《「失」婚大作戰》

Lm

新讀者留名

細細個好鍾意聽你個名唱既歌

LM

「點呀？今次想穿越返去邊一日？」Jacob問。

「仲嚟？已經衰左兩次啦喎。」

「有左上兩次經驗，呢次一定掂啦，更何況上次你都差啲成功，同埋你都無得揀啦，喺婚禮上飛起新娘，好無陰功架嘛。」

「但係兩次都唔成功…」

「♪過去你太放任，放棄愛與責任，披起婚紗我帶著傷感—」Jacob無啦啦又喺度唱歌，都唔知攞景定贈慶。

「♪穿起傷心婚紗，記掛說過愛我的你…」

「唔好唱啦，都唔知你唱乜，唱到我心都煩埋。」

「梅艷芳嘅《黑色婚紗》呀嘛，係就係冷門啲，不過就好啱Wendy聽，等你走左之後，我真係要推薦俾佢聽下。」

（我後來有專登去查過呢首歌，原來Jacob唱嘅前半句係梅艷芳嘅《傷心教堂》，後半句先係《黑色婚紗》，條友傻下傻下將兩首歌歌詞合埋一齊唱，雖然駁埋聽落都幾夾。）

Jacob繼續加鹽加醋：「眾目睽睽下喺婚禮上被人飛，呢個婚禮一定好難忘，我估Wendy呢世都唔會唔記得，從此心入面永遠有一道痛苦既疤痕。唉，♪穿起傷心婚紗…」

「好啦好啦，聽你講埋咁次，我可以再穿越多次，咁你有無能力將我帶返四年半前嘅東京？」

Jacob充滿自信咁點一點頭：「當然無問題，咁你要邊一日？」

我翻閱IG，碌左一陣，揾到一張喺日本東京影嘅櫻花相，同時睇到嗰張扭耳仔發誓，唔再玩牛熊證嘅相都仲喺度，只係上載時間唔同左。

我果然係我，果然唔會令Wendy失望。

講返呢張櫻花相，係我同Wendy拍拖半年嗰陣去東京旅行影嘅。

我相信唔少人都有旅行嗌交嗌到分手嘅經驗。

旅行係一段感情嘅煉金石，旅途上兩人朝夕相對，喺一處陌生嘅地方會遇到各種事情，過程中就好容易產生摩擦或者意見分歧，一個唔小心隨時嗌大交。

而相中嘅東京之旅就係Wendy同我嘅第一次旅行，途中我地嘈左一獲勁嘅，幾乎分手咁滯。

計翻五年嚟，我同佢淨係嗌過兩次大交，一次係炒牛熊輸錢，另一次就係呢個東京之旅。

我揀呢個日子，理由係想Wendy喺討厭我嘅情況下同我分開，而且我地相識不足一年，感情唔算深厚，揀呢個時候分開都唔會太hurt。

唯一痛惜嘅係，隨後一齊嗰四年半嘅回憶同經歷都會統統消失，不復存在。

你問我捨唔捨得，我絕對唔捨得，只係我無得唔捨得，正如我好唔捨得Wendy，但都無得唔放手。

回過頭來再諗返嗰次旅行，就覺得當下嘈嘅嘢其實好濕碎，不外乎都係意見不合嗰類。

例如係我鐘意hea住玩，佢鐘意計劃好曬逐個地方趕行程，我想佢陪我秋葉原，佢就想我陪shopping買衫，又或者佢將酒店book錯左做民宿，我就帶錯路等等無傷大雅嘅事。

有樣嘢值得提一提，嗰次旅行我以為有得搞嘢，無估到佢係一個好虔誠嘅基督徒，連掂都唔俾掂，個心暗啞底有啲唔爽（家陣諗返就係另一種感覺），因而對我嘅情緒可能都有些少影響。

至於鬧交嘅導火線亦係一件好普通、好普通嘅事，就係佢電話無電，問我借「尿袋」。

咁啱我用緊嚟叉電，就話唔借俾佢用，佢向我呻左兩句，我又多口駁左幾句，之後漸漸演變成嗌交，彼此都藉機將積壓喺心目中嘅不滿同怨言，一次過發洩出嚟。

鬧到大家都講到要分手，要從此一拍兩散咁滯，直頭我兩個分開左半日，各自各旅行。

後尾唔知係咪緣分所致，我地喺某個河畔，於櫻花樹下重遇。

雙方都好似心有靈犀咁，朝早分開左，到黃昏卻又不約而同，嚟到同一個地方睇櫻花。

就喺櫻花飄絮嘅環境下，我地雙方冰釋前嫌，好快就下左啖氣，之後揾個地方坐低，平心靜氣，用對話同溝通解決左分歧。

其實，拍拖嘅嘢不外乎就係你遷就下我，我遷就下你，同埋平時就唔好將啲嘢積積埋埋，有不滿就直接講出嚟，最好一齊傾一齊去改，呢啲都係我兩個喺嗰次旅行中所領悟嘅相處之道。

