《「失」婚大作戰》

推

「滴噠滴噠—」

下晝一點幾，大雨還未停。天文台改發紅色暴雨警告。

安仔同肥榮都Whatsapp Wendy，問計劃都咪要取消。

原定呢個時候，佢地本來會到沙灘準備定啲嘢，家下咁嘅環境，睇嚟所有野都要推遲。

而Wendy都做好最壞打算，啲雨再繼續咁落嘅話，嗰啲沙灘燭光煙花睇怕用唔著，不過就算無左呢啲，佢都要當面同阿康表白。

佢要對方親口應承同佢一齊，開始佢地嘅關係。

「今日出面落大雨，不如我地約過第二日？」阿康send嚟短訊。

「無事嘅，好快停雨架啦。」

「咁我地延遲少少，等到啲雨細返啲先入西貢啦。」

「好呀，記得唔好甩底。」Wendy強調話。

傾盤大雨一直落，落到差唔多五點，天文台終於將紅色暴雨改返為黃色暴雨警告。

仲有三個鐘，Wendy嘅穿越時間就會結束，佢見啲雨好似細左，都唔理咁多，立即就call安仔同肥榮，一齊入西貢預備下先。

佢地冒住大雨嚟到彩虹小巴站。

「安仔，你班busking嘅friend，你琴日又話佢地應承過嚟做伴奏嘅？」Wendy問。

「落咁大雨，佢地無人肯出。」

「咁你嚟得做咩唔帶埋自己支結他？」

「家下橫風橫雨，我都驚自己支結他淋濕架嘛，有你自己一個彈琴都夠啦。」安仔答話。

Wendy感到失望，然後問肥榮：「啲蠟燭、煙花，你都帶齊啦嘛？」

「梗係準備好曬啦。」肥榮打開背囊展示入面嘅物品。

「啲蠟燭呢？」Wendy摷一摷個背囊，發覺無蠟燭。

「咦係喎，唔通我帶漏左，一係我返屋企攞返。」

「你住到山卡拉咁遠，一來一回有排喎，你唔係要我地憨居居咁等你下話？」安仔話。

「咁點算？」

「唉算啦，入到西貢先睇下有得買。」Wendy十分無奈，估唔到呢兩條友咁靠唔住，早知就唔揾佢兩個幫手。

入到西貢，雨勢又再細返啲。

佢地揾下有無蠟燭賣，結果有係有，但就係嗰啲元寶蠟燭嗰種蠟燭。

今次真係吹脹，砌呢啲蠟燭寧願唔要算。

見啲雨越嚟越細，佢地就嚟到一個西貢小沙灘。

無左蠟燭，又無樂隊伴奏，家下就得返煙花同部琴，仲有一扎玫瑰花。

「…咁到時我唱完歌，就會拎扎花送俾阿康，同佢表白，咁你地就喺隔籬放煙花，o唔ok？」Wendy向佢地解釋一次。

「梗係OK。」二人話無問題。

跟住肥榮從背囊，拎啲煙花出嚟睇下，發覺全部濕曬：「大獲，啲煙花濕曬。」

「唔係呀嘛？」Wendy行過去一望，肥榮背囊嘅煙花真係淋濕曬，「乾左應該仲點得著架嘛？」

「唔清楚喎。」

「如果連煙花都無埋，我兩個咪無嘢做，咁嗰一萬蚊係咪都照俾架？」安仔問Wendy。

「放心啦，我應承得就肯定俾架啦。」

「哈哈，咁就好啦。」

「時間差唔多，我要出返市區同阿康會合，我將扎花同部琴俾你兩個保管住，唔該你地唔好再有咩差錯。」

Wendy吩咐完，就行返出西貢市集，準備搭車。

沿途竟然遇到佢個有錢仔上司。

「Hi Wendy，點解咁啱嘅，你嚟西貢做咩呀？」有錢仔上司上前打招呼。

「無，約左朋友入嚟食飯。」Wendy求其作啲嘢敷衍對方。

「咁你知唔知我喺度做咩？」

Wendy無興趣知道佢啲嘢，禮貌上問一問：「都係過嚟食飯？」

「唔係，我約左幾個friend喺船度練嘢。」有錢仔上司身後有一隻遊艇。

「哦原來係咁，係啦唔好意思，因為我趕時間，我地得閒再傾過啦。」

「唔好走住，既然咁有緣，咁唔好擇日不如撞日，你上嚟遊艇我俾啲嘢你睇下。」有錢仔上司無端端拉左Wendy上船。

Wendy無端白事夾硬俾人拉左上遊艇，上到船佢見到入面裝飾得好靚，又鮮花又燈飾又有氣球，而且仲有班拉提琴嘅樂手。

