我和鄰居大姐姐的故事（5）

葉開葉開 2021-02-02 19:34:53

一百零七

阿必眼泛淚光咁望住屎sir。

屌，眼淚都可話咇就咇，有冇咁撚戇鳩呀？

「真…因為我地學校不嬲都會比多一次機會有機會留班既中一生。不過…」屎sir道：「我諗我地要搵你家長傾下先。」

「屎sir！有咩同我講得架喇！等我再轉達比佢地知！」阿必再一次五體投地。

「林必才，你家長最後點都會知道你既成績架喎。」屎sir不慍不火地道：「因為你黎緊係要補考唔合格既科目。」

「下？」跪響度既阿必抬起頭。

「你等我一陣…」屎sir返入教員室拎左張通告出黎：「本來諗住上堂見到你先比你。」

阿必企返起身接過張通告，面色慘然一變：「呢張係…」

「學校會比中一既留級生多一次機會，但前提係要接受補考既安排，然後主科同平均分都要合格。」屎sir點點頭：「你拎呢張通告比你家長簽喇，儘快呀記住，如果你家長同意既話，學校就要安排補考既時間同地點。」屎sir講完就轉身入返教員室：「就咁喇。」

留低阿必呆呆咁目送屎sir離去…

「咁…都唔錯吖。」淇淇安慰阿必道：「補考合格就唔駛留班喇喎。」

「係囉，你比心機冇野係做唔到既。」我好撚難咁忍緊笑安慰阿必。

「唉，實比老媽子鬧死喇…」阿必副垂頭喪氣既樣。

雖然就唔應該咁講，不過你唔溫書炒晒考試比人鬧係好撚正常架喎…

*

…

…

…

「點解我要響度陪你條撚樣溫書架？」我坐左響張餐枱旁既餐椅上面，呆呆咁望住睇落「好似」好努力溫緊書既阿必：「明明今日係暑假既第一日，點解我要做埋啲咁既鳩野…」

「哈哈哈哈！」阿必學撚埋黑熊，豪邁咁笑道：「尋日你去個唱K party係我請你架喎，叫你陪下我都得啫！」

「好嘈呀你地！」八婆儀響餐枱既另一面不滿地道：「死人必你快啲專心溫書喇！」

大家係咪唔明白發生左乜撚野事呢？係咪睇到一頭霧水呢？

首先呢，我地而家就響淇淇屋企，幫阿必響幾日之內惡補溫書，希望幾日之後既補考佢可以大步過…

至於點解會響淇淇屋企呢…

咁就要由果日講返起…

話說阿必當日接過張補考通告之後，個樣慘撚過死老豆老母，一路垂頭喪氣咁行返去課室…淇淇作為一個外向又肯幫助同學既模範女班長兼全班成績第一名既好學生，就自告奮勇咁話要幫阿必補習…

本身想去圖書館溫，阿必又話驚嘈撚住人；好喇話去快餐店溫，阿必又話驚阻撚住人地搵食；想去B's Cafe，阿必又嫌人地貴；好喇話想佢屋企，佢又話屋企有人又細又亂所以唔方便…

最後佢既提議…

係非常厚顏無恥咁問去淇淇屋企溫書得唔得…

淇淇最初其實唔係幾願意，但響阿必死纏難打再加上淇淇咁肯去幫人，最後就應承左阿必。

雖然性格不同，但鍾意幫人呢樣野淇淇同秋兒姐姐好似。

至於點解八婆儀會響度？

「等我跟埋黎睇下你個死人頭係咪真係溫書先。」佢係咁講既：「我要監督住你！」

不過我覺得佢係黎睇熱鬧食花生多啲。

至於我？

屌，係因為我為食，所以中撚左阿必既圈套！

事緣尋日係中一最後一個上課日，所以一到lunch time 就放學，由於中二既時候大家會再分過班，所以淇淇就提議不如成班去唱K聚下當係暫別大家既party。

問心，我個人其實好撚摺，除左淇淇同阿必之外，我都冇乜同其他人有交流（包括八婆儀同鄭海欣），加上我又冇錢（呃，其實係有小小踢青年軍賺返黎既車馬費，但我唔撚想用），所以我都係決定唔去。

淇淇好似有啲失望。

呢個時候仆街必走過黎問我：「不如我請你去唱K吖？」

「咁撚荀？」我諗起同Kitty姐姐去唱K果次有自助餐食，對阿必呢個提議不禁怦然心動。

「不過…」阿必露出左個賊樣：「有條件架喎…」

「咩條件？」

「之後果個禮拜，你要陪我溫書！」

「屌你個死基佬，咪撚咁基喇！」我皺眉道。

「唔係喱，我覺得你都去既話，淇淇先會肯比我上佢屋企溫書架。」冇錯，呢一刻淇淇係仲未應承阿必既，佢話要夜小小問完屋企人再電話覆佢。

「是旦喇。」一諗起啲自助餐…「不過佢比唔比你上去溫書同我有乜撚野關係？」

「有架。」阿必話：「屌，你條友真係冇乜自覺架喎。」

「你up乜鳩呀？」

不過陪阿必溫書啫，又唔係我溫，係咪先？咁就有餐自動餐食，我有晒著數喇。

就係咁…後尾我發覺自己…原來自己係錯既…

伏已中。

好撚悶呀！！！

（待續）

睇操女教練 2021-02-02 19:50:39

淇淇同熙熙入房玩啦唔好阻住八婆儀督促阿必