IG嘅呢幅櫻花相就係紀念我地嘅和好如初。

然而，再返去一次嘅話，我會選擇直接坐飛機返香港，唔會再出現櫻花樹下嘅和解。

「哈利路亞 Jacob CHANCE！」

一句口號，又將我時光倒流，返到四年半前。

「呼~」

一陣涼風吹過，我不禁打左個冷震。

「…你賴我帶錯路，搞到去錯地方曬時間，你夠book錯酒店啦，有口話…」

上一刻過去嘅我講緊呢句說話，下一刻穿越嘅我反應唔過嚟，接唔到話，搞到成句說話斷開左。

再望一望四周，發現自己正身處喺一條好乾淨嘅街道，周邊嘅建築物起得好矮，而附近店鋪門牌都寫住日文。

我手上就拎電話連「尿袋」，Wendy企喺面前，個樣嬲爆爆，呢個正正就喺我兩個喺東京嗌大交嘅情景。

就係好衰唔衰，喺正我地鬧緊交嘅時候穿越返黎，我都唔記得左上一句鬧緊咩，唔知點接下一句。

Wendy無出聲，淨係谷住道氣睥住我。

我努力回想，諗左一陣先好唔容易，諗到返一啲當時講過嘅說話。

「既然你怨我帶錯路，咁叻你就拎張地圖自己搵啦，我依家就去秋葉原，你去你嘅六本木，大家分開行咁咪唔洗拗囉！」

Wendy靜左幾秒先出聲：「咁…咁即係算點？」

「咪散band囉，我地好明顯就夾唔嚟，你由照到晚趕行程，但plan之前又無征詢下我嘅意見，喂大佬呀，朝早未夠七點就起身，去旅行仲慘過返工，我想睇figure姐，你又話香港都有得睇，你啲女人嘢香港夠有得賣啦，洗鬼專程嚟日本買咩！多餘！」

「我…」

「唔好再講啦，我都唔想再拗落去，我同你其實根本都唔啱channel，一個天一個地，一個無線一個亞視，你頂我唔順，我又頂你唔順，總之呢，以後大家各行各路，一拍兩散，返到香港都唔好再見啦，係咁先。」

