繹】豎起並只郁動食指又嘟嘟嘴，自左到右來回作出水撥般的手勢。



【表情＋動作演繹】適時聳聳肩又攤手，表示我都唔知點解㗎？

到第五、六句時。

〈♫ 冇…理由㗎！你…你幾好吖 ♬〉

【表情＋動作演繹】用手搔搔腦袋，再豎起拇指作出一個GOOD的手勢。

正當我期待她會怎樣演繹第七、八句時。

〈♫ 點會冇人鍾意你喎？或者有…你唔知啫 ♬〉。

這尤如轉體720的超難度動作，只見她垂下了頭，兩肩在顫抖輕輕抽搐，搞到我有點不知所措，微微的反握了她的手：「喂，做乜呀？」

突然她放聲大笑出來，原來她剛才忍著笑，邊笑邊喘氣：「我唔識點做無人鍾意…你…呀…」想起這句獨白有點不妥，愈說愈細聲。

「唏呀！黐線妹，妳嚇死我呀。」我也順著她的口頭蟬叫她，最後大家一齊都忍不住捧腹大笑，在沙發上東歪西倒，完結了這場另類的「咪嘴」戲碼。

幸好我仍然背向她坐，否則要面對面聽《紅茶館》，可真的有夠老尷了。

接下來的時間，我們開始商量怎樣走人了，雖然有默契一齊離開（因為班歌手正常都唔會在午夜前掛咪的），但為免俾人唱，都要花點心思。最後決定由我先離開，10分鐘後才到阿心離開。

依依不捨的在背後放開她的手，打個眼色後起身走人，向主持人馬飛打個招呼，他也無暇理會，只拋下一句：「咦？唔係等埋一齊走咩？」

我也敷衍了事：「唔喇，眼瞓呀，聽朝我嗰堂返八半（08:30）。掰掰喇。」告別眾人後，逕自走到酒店大門（Red Box在地庫）等了一會，阿心也上來了。

我問她班友有無懷疑，她笑了笑：「無呀，佢哋都仲掛住唱，無乜理我。呀～未行得住，我要打個電話先呀。」我下意識的在想，唔通立即要同男朋友報到？都係嘅，呢啲機會不是我的。

可能見我發呆又臉色不善吧，阿心推了我一下：「入酒店大堂打電話啦，我打返屋企咋，要講低我宜家返嘛，你諗咗去邊呀～」橫了我一眼。

她好像看穿我的想法，只好訕訕一笑，有點尷尬的跟著她走進大堂。問清楚電話的位置後，她拉著我站在她旁邊：「你喺度等我打完電話一齊走吖。」我有點奇怪企得咁近，咪直情聽到妳講乜？「喂…爸爸？係呀…我宜家先喺灣仔返嚟呀…得啦…知喇…同同學一齊唔怕啦…係噉喇。」放下電話後，對著我甜甜一笑，原來她笑起來有小酒渦的。

「你滿意啦？嗱，你聽到我同同學一齊返去㗎，噉你要陪我坐車嘞。嗯～你要唔要打電話？」聽到她無厘頭一句——你滿意啦？明顯是看透我的心思，知道我懷疑她報到；之但係有個女生對我坦白喎，個心應該甜到漏喇啩，但…事實是…那一刻…是相當樣衰的。

被她看穿令我幾乎無地自容，急忙說道：「10點幾啫，我媽唔使我打返去嘅。」見她眼睛瞇起成一線的斜睥著我，又是那個似笑非笑、抿著嘴的表情，醒悟到她要我交代跟她同等份量的答案。想起剛才另類咪嘴的情景，靈機一觸！輕鬆的聳聳肩：「咩呀，其實頭先都答咗妳㗎啦，妳自己都確認咗㗎。」一於無厘頭鬥無厘頭！