呢個有錢仔琴日聽完阿康講嘅嘢，立即就揾左班玩開音樂嘅朋友，練左首John Legend嘅歌，仲將隻遊艇佈置得美輪美奐，打算準備好曬就約Wendy出嚟示愛。

不過佢無諗到呢日會喺西貢撞到Wendy，所以乾脆就即場將呢個驚喜送俾對方。

「咳咳—」有錢仔拎起咪，對住Wendy開聲獻唱John Legend嘅首本名曲 All of me。

Wendy唔知對方搞邊科，淨係聽到成隊band演奏得非常好，於是叫停問：「你可唔可以借你隊band嚟用下？」

「下？」有錢仔一臉疑惑。

「我想借你班樂手朋友一用，仲有你啲花同燈飾，同埋請問你呢度有無蠟燭架？」Wendy一輪嘴咁問。

「你要呢啲嘢嚟做咩？」有錢仔問。

「唔夠時間解釋咁多，你可唔可以借嚟洗下呀？」Wendy焦急追問。

「Er…我諗都得嘅…」

Wendy聽見對方應承，隨即就打電話叫安仔同肥榮過嚟，帶啲樂手同搬啲嘢過沙灘。

有錢仔一開頭唔知咩事，到後來先知，原來Wendy係要呢啲嘢嚟同阿康表白。

Wendy坐車返到彩虹站，同阿康會合。

「唔好意思我遲左，你等左好耐呀？」Wendy見到面，好自然咁翹住阿康。

「唔係，一陣啫。」呢個五年前嘅阿康俾Wendy咁樣挨一挨，塊面當堂紅曬。

Wendy一時之間無為意，眼前呢個係未同自己拍拖嘅阿康。

對方好似俾自己咁主動嘅舉動嚇親，佢就縮一縮手，保持返一啲矜持。

「係啦，琴日唔好意思呀，我本來約左你入西貢，我都唔知點解自己無端端放你飛機。」阿康臉上帶著一點腼腆。

「唔緊要，我都完全無放上心。」

「哈，係就好啦，咁我地依家入去西貢做咩呀？」阿康問。

「去到你咪知囉。」

個天已經停曬雨，二人入到西貢，時間差唔多七點。

Wendy先同阿康行下，等佢收到肥榮同安仔嘅message，話砌好嗰啲蠟燭，佢就會帶對方過去沙灘。

然而時間慢慢逼近，Wendy內心開始焦躁不安，心諗肥榮同安仔點解仲未搞掂。

「你肚唔肚餓？我地洗唔洗食啲嘢？」阿康問。

「唔洗，我唔係好肚餓。」

「咁我地，有咩做呀？」

Wendy唔知點解釋，好彩留意到對方兩隻手指紅曬咁，就乘機轉移話題：「點解你嗰兩隻手指紅曬，仲起曬泡嘅？」

「呢個我都唔知，我一訓醒就咁啦。」

Wendy推斷應該係穿越嘅阿康，特登整傷啲手指，唔俾原本嘅阿康自彈自唱表白。

佢當堂感到慶幸自己有穿越返嚟，如果原本嘅阿康真係因為手指傷左而放棄表白，咁佢地兩個嘅故事就會變得唔截然不同。

只係佢得返好少時間，再拖落去，恐怕嚟唔切表白。

「滋滋—」手機突然傳來震動。

Wendy打開一睇，見到安仔二人終於搞掂啲嘢。

依家已經係七點半，仲有半個鐘佢就要被送返現實，所以佢要抓緊時間帶阿康到沙灘。

「阿康，行快啲。」Wendy加緊腳步。

緊隨其後嘅阿康唔知對方搞邊科，直到去到沙灘，見到用蠟燭砌好嘅「I LOVE U」字樣，旁邊仲伴著一啲燈飾。

「Wendy，你…」

「Shh—」Wendy叫阿康唔好出聲住，然後帶佢行落沙灘。

佢自己埋到岸邊，附近放電子琴嘅位置，喺佢身後係嘅幾個，從有錢仔上司借返嚟嘅樂手。

佢將手放到琴上，先開始彈奏，同時開口吟唱，其他樂手順住樂章旋律，慢慢配合演奏。

「♪Loves all of you Love your curves and all your edges
All your perfect imperfections
Give your all to me I'll give my all to you」