講完呢句，我就即刻出馬路截的士，心諗講得咁清楚，應該能夠同Wendy撇清關係。

對佢嚟講，呢次旅行認清左我呢個人，損失嘅只係一段半年嘅感情，估計都唔會太傷，而我就唔同，我無左嘅係一段五年嘅感情。

的士司機車我去機場，我準備搭飛機返香港，跟手就轉埋電話號碼，到時Wendy見我電話點打都打唔通，大概便會意會到我地關係已完。

嚟到機場，我諗住買最早嗰班機，卻發現自己遺忘左一樣好重要嘅野，就係passport。

頂…本護照放左喺酒店，竟然咁都會唔記得左。

我拿拿臨返轉頭，坐的士返酒店，偏偏就遇上大塞車，由下午一點塞到差唔多五點先到酒店。

搭車沿途經過附近一條街，我居然見到Wendy同一個陌生男子喺勾搭傾計。

我無睇錯呀嘛，只係分開左短短幾粒鐘，對方竟然咁快就背住我溝仔？

最衰我喺架車度聽唔到佢地up乜，分唔到條仔係遊客定係本地人。

話就話呢個階段我地只係拍左半年拖，感情未算好深厚，但都唔洗咁快搵過件架。

我心裡有點不是滋味。

返到酒店房後，我搵到本passport，跟住再將少部份無執走嘅衫褲一次過收拾好。

執嘢嗰陣，不時都「裝」下門口，諗緊Wendy會唔會帶條仔返酒店。

咁啱就呢個時候Wendy打開門，撞正我喺度：「阿康，原來你返左嚟酒店。」

「啱先同你一齊嗰個男人係咩人嚟？」我直截了當就問。

「邊個男人？」

「我見到你喺附近條街同一個男人傾密計，條友日本仔嚟架？佢唔會跟埋返酒店呀嘛？」我睄一睄佢身後。

「哦~你講緊啱先嗰男人，係呀，個男仔係日本人嚟架，我…」

Wendy未講完，我就搶先講：「咁快識到新仔，幾好呀。」

呢句說話一半係反話，一半係真心話。

一方面為佢咁快就去識新仔而不爽，另一方面又為佢對我地呢段關係釋懷而安心，總之心情極度矛盾。

「你誤會啦，頭先嗰個日本人只係…」Wendy想解釋，卻又被我打斷。

「我返嚟係執返啲嘢走，依家執好曬，無乜嘢我走先。」我叫自己唔好多管閒事，唔好理對方嘅嘢。

我攞住護照，孭上行裝，Wendy叫停我，而我無理會，快步離開房間。

落到樓下，上左的士，我就叫司機車返我去機場。

沿路上我又忍唔住諗起Wendy識日本仔嘅事。

頂，啲日本仔出曬名鹹濕架嘛，Wendy點會睇上佢地？

仲要分開左一日都無就周圍識仔，就算係識都唔好識架仔啦。

真係越諗越唔對路，日本咁多癡漢，萬一條日本仔好似AV咁，落藥迷姦守身如玉嘅Wendy，咁仲得了？

唔得，我唔可以俾個淫賤日本仔搞Wendy。

我又改變主意，叫司機返轉頭。

一落車就見到Wendy自己一個行出嚟酒店，心諗唔通Wendy約左日本仔出街？

我偷偷地尾隨其後，睇下佢去邊。

佢先去到一間七仔買左啲嘢，然後就繞過幾條街，左兜右兜最後嚟到一間居酒
屋。

莫非佢就係約左個日本仔喺呢度食晚飯？

我想入去𥄫一𥄫，但又驚會俾佢發現，於是選擇留喺出面，等到佢兩個出嚟。

「呼~」

一陣風吹過，東京嘅春天日夜溫差大。日頭仲暖暖地，到夜晚就好鬼凍，家下啲風吹埋嚟直頭即刻起雞皮。

冷風呼呼吹，我獨自一人企喺居酒屋對面嘅街口等待。

唉…

我都唔知自己喺度做緊乜，穿越之前明明度好曬，一分手就搭飛機返香港，直接同Wendy嚟個了斷，家下又瀨死唔肯走，仲好似做賊咁鬼鬼鼠鼠喺度跟蹤人。

其實，分左手對方揾邊個、溝邊條仔都唔關自己事，何必咁耿耿於懷？