阿心一副茫然的樣子，似乎一時未能聯想到「頭先」發生了甚麼事，畢竟今晚兩人之間開始和發生了很多。我豎起食指，作出水撥般左右來回的手勢，正是獨白〈♬ 你冇女朋友？梗係唔信啦 ♫〉，那時候她的演繹。「記唔記妳頭先呢個手勢呀？我當時擰擰頭答咗妳——我冇啦，同埋我都唔知點解冇㗎。」

她終於聯想起剛才那段獨白的情景了，跺足大發嬌嗔：「喂呀～邊有咁矛㗎！」

我乘勝追擊：「話時話，最後兩句超難動作妳都未做喎，嗱，不如妳解埋我知吖。」最後兩句是〈♫ 點會冇人鍾意你喎？或者有…你唔知啫 ♬〉，即是要她答誰是那個鍾意我的人。

阿心微紅著臉窘住了：「噫～唔識呀，行啦，返屋企呀。」哈哈，在少男少女攻防戰中險勝一小個回合。

無名分的浪漫

出了酒店大門，外面仍然斷續的下著大雨，繼續慶幸袋中有遮，正準備找出來：「咦，妳無帶遮咩？」

「無呀，都話無諗過出街嘛，頭先嚟時又係坐的士嘅，你有咪得囉。」阿心毫不擔心。

我心諗又會咁老定的…打好傘後一齊出發，大家都知縮骨遮可以有幾大把吖，一個肥毒加個纖瘦女生擠著用，肯定其中有一個人半邊身會曝露在遮外淋濕，此情此景濕身的當然是我了。

「哎呀，行埋啲啦，你濕晒喇。不如你將把遮放大家中間啦。」她體貼的嚷著。

我轉用靠近她的手擔遮，將遮撐在大家中間，她竟然自動波的翹著我手臂，搞到我有點受寵若驚。我知她怕被人看到閒話，帶著疑惑的眼神望向她，她反而大方的笑道：「落雨嘛，唔怕啦，頭先你拖我咁耐，宜家咪拖返你當補數囉。」

妳唔怕時我更加唔怕了。相視一笑，盡在不言中。這個雨天，兩個人依偎著同行，兩顆心亦愈靠愈近。

上了地鐵（大庭廣眾，無藉口再拖住了），我半邊身濕透，直可以滴出水來，不禁抱怨下雨天的不便。阿心反而開解我：「你知道嘛，落雨有分春雨同秋雨喎，而家11月落嘅叫秋雨，落秋雨係為咗令泥土變得鬆軟，噉先可以播種，有利耕種㗎。」

我搔搔頭：「而家都無乜人耕田啦。」

「此言差矣…嘻…」又用某人的口頭蟬，只是話未說完她已經笑了出來。「嗯～其實都可以將耕種譬喻做人與人之間嘅關係㗎，要不停灌溉滋潤先會成長噉囉。」她看著我眨眨眼續說：「如果唔係因為落大雨，我哋都唔會咁多嘢傾啦，係咪？」

這又是真的，今晚可真的是一個相當奇妙的經歷，種種的巧合令我加深認識了一位各方面都和自己好夾的女生，一下子不知道再說點甚麼好。

我見剛剛的話題有點嚴肅，嘗試搵其他嘢講吧：「話時話，妳有冇發覺阿『此言差矣』個樣好似一個人呀。」

幾乎剛說完，阿心已經可以叫出來：「鄭T瑞吖嘛，真係幾似喎，但點解你哋成日見嚫佢都搵黎G嘅？」

我聽到後幾乎噴飯：「啊哈，乜妳無去O Camp咩？」

「無呀，我阿爸唔想我去咪唔去囉。」她理所當然的答道。

我解釋了鄭T瑞同黎G之間的關係後，順口問她：「唔怪得專登要打返屋企講聲先啦，妳阿爸管得好嚴㗎？」順便收收風，以便將來部署都好吖…誒…世事話唔埋嘅。

「嗯～都唔算嘅，O Camp要過夜先至有啲意見啫，同埋最近治安唔好嘛，所以夜返佢要我打返去囉。」她娓娓說出原因。轟動一時的屯門色魔案，就起始發生在那年的，所以當時女生出夜街都人人自危，要求男生接送的情況也很普遍。

