話說今日着裙嘅鼠王芬,原本同象哥一齊企喺前排,其後由於建制派議員人多,唯有分成兩排影相。其間民建聯「元秋」蔣麗芸即隔空施展獅吼功,向企喺前排嘅梁美芬高喊:「踎啊,美芬!」梁美芬則不為所動,反嗌:「唔踎!」
被「美芬」遮住嘅象哥相當不滿,加入叫梁美芬踎底行列,但梁繼續企硬,並向象哥話:「你可以企前面㗎!我無阻你喎,你咪企前面囉!」象哥此時更加扯火,怒吼:「喂,妳係咪咁樣企啊?梁美芬!」梁美芬聽到後似乎相當不耐煩,一度用手踭叫象哥企前,此時象哥終於嬲到爆煲,出手大力扯梁美芬去較後位置,令梁美芬即時嚇到嗌咗出嚟,身邊嘅建制派議員睇到亦呆咗。
https://hk.appledaily.com/local/20200901/WSRBCQI6QBC6LPU64Q5ZR46Y54/