講到底，自己根本無想象中咁灑脫，未能做到話放低就放得低。

但係呢個世界咁多男人，無理由要揀條日本仔架，佢明知啲日本仔又鹹濕又大男人又變態，寧願佢喺度識返個香港人，同聲同氣咁仲好。

「滴噠—滴噠—」

突然間，個天落起大雨。

我無遮喺身，俾啲雨淋到個身濕曬，俾逼跑到居酒屋斜對面，一條有瓦遮頭嘅街道嚟避雨。

「乞嚏！」

成個身濕曬，再俾啲風吹一吹，直頭凍到入心：「乞嚏!」

手錶上嘅時針一圈一圈轉動，Wendy入左居酒屋成兩粒幾鐘，我就係外面企足咁耐。

唔知係咪食風食得多，我feel自己暈暈地，個身不停打冷震，兼且狂打乞嚏。

我真係諗唔明，點解Wendy會同個剛相識嘅日本仔食飯食咁耐，而且佢又唔識日文，究竟食啲咩傾啲咩可以坐咁耐？

又過多左半粒鐘，Wendy終於從居酒屋行出嚟。

奇怪啦，點解得佢自己一個，隻日本仔呢？

Wendy腳步浮浮，似係飲大左，至於靜靜雞跟喺佢後面嘅我，都唔好得好多，我成個人都暈陀陀，企得都唔多穩。

我再用手摸一摸額頭，感覺有啲㷫，睇嚟喺頭先淋一淋雨，搞到攝親。

「你地係咩人？唔好行埋嚟，唔好掂我…」

突然，唔知從邊度嚟左幾條日本mk仔，佢地擋住條路唔俾Wendy行。

日本仔果然好鹹濕，AV啲情節真係無呃人。

班友對Wendy毛手毛腳，博懵又抽水，咁嘅情況下，我二話不說，衝上前護花。

可惜跑無幾步，都未嚟得切出手，眼中嘅世界忽然天旋地轉，我一下子企唔穩，「砰」一聲成個人仆左落地下。

幾秒後便眼前一黑，失去意識。

唔知過左幾耐，我先醒返，張開眼第一時間見到嘅就係Wendy。

「Wendy...你無嘢呀嘛...有無蝕底俾班架仔？」我個人瘟瘟沌沌，身體有啲發冷，。

「無事，好彩咁啱有巡邏嘅警察路過，佢地唔單止趕走班飛仔，仲幫我抬你返嚟酒店。」

Wendy倒左杯水俾我飲：「你知唔知你琴晚燒得好勁，好彩啲退燒藥有效，如果唔係就要call救護車送你去醫院。」

「多謝。」我坐返起身，接過水杯，飲一啖水。

見到對方無事，我都安樂返啲：「你無事就好啦，係啦，咁依家幾點呀？」

Wendy睇下時間，答話：「都差唔多十二點半啦。」

計翻時間，廿四個鐘即將要過去，咁就意味住今次嘅穿越分手任務，又一次失敗。

而呢次失敗係自己一手造成，衰在自己心軟。

「陣間你再食多兩粒退燒藥，好好休息下我諗就無事架啦，同埋你餓唔餓，洗唔洗食啲嘢？我可以落街買啲嘢俾你做lunch。」Wendy幫我將水杯放回到床頭。

「唔洗，我唔肚餓。」

之後我地兩個都靜左無出聲，佢望我一眼，我望佢一眼。

大家都好似都有啲嘢想講，但又唔知點開口咁。

隔左一陣，有一片櫻花，從窗口慢慢飄入嚟間房，落在地上。

我地不約而同望出窗外，之前一直都無留意，原來從民宿嘅窗口望去，會見到不遠處嘅小山丘上有一棵櫻花樹。

微風吹動，繁花飛舞。

Wendy拎住電話，拍攝嗰棵盛開嘅櫻花樹。

佢無開閃光燈，卻有一道閃光閃現面前。

穿越時間已到，我又要回到現實。

不出所料，我又再次返到嚟同一間教堂。

一切都係維持原狀，沒有改變。

如果一開波講我地係兄妹
就唔洗拖拖拉拉

主角怕講出黎，會對對方造成好大打擊，所以選擇左唔講

同埋一秒完故
加油樓主

「叩叩—」

喺呢個時候，有人敲門。