「噉平時都有人送妳㗎咩？」我打蛇隨棍上。

她眼睛微微瞇起斜睥，露出一副「你又嚟？」的表情：「平時都係去補習囉，跟住就返屋企㗎喇，好少好似今晚噉。」頓了一頓。「所以一陣你要陪我返去喎。」

「得啦，妳又無遮，又飲醉酒，點都要㗎啦。」我正是求之不得，既可以親近佳人，又可以扮有風度。

「噉你又覺唔覺得我好似一個人？」突然她笑嘻嘻的問我。

「我要望清楚先喎。」

「你咪望飽佢囉。」她一翻白眼，擺出一副任君觀賞的模樣。

我泛起一種甜蜜的感覺，裝模作樣的當面𥄫佢一輪：「嗯～下巴兜兜，似…吳Y漢！」我不假思索的說出來。當年《吳耀漢攪攪震》剛播完，反應不錯，久唔久都有人討論。

她瞪大本來已頗大的眼睛，眼珠幾乎要跌出來：「𡃁仔，你係唔係玩嘢呀～」說到最後又忍不了笑，而我更一早笑到有腹肌了。

「噢，Sorry，搞錯了，再嚟再嚟，嗯～豬膽鼻幾好福氣嘅，似朱M咪喎。」她索性擰歪面，一副費事睬你的樣子。我怕玩出火，輪到我笠水了。一口氣將各美女藝人黎G、朱Y…最後我連譚Y瑛姐姐都出埋，但她都不理睬。「喂呀，畀啲貼士啦。」我哀求著。

她面帶笑意的擰回來，仍嘟著嘴扮嬲：「又好，要貼士呀～佢做電影嘅。」

「我都知道一定係靚女啦，畀多少少指示好嗎？」擦鞋話係靚女實無死嘅，點都唔會話自己似朱M咪啦，天才～

「嗯～好啦，台灣人嚟嘅。」

「啊，13姨關C琳？」當時剛好上《黃飛鴻》第二集，所以我隨口便說了出來。

「唔係呀～佢都唔係台灣人。」

「咦？台灣靚女，拍電影的，唔通係…」我福至心靈的突然想起一位拍完《倩女幽魂》系列和經典港產片《賭神》紅到發紫的女星。「王T賢！」

終於她甜笑的點頭：「算你啦。」

其實我心中不大同意的，誠然阿心的眼睛很大，但完全不是王小姐那種嫵媚的氣質，然而不認同還不認同，在缺乏反抗能力下，我只能附和：「嗯，妳眼大大都真係幾似喎。」此後，王T賢就成了我倆之間的magic word，有時候如果惹得她生氣，只要一用這大絕，多數都可以化險為夷。

有文未？

抱歉, 最後校對中, 稍等多半小時

剛好是第一章的最後一節。

傘兵任務

談笑間返到石硤尾站落車，出得站來發現已經停雨了，依諾送她回家，當然無藉口再「把臂同行」啦。原來她家住大坑西邨民泰樓，根本就在地鐵站B2出口上蓋，回家的路程短得不能再短，自然再無談天的時間了。

民泰樓是典型的第二代七層公屋，沒有電梯的，屬於頭中尾各有樓梯的設計，地下的各個樓梯入口也沒有甚麼保安設施，其實當年的舊屋邨大都是無掩雞籠，任何人也可以自出自入，所以有部份邨民會自發組織自衛隊，每晚定時結黨巡樓，他們「行咇」時相當熱血的，大家有無睇過一齣電影叫《勁揪俠》？班自衛隊就exactly好似班街坊英雄噉，個個上晒「架生」逐層巡（咳…無Cosplay的）；因此一個女生太夜回家確是有點兒危險，也難怪林爸爸擔心。