Wendy佢一邊唱，腦海一邊諗返呢五年嚟，同阿康一齊經歷過嘅好多事情，當中有喜有樂，然而不論係開心定係唔開心，嗰啲統統都係寶貴嘅回憶。

佢唔捨得呢啲回憶，更唔捨得阿康，唱下唱下，一時感慨，眼角就忍唔住流出淚水。

至於阿康，呢一刻個心徹底被融化，完全無諗過對方會咁主動同自己表白。

佢面紅耳赤，個心仲瘋狂咁怦怦咁跳。

Wendy唱完成首歌，跟手送上鮮艷嘅鮮花。

一般都係男仔送花俾女仔，好少話女仔送花俾男仔，因此收到花嘅阿康為之動容。

「阿康，你可唔可以做我男朋友？」

阿康猛咁「up」頭，諗都唔諗就答應。

呢個時候，煙花出場。

安仔同肥榮後尾發現原來有幾支煙花無淋濕到，仲可以點著嚟用。

佢兩個總算有返啲貢獻。

喺漆黑嘅夜空，漫天煙火之下，Wendy緊抱住阿康，將個頭伏喺對方嘅胸膛上。

「阿康，你可唔可以應承我，以後都要同我喺埋一齊，有咩事都好，都唔好拋低我？」

「當然可以，我應承你，就算以後風吹雨打，天打雷劈，我都唔會dum低你。」

雖然Wendy知道五年後嘅阿康都係會dum低自己，但聽到呢句說話時，佢仍然感到好窩心。

與此同時，佢暗地裡已經下定決心，無論點自己都要同阿康一齊，永遠都唔分開。

係咪兄妹都好，佢都唔理咁多，佢係要同對方結婚，就算個天想阻都唔會阻得到。

pish啊

唔知完故前上唔上到20個likes

再pish啊
其實個故係咪已經到咗中後段

大家一齊推

live咗
好好睇，有少少鬥智feel

有啦

係呀，今個禮拜內應該完到

一覺訓醒就見到過左20 likes多謝大家支持

還好，個人覺得穿左橋，後面唔夠dramatic

早知收埋唔講

腦閉塞，休息一日，聽日再出

pish

穿越時間已結束，Wendy嘅意識由甜蜜嘅告白回到結婚現場。

Paula亦都幫佢化好妝：「搞掂啦，靚靚終於新娘出爐，哈哈！」

有人話過，女人喺結婚嗰一刻係最靚嘅，呢一刻身穿白紗，化好曬妝嘅Wendy，望上去的確明艷動人，全身散發著光彩。

只但係一個婚禮，新娘再靚都好，無左個新郎嘅話，都係毫無意義。

事實上，慧姨之前講得嘅其實無錯，近親通婚喺香港係唔合法嘅。

因此，為左掩飾自己同阿康嘅真正關係，Wendy拎起本日記，把心一橫，撕爛佢。

連埋佢阿媽同阿康老豆嘅合照都一齊撕碎。

「Wendy，做咩無端端撕爛左本簿呀？」Paula睇到對方呢個舉動，不明所以。

「無，本嘢又殘又舊又無用，咁咪撕爛佢囉，係啦，Paula，既然都化好妝，不如你出一出去先。」

「哦…好啦，你有咩搞都好，都唔好搞咁耐，睇住時間。」

Paula走左之後，Wendy繼續搣，繼續撕。

一本完整嘅日記，眨下眼就被撕成一堆紙屑。

無左呢本嘢，咁呢個世界除左佢、阿康同慧姨，就唔會再有第四個人知佢同阿康嘅事，唔會有其他人出嚟阻止佢地呢頭婚事，或者報串報警拉佢地。

第一步完成左，第二步佢就要同阿康當面講清楚。

佢推開門，想過隔籬房，剛踏出一步，周圍突然又變得全黑。

「喂你要去邊呀？」Mary出現身後。

「我要同阿康講清楚，我要話佢聽，我地唔可以就咁而分開。」

「遲左啦，佢間房已經時間停止左，你依家入唔到去。」

「即係佢仲要穿越？咁佢要返去邊一日？」Wendy收返踏出嘅腳步，轉身問Mary。

「我無聽錯嘅話，你未婚夫應該係想返去你地相識嗰一日。」

「既然係咁，咁我都返去嗰一日，無論係現在定還是過去，有啲嘢我一定親口同佢講。」

「拿，咪話我唔提你，你一旦『自爆』，穿越就好有機會即時失效，到時你就會被送返現實。」