有兩個西裝骨骨嘅男人行入房。

佢地係我嘅老友兼婚禮伴郎，安仔同肥榮。

「婚禮就開始啦喂，新郎哥你心情如何，係咪好緊張？」肥榮著嘅係加大碼西裝，但望落去好似都唔太啱身。

「呢刻咩心情？」我苦澀一笑，無法言喻。

再看看手腕上嘅錶，時間顯示為九點五十分，仲有十分鐘個婚禮就要開始。

再唔走人嘅話，我就要同自己個妹成婚。

連續試左三次穿越都改變唔到事實，睇嚟我真係無得揀，只能喺婚禮上做衰人，拋棄新娘。

安仔見我神色慌張，就叫我放輕鬆：「阿康你唔洗咁慌失失喎，雖然第一次係緊張啲嘅。」

佢今日個頭落左好多髮蠟，gel到「臘臘令」。

而我都唔知點同佢地，解釋我呢刻嘅狀況，只能歎一口氣，無視二人，直接行出房間。

剛半隻腳踏出後台，就睄到百幾二百個嚟觀禮嘅賓客坐曬喺度。

咁嘅情況下，我想從正門離開應該係無可能。

我又調頭走返入間房問二人：「安仔、肥榮，你兩個知唔知呢間禮堂有無後門？」

「無端端做咩問埋禮堂有無後門？」安仔問。

「哈！莫非你中左嗰啲咩結婚恐懼症，家下想從後門走人，想做婚禮嘅逃兵？」肥榮講笑咁講。

「呢個時候我解釋唔到咁多，你地知唔知後門喺邊？」我心急追問。

「你無嘢呀嘛，神神化化咁？後門我就唔見有，不過走廊有個轉彎位，嗰度好似有條走火通...」

肥榮講到一半無端端停左落嚟，成個人突然間定左格咁，絲毫不動，就連身邊嘅安仔都一樣。

隨即，四周變得漆黑一片。

當白光照落我頭頂，教堂精靈Jacob亦隨之出現喺眼前。

「做咩扎恆馬咁，你唔係諗住走佬呀？」

「廢話，剩返兩個字個婚禮就開始，再唔走就嚟唔切。」

「你都睇到啦，成百幾二百人坐左喺出面，你唔係想咁多隻眼望住Wendy喺婚禮上，俾你呢個新郎哥拋棄呀嘛？」Jacob反問我。

「我知咁樣會令Wendy非常難堪，但都無辦法，你幫我穿越左三次但一啲效果都無，咁仲可以點？」我表示無奈。

「答案就係再穿越一次。」

「衰左三次仲嚟？」

「你試下認真諗下，你唔返去改變歷史嘅話，咁你同Wendy上床嘅事就將永遠變成事實。」

Jacob摷返我第一次穿越失敗，間接導致自己同Wendy上床嘅事出嚟講。

對此我係無言反駁。

跟住，Jacob清一清喉嚨，以為佢又想唱歌，點知今次玩吟詩作對：「顧城有一首詩係咁寫嘅，」

「你不願意種花
你說：『我不願看見它
一點點凋落』
是的
為了避免結束
你避免了一切開始」

「好心你有嘢就講，唔好又唱歌又吟詩，搞埋啲無謂嘢。」我有少少唔耐煩。

「一句講曬，你信我，今次我有信心你可以同Wendy撇清關係！」Jacob拍心口保證。

「咁你話我仲可以返去幾時同做啲咩？我就真係諗唔到啦。」

「學詩人顧城話齋，避免結束嘅最好方法就係避免開始，一段感情無論以咩形式結束，對雙方都係會造成傷害，而防止受傷嘅方法就係唔好開始。」

我無出聲，俾對方繼續講。

「呢一次，我提議你返去你同Wendy表白嘅嗰一日。」

「表白嗰日？」

「無錯！知唔知點解分手會咁痛？」

「因為大家相愛…」我都未講完就俾佢搶左對白。

「係因為有愛！只有相愛過嘅人先會感覺痛，而且愛得越深，就傷得越痛。假設你一開始無表白，你兩個從來都無開始過呢段感情、亦無愛過對方，咁咪唔會心痛囉！你都唔洗再擔心分開會hurt到對方，甚至你兩兄妹結婚同上床呢兩壇嘢直頭唔會發生。」