我陪她去到地下樓梯口，有點依依不捨：「不如…送埋妳上樓，好嘛？」

「誒…」她有點猶豫，可能怕被人看見吧。

「我陪妳上到妳嗰層樓梯口，睇住妳入屋啦，我唔見住妳安全返到，都係有啲擔心哩。」其實我見四周環境幽靜，堅係有啲擔心。

幸好最終她都同意，點頭道：「好啦，辛苦你撐樓梯喎。」

「欵，我無話妳知我住唐樓咩？我都係撐樓梯返屋企㗎。」當下邊撐邊說我家的位置。「既然大家住得咁近，不如第二時約埋一齊返放學啦？」我隨口將當日在地鐵「跟蹤」她時想到的情景說了出來。她也很爽快的點頭答應了。

「吁～到10樓嘞，係呢層喇，嗱，我住向街嗰邊嘅第三間，等我入咗去你都好快啲返屋企嘞，你都要小心喎。」阿心細心的叮嚀。

「好啦，妳聽日返晏呀？我返早呢，唔可以約埋一齊返添。」我明早要返A1班，真的是上八半，下午才接著上A2的retake科，因為阿心是A2班的，所以她下午才返學。

「唔緊要啦，下晝喺學校都見啦，掰掰。」我站在樓梯口，看著她自己行去開門，入門後身影消失了，還鬼馬的將手伸出鐵閘外跟我拜拜。



看（聽）她關好門，我也轉頭落樓了，想起全晚也有她一直陪伴在旁說說笑笑，不免有一點失落感。記得之前看《姊妹》時講過，兩個人開始有交流，進而嘗試交往，通常會依循兩種方式，第一種可能是因為彼此的外貌、身形、體香、談吐，甚至是衣著，令二人的腦袋在秒數內產生化學反應，叮！一見鍾情的撻著了；另一種是細水長流的，兩人本來就相識的，關係一向平淡，卻被一個契機或是優點而觸動，大家的臉孔才漸漸變得清晰，思想開始同步，喔～原來佢都幾好喎。

聽落我們好像是第二種情況啊，欵…我們算是開始交往了嗎？

正在胡思亂想之際，赫然驚覺…為什麼才道別卻仍是想著她？為什麼已經開始掛念她了？

戴上耳筒聽著歌，沿著窩仔街走向白田方向，行不消10分鐘步程，就返到巴域街尾我家樓下了，原來大家的「距離」真的幾近，呀，是家的距離。回家一看，原來已經11點半，老媽仍在趕稿（佢兼職「正稿」，日夜都宅在家裡爬格子）：「無淋雨咩？頭先好大雨喎，食咗飯嘞，係咪？」一輪嘴的問長問短，突然她眼睛微微瞇起斜睥著我：「咦，飲過酒呀？」

不知道是她嗅覺靈敏還是我樣子有異，不過飲啖酒都沒甚麼大不吧，我如常的回答：「少少濕身啦，不過好～彩～妳叫我帶遮咋。」濕到出水就真，但是這句對老媽「好彩帶遮」的感激，卻是由衷的，無嗰把縮骨遮，今晚少好多福利呀。「同同學一齊食飯時，飲咗啲fruit punch啫，沖涼喇，聽日返早呀。」

老媽仍在咕噥著：「唓～又話自己唔煙唔酒嘅，吹水。」

我邊行邊說：「都退咗役幾年啦，飲少少酒唔怕啩，唔食煙咪得囉。」我突然想起剛才老媽的眼神，何解有種熟悉嘅感覺呢？心中一動，剛才阿心也有這樣的表情啊，她又能夠像老媽一樣看穿我的想法喎，就連小串嘴的態度也極為相似；相對地，會不會因為阿心的性格類近家中這個女人，所以自己才無意識大膽的跟她互動呢。想到這裡頭皮有點發麻，唔通家裡家外都要應付兩個阿媽？不過一想起她的笑靨，心中生暖，恨不得明天的課堂馬上來到。