「到呢個時候，我諗我都無得再隱瞞，至少要俾佢知道我已經睇左日記。」

「哦，咁好啦，你鐘意點就點啦。」

Wendy唔想再同阿康拖拉，亦唔想再同對方玩嗰啲「你分手，我箍煲」嘅遊戲，今次返到過去，佢要同對方一齊坐低講請講楚。

佢吸一啖大氣，收拾心情，然後指住前方大嗌：

「哈利路亞 Mary Chance！」

二零一五年，七月二十一日。

呢一日就係佢地相識前嘅一日。

緣分呢樣嘢好奇妙，喺呢一日，佢地兩個生活喺各自嘅世界，互不相識，而一日後，佢地將會相遇，變成朋友，進入彼此嘅世界，再慢慢發展成戀人。

可惜嘅係，並唔係每一段緣份，都能開花結果。

有啲關係只能去到朋友為止，有啲能夠成為情侶但結唔成夫妻，有啲甚至只係一面之緣。

難得佢兩個能成為情侶，仲去到結婚呢一個階段，咁就更加要好好珍惜，唔能夠俾自己眼白白，望住一段本來握喺手心嘅緣份流逝同消失。

好峰迴路轉

一穿越返到嚟，佢即刻就打電話俾阿康。

「嘟…對唔住，你所打的電話未有登記…」

聽到呢個錄音，Wendy先醒起，阿康識佢之前係用緊另一個電話號碼，係識左之後無幾耐對方先轉左新號碼。

咁今次就大獲，佢完全諗唔起之前嗰一個電話號碼。

佢試打左幾次，撞左幾次都撞唔啱，就只能打去揾阿康兩個friend，安仔同肥榮。

結果佢地一個電話無人聽，一個以為係廣告電話，聽左幾秒就收左線。

眼見打電話揾唔到人，心急嘅佢乾脆直接揾上門，橫掂阿康嘅地址一直無變，肯定揾得到。

佢拿拿臨飛的去到阿康屋企。

「叮噹—」

阿康嘅阿媽打開門，見到門口企左個陌生女子，問：「請問你揾邊位？」

「Auntie，阿康佢喺唔喺度？」

「你係邊位呀，揾阿康咩事？」

「我叫Wendy，係阿康嘅朋友，我有啲事想揾佢。」

「阿康啱啱出左去喎，你想揾佢不如打佢電話。」阿康阿媽話。

「Auntie，我無佢電話號碼，你可唔可話我聽？」Wendy問。

「下？你又話你係阿康嘅朋友，點解會無佢電話？唔對路喎，你唔會係嗰啲傳銷公司派嚟呃錢架下話？」

「Er...呢件事有啲難解釋，不如係咁啦，你俾我入嚟坐，我等佢返嚟。」

阿康阿媽猶豫左幾秒，選擇拒絕：「唔好啦，你要等就係門口等啦，我又唔識你，我唔想『立亂』開門俾陌生人。」

「Auntie，你聽我講…」

「砰！」佢未講完，阿康阿媽就關上左大門。

Wendy感到無奈，只好踎喺門口，等阿康返嚟。

等左大半個鐘，阿康就未等到，反而遇著兩個巡樓嘅保安。

保安見到有個生保人，企人地個門口唔知做咩，驚係有啲咩不軌企圖，於是上前就趕走左Wendy。

無奈之下，Wendy只能由門口企到大廈樓下等待。

夏天嘅夜晚又悶又熱，佢一個人由十點半等到十二點幾，仲未等到阿康返嚟。

而呢個時候，突然遠處有把女人聲大嗌，嗌得非常淒厲。

好奇又好心嘅佢行去睇下，見到一個大肚婆喺條街度嗌肚痛。

佢衝上前扶住對方，再揾個地方坐低：「你見點？洗唔洗同你call白車？」

「我個肚好…」個大肚婆痛到講唔到嘢。

Wendy見到對方咁痛苦，唔理咁多，第一時間打電話call白車。

大約五分鐘後，救護車就嚟到，將大肚婆送去醫院。

做完一件好事，佢再返去等阿康，又再等左成粒鐘，仍然都係等唔到人。

佢想上單位再敲多次門，但樓下嘅保安認得佢，唔俾佢再上去。

最後，佢傻更更等到三點幾，因為太眼訓頂唔順，加上天氣熱又多蚊，唯有選擇打道回府，等到第二日訓醒，先上阿康公司揾人。

轉入大直路入結局

加速

今日係咁多，聽日繼續

pish

推