雖然我唔明顧城嘅詩同Jacob所提議嘅方法，兩者間有咩直接關聯，但係佢講嘅嘢不無道理。

假若從不曾相愛，咁就唔會為離別而心痛。

Wendy同我係兄妹，彼此有血緣關係，我地喺埋一齊本身就係一個錯誤，呢段關係註定無法修成正果。

既然如此，由最初唔開始呢段感情，或者係對我地最好嘅選擇。

但同時都意味住，我將會連嗰半年嘅回憶都無埋。

所有嘢都會如粉筆字般，統統被抹走。

留名

兩個櫻花畫面都好靚

「點呀？呢個提議你覺得點？」

「嗯…你仲有無更好嘅提議？」我有點猶豫。

「無啦，我諗到最好方法就得呢個。」

最終苦無對策嘅我選擇信多一次Jacob，採用左佢嗰建議。

我打開IG，俾五年前表白成功嘅照片對方睇。

「哇，你表白都幾大陣仗下喎，又喺沙灘砌蠟燭，又放煙花，又送大扎玫瑰，仲揸住結他自彈自唱，都幾有心思喎。」Jacob一邊睇相一邊讚歎。

「係呀，當時真係花左唔少心機架。」

「咁你自彈自唱，彈左邊首歌？」

「John Legend嘅All of me。」

「呢首歌幾難唱架喎。」

「係呀，嗰陣我都練左好耐，不過今次再返去，睇嚟可以慳返唔洗練。」我苦澀笑一笑，心裡泛起一陣哀傷。

「唔好諗呢啲嘢啦，收拾心情準備返去五年前啦。」Jacob將電話遞返過嚟。

我再望一望電話屏幕上昔日表白嘅照片，想趁呢啲珍貴嘅畫面徹底消失前再睇多幾眼。

之後，一句「哈利路亞 Jacob CHANCE」，一道奪目強光，又再將我帶回到過去。

同對上三次穿越一樣，我返到事件發生前嘅二十四小時。

此刻嘅我背後孭住一把結他，搭緊lift，上緊安仔嘅屋企。

呢日我應該係收工約左對方陪我練結他。

首All of me其實就係安仔教我彈同唱嘅，我諗住喺表白前一日作最後衝刺，上去佢到再加強一下練習。

雖然依家已經唔需要呢啲嘢，不過都一場嚟到，無理由調頭走放人飛機。

於是我照上去對方屋企。

「你彈唱一次嚟聽下先，我睇下你彈成點，再幫你執執。」安仔點起香煙，手上拎住自己支結他，與我並排而坐。

我隨手放低支結他：「我唔練啦，你都收返埋支結他，我地落街食打冷。」

「唔練？你聽日唔係要自彈自唱表白咩？」

「我決定放棄，聽日唔去表白。」

「放棄？真？」

「嗯，無錯。」我肯定地回答。

「哇，你終於諗通左啦？」

「係，我諗通左。」

「頂，話左架啦，人地Wendy樣靚身材正，你就甩皮甩骨又無銀，就算真係要揀都揀佢個有錢仔上司啦，我同肥榮一早就叫你放棄。」

安仔呼出煙圈，繼續講：「你之前都講過，佢個上司送左條幾皮野嘅Cartier頸鏈俾佢，你就得首John Legend，呢個年代啲女好q現實架，你估真係好似拍戲咁，靠誠意就溝到女咩，好彩依家放棄都未遲，總好過搞完場大龍鳳俾人reject，到時食檸檬都食到你面懵懵。」