日常一些不被留意的小事，往往都會成為無可替代的回憶，亦可能成為影響一生的小齒輪。如果當天無留意到她的手凍，無捉緊機會去拖她的手，下半生的人生可能就會截然不同了。

加油作者

謝支持

老餅的豆知識（一）

《姊妹》創刊於1970年，是一本女性向的雜誌，內容涵蓋美容時尚、娛樂小說、社交平台及性知識等，也是女性商品廣告的首選平台。《姊妹》除了是市場上獨有的女性雙周刊外，尚有不少特色，它每期都找來當時得令的女星拍攝封面（有興趣search鍾楚紅的封面，索到爆！），所以它的封面自然而然成為一個時尚指標，很多太太會拿著《姊妹》去髮型屋，要求對照著封面來剪新髮型；還有它的小說專欄，連名女作家亦舒也供稿出新連載，待看過反應後才將連載結集出書；而因為未有社交網絡或交友app，那時候要識朋友可比現世更困難，因此它的專欄「友誼萬歲」亦成為大家結交筆友的世界平台。



雖然《姊妹》定位為女性雜誌，但仍不乏男讀者（毒隱）捧場，家中有女性買回來時會偷偷看的有之，亦有上堂時公然睇的（編劇本人），皆因其中最為男性心癢難搔的，是刊登在那些彩色再造紙上的性事專欄，譬如「姊妹天地」的醫學及心理「性」專題探討，結婚不惑症、五感與性感、打J有益有害（那時候未有打J這個term的，這裡只是方便大家理解）等等，又有「姊妹信箱」和性博士信箱，讓大家問「柒」問題，偶然亦有性感的明星照（玉卿嫂和事業媚都拍唔少了），在當年3～4仔影碟未發明，亦未有jav這等超方便的網站之際，《姊妹》確實是充當了毒隱們的心靈雞湯，所以說它陪伴大家成長也不為過。係呀，那時候睇甜嘢都要識字的…

可惜紙媒始終敵不過網絡力量，《姊妹》雖然在2005年變革求存，後來也逐漸沒落了，現在只餘星馬版仍在運作。

老餅的豆知識（二）

有巴絲睇初稿時，認為女主角對一個不大相熟的肥毒，毛手毛腳的行為過份順攤，正常人都應該會反抗甚或是大巴大巴車埋去，質疑劇情有如三色台膠劇般離地。

小編採訪了女主角，跟她了解一下當時的心路歷程。女主角：「你想像一下當時嘅環境？成個場無人理我，飲咗杯嘢又暈暈哋，終於有個人留意我、緊張我嘞，況且嗰個人又提醒我唔好再飲杯酒，我就知佢唔會害我啦，噉後來又真係凍嘛，咪半推半就無反抗囉。」

小編又採訪了編劇對膠劇的評論：「唉，男主角一早講咗啦，嗰個無知少女嚟嘛，噉都問？膠都費事畀你。」

老餅的豆知識（三）

在好長的一段時間後，編劇在研究聖經故事時，發現女主角當天開導男主角有關下雨天的牢騷時，是引用了聖經中關於秋雨的恩典和啟示【詩 65:9-13】。

編劇註：「全劇除了林氏一家，無人係耶教徒，援引聖經純粹係解讀鏡頭背後嘅創作緣由，並非導人迷信耶。」戴咗頭盔先，有避無患。

老餅的豆知識（四）

又是巴絲的投訴，男主角對於「討論」女主角跟王T賢的相似度時，有點不以為然，紛紛要求男主角清晰形容女主角容貌，小編採訪了男主角：「其實佢嘅大眼睛同埋『輪廓』反而更似素顏嘅李K欣，但為咗避免佢狂喜以及為擦鞋避嫌，最後就不了了之，不過我提醒大家唔好過份解讀李K欣，重點係『輪廓』。」

小編又採訪了編劇：「即是投訴我文字上嘅表達『渣』呀？」



（第一章完，待續）

打算明天開始出第二章, 排版格式之類有冇意見?

睇落都舒服，唯一建議就係加速