一人一個小巴落車站名奇怪叫法

咖啡屋有落 (明嘅就明)

是咁的，一架小巴，十六個座位，十六種想法。而每架短途小巴，總存在一個「熱門落車地點」，即係全車16條友仔，七成都係嗰到落車，嗰嗰地方可能係「地鐵站」、「街口」、「燈位」。總之你坐上架車，已經知道嗰嗰地方係大部份人嘅目的地。

好，問題 嚟啦。

人人都係嗰度落車，但嗌「有落」嘅只係需要一位。咁邊個嗌呢？

我老死阿強嘅睇法就係：「等人嗌囉，唔通自己嗌呀？」

阿強喺香港生活咗30年，充滿住香港人應有態度！就係有咩事都好，等人出聲，都好過自己出聲！你說對不對？

每個人搭上呢架Van仔，心中總係存有一絲希望，就係「最好有其他人嗌有落啦！」

Actually，嗌句「有落」好難咩？點解唔自己嗌？

逃避心態嘅嘢你識條春咩，大學嘅Final Paper都要拖到最後一晚先爆，稅表唔到Last day唔填，我哋香港人有咩係唔可以「避」？

同埋嗌「有落」係有Cost架！你有無試過同前面個阿叔一齊擘開個嘴，兩把聲同分同秒嗌「有落呀唔該」，
同步率係100，同暴走咗嘅初號機一樣！Perfect Match，場面勁尷尬，司機亦立即減速。

另外，如果你坐最後個排，嗌「有落」其實存在危機，因為你離司機太遠！你需要運氣，將全身氣勁儲落丹田，再經個肺，大喝一聲「有落」。太激動會走音，變咗「有樂牙..唔該...」但太細聲的話，司機就有機會聽唔到！

知唔知世界上最不安係咩？唔係放榜、唔係女友唔聽電話，而係你嗌咗「有落」，但係司機大佬無遞手。

究竟司機大佬係心情麻麻唔想遞定真係聽唔到？你要明白司機大佬係性情中人，唔得罪得，所以無人知。
但全車其他人聽到你嗌「有落」，佢哋唔會Double Confirm，個責任交哂俾你。如果司機真係聽唔到飛咗站，咁係邊個嘅錯？

好明顯係你呀，又要爭住嗌，又要唔夠聲，司機唔遞手又唔嗌多次，仲唔係你錯？由嗌咗嗰刻開始，所有公民責任都落哂喺你度，壓力極大。

既然嗌「有落」都咁多陰謀論，梗係逃避啦。

好似我同阿強上次搭Van仔咁，基本上九成人都肯定係「街口有落」，因為街口隔離就係地鐵站，既方便又環保。

一上到車，大家已經暗地裡角力，心諗：「今日有無人嗌呢？」

司機大佬唔理咁多，踩到60Km，掟埋個彎，前面就係街口！

已經嚟到最後100米！前面嗰阿叔好似蠢蠢欲動！係咪想嗌呀？係就快嗌呀！因為離目的地愈近，大家一齊「撞車」講「有落」嘅機會就會相對提高！

得返80米，阿叔好似唔係好惦，隔離個師奶拎手袋，嗱！師奶只要你揚聲嗌「有落」就好似領住聖旨咁，無人夠膽插嘴呀！

得返50米，喂師奶唔嗌嘅？你唔落車唔好拎手袋啦！俾錯「熄爐」喎！點先？唔怕，坐第一排仲有個後生仔，佢細細聲講句「有落」都食糊！一嗌就做英雄救全車！嗌唔嗌？

得返30米，後生仔有啲猶疑喎，係咪信唔過？唔通要自己出手？呢個時候，成車16個人都係一個眼神，千言萬語盡在其中，想說服對方講一句「有落」。咁有默契，我哋唔去嘗試發展一段16角戀都算係社會上嘅一種浪費。

最後10米啦！大直路！「司機！前面有落啦唔該！」終於出聲，係阿強。司機大佬技術好！最後10米剎車，順便將衝力化為動能，「發」開度車門。

喺最後10米先有人嗌有落，正路應該係得佢一個有Demand要落車啦！Right？
但係最後全車16個人一齊落車，無人留底。

基本上係阿強嗌咗「有落」之後，不論阿叔又好、師奶又好、後生仔又好，大家都鬆一口氣，露出久違嘅笑容，即時拎袋，狗衝落車。

如果阿強真係唔出聲咁點？司機會直行直過，可能會有人嗌喺前少少超市有落，行返轉頭。又或者直接去總站，搭多幾分鐘行多兩步咁囉。

香港人，總覺得行先死先，出聲先無著數，盡量少做。

今次10米前有阿強，下次未必有。而小巴司機係明叔的話，都叫萬事有商量，你要落佢會停。

但係如果有日個司機叫梁振英，你又唔出聲嗌「有落」，咁就真係飛站，直行直過，將香港車去中國，賣你豬仔。

香港嘅朋友仔，係時候出聲啦。

PS. 我都知有啲小巴呢家有落車鐘，但我搭開嗰啲無咁先進..sosad

學校有落

但前面起碼4間學校

kong u 搭小巴
啲鬼妹係會講 stop please

寶聲有落

明明拆左好多年

以前搭金雞 van 都係叫黃克競有落

總站有落 唔該

前面轉彎玻璃屋有落

呢度落

我試過搭通宵小巴
落淨我最後一個
車埋我返屋企樓下

有經驗司機會同你講過埋個禁區牌落

油站 粥舖

試過搭到總站落
上層計埋我得三個人
之後第一個人落車
我跟住落
當時見到近車尾有個男人瞓著左
落左車見到司機都落左車
之後司機見到我落車又冇人跟著
就上車去返司機位
我以為佢會睇鏡頭見到有人喺上層
點知佢轉頭就熄燈開車駛離站頭
上層黑猛猛
呀叔醒左實嚇撚死

山頂有落

仲有冇人會叫咪數

八咪半
九咪半
十咪半

有聽到老一輩仲叫緊

細個第一次入西貢
去到差唔多總站叫轉彎有落
俾個阿姐笑

大丸都仲有人叫

我有次聽到有呀婆叫 土地公有落

前邊有落

海事處有落
但依家都變左陸地幾十年

垃圾桶丫唔該!
跟住過幾日個垃圾桶冇撚左，唯有前啲隧道口落

學校有落 次撚次停到老撚咁遠
之後問返先知校長唔俾佢地停門口