佢所講嘅有錢仔上司，曾經係我追求Wendy時最大嘅競爭對手。

條友用銀彈攻勢，狂買禮物追求Wendy，我就靠愛同誠意打動。

結果係點，呢個就唔洗多講，我嘅愛同誠意當然擊敗左金錢同物質。

一直安仔同肥榮都睇死我唔得，成日叫我及早放棄，殊不知結果出人意料，令佢兩個大跌眼鏡，諗返起都覺得好笑。

可惜佢地個o嘴樣無得再睇多次。

「嗯，無錯，講得啱。」我點頭並附和安仔，跟住就話：「好啦夠啦，唔好講咁多，我嚟之前無食野，家下個肚咕咕聲，快一齊落街食嘢。」

「OKOK，食埋支煙就行。」

我搶走安仔手中嘅煙仔，一嘢用食指同拇指直接㩒熄煙頭。

強烈嘅灼熱感刺痛皮膚，兩隻手指當堂俾「辣」到紅曬。

「你傻左呀？咁樣用手熄支煙，因住『辣』到起泡。」安仔搶返支煙，掉落煙灰缸。

我心諗最好就起個大泡，咁到我走左之後，過去嘅我想彈結他都無得彈。

臨走前我順便將支結他送埋俾安仔，乾乾脆脆，乾手淨腳。

嚟到夜晚十點幾。

我地約埋肥榮出嚟一間小菜館食嘢。

「下阿康，你真係唔表白？係嘅話就太好啦，咁聽日我就唔洗山長水遠，入西貢幫你喺沙灘砌蠟燭，仲唔洗冒住犯法嘅風險幫你放煙花。」肥榮鬆一口氣。

「當初早啲放棄咪好囉，咁就唔洗曬心機練左大半個月結他。」安仔飲一啖啤酒。

「咪係囉，我兩個早就叫你放棄，你諗下條女咁多有錢仔排住隊溝，幾時輪到你？既然明知唔得，咁表白嚟都曬氣啦，啱唔啱先？」肥榮夾起面前嘅滷水鵝掌。

「拿，呢次呢，就全靠我同肥榮點醒左你，咁你先唔洗做傻仔表演『食檸檬』，所以呢餐飯你請啦。」安仔搭住我膊頭講。

「得得得，今餐我埋單，以答謝兩位兄弟一直以嚟嘅苦心相勸，咁你地都要應承我，假如以後我又睇唔開想去表白，到時你地務必一定要阻止我。」我倒酒給二人。

「無問題啦！」佢地大啖飲啤酒，並連聲說好。

「喂阿康，你突然做咩呆左唔出聲？」肥榮身上著住加大碼嘅西裝西褲。

「點…點解…點解我仲喺呢度…」我見到自己返到嚟同一間教堂。

「未訓醒呀你？婚禮都未開始，你梗係仲喺度。」 安仔個頭gel到「臘臘令」。

「無可能，我同Wendy都無表白過，我地點會結婚？」

「你係咪真係有結婚恐懼症，搞到個人精神錯亂？」安仔摸一摸我額頭。

「當時你地兩個都喺度架，我都無同Wendy表白，何來結婚？唔好話我聽，我返到現實後，你兩個無阻止我表白呀下？」我追問二人。

「講咩呀你？你都無表白，係Wendy同你表白呀嘛，你唔係真係得左咩結婚恐懼症，家下驚到失憶下話？」安仔對我講。

下？Wendy同我表白？？？

忽然間，腦袋感到一陣昏眩。

隨之，有一啲畫面湧現眼前。

我見到自己身處喺一個沙灘，周圍有蠟燭砌左「I LOVE U」字形，然後有煙花略過夜空，同埋樂隊嘅演奏。

喺呢個環境下，Wendy向我示愛。

安仔講得無錯，我無表白，係Wendy表嘅白。

點解Wendy會同我表白？

「噔—」四周漆黑，一盞白燈射落嚟。

「竟然咁都唔成功，真係可惜。」Jacob坐喺梳妝台前食緊雪糕。

「你嚟得啱啦，你又話阻止開始就可以阻止結束嘅，殊不知我仲喺度見到你條友，一切如常，咩都無變過，」

「咁事實唔開始就真係唔會有結束，只係無預到Wendy會咁主動，開口同你示愛，呢樣我都無計架。」

「咁點解Wendy會同我表白？」

「其實都唔出奇嘅，最大可能咪就係根本Wendy一直都暗戀緊你，見等唔到你表白，咁就自己主動開口表白。」Jacob「筆」一啖雪糕。

「你話Wendy一直都鐘意我，所以同我表白？」

「睇怕就係啦。」

Jacob呢個講法聽落都合乎邏輯嘅，照咁推斷，Wendy之前一直無接受有錢仔上司嘅追求，莫非都係因為鐘意我嘅緣故？

我同佢喺一齊之前，一路都有啲曖昧，可能佢就喺曖昧期間鐘意左我，一直等緊我開口示愛，最後見等無可等，就決定自己做主動。

只但係，佢表白嘅形式又會同我嘅咁相似？

「咁樣功虧一簣，都真係幾唔抵。」Jacob丟棄手上食完嘅雪糕杯。

「已經試左四次都唔得，你仲有無辦法？」我問。

「無啦，我連最後一招我俾埋你，依家無曬辦法啦。」

「唔係呀嘛，得返唔夠五分鐘個婚禮就要開始，我家下想逃婚都唔知嚟唔嚟唔切，呢個關頭你先話無曬計？」

「咁我以為唔表白呢招實掂架嘛，點知咁都衰左，我真係無『橋』啦，一係你自己幫自己諗下，睇下仲有無辦法？」

「我有辦法就唔洗問你啦。」

「好啦，等我食多杯雪糕，激發下靈感，再幫你度一度。」Jacob喺衫袋拎出一杯雪糕。

而我都嘗試回想過往一啲點滴，諗下仲有咩時間點值得返去。

我一邊回想，心裡竟然一邊暗自慶幸，慶幸嗰啲昔日嘅回憶仍然存於腦中，並無消失。

講到尾，我始終係唔捨得捨棄呢段感情。

唔捨得捨棄嗰啲充滿愛嘅回憶。

「有！我諗到計！」Jacob突然大嗌出聲。

「頂你，咁大聲作死咩，差啲耳仔都你俾整聾。」我又俾佢嚇左一跳。

「Sorry sorry，一時激動大聲左，但我已經諗到你要返去邊一日。」

「邊一日？」

「顧城嘅詩係咁寫嘅，你不願…」

「得啦得啦，唔洗再重複，快啲講啦。」

「你同Wendy嘅開始並唔係從表白嗰一日計，而係由你地相識嘅嗰一日。」

「相…相識嗰一日？」

睇到呢個位，我諗大家應該已經發現故事一個重要伏筆

推

冇發現到

應該係Mary走咗去幫Wendy回到過去 咁先至解釋到同樣嘅表白方式
唔知Wendy知道咗佢哋係親兄妹之後會點
不過都要驗咗DNA先準嘅

咁勁嘅
我仲一直喺度諗點解Mary唔返嚟同Jacob爭